Ang mga Butang sang Akon Kalag
Ano ang mga butang ang inyo ginabinagbinag? Ano ang mga butang ang importante sa inyo? Ano ang mga butang sang inyo kalag?
Mga kauturan ko, samtang nagatindog ako liwat sa sining aton pinalangga nga Conference Center, ginpahanumdom ako sang mga pulong ni Apostoles Pedro: “Ginuo, maayo nga magpabilin kita diri.”1
Ang akon mga pamensaron sa karon nasentro sa mga pulong sang propetang si Nefi, nga nagtipig sang rekord sang iya katawhan pagkatapos nga mapatay ang Amay nga si Lehi. Si Nefi nagsulat, “Kag sa mga ini ginasulat ko ang mga butang sang akon kalag.”2
Sang una ginalabyan ko lang ining bersikulo, nga ginapensar ining tinaga nga things [mga butang] indi masyado ka elegante kag espirituhanon, indi talalupangdon nga iangot sa “akon kalag.” Apang akon natun-an nga ining tinaga nga mga butang gingamit sa balaan nga mga kasulatan 2,354 ka beses.3 Halimbawa, sa Moises: “Ako ang Ginsuguran kag ang Katapusan, ang Dios nga Makagagahum; gintuga ko ining mga butang.”4 Kag ang mga pulong ni Nefi: “Yari karon, ang akon kalag nagakalipay sa mga butang sang Ginuo; kag ang akon tagipusuon dalayon nga nagabinag-binag sa mga butang nga akon nakit-an kag nabatian.”5
Ang mga pulong ni Nefi nagapamangkot “Ano ang mga butang ang inyo ginabinagbinag?” “Ano ang mga butang ang importante sa inyo?” “Ano ang mga butang sang inyo kalag?”
Ang mga butang sang aton kalag masami nga ginaklaro kag ginapadalman paagi sa pagpamangkot.
Sa tion sang pandemya nakapakigkita ako sa mga lamharon sa bug-os nga kalibutan sa madamo nga devotional, dalagko kag magagmay, paagi sa mga broadcast kag social media, kag amon ginhambalan ang ila mga pamangkot.
Ang katorse-anyos nga si Joseph Smith may ara sing pamangkot sa kadadalman sang iya kalag, kag ginpamangkot niya ini sa Ginuo. Si Pangulong Russell M. Nelson nagdagmit: “Magpamangkot kamo sa Ginuo kag sa iban nga masaligan. Magtuon nga may handum nga magpati imbes nga nagalaum nga makakita sang mga diperensya sa kabuhi sang propeta ukon mga di-pagsinanto sa balaan nga mga kasulatan. Untati ang pagdugang sang inyo mga pagpangduhaduha sa pagsulit-sulit sang mga ini sa … mga nagaduhaduha. Tuguti ang Ginuo nga tuytuyan kamo sa inyo pagpanglakaton padulong sa espirituhanon nga pagtukib.”6
Ang mga lamharon masami nagapamangkot sa akon ano ang akon ginapatihan, kag ngaa nagapati ako.
Akon nadumduman nga nagbisita ako sing virtual sa puluy-an sang isa ka bataon nga babayi. Nagpamangkot ako kon ini ang una nga beses nga nakabisita ang isa ka Apostoles sa iya puluy-an. Madasig sia nga nagyuhom kag nagsabat “Huo.” Kanami sang iya pamangkot sa akon: “Ano ang pinakaimportante nga mga butang ang dapat ko mahibaloan?”
Nagsabat ako nga ang mga butang sang akon kalag, ang mga butang nga nagahanda sa akon nga makabati sang mga pagpabatyag, nagapaliso sang akon atensyon tuhoy sa espirituhanon nga mga butang, nga nagahatag sang katuyuan sa akon buluhaton sa ebanghelyo kag sa akon mismo kabuhi.
Puwede ko bala mapaambit sa inyo ang pila ka mga butang sang akon kalag? Ining mga butang magamit sang tanan nga nagatinguha nga mangin matuodtuod nga mga disipulo ni Jesucristo. Ang napulo maayo kag mahapos nga numero. Karon nga adlaw hatagan ko kamo sing pito nga nagapaabot nga inyo kompletohon ang ikawalo, ikasiyam, kag ikapulo halin sa inyo kaugalingon nga mga eksperiyensya.
Una, higugmaon ang Dios nga Amay kag si Jesucristo nga aton Manluluwas.
Si Jesus nagmando sang una nga kasugoan: “Higugmaa ang Ginuo nga imo Dios sa bug-os mong tagipusuon, kag sa bug-os mong kalag, kag sa bug-os mong hunahuna.”7
Si Pangulong Nelson nagpahayag sang iya debosyon sa Dios, nga aton Walay Katapusan nga Amay, kag sa Iya Anak nga si Jesucristo, sang gintawag sia sa paggiya sang Simbahan, nga nagasiling “Kilala ko Sila, palangga ko Sila, kag nagapangako nga alagaran Sila—kag kamo—sa tagsa ka ginhawa nga nabilin sa akon kabuhi.”8
Gani una, higugmaon ang Amay kag ang Anak.
Ikaduha, “Higugmaon ang imo isigkatawo.”9
Indi lang ini maayo nga ideya; ini ang ikaduha nga dakong sugo. Ang imo mga isigkatawo amo ang imo bana o asawa kag pamilya, mga miyembro sang ward, mga katrabaho, mga kaupod sa kwarto, sila nga mga indi mo karelihiyon, sila nga nagakinahanglan sang bulig, kag, sa prangka, ang tanan-tanan. Ang importansya sang “higugmaa ang imo isigkatawo” ginapahayag sa himno nga “Love One Another [Maghigugmaanay].”10
Si Pangulong Nelson nagapahanumdom sa aton, “Kon aton higugmaon ang Dios sa bug-os naton nga tagipusuon, pagalisuon Niya ang aton mga tagipusuon tuhoy sa kaayohan sang iban.”11
Ikatatlo, higugmaon ang imo kaugalingon.
Diri sini ginabudlayan ang madamo. Indi bala ini makalangkag nga ang higugmaon ang aton kaugalingon mas mabudlay sangsa higugmaon ang iban? Apang ang Ginuo nagsiling, “Higugmaa ang imo isigkatawo subong sa imo kaugalingon.”12 Iya ginapakamahal ang pagkadiosnon nga ara sa aton, kag gani kinahanglan amo man kita. Kon kita ginabudlayan kag ginabug-atan sang mga kasaypanan, mga sakit sing buot, mga balatyagon nga di-makasangkol, pagkadismaya, kaakig, ukon sala, ang gahum sang Pagbayad-Sala sang Manluluwas, paagi sa diosnon nga plano, ang isa sang mga butang nga nagabayaw sang aton kalag.
Ikaapat, tumanon ang mga kasuguan.
Ginklaro ini sang Ginuo: “Kon ginahigugma ninyo Ako, tumana ang akon mga kasugoan.”13 Magtinguha sa tagsa ka adlaw nga mangin mas maayo kag magdutdot pasulong sa pagkamatarong.
Ikalima, mangin takos pirme sa pagtambong sa templo.
Ginatawag ko ini pagkarekomendado sa Ginuo.” Makasulod man kamo sa templo ukon indi, ang pagkatakos para sa current temple recommend makapatutok sa inyo sing maayo sa mga butang nga importante, ang banas sang kasugtanan.
Ikaanom, mangin malipayon kag masinadyahon.
“Magkalipay kamo, kag indi magkahadlok,”14 nagsiling ang Ginuo. Ngaa? Paano kon ang mga hangkat sigesige nga nagaabot sa aton? Bangod sang promisa nga ginsaad ni Jesucristo: “Ako, nga Ginuo, kaupod ninyo, kag magapabilin sa tupad ninyo.”15
Si Panulong Nelson naglaragway sang ginpanumbalik nga ebanghelyo “bilang isa ka mensahe sang kalipay!”16 Kag sia nagapaathag, “Ang kalipay nga aton mabatyagan halos wala sing kalabtanan sa mga sirkumstansya sang aton mga kabuhi kag may dako kaayo nga kalabtanan sa ginatutokan sang aton mga kabuhi.”17
Ikapito, sundon ang buhi nga propeta sang Dios.
Mahimo nga ikapito ini sa akon lista sang mga butang, pero ini amo ang ara sa pinakaibabaw sang akon hunahuna suno sa iya sini importansya sa karon.
May ara kita sing propeta sang Dios sa duta sa karon! Indi pag-ibalewala ang kahulugan sini para sa imo. Panumduma ang pamatan-on nga babayi nga akon ginmitlang sang umpisa. Gusto niya mahibaloan ano ang mga butang nga labing importante. “Sunda ang buhi nga propeta,” siling ko sadto kag ginadagmit ko liwat karon.
Ginakilala kita bilang isa ka Simbahan nga ginagiyahan sang mga propeta, mga manugpanan-aw, kag mga manugpahayag sang rebelasyon nga gintawag sang Dios para sa sini nga panahon. Ginapromisa ko nga kon magpamati kag magsunod kamo sa ila mga laygay, indi gid kamo magtalang. Indi gid!
Nagakabuhi kita sa panahon nga sa diin “ginabolabola kag ginapalidpalid,”18 kita kon ginaatake ang aton espirituwalidad, pagkadesente, integridad, kag pagtahod. Kinahanglan naton maghimo sang mga pagpili. Yara sa aton ang tingog sang Ginuo paagi sa Iya propeta agud pakalmahon ang aton mga kahadlok kag pauswagon ang aton kaugalingon, kay kon si Pangulong Nelson nagahambal, nagahambal sia para sa Ginuo.
Ginbugayan kita sang mga balaan nga mga kasulatan nga ngapahanumdum sa aton, “Ang akon mga panghunahuna indi inyo mga panghunahuna, kag ang akon mga dalanon indi inyo mga dalanon, nagasiling ang Ginuo.”19
Amo man kay Naaman, pangulo sang kasoldadohan sang Siria, apang isa ka aroon, nga ginhambalan nga ang propetang Eliseo makapaayo sa iya. Ginpadala ni Eliseo ang iya mensahero agud hambalon si Naaman nga magpanghugas sing makapito ka beses sa Suba sang Jordan kag mangin matinlo sia. Si Naaman nangyaguta. Pat-od nga may mas dako pa nga suba sangsa Jordan, kag ngaa magpadala sang suluguon kon ginapaabot niya si Eliseo nga propeta nga personal nga mag-ayo sa iya? Si Naaman nagtalikod kag naglakat apang sang ulihi napalugpayan sang iya mga alagad: “Kon ang manalagna nagpangabay sa imo sa paghimo sing dakung butang, indi ka bala buot maghimo sini?”20 Sang ulihi naglusong man gid si Naaman sing pito ka beses sa suba sang Jordan kag nag-ayo.
Ang istorya ni Naaman nagapahanundum sa aton sang risgo sa pagpili lang sa laygay sang propeta nga nagasanto sa aton mga panghunahuna, mga ginapaabot ukon mga talaksan [norms] sa karon. Ang aton propeta padayon nga nagapahanumdum sa aton sa aton kaugalingon nga mga Suba sang Jordan agud mag-ayo.
Ang pinakaimportante nga mga pulong nga aton pamatian, binagbinagon, kag sundon amo ang mga ginpahayag paagi sa aton buhi nga propeta. Akon ginasaksi nga nakapungko ako sa pagpakigsugilanon upod kay Pangulong Nelson agud hambalan ang importante nga mga bagay sang Simbahan kag sang kalibutan, kag akon nakita ang mga rebelasyon nga nagaagay paagi sa iya. Kilala niya ang Ginuo, nahibaloan niya ang Iya mga dalanon, kag iya ginahandum nga ang tanan nga anak sang Dios magapamati sa Iya, sa Ginuong Jesucristo.
Sa madamo nga tinuig nakapamati kita sa propeta makaduha ka beses sa kada tuig sa tion sang pangkabilogan nga komperensya. Apang tungod sang mga komplikado nga mga problema sa aton panahon, si Pangulong Nelson nagahambal sing masami sa mga forum,21 social media,22 mga devotional,23 kag bisan sa mga press briefing.24 Akon sia napanilagan nga nagahanda kag nagapresentar sang dalagko nga pagpahayag sang mga mensahe nga nagapalig-on sing dugang nga kapasalamatan, nagasakdag sang paglakip sang tanan naton nga kauturan sa duta, kag nagadugang sing paghidaet, pag-asa, kalipay, ikaayong-lawas, kag pag-ayo sa aton indibidwal nga mga kabuhi.
Si Pangulong Nelson isa ka maalam nga manughambal, apang ang labing importante, isa sia ka propeta sang Dios. Makahalawhaw ini kon imo ini hunahunaon, apang kinahanglan nga aton marealisar nga ang iya maathag nga direksyon magasagang sa aton gikan sa mga pagpangdaya, pagkamalalangon, kag sekular nga mga pamaagi nga nagapangibabaw sa kalibutan sa karon.25
Ang gahum kag awtoridad sang propeta nahanungod sa rebelasyon. “Ang Pagpanumbalik sang Kabug-osan sang Ebanghelyo ni Jesucristo: Ika-duha ka Gatos ka Tuig nga Anibersaryo nga Proklamasyon sa Kalibutan,” nga ginhatag sa Abril 2020 nga pangkabilogan nga komperensya, nagadagmit nga ang Ginuo amo ang nagadumala sining buluhaton. Sa sini nga proklamasyon, ang Unang Panguluhan kag Korum sang Dose ka Apostoles nagasiling: “Malipayon namon nga ginapahayag nga ang ginpromisa nga Pagpanumbalik nagapasulong paagi sa padayon nga rebelasyon. Ang duta indi na mangin pareho sadto, bangud kay ang Dios ‘magatingub sang tanan nga butang kay Cristo’ (Mga Taga-Efeso 1:10).”26
“Ang tanan nga butang kay Cristo”27 kag “ang mga butang sang akon kalag”28 amo ang ginapasulabi sining Simbahan, sining ebanghelyo, kag sining katawhan.
Nagatakop ako nga nagaagda sa tagsa sa inyo nga binagbinagon ang pito ka “mga butang sang akon kalag” nga akon ginpaambit sa inyo: higugmaon ang Dios nga Amay kag si Jesucristo nga aton Manluluwas; higugmaon ang isigkatawo; higugmaon ang kaugalingon; tumanon ang mga kasugoan; mangin takos pirme para sa isa ka temple recommend; mangin malipayon kag masinadyahon; kag sundon ang buhi nga propeta sang Dios. Ginaagda ko kamo nga tamdon ang inyo ika-walo, ika-siyam, kag ika-pulo. Pamensara ang mga paagi nga mapaambit ang inyo tinagipusuon nga “mga butang” sa iban kag mapaisog sila sa pagpangamuyo, pagbinagbinag, kag sa pagpangayo sang paggiya sang Ginuo.
Ang mga butang sang akon kalag malahalon para sa akon kag ang inyo amo man para sa inyo. Ining mga butang nagapabaskog sang aton pagserbisyo sa Simabahan kag sa tanan nga aspeto sang kabuhi. Ang mga ini nagapadedikar sa aton kay Jesucristo, nagapahanumdom sa aton sang aton mga kasugtanan, kag ang mga ini nagabulig sa aton nga mabatyagan ang kasigurohan sa mga butkon sang Ginuo. Nagapamatuod ako nga Iya ginahandum nga ang aton mga kalag “indi gid nga mas-a paggutumon ukon pag-uhawon, kundi nga mabusog”29 sa Iya paghigugma kon aton tinguhaon nga mangin matuodtuod Niya nga mga disipulo, nga mangin-isa sa Iya subong nga Sia sa Amay. Sa ngalan ni Jesucristo, amen.