10:24

Gugma sang Dios: Ang Labing Makalilipay sa Kalag

Ni Susan H. Porter

Unang Manuglaygay sa Pangkabilugan nga Pangulohan sang Primary

Ang gugma sang Dios indi masalapoan sa mga sirkumstansya sang aton mga kabuhi, kundi sa Iya presensya sa aton mga kabuhi.

Mga utod, nakahibalo bala kamo kon ano ka bug-os kamo nga ginahigugma sang Dios, nga aton Amay nga Langitnon? Nabatyagan bala ninyo ang Iya gugma sa kadadalman sang inyo kalag?

Kon nakahibalo kag nakahangop kamo kon ano kabug-os kamo nga ginahigugma bilang anak sang Dios, ginabag-o sini ang tanan. Ginabag-o sini ang imo balatyagon parte sa imo kaugalingon kon makahimo ka sing mga sayop. Ginabag-o sini ang imo balatyagon kon nagakatabo ang mabudlay nga mga butang. Ginabag-o sini ang imo panan-aw sa mga kasugoan sang Dios. Ginabag-o sini ang imo panulok sa iban, kag sa imo ikasarang nga maghimo sang kinalain.

Si Elder Jeffrey R. Holland nagtudlo, “Ang unang dako nga kasugoan sa bug-os nga wala katapusan amo ang higugmaon ang Dios sa bug-os naton nga tagipusuon, ikasarang, hunahuna, kag kusog—ina ang unang dako nga kasugoan. Pero ang unang dako nga kamatuoran sa bug-os nga wala katapusan amo nga ang Dios nagahigugma sa aton sa bug-os Niya nga tagipusuon, ikasarang, hunahuna kag kusog.”¹

Paano ang tagsa sa aton makahibalo sa kadadalman sang aton mga kalag sinang dako nga kamatuoran sang wala katapusan?

Ang propetang si Nefi ginpakita sa isa ka panan-awon sang pinakagamhanan nga ebidensya sang gugma sang Dios. Pagkakita sang kahoy sang kabuhi, nagpangabay si Nefi nga mahibal-an ang kahulugan sini. Bilang sabat, isa ka anghel ang nagpakita kay Nefi sang isa ka siyudad, isa ka iloy kag isa ka lapsag. Samtang ginatulok ni Nefi ang siyudad sang Nazaret kag ang matarong nga iloy nga si Maria nga nagakugos sang lapsag nga si Jesus sa iya mga butkon, ang anghel nagpahayag, “Yari karon ang Cordero sang Dios, huo, bisan ang Anak sang Wala’y Katapusan nga Amay!”²

Sa sinang sagrado nga tion, nahangpan ni Nefi nga sa pagkatawo sang Manluluwas, ang Dios nagapakita sang Iya putli kag bug-os nga gugma. Ang gugma sang Dios, saksi ni Nefi, “nagatugob sa mga tagipusuon sang mga anak sang tawo.”³

Malaragway naton ang gugma sang Dios bilang kasanag nga nagahalin sa kahoy sang kabuhi, nga nagatugob sa bilog nga kalibutan pakadto sa mga tagipusuon sang mga anak sang katawhan. Ang kasanag kag gugma sang Dios nagalapnag sa tanan Niya nga gintuga.⁴

Kon kaisa, sayop naton nga ginapanumdum nga mabatyagan lamang naton ang gugma sang Dios pagkatapos nga nasunod na naton ang barandilya nga salsalon kag nakaambit sang bunga. Ang gugma sang Dios, ugaling, ginabaton indi lang sadtong mga nagakadto sa kahoy kundi ini mismo ang gahum nga nagatulod sa aton nga pangitaon inang kahoy.

“Gani, ini ang labing tilinguhaon labaw sa tanan nga mga butang,” tudlo ni Nefi, kag ang anghel nagsiling, “Kag subong man, ang labing makalilipay sa kalag.”⁵

Beynte anyos ang nagligad, isa ka pinalangga nga miyembro sang pamilya ang nagpalayo sa Simbahan. Madamo sia sang wala masabat nga mga pamangkot. Ang iya asawa, nga isa ka hinaylo, nagpabilin nga tampad sa iya pagtuo. Naghimakas sila agud maamligan ang ila pag-asawahay sa mga problema nga nagtuhaw tungod sini.

Sang nagligad nga tuig nagsulat sia sing tatlo ka pamangkot parte sa Simbahan nga nabudlayan sia maghangop kag ginpadala ini sa duha ka mag-asawa nga madugay na niya nga mga abyan. Gin-agda niya sila nga binagbinagon atong mga pamangkot kag magpanyapon sa ila agud magpaambit sang ila mga hunahuna.

Pagkatapos sadtong pagbisita, nagsulod sia sa iya kwarto kag nagsugod obra sa isa ka proyekto. Ang paghinambalanay sadto nga gab-i kag ang gugma nga ginpakita sa iya sang iya mga abyan nangibabaw sa iya hunahuna. Pagkatapos nagsulat sia nga napilitan sia mag-untat sang iya ginaobra. Nagsiling isa: “Dako nga kasanag ang nagpuno sang akon kalag. … Nakaagi na ako sining tudok nga balatyagon sang kasanagan, pero ini karon, labi nga nagbaskog sangsa nagligad kag naglawig sing pila ka minutos. Malinong ako nga nagpungko nga may amo sina nga balatyagon, nga nahangpan ko bilang pagpakita sang Dios sang iya gugma para sa akon. … May pagpabatyag-espirituhanon nga naghambal sa akon nga makabalik ako sa Simbahan kag ipautwas ining gugma sang Dios sa akon himuon didto.”

Dayon, ginpanumdum niya ang iya mga pamangkot. Ang balatyagon nga iya nabaton amo nga nalipay ang Dios sa iya mga pamangkot kag ang indi pagbaton sang maathag nga mga sabat indi dapat magpugong sa iya sa pag-uswag.⁶ Dapat niya ipaambit ang gugma sang Dios sa tanan samtang padayon sia nga nagabinagbinag. Sa pag-akto niya sa sinang pagpabatyag, may nabatyagan sia nga kasuod kay Joseph Smith, nga nagsiling pagkatapos sang iya Unang Panan-awon, “Ang akon kalag napuno sang gugma, kag sa madamo nga inadlaw nagkasadya ako sing may dako nga kalipay.”⁷

Talalupangdon nga pila lang ka bulan pagkatapos, ining miyembro sang pamilya nagbaton sang amo man nga calling nga iya ginkaptan 20 katuig antes. Sa una nga tion nga ginkaptan niya inang calling, gintungdan niya ang iya mga responsibilidad bilang mapisan nga miyembro sang Simbahan. Subong ang pamangkot niya indi na “Paano ko tumanon ining calling?” kundi “Paano ko mapakita ang gugma sang Dios paagi sa akon pag-alagad?” Sa sining bag-o nga paagi nakabatyag sia sing daku nga kalipay, kahulugan, kag katuyuan sa tanan nga aspeto sang iya calling.

Mga kauturan, paano kita makabaton sang nagabag-o nga gahum sang gugma sang Dios? Ang propetang si Mormon nagaagda sa aton nga “magpangamuyo sa Amay sa bug-os nga ikasarang sang tagipusuon, agud mapuno kamo sa sining gugma, nga iya ginhatag sa tanan nga matuod nga mga sumolunod sang iya Anak nga si Jesucristo.”⁸ Si Mormon nagaagda sa aton indi lamang nga magpangamuyo agud mapuno kita sang Iya gugma para sa iban kundi nga magpangamuyo agud nga mabatyagan naton ang putli nga gugma sang Dios para sa aton⁹

Kon mabaton naton ang Iya gugma, masalapoan naton ang mas dako nga kalipay sa pagtinguha nga maghigugma kag mag-alagad pareho sa Iya, agud mangin “matuod nga mga sumulunod sang iya Anak, si Jesucristo.”¹⁰

Ang gugma sang Dios indi masalapoan sa mga sirkumstansya sang aton mga kabuhi, kundi sa Iya presensya sa aton mga kabuhi. Mabatyagan naton ang Iya gugma kon makabaton kita sang kusog nga labaw sangsa aton kaugalingon kag kon ang Iya Espiritu nagadala sang kalinong, kaumpawan kag direksyon. Kon kaisa mahimo nga mabudlay mabatyagan ang Iya gugma. Makapangamuyo kita nga buksan ang aton mga mata agud makita ang Iya impluwensiya sa aton mga kabuhi kag agud makita ang Iya gugma sa katahum sang Iya mga gintuga.

Kon panumdumon naton ang kabuhi sang Manluluwas kag Iya wala tupong nga sakripisyo, magasugod nga mahangpan naton ang Iya gugma para sa aton. Matinahuron nga ginakanta naton ang mga pulong ni Eliza R. Snow: “Hamiling dugo nagtulo; kabuhi Niya ginhatag.”¹¹ Ang pagpaubos ni Jesus sa pag-antos para sa aton nagatinlo sang aton mga kalag kag nagabukas sang aton mga tagipusuon sa pagpangayo sang kapatawaran sa Iya kamot kag nagapuno sa aton sang handum nga magpangabuhi pareho sa Iya.¹²

Si Pangulong Russell M. Nelson nagsulat, “Kon mas dedikado kita sa pagsunod sang paagi sang Iya pagpangabuhi, ang aton gugma mangin mas putli kag mas diosnon.”¹³

Ang amon bata nga lalaki nagsugid: “Sang 11 anyos ako, kami sang akon mga abyan nagdesisyon nga manago sa amon maestro kag magligoy sa una nga bahin sang amon klase sa Primary. Sang nagsulod gid man kami sang ulihi, sa amon kakibot, ang amon maestro mainit nga nag-abiabi sa amon. Dayon sinsero sia nga nagpangamuyo sa diin nagpautwas sia sing hugot nga pagpasalamat sa Ginuo nga nagdesisyon kami nga magsulod sa klase sina nga adlaw sa amon kaugalingon nga pagbuot Indi ko na madumduman kon ano ang leksyon ukon bisan ang ngalan ang amon maestro, pero subong, mga 30 anyos pagkatapos, natandog ako gihapon sang putli nga gugma nga ginpakita sa akon sadto nga adlaw.

Lima ka tuig ang nagligad, nakakita ako sang ehemplo sang diosnon nga gugma samtang nagatambong sa Primary sa isa ka ward sa Russia. Nakita ko ang isa ka tampad nga sister nga nagaluhod sa atubang sang duha ka bata nga lalaki nga nagasaksi sa ila nga bisan pa sila lang ang nagakabuhi sa duta, si Jesus magaantos kag magapakamatay para lang gid sa ila.

Nagapamatuod ako nga ang aton Ginuo kag Manluluwas matuod gid nga napatay para sa tagsa sa aton. Pagpahayag ini sang Iya wala tupong nga gugma para sa aton kag para sa Iya Amay.

“Buhi gid ang Manunubos ko. Makalilipay ining pulong! Higugmaon [kita] sing dayon.”¹⁴

Kabay nga buksan naton ang aton mga tagipusuon agud mabaton ang putli nga gugma sang Dios para sa aton kag dayon ipaambit inang Iya gugma sa tanan naton nga ginahimo kag pagkatawo. Sa sagrado nga ngalan ni Jesucristo, amen.