Pagpanghanda para sa Ika-duhang Pagkari ni Cristo
Ilabi na gid karon, ginapangayo sa aton nga atubangon ang realidad nga nagahilapit na gid kita kaayo sa Ika-duhang Pagkari ni Jesucristo.
Sa nasulat sa Libro ni Mormon, anum ka tuig antes matawo si Jesucristo, si Samuel, nga isa ka matarong nga Lamanhon, nagpanagna sa Nefinhon nga katawhan nga sang amo nga tion halos tanan nagtalikod na sa kamatuoran,1 sang mga patimaan nga magaupod sa pagkabun-ag sang aton Manluluwas. Ang masubo, kalabanan sa mga Nefinhon nagsikway sa mga patimaan tungod “indi makatarunganon nga ang tagsubong nga isa ka persona bilang isa ka Cristo [dapat nga] magakari.”2
Ang masubo, suno sa nasulat sa balaan nga mga kasulatan, madamo sa mga Judio, sa pareho nga paagi, indi makabaton nga isa ka tawo nga ginhingadlan Jesus, halin sa isa ka di-kilala nga probinsya sang Galilea, amo ang matuod gid nga madugay na nga ginahulat nga Mesias.3 Si Jesus, nga matuod nga nagkari agud tumanon ang madamo nga propesiya nga ginhimo sang Hebreo nga mga propeta, ginsikway kag ginlansang pa gani sa krus, kasubong sang gintudlo sang propeta sa Libro ni Mormon nga si Jacob, ang mga Judio “[nagatulok] sa unhan sang tanda.” Gani, si Jacob nagpamatuod nga “Ginkuha sang Dios ang iya kaathagan gikan sa ila, kag ginhatag sa ila ang madamo nga mga butang nga indi nila mahangpan, sanglit ila ini naluyagan. Kag sanglit ila ini naluyagan ginhimo ini sang Dios, agud nga sila masandad.”4
Dawsa indi mapatihan, wala sing panudlo, wala sing milagro, kag wala sing pagpakita sang bisan langitnon nga anghel, pareho sang nasaksihan nanday Laman kag Lemuel,5 ang daw may makahaylo nga gahum agud makakumbinsi sang pila ka indibidwal nga liwaton ang ila ginaagyan, panan-aw, ukon ginapatihan nga ang isa ka bagay matuod. Amo gid ini ang matabo kon ang mga pinanudlo ukon mga milagro wala nagasanto sa mga ginapatihan, mga handum, ukon mga ideya sang isa ka indibidwal.
Palihog ikumparar sang makadali ang masunod nga duha ka balaan nga mga kasulatan, ang una halin kay Apostoles Pablo nga nagahambal parte sa ulihing mga adlaw nga ginalaragway ang mga pamatasan sang tawo kag ang ikaduha halin kay Alma nga propeta nga nagapakita paano ang Dios maghikot sang Iya buluhaton sa tunga sang katawhan. Una halin kay Pablo:
“Tandai ini! Mangin mabudlay kaayo ang mga inadlaw sa katapusan nga panag-on.
“Kay ang mga tawo mangin maiyaiyahon, maki-kwarta, bugalon, mapalabilabihon, mapasipalahon, di-matinumanon sa ila mga ginikanan, di-mapinasalamaton kag di-diosnon,
“Wala sila sing pasunaid, wala kaluoy, mapinatupatuon, mainiton kag mabangis; magadumot sila sang maayo,
“Magamaluibon, mangin dasudaso kag matinaastaason; magahigugma sila sang kalipayan labi sang sa Dios; …
“Nagatinguha sa gihapon sa pagtuon pero indi gid sila makalambot sa pagkilala sang kamatuoran.”6
Kag karon halin kay Alma, nga nagahambal sang pundasyon nga prinsipyo sang ebanghelyo ni Jesucristo: “Karon mahimo nga naghunahuna ka nga kabuangan ini sa akon; apang yari karon ginasiling ko sa imo, nga paagi sa diutay kag yano nga mga butang ginapahanabo ang dalagko nga mga butang; kag ang diutay nga mga pahito sa madamo nga mga [kahigayunan] nagapakahuya sang mga maalam.”7
Nagapuyo kita sa isa ka modernong kalibutan puno sang dalagko nga kaalam kag tuman nga ikasarang. Walay sapayan sini, ining mga butang masami nga nagatabon sa mahuyang nga pundasyon kon sa diin ini napasad. Gani, wala ini nagagiya sa tunay nga kamatuoran kag nagapadulong sa Dios kag sa gahum agud makabaton sang rebelasyon, makaangkon sang espirituhanon nga ihibalo, kag magtubo ang pagtuo kay Jesucristo nga nagadala sang kaluwasan.8
Ginapahanumdom kita sing maayo sa mga pulong sang aton Ginuo kay Tomas kag sa iban nga mga Apostoles sa bisperas sang Iya nagabayad-sala nga sakripisyo: “Si Jesus nagsabat sa iya, Ako amo ang dalan, ang kamatuoran, kag ang kabuhi, wala sing may makakadto sa Amay kon indi paagi sa akon.”9
Sa ila nga may mga mata sa pagtan-aw, may mga dulunggan sa pagpamati kag mga tagipusuon sa pagbatyag, ilabi na gid karon, ginapangayo sa aton nga atubangon ang realidad nga nagahilapit na gid kita kaayo sa Ika-duhang Pagkari ni Jesucristo. Matuod gid, dalagko nga mga kabudlayan ang nagahulat sa mga yari sa duta sa Iya nga pagbalik, apang sa sini nga bahin, ang mga matutom hindi kinahanglan magkahadlok.
Karon akon sambiton sing makadali halin sa Gospel Topics sang Simbahan sa idalom sang tig-ulo nga “Ika-duhang Pagkari ni Jesucristo”:
“Kon magkari liwat ang Manluluwas, magakari Sia sa gahum kag himaya para angkonon ang kalibutan bilang Iya ginharian. Ang Iya Ika-duhang Pagkari mangin tanda sang pagsugod sang Milenya.
“Ang Ika-duhang Pagkari mangin makahaladlok, masubo nga tion para sa malain nga mga tawo, pero ini mangin adlaw sang paghidaet para sa mga matarong. Ang Ginuo nagpahayag:
“‘Kay sila nga maalam kag nagbaton sang kamatuoran, kag naghimo sang Balaan nga Espiritu nga ila giya, kag wala napatalang—sa pagkamatuod ginasiling ko sa inyo, indi sila pagasikwayon kag idap-ong sa kalayo, kundi malampuwasan nila ang adlaw sang pagkari sang Ginuo.”
“‘Kag ang duta igahatag sa ila bilang panublion; kag magadamo sila kag magabakod, kag ang ila mga anak magatubo nga wala sang sala padulong sa kaluwasan.
“‘Kay ang Ginuo mangin yara sa tunga nila, kag ang iya himaya mangin yara sa ila, kag sia mangin ila hari kag ila manughatag sang kasugoan.’ (Doktrina kag mga Kasugtanan 45:57–59).”10
Sa aton pagpanghanda para sa Ika-duhang Pagkari ni Jesucristo may ara ako sang importante, nagapaumpaw nga ihambal para sa mga matutom halin sa propeta nga si Amos sang Daan nga Katipan: “Sa pagkamatuod ang Ginoo nga Gamhanan indi maghimo sing bisan ano nga butang kon indi niya anay mapahayag ang iya plano sa iya mga alagad nga mga propeta.”11
Sa amo man, ang propeta sang Ginuo sa kalibutan sa karon, si Pangulong Russell M. Nelson, naghatag sa aton sining bag-o nga makainspirar nga laygay: “Ang ebanghelyo ni Jesucristo isa ka ebanghelyo sang paghinulsol. Bangud sang Pagbayad-Sala sang Manluluwas, ang Iya ebanghelyo nagahatag sang pangagda nga padayon magbag-o, magtubo, kag mangin mas matinlo. Ini ang ebanghelyo sang paglaum, sang pag-ayo, kag sang pag-uswag. Gani, ang ebanghelyo isa ka mensahe sang kalipay! Ang aton mga espiritu nagakasadya sa tagsa ka magagmay naton nga tikang paabante.”12
Lubos ako nga nagasaksi kag nagapamatuod sang pagkamatuod sang Dios kag sang mga milagro sa adlaw-adlaw nga pagkabuhi sang indi maisip nga katawhan gikan sa manubo kag mataas nga estado sang kabuhi. Matuod, madamo sa sagrado nga mga eksperiyensya ang malaka nga ginasugid, sa isa ka bahin tungod sang ila diosnon nga ginhalinan kag ang posibilidad sang pagyaguta sang mga wala makahibalo.
Tungod sini, ang katapusan nga propeta sang Libro ni Mormon nga si Moroni nagapahanumdom sa aton:
“Kag sa liwat nagahambal ako sa inyo nga mga nagapanghiwala sang mga bugna sang Dios, kag nagasiling nga nag-untat na ang mga ini, nga wala na sing mga bugna, ukon mga panagna, ukon mga hiyas, ukon mga pagpang-ayo, ukon paghambal sang mga hinambalan, kag mga pagpatpat sang mga hinambalan;
“Yari karon ginasiling ko sa inyo, sia nga nagapanghiwala sining mga butang wala makahibalo sang ebanghelyo ni Cristo; huo, wala sia makabasa sang balaan nga mga kasulatan; kon mag-amo man, wala sia makahangop sang mga ini.
“Kay indi bala naton mabasa nga ang Dios amo man gihapon kahapon, karon, kag sa wala’y katubtuban, kag sa iya wala sing pagliwat-liwat ukon wala man sing landong sang pagbalhin?”13
Magatakop ako sang akon pamulongpulong sa isa ka makainspirar nga pahayag gikan kay Propetang Joseph Smith, nga ginhambal malapit sa katapusan sang iya pag-alagad samtang iya ginapaabot ang Ika-duhang Pagkari ni Jesucristo: “Indi bala kita magpadayon sa amo kadako nga kawsa? Mag-abante kag indi mag-atras. Kaisog, mga brother [kag, idugang ko, mga sister]; kag abante, abante sa kadalag-an! Papangalipaya ang inyo mga tagipusuon, kag mangin tuman kamasinadyahon.”14 Sa diin akon ginadugang ang akon pagsaksi sa ngalan ni Jesucristo, amen.