Ang Pagtuo nga Magpangayo kag Dayon Mag-akto
Ang pagtuo kay Jesucristo amo ang yabi sa pagbaton sang mga rebelasyon sang kamatuoran.
Mahal kong mga kauturan, nagapasalamat ako sa okasyon nga makahambal sa inyo sa sining Sabado sang gab-i nga sesyon sang pangkabilogan nga komperensya. Sa iya introduksyon sa komperensya sini nga aga, si Pangulong Russel M. Nelson nagsiling nga “ang tunay nga rebelasyon para sa mga pamangkot sa inyo tagipusuon magahimo sini nga komperensya nga makalilipay kag halandumon.” Kon wala pa ninyo napangayo ang pag-alagad sang Balaan nga Espiritu agud buligan kamo nga mabatian ang gusto ipabati sang Ginuo sa inyo sa sining duha ka adlaw, ginaagda ko kamo nga himuon ini subong.”1 Ginpangayo ko inang bugay samtang naghanda ako sa pagbaton sang rebelasyon para sa sining pagpamulong sa inyo. Ang hugot ko nga pangamuyo amo nga tani mabaton ninyo inang rebelasyon halin sa Dios.
Ang paagi sang pagbaton sang rebelasyon halin sa Dios wala nagbag-o halin pa sa panahon ni Adan kag Eva. Pareho lang ini gihapon sa tanan nga gintawag nga mga alagad sang Ginuo halin sa ginsuguran asta subong. Pareho man ini para sa inyo kag sa akon. Matigayon ini pirme paagi sa pagpakita sang pagtuo.2
Ang pamatan-on nga si Joseph Smith may bastante nga pagtuo agud mamangkot sa Dios, nga nagapati nga sabton sang Dios ang iya hugot nga panginahanglan. Ang sabat nagbag-o sang kalibutan. Gusto niya mahibal-an kon diin nga simbahan maentra agud matinloan halin sa sala. Ang sabat nga iya nabaton nagpaisog sa iya nga padayonon ang mas maayo nga mga pamangkot kag aktohan ang dalayon nga pag-ilig sang rebelasyon nga bag-o lang nagsugod.3
Ang inyo eksperiyensia sa sining komperensya mahimo nga kaanggid man. May mga pamangkot kamo nga ginapangitaan ninyo sang sabat. Sa pinakakubos, may bastante kamo nga pagtuo nga maglaum nga makabaton sang sabat halin sa Ginuo paagi sa Iya mga alagad.4 Wala kamo sing tsansa nga mamangkot sing matunog agud sabton sang mga humalambal, pero makapamangkot kamo sa inyo mahigugmaon nga Amay sa pangamuyo.
Nahibal-an ko halin sa inagihan nga ang mga sabat mabaton nga sibu gid sa inyo mga panginahanglan kag inyo espirituhanon nga paghanda. Kon kinahanglan ninyo sang sabat nga importante sa inyo wala katapusan nga kaayohan ukon sa iya sang iban, ang sabat laban gid nga mabaton. Apang, bisan pa sina, mahimo kamo makabaton—pareho kay Joseph Smith—sang sabat nga maghulat.5
Kon ang inyo pagtuo kay Jesucristo nagresulta sa mapainubuson nga tagipusuon bilang epekto sang Iya Pagbayad-Sala, mas mabatyagan ninyo ang impluwensiya sang Espiritu bilang sabat sa inyo mga pangamuyo. Ang akon personal nga eksperiyensia amo nga ang mahinay, diutay nga tingug maathag kag mahangpan sa akon kaisipan kon matawhay ang akon balatyagon kag nagapasugot sa pagbuot sang Ginuo. Inang balatyagon sang pagpaubos pinakamaayo nga malaragway bilang “Indi ang akon kabubut-on kundi ang imo ang matuman.”6
Ining proseso sang rebelasyon ang rason nga mabatian ninyo ang mga humalambal nga nagatudlo sa sining komperensya sang ginatawag nga doktrina ni Cristo.7 Ang rebelasyon mabaton naton suno sa aton kaukod sa pagtinguha nga huptan sa aton mga tagipusuon ang doktrina ni Cristo kag ipangabuhi ini.
Madumduman ninyo sa Libro ni Mormon nga nagtudlo si Nefi sa aton nga ang pagtuo kay Jesucristo amo ang yabi sa pagbaton sang rebelasyon sang kamatuoran kag ang yabi sa pag-angkon sang kompiyansa nga ginasunod naton ang direksyon sang Manluluwas. Ginsulat ni Nefi ang masunod nga mga pulong ginatus-ka-tuig antes matawo si Jesucristo sa duta:
“Ang mga anghel nagahambal paagi sa gahum sang Balaan nga Espiritu; gani, nagahambal sila sang mga pulong ni Cristo. Gani, nagsiling ako sa inyo, magpaayaw kamo sa mga pulong ni Cristo; kay yari karon, ang mga pulong ni Cristo magasugid sa inyo sang tanan nga mga butang nga inyo dapat himuon.
“Gani, karon pagkatapos nga mahambal ko ining mga pulong, kon indi ninyo mahangpan ang mga ini, ina tungod kay wala kamo magpamangkot, ukon wala man kamo magpanuktok; gani, wala kamo madala sa kapawa, kundi pat-od gid nga mawala sa kadudulman.
“Kay yari karon, sa liwat ginasiling ko sa inyo nga kon magasulod kamo sa dalan, kag magbaton sang Balaan nga Espiritu, igapakita sini sa inyo ang tanan nga mga butang nga inyo dapat himuon.
“Yari karon, amo ini ang doktrina ni Cristo, kag wala na sing doktrina pa nga igahatag tubtob nga pagkatapos nga igapakita niya sa inyo ang iya kaugalingon sa unod. Kag kon sia magapakita sa inyo sang iya kaugalingon sa unod, ang mga butang nga iya ihambal sa inyo amo ang inyo bantayan nga himuon.”8
Ang Ginuo magahambal sa aton paagi sa Iya mga alagad subong kag sa maabot nga mga inadlaw. [Tudloan] Niya kita sang tanan nga mga butang nga aton dapat himuon.9 Ang Manluluwas indi magsinggit sang mga sugo sa inyo kag sa akon. Pareho sang gintudlo Niya kay Elias:
“Kag nagsiling sia, Gwa ka kag magtindog sa bukid sa atubangan sang Ginuo. Kag, yari karon, ang Ginuo nag-agi, kag ang daku kag mabaskog nga hangin nagpalitik sang mga bukid, kag nagpugday ang mga igang sa atubangan sang Ginuo; apang ang Ginuo wala sa hangin; kag madason sa hangin ang linog, apang ang Ginuo wala sa linog:
“Kag madason sa linog ang kalayo, apang ang Ginuo wala sa kalayo; kag madason sa kalayo isa ka tingug nga mahinay.”10
Ang pagkabati sinang tingug resulta sang aton pagtuo sa Iya. Upod ang bastante nga pagtuo, mangayo kita sang direksyon nga may tuyo nga maglakat kag himuon ang mga butang nga Iya ginasugo.11 Makatigayon na kita sina sing husto nga pagtuo agud mahibal-an nga ano man ang Iya ginasugo magabugay sa iban, kag matinloan kita sa proseso tungod sang Iya gugma sa aton.
Bangod ang aton pagtuo kay Jesucristo magatuytoy na sa aton nga mangayo sa Amay sang mga sabat, inang pagtuo magadala man sang impluwensiya sang Manluluwas nga igo agud mabatian naton ang iya direksyon kag mangin desidido kag malipayon sa pagtuman. Dayon magakanta kita sang pulong sang himno nga malipayon, bisan pa mabudlay ang buluhaton: “Matam-is ang buluhaton, Dios hari ko dayawon ka.”12
Kon mas ginahuptan naton ang doktrina ni Cristo sa aton mga kabuhi kag tagipusuon, mas daku ang gugma kag simpatiya naton para sa mga wala pa gid sang bugay sang pagtuo kay Jesucristo ukon nabudlayan sa pagtipig sini. Mabudlay ang magtuman sang mga kasugoan sang Ginuo kon wala sang pagtuo kag pagsalig sa Iya. Sa pagkadula sang pagtuo sang iban sa Manluluwas, mahimo pa gani nila batoan ang Iya mga laygay, nga ginatawag ang maayo nga malain kag ang malain nga maayo.13 Agud malikawan ining masubo nga sayop, importante gid nga ang bisan ano nga personal nga rebelasyon nga aton ginabaton nagasanto sa mga panudlo sang Ginuo kag Iya mga propeta.
Mga kauturan, kinahanglanon ang pagtuo agud mangin matinumanon sa mga kasugoan sang Ginuo. Kinahanglanon ang pagtuo kay Jesucristo agud mag-alagad sa iban para sa Iya. Kinahanglanon ang pagtuo nga maggwa agud itudlo ang Iya ebanghelyo kag itanyag ini sa mga tawo nga basi indi makabatyag sang tingug sand Espiritu kag basi magsikway pa gani sang kamatuoran sang mensahe. Pero sa aton pagpakita sang pagtuo kay Cristo—kag pagsunod sa Iya buhi nga propeta—ang pagtuo magadugang sa bilog nga kalibutan. Bangod sang teknolohiya, basi mas madamo nga mga anak sang Dios ang makabati kag magkilala sang pulong sang Dios sini nga semana sangsa ano pa man nga duha ka adlaw sa kasaysayan.
Nga may nagadugang nga pagtuo nga ini ang Simbahan kag ginharian sang Ginuo sa duta, mas madamo nga mga miyembro ang nagabayad sang ika-pulo kag nagaamot agud buligan ang mga nagakinahanglan, bisan pa nga inang mga miyembro nagaagi sa ila kaugalingon nga mga pagtilaw. Nga nagatuo nga gintawag sila ni Jesucristo, ang mga misyonero sa bilog nga kalibutan nakakita sang mga paagi nga madaug ang mga hangkat nga tuga sang pandemya, nga ginahimo ini sing may kaisog kag kalipay. Kag sa ila dugang nga pagpanikasog, ang ila pagtuo mas nagbakod.
Madugay na nga ang kasupak kag pagtilaw panugod sang pagtubo kag pagtuo. Matuod ini pirme, labi na gid sa pagsugod sang Pagpanumbalik kag sa pagtukod sang Simbahan sang Ginuo.14
Ang madugay na ginhambal ni Pangulong George Q. Cannon matuod gihapon subong kag mangin matuod tubtob personal nga magakari ang Manluluwas agud pangunahan ang Iya Simbahan kag Iya katawhan: “Ang pagkamatinumanon sa Ebanghelyo nagadala sang [katawhan] sa tuman kasuod nga relasyon sa Ginuo. Ginapahamtang sini ang suod nga kaangtanan sa tunga sang katawhan sa duta kag sa aton Dakung Tagtuga sa kalangitan. Ginadala sini sa tawhanon nga kaisipan ang balatyagon sang perpekto nga kompiyansa sa Makagagahum kag sa Iya kahanda nga mamati kag magsabat sang mga pangamuyo sang mga nagasalig sa Iya. Sa tinion sang pagtilaw kag kabudlayan ining kompiyansa tuman ka malahalon. Ang problema mahimo mag-abot sa indibidwal ukon sa mga katawhan, ang mga kalamidad mahimo maghana kag daw wala na sing rason nga maglaum, apang, kon panginpuslan sang katawhan ang mga pribelihiyo sang pagkamatinumanon sa Ebanghelyo, may malig-on sila nga tilindogan; ang ila mga tiil nagatungtong sa bato nga indi gid maisdog.”15
Akon panaksihon nga ang bato nga aton ginatindogan amo ang aton saksi nga si Jesus ang Cristo, nga Iya ini Simbahan nga personal Niya nga ginapangunahan, kag si Pangulong Russel M. Nelson ang Iya buhi nga propeta subong.
Si Pangulong Nelson nagapangayo kag nagabaton sang direksyon halin sa Ginuo. Ehemplo sia para sa akon sang pagpangayo sinang direksyon nga may determinasyon sa pagsunod sini. Inang amo man nga determinasyon nga mangin matinumanon sa direksyon sang Ginuo ang yara sa tagipusuon sang tanan nga naghambal ukon magahambal, nagapangamuyo ukon nagakanta sa sining pangkabilogan nga komperensya sang Iya Simbahan.
Nagapangamuyo ako nga ang tanan nga nagalantaw ukon nagapamati sa sining komperensya sa bilog nga kalibutan makabatyag sang gugma sang Ginuo para sa ila. Ginsabat sang Amay nga Langitnon ang akon pangamuyo nga mabatyagan ko tani bisan diutay lang ang gugma sang Manluluwas sa inyo kag sa Iya Amay nga Langitnon, nga aton Amay nga Langitnon.
Nagapamatuod ako nga si Jesucristo buhi. Sia ang aton Manluluwas kag aton Manunubos. Iya ini Simbahan. Sia ang nagapanguna sini. Sia, upod ang Amay nga Langitnon, personal nga nagpakita kay Joseph Smith sa kakahoyan sa New York. Ang ebanghelyo ni Jesucristo kag Iya priesthood ginpanumbalik paagi sa langitnon nga mga mensahero.16 Paagi sa gahum sang Balaan nga Espiritu nakahibalo ako nga matuod ini.
Pangamuyo ko nga makaangkon kamo sang amo man nga saksi. Pangamuyo ko nga mangayo kamo sa Amay nga Langitnon sang pagtuo kay Jesucristo nga kinahanglan ninyo agud maghimo kag magtipig sang mga kasugtanan nga magatugot sa Balaan nga Espiritu nga mangin kaupod ninyo pirme. Ginabilin ko sa inyo ang akon gugma kag panaksihon sa sagrado nga ngalan ni Jesucristo, amen.