Lubos nga Nahamut-an sang Ginuo sa Tanan Ko nga mga Adlaw
Ano ang aton reaksyon sa aton mga pag-antos? Mapasalamaton bala kita sa pulong kay mas nagatutok kita sa aton mga bugay sangsa aton mga problema?
Ang COVID-19 nga pandemya isa sang madamo nga mga pagtilaw kag hangkat nga ginaatubang sang mga anak sang Dios sa bilog nga kasaysayan sang kalibutan. Pagsugod sining tuig, ako kag ang mahal ko nga pamilya may tama kabudlay nga mga pagtilaw. Ang pandemya kag iban pa nga rason nagdala sang kamatayon kag kasakit sa amon pamilya sa pagkapatay sang pila ka mga pinalangga. Sa pihak sang pagpabulong, pagpuasa kag pangamuyo, sa sulod sang lima ka semana ang akon utod nga sanday Charly, Sucy kag bayaw nga si Jimmy napatay.
Sa masami, natingala ako kon ngaa naghibi ang Manluluwas sang nakita Niya si Maria nga nagakalisod sa pagkapatay sang iya utod nga si Lazarus, bisan nakahibalo Sia nga may gahum Sia sa pagbanhaw kay Lazarus kag malapit na Niya gamiton ining gahum agud luwason ang Iya abyan sa kamatayon.1 Nagadayaw ako sa kaluoy kag empatiya sang Manluluwas kay Maria; nahangpan Niya ang wala tupong nga kasakit ni Maria sa pagkapatay sang iya utod nga si Lazarus.
Nagabatyag kita sang amo man kagrabe nga sakit sa temporaryo nga pagkahamulag sa aton mga pinalangga. Ang Manluluwas may perpekto nga kaluoy sa aton. Wala Niya kita ginabasol sa aton hapaw-nga-panulok, ukon sa limitado nga panan-aw sa aton wala katapusan nga biyahe. Sa baylo, may kaluoy Sia sa aton kasubo kag pag-antos.
Ang Amay nga Langitnon kag Iya Anak, si Jesucristo, luyag nga magkalipay kita.2 Si Pangulong Nelson nagtudlo: “Ang kalipay nga aton mabatyagan halos wala sing kalabtanan sa mga sirkumstansya sang aton mga kabuhi kag may dako kaayo nga kalabtanan sa ginatutokan sang aton mga kabuhi. Kon ang tutok sang aton mga kabuhi ara sa plano sang kaluwasan sang Dios … makabatyag kita sang kalipay bisan ano pa ang nagakatabo—ukon wala nagakatabo—sa aton mga kabuhi.”3
Sang hubin pa ako nga misyonero, madumduman ko sang ang isa ka manami nga misyonero nga akon ginadayaw nakabaton sang malain nga balita. Ang iya nanay kag manghod nga lalaki napatay sa isa ka aksidente. Ang mission president nagtanyag sa sining elder sang tsansa nga magpauli para sa lubong. Apang, pagkatapos nga nakighambal sa iya amay sa telepono, ining misyonero nagdesisyon nga magpabilin kag tapuson ang iya misyon.
Sang ulihi, sang nagaalagad kami sa pareho nga zone, nakabaton kami sang akon companion sang tawag nga may mga kawatan nga nagkawat sang bisekleta sining misyonero kag nagbuno sa iya. Sia kag ang iya companion naglakat pakadto sa pinakamalapit nga ospital, kon diin kami sang akon companion nagtabo sa ila. Pakadto sa ospital, nagpangasubo ako para sa sining misyonero. Nahunahuna ko nga basi maluyahan na sia kag piho gid, pagkatapos sining mapait nga eksperiyensia, gustohon na niya nga magpauli.
Apang, pag-abot namon sa ospital, nakita ko ining misyonero nga nagahigda, nagahulat nga operahan—kag nagayuhum. Panumdum ko, “Paano sia makayuhum sa amo sini nga sitwasyon?” Samtang nagapaayo sia sa ospital, mapagsik sia nga nagapanagtag sang mga pampleta kag mga kopya sang Libro ni Mormon sa mga doktor, nars, kag iban pa nga pasyente. Sa pihak sining mga pagtilaw, indi sia gusto nga magpauli. Kundi nga, nag-alagad sia tubtob sa katapusan nga adlaw sang iya misyon nga may pagtuo, kusog, kabakod kag kapagsik.
Sa panugod sang Libro ni Mormon, si Nefi nagsiling, “Nga nakakita sang madamo nga pag-antos sa pagligad sang akon mga adlaw, apang, lubos nga nahamut-an sang Ginuo sa tanan ko nga mga adlaw.”4
Ginapanumdum ko ang madamo nga mga pagtilaw ni Nefi, madamo sini ang nalakip sa iya mga sinulatan. Ang iya mga pagtilaw nagabulig sa aton nga mahangpan nga tanan kita may mabudlay gid nga mga pagtilaw. Isa sining mga pagtilaw natabo sang si Nefi ginsugo nga magbalik sa Jerusalem agud kuhaon ang mga lamina nga saway nga ara kay Laban. Ang pila sang mga utod ni Nefi diutay ang pagtuo, kag ginhanot pa gani nila si Nefi sang bilugon. Naagyan ni Nefi ang isa pa gid ka pagtilaw sang nabali ang iya pana kag indi na makakuha sang pagkaon para sa iya pamilya. Sang ulihi, sang ginsugo si Nefi nga magpasad sang sakayan-dagat, ang iya mga utod nagyaguta sa iya kag indi magbulig sa iya. Sa pihak sini kag madamo nga iban pa nga mga pagtilaw sa iya kabuhi, pirme gid ginakilala ni Nefi ang kaayo sang Dios.
Sang nagatabok ang iya pamilya sa dagat pakadto sa duta nga ginpanaad, pila sang pamilya ni Nefi ang “nagsugod sa pagsinadya,” paghambal sing damuhal, kag nalipat nga gahum sang Ginuo ang nag-amlig sa ila. Sang ginsaway sila ni Nefi, naakig sila kag gingapos sia sang lubid nga indi sia makagiho. Ang Libro ni Mormon nagasiling nga “ginpaagyan [sia] sing tuman nga kapintas” sang iya mga utod; ang iya mga pulso kag mga buko-buko “nagpalanghubag sing tuman kag tuman ang palanakit.”5 Si Nefi, nagkalisod tungod sang katig-a sang mga tagipusuon sang iya mga utod kag masami ginadaug sang iya kalisdanan.6 “Apang,” siling niya, “nagsalig ako sa akon Dios, kag nagdayaw sa iya sa bilog nga adlaw; kag wala ako nagkumod batok sa Ginuo tungod sang akon mga pag-antos.”7
Pinalangga kong mga utod, ano ang aton reaksyon sa aton mga pag-antos? Nagakumod bala kita sa Ginuo tungod sang mga ini? Ukon, pareho kay Nefi kag sa akon misyonero nga abyan sadto, mapasalamaton bala kita sa pulong, hunahuna kag buhat kay mas nagatutok kita sa aton mga bugay sangsa aton mga problema?
Ang aton Manluluwas, nga si Jesucristo, naghatag sa aton sang ehemplo durante sang Iya dutan-on nga pag-alagad. Sa tinion sang kabudlayan kag pagtilaw, diutay lang ang mga butang nga nagadala sa aton sing labi nga katawhay kag kalipay sangsa pag-alagad sa aton isigkatawo. Ang Libro ni Mateo nagasugid sang natabo pagkahibalo sang Manluluwas nga ang Iya pakaisa nga si Juan Bautista ginpugotan sang ulo ni Haring Herod agud mapalipay ang bata nga babayi ni Herodias.
“Kag nag-abot ang iya mga disipulo kag ila ginkuha ang bangkay kag ginlubong, kag naglakat sila kag ginsugiran si Jesus.
“Sang pagkabati ni Jesus sang balita, naghalin sia sa sadto nga lugar nga nagasakay sa sakayan kag nagkadto sa isa ka baw-ing nga lugar nga isahanon lang: kag sang nahibaluan ini sang mga tawo, nag-apas sila sa iya nga nagalakat lang.
“Sang pagtakas ni Jesus, nakita niya ang madamo nga mga tawo. Naluoy gid sia sa ila kag gin-ayo niya ang ila mga masakiton.
“Sang sirom na, ang iya mga disipulo nagpalapit sa iya kag nagsiling, Madulom na kag baw-ing ini nga lugar. Palakta ang mga tawo sa pagkadto sa mga barangay agod makabakal sila sang pagkaon para sa ila kaugalingon.
“Nagsabat si Jesus, Indi na kinahanglan nga maglakat pa sila. Kamo mismo ang maghatag sa ila sing pagkaon.”8
Si Jesucristo nagpakita sa aton nga sa tinion sang pagtilaw kag kapiot, sarang naton makita ang mga kabudlayan sang iban. Nga natandog sang kaluoy, sarang kita magdab-ot kag mag-alsa sa ila. Kag sa paghimo naton sini, maalsa man kita sang aton Cristohanon nga pag-alagad. Si Pangulong Gordon B. Hinckley nagsiling: “Ang nahibal-an ko nga pinakamaayo nga bulong sa kabalaka amo ang pagtrabaho. Ang pinakamaayo nga bulong sa kawala-paglaum amo ang pag-alagad. Ang pinakamaayo nga bulong sa kakapoy amo ang hangkat sa pagbulig sa mas ginakapoy.”9
Bilang miyembro sang Simbahan ni Jesucristo, madamo ako sang mga oportunidad sa pag-atipan kag pag-alagad sa akon isigkatawo. Sa sining mga tinion mabatyagan ko nga ginapamag-an sang Amay nga Langitnon ang akon mga karga. Si Pangulong Russel M. Nelson amo ang propeta sang Dios sa duta; daku sia nga ehemplo kon paano kita mag-atipan sa iban sa tion sang mabudlay nga mga pagtilaw. Ginatingob ko ang akon testimonya upod sa iya sang iban pa nga mga Santos nga ang Dios amo ang aton mapinalanggaon nga Amay nga Langitnon. Nabatyagan ko ang Iya wala tupong nga pagpalangga sa tion sang akon mabudlay gid nga mga pagtilaw. Ang aton Manluluwas, nga si Jesucristo, nakahangop sang aton mga kasakit kag kalisod. Luyag Niya nga pamag-anon ang aton mga karga kag paumpawan kita. Dapat naton sundon ang Iya ehemplo paagi sa pag-alagad kag pag-atipan sa mga may mas mabug-at nga mga karga sangsa aton. Sa ngalan ni Jesucristo, amen.