Mensahe sang Pag-abiabi
Pag-abiabi sa pangkabilogan nga komperensya kag sa pribelihiyo nga magpamati sa tingug sang Ginuo.
Mahal kong kauturan kag kaabyanan sa bilog nga kalibutan, personal ko kamo nga ginaabiabi sa sining pangkabilogan nga komperensya. Nagatipon kita bilang dako nga bug-os-kalibutan nga pamilya nga nagahandum sa pagsimba sa aton Ginuo kag Manluluwas, nga si Jesucristo. Salamat sa pagbuylog sa amon.
Ining nagligad nga tuig nangin indi kinaandan. Wala sing duda tanan kita nakatuon sang mga butang nga wala naton mahibal-i sadto. Pila sa mga leksyon nga nahibal-an ko na sadto ginsulat sa akon tagipusuon sa bag-o kag nagapaathag nga paagi.
Halimbawa, nahibal-an ko sing pat-od nga ang Ginuo ang nagapamuno sa mga hilikuton sang Iya Simbahan. Siling Niya, “Ipakita ko sa [inyo] nga makasarang ako sa paghimo sang akon kaugalingon nga buluhaton.”1
Masami, kami sang akon mga manuglaygay nagatan-aw nga nagalumaw-lumaw ang mga mata samtang Sia nagapatunga sa tama kamakahalangkat nga mga sirkumstansya pagkatapos nga ginhimo na naton ang aton pinakamaayo kag wala na sang mahimo pa. Matuod gid nga nagakahalawhaw kami.
Mas nahangpan ko man karon kon ano ang Iya buot silingon sang magsiling Sia nga, “Tan-awa, padalion ko ang akon buluhaton sa iya sini panahon.”2 Sulit-sulit ako nga nagkalipay sang Iya ginpangunahan kag ginpadasig ang Iya buluhaton—bisan sa tunga sang bug-os-kalibutan nga pandemya.
Pinalangga kong mga kauturan, ang kusog sang Simbahan ara sa pagpaninguha kag sa padayon-nga-nagadako nga mga testimonya sang mga miyembro sini. Ang mga testimonya pinakamaayo nga ginapatubo sa balay. Sang nagligad nga tuig, madamo sa inyo ang mas nagtutom sa pagtuon sang ebanghelyo sa inyo mga puluy-an. Salamat gid, kag pasalamatan kamo sang inyo mga kabataan.
Ang dako nga proyekto sang pagpatahum sang Templo sang Salt Lake nagapadayon. Halin sa akon opisina makita ko mismo ang trabaho nga nagakatabo sa plaza sang templo.
Samtang nagatan-aw ako sa mga trabahante nga ginalukat ang daan nga mga gamot sang kahoy, mga tubo, mga linya sang kuryente, kag ang nagatahos nga fountain, napensar ko ang kakinahanglan nga hawanan sang tagsa sa aton, sa bulig sang Manluluwas, ang daan nga mga sagbot sa aton mga kabuhi.
Ang ebanghelyo ni Jesucristo isa ka ebanghelyo sang paghinulsol.3 Bangud sang Pagbayad-Sala sang Manluluwas, nagahatag ang Iya ebanghelyo sang pangagda nga padayon magbag-o, magtubo, kag mangin mas matinlo. Ini ang ebanghelyo sang paglaum, sang pag-ayo, kag sang pag-uswag. Gani, ang ebanghelyo isa ka mensahe sang kalipay! Ang aton mga espiritu nagakasadya sa tagsa ka gagmay naton nga tikang paabante.
Nalakip sa pagtipon sang Israel, kag importante kaayo nga bahin, amo ang sugo sa aton bilang katawhan nga mangin takos kag hugot sa buot sa pagbulig handa sang kalibutan sa Ikaduha nga Pagkari sang Ginuo.
Samtang nagapamati kita sa mga mensahe nga mauti nga ginhanda sang aton mga lider sa idalom sang direksyon sang Balaan nga Espiritu, ginaagda ko kamo nga magpangamuyo para mahibal-an ang mga daan nga sagbot nga kinahanglan ninyo hawanan sa inyo kabuhi agud kamo mangin mas kaangay-angay.
Palangga ko kamo, pinalangga kong kauturan, kag nagapamatuod ako nga ang aton Amay nga Langitnon kag ang Iya Anak nga si Jesucristo nakakilala kag nagapalangga sang kada isa sa inyo. Ara sila handa sa pagbulig sa inyo sa tagsa ninyo ka tikang paabante. Pag-abiabi sa pangkabilogan nga komperensya kag sa pribelihiyo nga magpamati sa tingug sang Ginuo. Sa ngalan ni Jesucristo, amen.