Magpakamaayo sa Iya Ngalan
Ang katuyuan sang aton pagbaton sang priesthood amo ang pagtugot sa aton nga magpakamaayo sang mga tawo para sa Ginuo, nga ginahimo ini sa Iya ngalan.
Pinalangga kong mga kauturan, pareho ko nga mga alagad sa priesthood sang Dios, isa ka dungog para sa akon ang maghambal sa inyo sini nga gab-i. Dako gid ang akon respeto kag pagpasalamat sa inyo. Kon makighambal ako sa inyo kag mabatian ang inyo dako nga pagtuo, nagapati ako nga may ara sing nagadugang nga gahum sang priesthood sa kalibutan, nga may padayon nga nagabaskog nga mga korum kag mas nagamatinuohon na gid nga mga nagakapot sang priesthood.
Sa akon pila ka tinion upod sa inyo sini nga gab-i, magahambal ako sa inyo nga luyag nga mangin mas epektibo pa gid sa inyo personal nga pag-alagad sa priesthood. Nakahibalo kamo sang katungdanan nga dapat ninyo tumanon sing maayo ang inyo tawag sa pag-alagad.1 Apang mahimo nga nagahunahuna kamo kon ano ang kahulugan sinang magpadako sang inyo tawag.
Masugod ako sa pinakabag-o nga mga deacono tungod sila ang laban-laban nga indi sigurado parte sa kon ano ang kahulugan sang magpadako sang ila pag-alagad sa priesthood. Ang bag-o naordin nga mga elder ayhan luyag man magpamati. Kag ang obispo sa iya una nga sinimana sa pag-alagad ayhan interesado man.
Kasanagan ini para sa akon nga balikan ang akon pahanon sang pagka-deacono. Tani may nakahambal sa akon sadto sang akon igapanugyan sa inyo subong. Nakabulig kuntani ini sa tanan nga alatindihon sa priesthood nga nag-abot sa akon sumugod sadto—bisan ang mga bag-o nga akon nabaton sa karon nga panahon.
Gin-ordin ako nga deacono sa branch nga tama kagamay nga ako gid lang ang nagaisahanon nga deacono kag ang akon utod nga si Ted ang nagaisahanon nga manunudlo. Kami gid lang ang pamilya sa branch. Ang bilog nga branch nagatipon sa amon balay. Ang lider sang priesthood para sa akon kag sa akon utod isa ka bag-ong miyembro nga bag-o lang man nakabaton sang iya nga priesthood. Nagpati ako sadto nga ang akon lamang tulumanon sa priesthood amo ang pagpasa sang sakramento sa akon mismo nga kalan-an.
Sang ang akon pamilya nagsaylo sa Utah, nasalapoan ko ang akon kaugalingon sa isa ka dako nga ward nga may madamo nga deacono. Sa akon una nga pangsakramento nga miting didto, akon naobserbahan ang mga deacono—nga pamatyag ko, daw mga soldado—nga plastado samtang nagapasa sang sakramento nga daw ginhanas nga grupo.
Pwerte ang akon kakulba nga pagkadason nga Domingo nagkadto ako sing temprano pa sa bilding sang ward agud mag-isahanon nga wala sing makakita sa akon. Nadumduman ko nga didto ato sa Yalecrest Ward sa Salt Lake City, kay may dako nga istatwa sa ugsaran. Nagpalipod ako sa istatwa kag nagpangamuyo ako sing hanuot agud mahibal-an kon paano nga indi magsala samtang nagapasa sang sakramento. Ginsabat inang pangamuyo.
Apang nahibaloan ko na karon nga may mas maayo nga paagi sa pagpangamuyo kag sa paghunahuna samtang ginatinguhaan naton nga magtubo sa aton pag-alagad sa priesthood. Naintiendihan ko na kon ngaa ang mga indibidwal ginahatagan sang priesthood. Ang katuyuan sang aton pagbaton sang priesthood amo ang pagtugot sa aton nga magpakamaayo sang mga tawo para sa Ginuo, nga ginahimo ini sa Iya ngalan.2
Tinuig pagkatapos ako nga nangin deacono sang akon matun-an kon ano ini sayuron. Halimbawa, bilang high priest, gintakayan ako nga magbisita sa pangsakramento nga miting sang isa ka balay alatipanan. Ginpangabay ako nga magpasa sang sakramento. Imbis nga panumdumon ang proseso ukon ang plastada sang akon pagpasa sang sakramento, gintulok ko ang mga guya sang tagsa ka tigulang. Nakita ko nga madamo sa ila ang nagahibi. Isa ka babayi ang nagkab-ot sang pako sang akon bayo, nagtangla, kag matunog nga nagsiling, “Ay, salamat, salamat.”
Ang Ginuo nagpakamaayo sang akon pag-alagad nga ginhatag sa Iya ngalan. Sina nga adlaw nagpangamuyo ako nga mag-abot inang milagro imbis nga magpangamuyo kon paano ko himuon ang akon obligasyon sing maayo. Nagpangamuyo ako nga mabatyagan sang mga tawo ang pagpalangga sang Ginuo paagi sa akon mapinalanggaon nga pag-alagad. Akon natun-an nga amo ini ang importante sa pag-alagad kag pagpakamaayo sa iban nga tawo sa Iya ngalan.
Nabatian ko ang isa ka bag-o nga eksperiyensya nga nagpahanumdum sa akon sinang pagpalangga. Sang ang tanan nga mga miting sa Simbahan ginsuspinde bangod sang pandemya sang COVID-19, isa ka ministering brother nagbaton sang alatindihon halin sa iya pangulo sang korum sang mga elder sa pagbendisyon kag paghatag sang sakramento sa isa ka sister nga iya ginaministeran. Sang gintawgan niya sia agud magtanyag nga dalhan sia sang sakramento, ginbaton niya ini nga nagapang-alang-alang, nahuya nga pagwaon sia sa iya kaugalingon nga balay sa sinang delikado nga tion kag nagapati man nga ang tanan madasig lang nga magbalik sa normal.
Sang nag-abot sia sa balay sang iya ginaministeran nga sister sang sina nga Domingo sang aga, may gin-ayo ang sister sa iya. Pwede bala sila makakadto sa pihak-balay kag maghiwat man sang sakramento sa iya 87 anyos nga kaingod? Upod ang pagpahanugot sang obispo, nagpasugot sia.
Sa madamo kaayo nga sinimana, kag sa mahinalungon kaayo nga social distancing kag iban pa nga mga pagpangandam, inang gamay nga grupo sang mga Santos nagtipon kada Domingo para sa simple nga sakramento nga programa. Pila lang ka sinipadsipad nga tinapay kag mga tagayan sang tubig—apang madamo nga mga luha ang nagtulo bangod sang kaayo sang isa ka mapinalanggaon nga Dios.
Sa kadugayan, ang ministering brother, ang iya pamilya, kag ang sister nga iya ginaministeran nakabalik na sa pagsimba. Pero ang 87 anyos nga balo, ang kaingod, tungod sa madamo nga paandam, kinahanglan nga magpabilin sa balay. Ang ministering brother—madumduman ninyo nga ang iya alatindihon sadto amo ang kaingod kag indi ining tigulang nga sister—pero tubtob sa karon hipos lang nga nagakadto sa iya balay kada Domingo, may dala nga balaan nga mga kasulatan kag gamay lang nga tinapay, agud maghikot sang sakramento sang Panihapon sang Ginuo.
Ang iya pag-alagad sa priesthood, pareho sa akon sina nga adlaw sa balay alatipanan, ginhatag tungod sang pagpalangga. Sa pagkamatuod, ang ministering brother sang sini lang nagpamangkot sa bishop kon may ara pa sang iban sa ward nga pwede niya atipanon. Ang iya handum nga padakuon ang iya pag-alagad sa priesthood nagtubo samtang nagaalagad sia sa ngalan sang Ginuo kag sa paagi nga sia lang kag ang Ginuo ang nakahibalo. Wala ako nakahibalo kon ang ministering brother nagpangamuyo, pareho sa akon, para iya mga ginaalagaran agud mahibaloan ang gugma sang Ginuo, pero tungod ang iya pag-alagad paagi sa ngalan sang Ginuo, ang resulta nangin pareho lang.
Ang pareho nga matahum nga resulta nagaabot kon magpangamuyo ako para sini antes ako maghatag sang priesthood nga bendisyon sa isa nga nagamasakit ukon ara sa tion sang panginahanglan. Natabo ini kis-a sa isa ka ospital sang ginaapura ako sang nagadali nga mga doktor—sobra pa sa ginaapura ako—ginmandoan ako—nga dalion kag maghalin gilayon para mahimo na nila ang ila ulobrahon, imbes nga hatagan ako sang oportunidad nga maghatag sang bendisyon sang priesthood. Nagpabilin ako, kag naghatag matuod ako sang bendisyon. Kag ang bata nga babayi nga akon ginbendisyunan sina nga adlaw, nga abi sang mga doktor mapatay, nabuhi. Nagapasalamat ako karon, nga sina nga adlaw, wala ko gintugtan ang akon kaugalingon nga balatyagon nga magpangibabaw kundi nabatyagan nga gusto sang Ginuo nga mahatagan inang bata nga babayi sang bendisyon. Kag nakahibalo ako kon ano ang bendisyon nga ina: ginbendisyunan ko sia nga mag-ayo. Kag nag-ayo sia.
Natabo ini sing madamo nga beses sang ginbendisyunan ko ang isa ka tawo nga nagatagumatayon na, kaupod ang mga miyembro sang pamilya nga nagapalibot sa katre, nga nagalaum sang bendisyon sang pag-ayo. Bisan gamay lang ang akon tion, nagapangamuyo gid ako agud mahibal-an kon ano nga pagpakamaayo ang ginatigana sang Ginuo nga akon mahatag sa Iya ngalan. Kag nagapangamuyo ako agud mahibal-an kon paano Niya luyag nga pakamaayohon inang tawo kag indi sa akon luyag ukon sa luyag sang mga tawo nga nagatindog sa palibot. Ang akon eksperiyensya amo nga bisan ang pagpakamaayo indi suno sa luyag sang iban nga tawo para sa ila kaugalingon ukon sa ila mga pinalangga, ang Espiritu nagatandog sang ila mga tagipusuon agud maeksperiyensya nila ang pagbaton kag kaumpawan imbes sang kasubo.
Ang amo man nga inspirasyon nagaabot kon ang mga patriarka nagapuasa kag nagapangamuyo para sa giya agud ihatag ang pagpakamaayo nga luyag sang Ginuo para sa isa ka tawo. Sa liwat, nabatian ko ang parte sa ginhatag nga mga pagpakamaayo nga nagpakibot sa akon kag nagpakibot man sa tawo nga nagbaton sang pagpakamaayo. Maathag gid, ang pagpakamaayo naghalin sa Ginuo—alangay ang mga pagpaandam nga nalakip diri kag ang mga promisa nga napaambit sa Iya ngalan. Ang pangamuyo kag pagpuasa sang patriarka ginpadyaan sang Ginuo.
Bilang obispo, akon natun-an ang magpangamuyo sa Ginuo samtang nagadumala sang mga interbyu sang katakos agud akon mabatyagan kon ano ang luyag Niya para sa sina nga tawo, nga ginatipigan ang bisan ano nga inspirasyon nga Iya ihatag nga indi matabonan sang akon kaugalingon nga panan-aw. Mabudlay ina kon ang Ginuo, tungod sa gugma, luyag nga magpakamaayo sang isa ka tawo nga may pagtadlong. Nagakinahanglan sing pagtinguha agud mahibal-an kon ano ang luyag sang Ginuo sa kon ano ang imo luyag kag ang luyag sang isa pa.
Nagapati ako nga pwede naton tumanon sing maayo ang aton pag-alagad sa priesthood sa bug-os naton nga kabuhi kag ayhan tubtob sa pihak nga kinabuhi. Magadepende ini sa aton katutum sa pagtinguha nga mahibal-an ang pagbuot sang Dios kag sa aton mga paghimud-os nga mabatian ang Iya tingug agud aton mahibal-an sing mas maayo kon ano ang Iya luyag para sa tawo nga aton ginaalagaran para sa Iya. Ina nga pagtuman sing maayo magaabot sa magagmay nga mga tikang. Mahimo ini mag-abot sing amat-amat, pero magaabot gid ini. Ang Ginuo nagapromisa sini sa aton:
“Kay kon sin-o man ang tampad sa pag-angkon sining duha ka pagkapari nga akon ginhambal, kag sa pagtuman sing maayo sang ila tawag sa pag-alagad, ginapakabalaan sang Espiritu sa pagbag-o sang ila mga lawas.
“Mangin mga anak nga lalaki sila ni Moises kag ni Aaron kag kaliwatan ni Abraham, kag ang simbahan kag ginharian, kag mga pinili sang Dios.
“Kag amo man sila tanan nga nagabaton sining pagkapari nagabaton sa akon, siling sang Ginuo.”3
Nagasaksi ako nga ang mga yabi sang priesthood ginpanumbalik kay Propetang Joseph Smith. Ang mga alagad sang Ginuo nagpakita halin sa langit agud ipanumbalik ang priesthood para sa dalagko nga mga hitabo nga ginpahayag kag matabo sa palaabuton. Ang Israel pagatiponon. Ang katawhan sang Ginuo mangin handa para sa Iya mahimayaon nga Ika-duha nga Pagkari. Ang Pagpanumbalik magapadayon. Ang Ginuo magapahayag sing dugang pa Niya nga mga pagbuot sa Iya mga propeta kag sa Iya mga alagad.
Mahimo nga pamatyag ninyo gamay kamo ikomparar sa dalagko nga mga pagbag-o nga pagahimuon sang Ginuo. Kon matuod ini, ginaagda ko kamo nga magpamangkot sa pangamuyo kon ano ang pagtan-aw sa inyo sang Ginuo. Kilala Niya kamo sing personal, ginhatag Niya ang priesthood sa inyo, kag ang inyo paggiho kag pagtuman sing maayo sang priesthood importante sa Iya tungod palangga Niya kamo kag nagasalig Sia sa inyo nga pakamaayuhon ninyo ang mga tawo nga palangga Niya sa Iya ngalan.
Ginapakamaayo ko kamo subong agud inyo mabatyagan ang Iya pagpalangga kag Iya pagsalig, sa ngalan sang Ginuong Jesucristo, amen.