Ano ang Nahimo sang Aton Manluluwas para sa Aton?
Ginhimo ni Jesucristo ang tanan nga kinahanglanon para sa aton pagpanglakaton sa kabuhi pakadto sa kapalaran nga ginpahamtang sa plano sang aton Amay nga Langitnon.
Sa isa ka Sabado sang gab-i nga miting sa stake conference madugay na, nakilala ko ang isa ka babayi nga nagsugid nga ang iya mga abyan nag-agda sa iya nga magbalik sa simbahan pagkatapos sang malawig nga pagkadi-aktibo, pero indi sia makapamensar sang bisan ano nga rason kon ngaa dapat sia magbalik. Agud paisugon sia, nagsiling ako, “Kon hunahunaon mo ang tanan-tanan nga nahimo sang Manluluwas para sa imo, madamo ka sang rason nga magbalik sa pagsimba kag pag-alagad sa Iya.” Nakibot ako sang nagsabat sia, “Ano ang nahimo Niya para sa akon?”
Ano ang nahimo ni Jesucristo para sa tagsa sa aton? Ginhimo Niya ang tanan nga kinahanglanon para sa aton pagpanglakaton sa kabuhi pakadto sa kapalaran nga ginpahamtang sa plano sang aton Amay nga Langitnon. Mahambal ako parte sa apat ka mayor nga bahin sinang plano. Sa tagsa sini, ang Iya Bugtong nga Anak, si Jesucristo, ang sentro nga persona. Ang motibo sini tanan amo ang “gugma sang Dios, nga nagatugob sa mga tagipusuon sang mga anak sang tawo; gani, ini ang labing tilinguhaon labaw sa tanan nga mga butang” (1 Nefi 11:22).
I.
Antes lang gid sang Domingo sang Paskwa sang Pagkabanhaw, nagakaigo ang maghambal anay parte sa Pagkabanhaw ni Jesucristo. Ang Pagkabanhaw halin sa minatay ang makapaumpaw nga personal nga haligi sang aton pagtuo. Nagahatag ini sang kahulugan sa aton doktrina, inspirasyon sa aton pamatasan, kag paglaum para sa aton palaabuton.
Bangod nagapati kita sa paglaragway sang Biblia kag Libro ni Mormon sang literal nga Pagkabanhaw ni Jesucristo, ginabaton man naton ang madamo nga mga pinanudlo sa balaan nga mga kasulatan nga ang pareho man nga pagkabanhaw magaabot sa tanan nga tawo nga nagkabuhi sa sini nga kallibutan.1 Pareho sa gintudlo ni Jesus, “bangud nga ako nagakabuhi, kamo magakabuhi man” (Juan 14:19). Kag ang Iya Apostoles nagtudlo nga “ang mga patay banhawon nga di madinulunton” kag “magsuklob ining madinulunton sang pagkadimadinulunton” (1 Mga Taga-Corinto 15:52, 54).
Apang ang Pagkabanhaw nagahatag sa aton sing labaw pa sangsa sining pasalig sang imortalidad. Ginabag-o sini ang aton panglantaw sa tawhanon nga kabuhi.
Ang Pagkabanhaw nagahatag sa aton sang panan-awon kag kusog nga malampuwasan ang mga hangkat sang kabuhi nga ginaatubang sang tagsa sa aton kag sinang aton mga ginapalangga. Nagahatag ini sa aton sang bag-o nga panan-aw sang aton mga kakulangan sa pisikal, sa kaisipan, ukon emosyon nga naangkon sa pagkabun-ag ukon durante nga nagakabuhi. Nagahatag ini sa aton sang kusog sa pagbatas sang mga kalisud, mga kapierdihan, kag mga kapaslawan. Bangod ang tagsa sa aton sigurado nga mabanhaw, nakahibalo kita nga ining dutan-on nga mga kakulangan kag upang temporaryo lamang.
Ang Pagkabanhaw nagahatag man sa aton sing gamhanan nga motibo nga tumanon ang mga kasugoan sang Dios mientras nagakabuhi kita. Kon magbangon kita halin sa minatay kag magkadto sa ginpropesiya sa aton nga Katapusan nga Paghukom, luyag naton nga mangin bagay sa pinakamanami nga mga bugay nga ginpromisa sa nabanhaw nga mga tinuga.2
Dugang pa, ang promisa nga ang Pagkabanhaw sarang maglakip sang oportunidad nga makaupod ang mga miyembro sang aton pamilya—bana, asawa, kabataan, ginikanan, kag kaliwatan—isa ka gamhanan nga pagpaisog nga tumanon naton ang aton mga responsibilidad sa pamilya sa sining kabuhi. Nagabulig man ini sa aton nga mag-updanay sa gugma sa sining kabuhi, kag nagapaumpaw sa aton sa kamatayon sang aton mga pinalangga. Nakahibalo kita nga ining pagbinulagay sa kabuhi temporaryo lamang, kag nagapaabot kita sang malipayon nga pagtilipon kag pag-inupdanay sa palaabuton. Ang Pagkabanhaw nagahatag sa aton sang paglaum kag kusog nga mangin pasensyoso samtang nagahulat kita. Ginahanda man kita sini nga may kaisog kag dignidad nga atubangon ang aton kaugalingon nga kamatayon—bisan pa ang kamatayon nga mahimo tawgon hilaw.
Ining tanan nga epekto sang Pagkabanhaw kabahin sang una nga sabat sa pamangkot “Ano ang nahimo ni Jesucristo para sa akon?”
II.
Para sa kalabanan sa aton, ang oportunidad nga mapatawad sang aton mga sala amo ang mayor nga kahulugan sang Pagbayad-Sala ni Jesucristo. Sa pagsimba, maligdong kita nga nagakanta:
Ang aton Manluluwas kag Manunubos nagbatas sang di-matungkad nga pag-antos agud mangin halad para sa mga sala sang tanan nga tawo nga magahinulsol. Ining nagabayad-sala nga sakripisyo naghatag sang pinakamataas nga kaayohan, ang cordero nga wala sing kasawayan, kabaylo sang tuman nga kalainan, ang mga sala sang bilog nga kalibutan. Nagbukas ini sang kahigayonan para sa tagsa sa aton nga matinloan sang aton personal nga mga sala agud nga mabaton kita liwat sa presensya sang Dios, ang aton Wala’y Katapusan nga Amay. Ining kahigayonan maangkon sang tanan nga mga anak sang Dios Sa pagsimba, nagakanta kita:
Ako na’bulong sa Iya trono nanaog
Tabangan kalag sang subong kong’ masuayon,
Nga sia maghatag dakong gugma sa subong ko.4
Ining dalayawon kag indi matungkad nga epekto sang Pagbayad-Sala ni Jesucristo nabase sa gugma sang Dios sa tagsa sa aton. Nagapamatuod ini sang Iya pahayag nga “ang bili sang mga kalag”—ang tagsa-tagsa—“dako sa panan-awan sang Dios” (Doktrina kag mga Kasugtanan 18:10). Sa Biblia, ginpaathag ini ni Jesucristo tuhoy sa paghigugma sang aton Amay nga Langitnon: “Kay ginhigugma gid sang Dios ang kalibutan sa bagay nga ginhatag niya ang iya bugtong nga Anak, agud nga ang bisan sin-o nga magtuo sa iya indi mawala kundi may kabuhi nga walay katapusan” (Juan 3:16). Sa moderno nga rebelasyon, ang aton Manunubos nga si Jesucristo, nagpahayag nga Sia “naghigugma gid sang kalibutan sa bagay nga ginhatag niya ang iya kaugalingon nga kabuhi, agud nga ang tanan nga magpati sa iya mangin mga anak sang Dios” (Doktrina kag mga Kasugtanan 34:3).
Gani, makatilingala bala, nga ang Libro ni Mormon: Isa pa ka Katipan nahanungod kay Cristo nagahingapos sa panudlo nga agud mangin “himpit” kag “ginpakabalaan kay Cristo,” dapat naton “palanggaon ang Dios sa [aton] bug-os nga ikasarang, kaisipan kag kusog”? (Moroni 10:32–33). Ang Iya plano nga ginapahulag sang gugma dapat batunon nga may gugma.
III.
Ano pa gid ang nahimo sang aton Manluluwas, nga si Jesucristo, para sa aton? Paagi sa panudlo sang Iya mga propeta kag paagi sa Iya personal nga pag-alagad, si Jesus nagtudlo sa aton sang plano sang kaluwasan. Ining plano nagalakip sang Pagtuga, sang katuyuan sang kabuhi, sang kakinahanglanon sang oposisyon, kag dulot sang kahilwayan sa pagpili. Gintudloan man Niya kita sang mga kasugoan kag mga kasugtanan nga kinahanglan naton tumanon kag sang mga ordinansa nga kinahanglan naton maeksperiyensyahan agud makabalik kita sa aton langitnon nga mga ginikanan.
Si Biblia, mabasa naton ang Iya panudlo: “Ako amo ang kapawa sa kalibutan; ang nagasunod sa akon indi maglakat sa kadudulman, kundi may kapawa nga nagahatag sang kabuhi” (Juan 8:12). Kag sa moderno nga rebelasyon, mabasa naton, “Tan-awa, ako si Jesucristo, … ang kasanag nga indi matago sa dulom” (Doktrina kag mga Kasugtanan 14:9). Kon sundon naton ang Iya mga panudlo, ginaiwagan Niya ang aton alagyan sa sining kabuhi kag ginasiguro ang aton kapalaran sa kabuhi nga madason.
Bangod palangga Niya kita, ginahangkat Niya kita nga magtutok sa Iya imbes nga sa mga butang sining kalibutan. Sa Iya talalupangdon nga sermon parte sa tinapay sang kabuhi, si Jesus nagtudlo nga indi kita dapat mangin kabahin sinang mga nagakaganyat sa mga butang sang kalibutan—mga butang nga nagasakdag sang kabuhi sa duta pero wala nagahatag sang sustansya para sa kabuhi nga wala’y katapusan.5 Sa pangagda ni Jesus sa aton sing liwat-liwat, “Sunod kamo sa akon.”6
IV.
Sa katapusan, ang Libro ni Mormon nagatudlo nga bilang kabahin sang Iya Pagbayad-Sala, si Jesucristo “[nag]-antos sang kasakit kag mga kapipit-an kag mga pagsulay sang tagsa ka sahi; kag ini agud nga ang pulong mahimo nga matuman nga nagasiling nga dalhon niya sa iya kaugalingon ang mga kasakit kag mga balatian sang iya katawhan” (Alma 7:11).
Ngaa gin-antos sang aton Manluluwas ining tawhanon nga mga kabudlayan “sang tagsa ka sahi”? Ginpaathag ni Alma, “Kag dalhon niya sa iya kaugalingon ang ila mga kahuyangan, agud ang iya tagipusuon mahimo nga mapuno sang kaawa, suno sa unod, agud mahimo niya nga mahibal-an suno sa unod kon paano magtabang sa iya katawhan suno sa ila mga kahuyangan” (Alma 7:12).
Ang aton Manluluwas nakabatyag kag nakahibalo sang aton mga pagsulay, aton mga paghimakas, aton mga hibubun-ot, kag aton mga pag-antos, kay kinabubut-on Niya nga gin-agyan ini tanan bilang kabahin sang Iya Pagbayad-Sala. Ang iban nga balaan nga mga kasulatan nagapamatuod sini. Ang Bag-ong Katipan nagapahayag, “Kay bangod nakaantos sia kag ginsulay, sarang sia makatabang sa mga ginasulay” (Mga Hebreo 2:18). Si Isaias nagatudlo, “Dili ka mahadlok; kay ako magaupod sa imo: … palig-unon ko ikaw; huo, buligan ko ikaw” (Isaias 41:10). Dapat dumdumon sang tanan nga nagaantos sing bisan ano nga sahi sang tawhanon nga kahuyang nga ang aton Manluluwas nag-agi man sinang sahi sang kasakit, kag paagi sa Iya Pagbayad-Sala, nagatanyag Sia sa tagsa sa aton sang kabakod nga madala ini.
Ang Propeta nga si Joseph Smith napalip-ot sini tanan sa aton ikatatlo nga artikulo sang pagtuo: “Nagapati kami nga paagi sa Pagbayad-sala ni Cristo, ang tanan nga katawhan sarang maluwas, paagi sa pagtuman sang mga kasugoan kag mga ordinansa sang Ebanghelyo.”
“Ano ang nahimo ni Jesucristo para sa akon?” pamangkot sinang sister. Sa idalom sang plano sang aton Amay nga Langitnon, Sia “nagtuga sang kalangitan kag sang duta” (Doktrina kag mga Kasugtanan 14:9) agud nga ang tagsa sa aton makaangkon sang tawhanon nga eksperiyensya nga kinahanglanon agud malab-ot ang aton diosnon nga kapalaran. Bilang bahin sang plano sang Amay, ang Pagkabanhaw ni Jesucristo nagdaug sang kamatayon agud sigurohon para sa tagsa sa aton ang kawala’y kamatayon. Ang nagabayad-sala nga sakripisyo ni Jesucristo nagahatag sa tagsa sa aton sang oportunidad nga maghinulsol sang aton mga sala kag magbalik nga matinlo sa aton langitnon nga puluy-an. Ang Iya mga kasugoan kag mga kasugtanan nagapakita sa aton sang alagyan, kag ang Iya priesthood nagahatag sang awtoridad sa paghikot sang mga ordinansa nga kinahanglanon agud malab-ot inang kapalaran. Kag ang aton Manluluwas kinabubut-on nga nag-agi sa tanan nga tawhanon nga kasakit kag mga kahuyang agud nga mahibal-an Niya kon paano kita pabakuron sa aton mga kasakit.
Si Jesucristo naghimo sini tanan bangod palangga Niya ang tanan nga mga anak sang Dios. Ang pagpalangga amo ang motibo para sini tanan, kag amo na ini ngadaan halin pa sa ginsuguran. Ang Dios naghambal sa aton sa moderno nga rebelasyon nga “gintuga niya ang … lalaki kag babayi, sa iya kaugalingon nga dagway … ; kag ginhatagan sila sang mga kasugoan nga higugmaon kag alagaran nila sia” (Doktrina kag mga Kasugtanan 20:18–19).
Nagasaksi ako sa sini tanan kag nagapangamuyo nga kabay dumdumon naton tanan kon ano ang nahimo sang aton Manluluwas para sa tagsa sa aton kag nga aton Sia palanggaon kag alagaran, sa ngalan ni Jesucristo, amen.