Pagtudlo sa Paagi sang Manluluwas
Ang responsibilidad ara sa tagsa sa aton nga sundon ang halimbawa sang Agalon kag magtudlo pareho sa Iya.
Pinasahi nga mga Manunudlo
Sang nagligad nga binulan, isa ko ka klasmeyt sadto halin sa akon banwa nga Overton, Nevada, nagpanugyan nga maghanda kami sang pamaskwa para sa amon pinalangga nga manunudlo sa kindergarten, nga sang nagligad lang nagsaulog sang iya ika-98 nga kaadlawan. Gintudloan niya kami nga mangin mabuot, sang importansya sang pagtulog, sang kanamit sang gatas kag biskwit, kag magpalanggaanay. Salamat, Sister Davis, bangod manami ka kaayo nga manunudlo.
May isa pa gid ako ka pinasahi nga manunudlo samtang nag-eskwela ako sa Ricks College sang una. Nagahanda ako sadto nga magmisyon kag nahunahuna ko nga makabulig ang magtambong sa klase sang pagpanghanda para sa misyon. Ang akon naeksperiyensyahan nagbag-o sang akon kabuhi.
Halin sa una nga adlaw sang klase, narealisar ko nga ara ako sa presensya sang batid nga manunudlo. Ang manunudlo amo si Brother F. Melvin Hammond. Nakahibalo ako nga palangga ni Brother F. Melvin Hammond ang Ginuo kag palangga niya ako. Makita ko ini sa iya guya kag mabatian ini sa iya tingug. Kon magtudlo sia, ginapasanag sang Espiritu ang akon kaisipan. Nagtudlo sia sang doktrina, pero gin-agda niya man ako nga magtuon sini nga ako lang. Ang ina nga pangagda nakabulig sa akon nga maintiendihan ang akon responsibilidad nga tun-an mismo ang doktrina sang Ginuo. Ang ina nga eksperiyensya nagbag-o sang akon kabuhi sa katubtuban. Salamat, Brother Hammond, sa pagtudlo sa paagi sang Manluluwas.
Mga kauturan, ang kada isa dapat nga makaagom sini nga klase sang eksperiyensya sa pagtuon pareho sa puluy-an kag sa simbahan.
Ang pauna sa Dali, Magsunod sa Akon nagapakita kon ano ang mahimo sang pagtudlo sa paagi ni Cristo. “Ang katuyuan sang tanan nga pagtuon sang ebanghelyo kag pagtudlo,” ginasiling sini, “amo ang padalumon ang aton pagkahaylo (conversion) kay Jesucristo kag buligan kita nga mangin mas pareho sa Iya. … Pero ang klase sang pagtuon sang ebanghelyo nga nagapabakod sang aton pagtuo kag nagadala sang milagro sang pagbag-o wala nagakatabo sa gilayon. Nagalab-ot ini sa gwa [sang] hulot-klasehan padulong sa tagipusuon kag puluy-an sang isa ka indibidwal.”1
Ginapakita sa balaan nga mga kasulatan nga dako gid ang epekto kag lapnag kaayo ang pag-alagad sang Manluluwas sa dumaan nga Amerika nga “ang katawhan nahaylo tanan sa Ginuo, sa bug-os nga kadaygan sang kadutaan, alangay nga mga Nefinhon kag mga Lamanhon, kag wala sing mga pagbinaisay kag mga pagsinuay sa tunga nila, kag ang tagsa katawo nakigbagay sing matarong ang isa sa isa.”2
Paano ang aton pagtudlo makahimo sang amo man nga epekto sa aton mga pinalangga? Paano kita magtudlo nga mas pareho sa Manluluwas kag makabulig sa iban nga mahaylo sing lubos? Tuguti ako nga hatagan kamo sang pila ka panugyan.
Sunda ang Manluluwas
Una sa tanan, dapat may inisyatibo kamo nga tun-an ang tanan nga inyo masarangan parte sa Puno nga Manunudlo Mismo. Paano Sia nagpakita sang pagpalangga sa iban? Ano ang ila nabatyagan sang nagtudlo Sia? Ano ang Iya gintudlo? Ano ang Iya mga ginapaabot sa Iya mga gintudloan? Pagkatapos mo nga hunahunaon ang mga pamangkot pareho sini, usisaa kag ipasanto ang imo paagi sang pagtudlo nga mangin mas pareho sa Iya.
Ang Simbahan nagabutang sang madamo nga materyales sa pagtudlo sa Librarya sang Ebanghelyo nga app kag sa ChurchofJesusChrist.org. Isa sining materyales ginatig-ulohan nga Teaching in the Savior’s Way. Ginaagda ko kamo nga basahon kag tun-an ang tagsa ka pulong sini. Ang mga prinsipyo sini magabulig sa inyo sa inyo pagtinguha nga mangin mas Cristohanon sa inyo pagtudlo.
Ipagwa ang Gahum sang mga Pamilya
Ang masunod ko nga panugyan malaragway paagi sa akon eksperiyensya sang nagligad nga binulan sang nagbisita ako sa akon suod nga abyan. Mabatian ko ang iya asawa sa sulod nga may ginasugilanon, gani nagpaalam na lang ako agud makabalik sia sa iya pamilya.
Pagligad sang mas o menos isa ka oras nabaton ko ining mensahe sa text halin sa iya mapinalanggaon nga asawa: “Brother Newman, salamat sa pagkadto. Dapat ginpasulod ka namon, pero luyag ko ipaambit sa imo kon ano ang ginahimo namon. Humalin pa sang pandemya ginahambalan namon ang Dali, Magsunod sa Akon upod sang amon hamtong nga kabataan kada Domingo sa Zoom. Matuod gid nga nagatuga ini sing mga milagro. Daw una ini nga tion nga ang amon anak nga babayi nakabasa sang Libro ni Mormon nga sia lang. Karon ang katapusan nga leksyon sa Libro ni Mormon, kag manugtapos na kami sang nag-abot ka. … Siling ko basi interesado ka nga mabal-an kon paano ang Dali, Magsunod sa Akon, ang Zoom, kag ang pandemya naghatag sang oportunidad sa husto nga tion agud magbag-o ang isa ka tagipusuon. … Nagakatingala ako kon pila ka magagmay nga mga milagro ang nagakatabo sa sining mabudlay nga tion.”
Para sa akon isa ini ka katumanan sang promisa nga ginhimo ni Pangulong Russell M. Nelson sang Oktubre 2018. Nagsiling sia nga ang nasentro sa puluy-an, suportado sang Simbahan nga pagtuon sang ebanghelyo “may potensyal sa pagpa-gwa sang gahum sang mga pamilya, samtang ang tagsa ka pamilya matutom kag mahinalungon nga nagatuman agud himuon ang ila puluy-an nga isa ka santuaryo sang pagtuo. Ginapromisa ko nga samtang matutom ninyo nga ginapanami ang inyo puluy-an agud mangin sentro sang pagtuon sang ebanghelyo, sa kadugayan ang inyo mga Adlaw nga Inugpahuway matuod nga mangin makalilipay. Ang inyo kabataan mangin malipayon nga magtuon kag magpangabuhi sang mga pinanudlo sang Manluluwas. … Ang mga pagbag-o sa inyo pamilya mangin talalupangdon kag dalayon.”3 Daw ano katahum nga pangako!
Agud matuod nga makapabag-o sing kabuhi, ang pagkahaylo kay Jesucristo kinahanglan maglakip sang bug-os naton nga kalag kag mag-impluwensya sang tagsa ka bahin sang aton kabuhi. Amo ini kon ngaa kinahanglan nakatutok ini sa sentro sang aton mga kabuhi—aton mga pamilya kag mga puluy-an.
Tandai Nga Personal Ang Pagkahaylo
Ang akon katapusan nga panugyan amo nga tandai nga ang pagkahaylo kinahanglan maghalin sa sulod. Pareho sa ginlaragway sa paanggid sang napulo ka ulay, indi kita puwede maghatag sa iban sang lana sang aton pagkahaylo bisan gusto pa naton. Suno sa gintudlo ni Elder David A. Bednar: “Ining bilidhon nga lana matigayon sing tinag-isa-isa ka tulo … sing mapasensyahon kag dalayon. Wala sing laktod; indi mahimo ang dinali-dali nga paghanda.”4
Ang Dali, Magsunod sa Akon nabase sa sina nga kamatuoran. Ginakomparar ko ini sa anghel nga nagbulig kay Nefi nga matun-an ang parte kay Jesucristo paagi sa pagsiling, “Tuloka!”5 Pareho sinang anghel, ang Dali, Magsunod sa Akon nagaagda sa aton nga usisaon ang balaan nga mga kasulatan kag ang mga pulong sang moderno nga mga propeta agud makilala ang Manluluwas kag pamatian Sia. Pareho kay Nefi, personal kita nga tuytuyan sang Espiritu samtang nagabasa kag nagabinagbinag sang pulong sang Dios. Ang Dali, Magsunod sa Akon amo ang lulumpatan nga nagabulig sa tagsa sa aton nga magsalom sing madalom sa tubig nga buhi sang doktrina ni Cristo.
Ang responsibilidad sang isa ka ginikanan kaanggid man sa madamo nga paagi. Ang kabataan nagapanubli sing madamo nga butang gikan sa ila mga ginikanan, pero ang testimonya indi kalakip sa mga ini. Indi naton puwede mahatag ang testimonya sa aton kabataan pareho nga indi naton mapilit ang liso nga magtubo. Apang makahatag kita sang nagapabaskog nga palibot, nga may maayong duta, wala sing mga tunok nga “nagalumos sang pulong.” Mahimo kita magtinguha sa paghimo sang maayo nga mga kahimtangan agud nga ang aton mga kabataan—kag iban nga aton ginapalangga—makasalapo sang lugar para sa liso, “[makapamati] sang pulong, kag [makahangop] sini”6 kag marealisar sa ila kaugalingon “nga ang binhi maayo.”7
Pila ka tuig na ang nagligad, ako kag akon anak nga si Jack nakaangkon sang oportunidad nga maghampang sa Old Course sa St. Andrews sa Scotland, sa diin nagsugod ang hampang nga golf. Makawiwili gid! Sang pagbalik ko gintilawan ko nga isugid sa iban kon ano kamakahalawhaw sang akon eksperiyensya. Pero indi ko mahimo. Ang mga litrato, video, kag ang akon pinakamanami nga paglaragway kulang gid kaayo. Sa ulihi narealisar ko nga ang paagi lang gid agud mabal-an sang iban ang katahum sang St. Andrews amo nga maeksperiyensyahan ini—nga makita ang malapad nga ginahampangan sing golf, mahaklo ang hangin, mabatyagan ang hangin sa ila guya, kag mahampak ang bola sang golf pakadto sa nagaluhob nga bahin sang duta kag sa madabong nga mga tanom nga dira gid kami sagad.
Amo man sini sa pulong sang Dios. Matudlo naton ini, mawali naton ini, mapaathag naton sini. Makasugilanon kita parte sini, malaragway naton ini, pwede man gani kita magpamatuod parte sini. Apang tubtob nga mabatyagan sang isa ka tawo ang sagrado nga pulong sang Dios nga nagatulo sa iya kalag pareho sang tun-og halin sa langit paagi sa gahum sang Espiritu,8 ini daw pareho lang sa pagtan-aw sa postcard ukon sa mga litrato sang pagbakasyon sang iban nga tawo. Kinahanglan ikaw mismo ang magkadto didto. Ang pagkahaylo isa ka personal nga pagpanglakaton—pagpanglakaton sa pagtipon.
Ang tanan nga nagatudlo sa puluy-an kag sa simbahan makahatag sa iban sang oportunidad nga makaangkon sang ila kaugalingon nga espirituhanon nga mga eksperiyensya. Paagi sining mga eksperiyensya, ila “mahibal-an ang kamatuoran sang tanan nga butang” sa ila mga kaugalingon.9 Si Pangulong Nelson nagtudlo, “Kon may sinsero kamo nga mga pamangkot parte sa ebanghelyo ukon sa Simbahan, sa inyo pagpili nga tugotan ang Dios nga magpangibabaw, tuytoyan kamo nga makita kag mahangpan ang bug-os, wala katapusan nga mga kamaturoran nga magagiya sa inyo kabuhi kag magabulig sa inyo nga magpabilin nga malig-on sa dalan sang kasugtanan.”10
Pauswagon Sing Bug-os Ang Pagtudlo
Ginaagda ko ang mga lider kag mga manunudlo sa tagsa ka organisasyon sang Simbahan nga maghambalanay upod sa mga ginikanan kag mga lamharon agud pauswagon sing lubos ang pagtudlo sa tagsa ka lebel—sa mga stake, sa mga ward, kag sa mga puluy-an. Mahimo ini paagi sa pagtudlo sang doktrina kag pag-agda sa paghinambalanay nga puno-sang-Espiritu parte sa mga kamatuoran nga gintudlo sang Balaan nga Espiritu sa aton sa malinong nga mga tinion sang aton personal nga pagtuon.
Mahal kong mga abyan kay Cristo, ang responsibilidad ara sa tagsa sa aton nga sundon ang halimbawa sang Agalon kag magtudlo pareho sa Iya. Ang Iya paagi amo ang matuod nga paagi! Kon sundon naton Sia “kon sia magapakita mangin subong kita sa iya, kay makita naton sia subong nga sia gid; agud mahimo naton nga maangkon ini nga paglaum; agud maputli kita bisan subong nga sia putli.”11 Sa ngalan Niya nga nabanhaw, ang Puno nga Manunudlo Mismo nga si Jesucristo, amen.