Mga Bishop—Mga Manugpahalab sang Panong sang Ginuo

Ni Elder Quentin L. Cook

Sang Korum sang Dose ka Apostoles

Ang bishop may pinakaimportante nga papel sa pag-alagad bilang manugpahalab para giyahan ang ulihing-tubo padulong kay Jesucristo.

Pinalangga kong mga kauturan sa priesthood, isa sa indi malimtan nga mga linya sa pinalangga nga himno nagapamangkot, “Ang mga lamharon bala sang Sion magaluya?”¹ Ang akon hugot sa buot kag matunog nga deklarasyon bilang sabat sa sinang pamangkot amo ang “Indi!”

Para masiguro nga matuod gihapon inang sabat, nagasaksi ako sa inyo karon nga ang pagsuporta sa ulihing-tubo sa tion sang indi kinaandan nga mga hangkat kag pagsulay isa ka importante nga responsibilidad nga ginhatag sa mga ginikanan kag mga bishopric sang aton Amay nga Langitnon.² Tugoti ako nga ipakita ang importansya sang bishopric paagi sa personal nga eksperiyensya.

Sang ako deacono, nagsaylo ang amon pamilya sa bag-o nga balay sa lain nga ward. Manugsugod ako sang junior high school, gani bag-o man ang akon eskwelahan. May manami nga grupo sang pamatan-on sa korum sang mga deacono. Kalabanan sa ila mga ginikanan aktibo nga mga miyembro. Ang akon nanay aktibo kaayo; ang akon tatay maayo sa tanan nga butang pero indi aktibo nga miyembro.

Ang ikaduhang manuglaygay sa bishopric,³ si Brother Dean Eyre, isa ka matutom nga lider. Sang nagapamag-o pa ako sa bag-o nga ward, isa ka kahiwatan sang tatay-kag-anak nga lalaki ang gin-anunsyo para sa Bear Lake—mga 40 milya (65 km) ang kalayuon. Abi ko indi ako magtambong nga wala si tatay. Pero si Brother Eyre naghatag sang espesyal nga imbitasyon sa akon nga mag-upod sa iya. Mataas ang iya panglantaw kag may respeto sa aton tatay kag ginsulit ang importansya sang akon kahigayunan nga maupod ang iban pa nga mga miyembro sa korum sang deacono. Gani nagdesisyon ako nga mag-upod kay Brother Eyre, kag kanami sang akon eksperiensya.

Si Brother Eyre isa ka maayo nga ehemplo sang Cristohanon nga pagpalangga sa pagtuman sang responsibilidad sang bishopric nga suportahan ang mga ginikanan sa pagbantay kag pag-atipan sang mga lamharon. Ginhatagan niya ako sang manami nga panugod sa sining bag-o nga ward kag nangin akon manunudlo.

Pila ka bulan antes ako maglakat sa misyon sang 1960, napatay si Brother Eyre tungod sa kanser sa edad nga 39. Nabilin ang iya asawa kag ila lima ka kabataan, tanan manubo sangsa 16 ang pangidaron. Ang iya pinakamagulang nga mga anak nga si Richard kag Christ Eyre, nagpasalig sa akon nga bisan wala ang ila tatay, ginasuportahan sila sang mga bishopric kag ginabantayan sila kag ang ila mga manghod nga may Cristohanon nga pagpalangga, nga akon gid ginpasalamatan.

Ara gid sa mga ginikanan ang mayor nga responsibilidad para sa ila mga pamilya.⁴ Ang mga pangulohan sang korum nagahatag man sang kinahanglanon nga suporta kag giya sa mga miyembro sang korum paagi sa pagbulig sa ila sa pagpasaka sang mga tulumanon kag gahum sang Aaronic Priesthood sa sentro sang ila mga kabuhi.⁵

Litrato

Ang manugpahalab upod ang mga karnero

Karon ang akon katuyuan amo nga tutokan ang mga bishop kag ang ila mga manuglaygay, nga bagay lang tawgon nga “mga manugpahalab sang panong sang Ginuo”—nga ginahatagan importansya ang pagkamanugpahalab sang ulihing-tubo.⁶ Talalupangdon nga gintumod ni Apostoles Pedro si Jesucristo bilang ang “Manugpahalab kag Manugtatap sang inyo mga kalag.”⁷

Ang bishop may lima ka mayor nga responsibilidad sa pagpanguna sa isa ka ward:

Sia ang nagapamuno nga mataas nga pari sa ward.⁸
Sia ang pangulo sang Aaronic Priesthood.⁹
Sia ang komon nga hukom.¹⁰
Ginapakig-angot niya ang buluhaton sang kaluwasan kag pagkahitaas, lakip na ang pag-atipan sang mga nagakinahanglan.¹¹
Kag ginadumalahan niya ang mga rekord, gasto, kag ang paggamit sang simbahan.¹²

Sa iya hilihuton bilang nagapamuno nga mataas nga pari, ang bishop amo ang “espirituhanon nga lider”¹³ sang ward. Sia isa ka “matutom nga disipulo ni Jesucristo.”¹⁴

Dugang pa, “ang bishop ang nagapakig-angot sang buluhaton sang kaluwasan kag pagkahitaas sa ward.”¹⁵ Ang bishop dapat nga magtakay sang adlaw-adlaw nga responsibilidad sang pagpaambit sang ebanghelyo, pagpabakod sang bag-o kag nagabalik nga mga miyembro, pagminister, kag buluhaton sa templo kag family history sa mga pangulohan sang elders quorum kag Relief Society.¹⁶ Ginapakig-angot sang bishop ining buluhaton sa konseho sang ward kag sa konseho sang mga lamharon sa ward.

Ang bishop may pinakaimportante nga papel sa pag-alagad bilang manugpahalab para giyahan ang ulihing-tubo, lakip na ang hubin nga mga single adult, padulong kay Jesucristo.¹⁷ Si Pangulong Russell M. Nelson nagpatalupangod sang pinakaimportante nga papel sang bishop kag sang iya mga manuglaygay. Iya gintudlo nga ang ila “una kag mayor nga responsibilidad amo ang pag-atipan sang mga lamharon nga lalaki kag lamharon nga babayi sa [ila] ward.”¹⁸ Ginasuportahan sang bishopric ang mga ginikanan sa pagbantay kag pagpadako sang kabataan kag mga lamharon sa ward. Ang bishop kag ang pangulo sang Young Women sa ward nagahambalanay. Ginatinguhaan nila nga buligan ang mga lamharon nga ipangabuhi ang mga sulundan sa Para sa Kusog sang mga Lamharon, magkalipikar sa pagbaton sang mga ordinansa, kag maghimo kag magtuman sang sagrado nga mga kasugtanan.

Siguro mamangkot kamo, “Ngaa ang bishop ginasugo nga maghatag sang dako kaayo nga tion upod sa mga lamharon?” Gin-organisar sang Ginuo ang Iya Simbahan sa pagtuman sang importante nga mga prayoridad. Tungod sini, ang organisasyon sang Iya Simbahan may istraktura kon sa diin ang bishop may duha ka responsibilidad. May doktrinal sia nga responsibilidad sa ward sa kabilugan, pero may pat-od man sia nga doctrinal nga responsibilidad sa korum sang mga pari.¹⁹

Ang mga pamatan-on nga priest kag ang bataon nga mga babayi sa pareho nga edad ara sa pinakaimportante nga tion sang ila mga kabuhi kag pagtubo. Sa sulod sang malip-ot nga panahon, nagahimo sila sang mga desisyon nga may dako nga mga resulta sa bug-os-kabuhi. Diri nila mahibal-an kon bala makasulod sila sa templo, mag-alagad sa misyon,²⁰ magtinguha nga makasal sa templo, kag maghanda para sa buluhaton sa ila kabuhi. Ining mga desisyon, kon nahimo na, may dako nga espirituhanon kag praktikal nga mga resulta sa ila mga kabuhi. Mga bishop, palihog hibal-a nga ang tama kalip-ot nga tion nga ginhatag sa lamharon nga pari, bataon nga babayi, ukon bataon nga hamtong makabulig sa ila nga maintiendihan ang gahum nga pwede nila lab-uton paagi sa Pagbayad-Sala ni Jesucristo. Makahatag ini sang panan-awon nga may dako nga impluwensya sa bilog nila nga kabuhi.

Litrato

Bishop Moa Mahe kag iya mga manuglaygay

Isa sa pinakamaayo nga halimbawa nga nakita ko sa isa ka bishop nga naghatag sang amo sini nga panan-awon sa iya lamharon amo si Bishop Moa Mahe. Gintawag sia nga mangin una nga bishop sang San Francisco Tongan Ward.²¹ Naghalin sia sa Vava‘u, Tonga. Ang iya ward ara malapit sa hulugpaan sang San Francisco, California, kon diin sia nagaobra.²²

Litrato

Tongan nga ward

Madamo kaayo sang lamharon sa ward, kalabanan halin sa mga pamilya nga bag-o lang nagsaylo sa Estados Unidos. Wala lang sila gintudloan ni Bishop Mahe sa pulong kag sa halimbawa kon paano mangin matarong nga mga disipulo ni Jesucristo, kundi ginpakita man sa ila ang panan-awon kon ano ang ila mahimo malab-utan kag ginbuligan sila nga maghanda para sa templo, mga misyon, sa edukasyon, kag trabaho. Nagserbisyo sia sing halos walo ka tuig, kag ang iya mga damgo kag handum para sa mga lamharon natuman.

Halos 90 porsyento sang mga lamharon nga lalaki sa mga korum sang Aaronic Priesthood nagserbe sa mga misyon. Kinse ka mga lamharon nga lalaki kag babayi ang una nga mga miyembro sang ila mga pamilya nga nakalab-ot sa kolehiyo.²³ Ginpangilala niya sang prinsipal sang lokal nga hayskul (nga indi sa aton pagtuo), kag nag-abyanay sila kag nakig-angot kon paano nila mabuligan ang tagsa ka lamharon nga malab-ot ang makahulugan nga mga lalab-uton kag malampuwasan ang mga problema. Siling sang prinsipal sa akon nga ginbuligan sia ni Bishop Mahe sa mga imigrante sa tanan nga pagtuluohan nga ginabudlayan. Nahibal-an sang mga lamharon nga palangga sila sang bishop.

Ang masubo, napatay si Bishop Mahe samtang nagaalagad bilang bishop. Indi ko gid malipatan ang iya makatalandog kag makainspirar nga serbisyo sa lubong. Kadamo sang nagtambong. Ang koro nalakipan sang masobra 35 ka matinuohon nga mga lamharon nga nag-alagad sa misyon ukon nagaeskwela sa kolehiyo kag mga lamharon sang tiyempo sang iya pagserbisyo bilang bishop. Isa sa manughambal ang nagpahayag sang madalom nga kapasalamatan sang mga lamharon kag mga hubin nga hamtong sa iya ward. Ginpasidunggan niya si Bishop Mahe sa panan-awon nga iya ginhatag sa ila sa paghanda para sa kabuhi kag matarong nga pag-alagad. Pero ang pinakaimportante, ginbuligan sila ni Bishop Mahe nga magtukod sang pagtuo kay Ginuong Jesucristo bilang pundasyon sang ila mga kabuhi.

Karon, mga bishop, kon diin man kamo nagaserbisyo, sa inyo mga interbyu kag iban pa nga mga inter-aksyon sa iban, makahatag kamo sinang klase sang panan-awon kag makapatubo sang pagtuo kay Jesucristo. Makatanyag kamo sang gamhanan nga mga imbitasyon sa pagbag-o sang pamatasan, mahanda sila para sa pagpangabuhi, kag papagsikon sila nga magpabilin sa dalan sang kasugtanan.

Dugang pa, mahimo ninyo buligan ang pila sa mga lamharon nga may mga problema upod sa mga ginikanan sa mga bagay nga daw indi gid man importante.²⁴ Sa tion nga daw dako gid ang problema sang mga lamharon sa ila mga ginikanan, ang tawo nga nagapamuno sa ila korum kag kon diin sina nasakop sa simbahan amo man ang tawo nga kadtuhan sang ila mga ginikanan para sa mga rekomendasyon sa templo. Ginabutang sini ang bishop sa pinasahi nga posisyon sa paglaygay sang pareho lamharon kag sang ila mga ginikanan kon ang pagginamo nagtuga na sang paglainay. Ang mga bishop makabulig tan-aw sang mga butang sa wala katapusan nga perspektibo kag magsolbar sang mga isyu nga mas ukon menos ang importansya. Ginarekomenda namon nga wala sang itakay sa mga bishop nga mga pamilya nga ministeran para makatutok sila sang ila tion kag kusog sa pagminister sa mga lamharon kg sa ila mga pamilya sa sining mga sitwasyon.²⁵

May nahibal-an ako nga isa ka bishop nga nakasolbar sang grabe nga inaway sa tunga sang anak nga lalaki kag sang iya mga ginikanan, nagdala sang katawhay sa balay kag nagpatubo sang dedikasyon sa ebanghelyo. Ginbuligan sang bishop ang mga ginikanan nga maintiendihan nga ang pagtinguha nga mangin disipulo ni Jesucristo mas importante pa sangsa kon paano kag kon san-o himuon ang mga hilikuton sa balay.

Agud makahatag sang mas dako nga tiyempo upod sa mga lamharon, kon sa diin man sila, lakip na sa mga kahiwatan sa eskwelahan, ginlaygayan ang mga bishop nga ihatag ang nagakaigo nga mga miting kag tion sang paglaygay sa mga hamtong. Bisan nga makalaygay ang mga bishop sa seryoso kag ginadalian nga mga butang, ginapanugyan namon nga ang pagtoka sang paglaygay sang madugay na, indi gawa ginadalian nga mga butang nga wala nagalakip sang pagtimbang sang katakos itakay sa mga miyembro sang elders quorum ukon Relief Society—masami sa mga pangulohan ukon ministering mga mga brother ukon sister. Pagagiyahan sang Espiritu ang mga lider²⁶ sa pagpili sang husto nga mga miyembro nga maghimo sining paglaygay. Atong nagabaton sining toka sa paglaygay may kinamatarong sa pagbaton sang rebelasyon. Kinahanglan nila, siyempre, nga tipigan ang impormasyon nga indi maglapta.

Ang madinumdumon nga mga lider masami nga nagasakripisyo para sa mga ulihing-tubo. Diri ginagamit sang mga miyembro sang bishopric ang kalabanan sang ila oras sa pagserbisyo-sa-Simbahan.

Karon gusto ko maghambal sang pila ka butang direkta sa mga lamharon kag dayon sa aton mga bishop.

Madamo sa inyo mga pinalangga nga lamharon ang mahimo wala sang klaro nga panan-awon kon sin-o kamo ukon sang inyo malab-utan. Pero ara kamo sa atubangan sang pinakaimportante nga mga desisyon nga inyo pagahimuon sa inyo mga kabuhi. Palihog hambali ninyo upod sang inyo mga ginikanan kag sang inyo bishop ang importante nga mga pagpili nga ara sa inyo atubang. Tugoti ang bishop nga mangin inyo abyan kag manuglaygay.

Nakahibalo kami nga may mga pagtilaw kamo kag mga tentasyon nga nagasugata sa inyo sa tanan nga direksyon. Kinahanglan naton tanan nga maghinulsol kada adlaw, pareho sang ginatudlo ni Pangulong Nelson. Palihog iistorya sa inyo bishop ang bisan ano nga butang kon diin makabulig ang komon nga hukom para matadlong ang inyo kabuhi upod sa Ginuo sa paghanda para sa “dako nga buluhaton” nga Iya gintigana para sa imo sa sining katapusan nga dispensasyon.²⁷ Pareho sang imbitasyon ni Pangulong Nelson sa inyo, palihog himoa ang inyo kaugalingon nga kalipikado nga mangin parte sang batalya sang mga lamharon sang Ginuo!²⁸

Karon mahambal ako sa inyo pinalangga nga mga bishop para sa liderato kag mga miyembro sang Simbahan. Ginapahayag namon ang dako nga kapasalamatan sa inyo. Sa mga pagbag-o nga ginpangayo sa inyo sang nagliligad lang nga tinuig, pinalangga nga mga bishop, palangga kag nagapasalamat gid kami sa inyo. Ang inyo kontribusyon sa ginharian indi halos malaragway. Ang Simbahan may 30,900 ka bishop kag branch president nga nagaalagad sa bilog nga kalibutan.²⁹ Ginatahod namon ang kada isa sa inyo.

Ang pila ka mga tinaga kag sagrado nga mga tawag nga ila ginalaragway may upod nga halos espirituhanon, indi matupungan nga kahulugan. Ang calling sang bishop amo ang ara sa pinakamataas sinang mga tinaga. Ang magserbisyo sa Ginuo sa sining ikasarang dalayawon sa madamo kaayo nga paagi. Ang pagtawag, pagsakdag, kag pagpain sang bishop isa ka indi-malimtan nga eksperiyensya. Para sa akon, tupong ini sa ilisipon lang nga mga hitabo sa kadalom kag kadako sang balatyagon nga ginapukaw sini. Daw makatupong ini sa balatyagon sang pagpakasal kag pagka-amay nga indi malaragway sa pila lang ka tinaga.³⁰

Mga bishop, ginasakdag namon kamo! Mga bishop, palangga namon kamo! Matuod gid kamo nga mga manugpahalab sang panong sang Ginuo. Indi kamo pagsikwayon sang Manluluwas sa sining sagrado nga mga tulumanon. Sa sini ako nagapamatuod, sa sining Paskwa sang Pagkabanhaw, sa ngalan ni Jesucristo, amen.