Lugar sa Dalayonan
Sa sining tion sang Paskwa sang Pagkabanhaw, ginaimbitar kita ni Jesucristo nga mangin, pareho sa Iya, isa ka maayong Samariahanon, nga himuon ang Iya Dalayonan (Iya Simbahan) nga pasilungan sang tanan
Mga kauturan, bisan pa nga nagtaliwan na sia 20 ka tuig na ang nagligad, may mga tion nga ginahidlaw ako sa akon amay. Ang Paskwa sang Pagkabanhaw nagapromisa nga makita ko sia liwat.
Sang ara ako sa graduate school sa England, nagbisita si tatay. Sa iya balatyagon bilang amay nahibal-an niya nga nahidlaw na ako sa balay.
Mahilig si tatay magpaadbenturar magluwas lang sa pagkaon. Bisan sa France, nga ginakilala sa pagkaon, masiling sia, “Makaon ta sang Chinese food.” Malawig na nga nagaserbisyo bilang patriarka sa Simbahan, si tatay espirituhanon kag maluluy-on. Isa ka gab-i, sang nag-inuwang ang mga ambulansya sa dalanon sang Paris, siling niya, “Gerrit, inang mga inuwang amo ang kapilasan sang isa ka siyudad.”
Sa sina nga biyahe, nabatyagan ko ang iban pa nga pag-inuwang kag kapilasan. Isa ka bataon nga babayi ang nagabaligya sang sorbete sa gamay nga kariton. Ang iya mga apa daw ang kadakuon lamang sa isa ka sukob sang sorbete. Sa ano kon nga rason, isa ka dako nga lalaki ang nagpalapit sa dalaga. Nga nagasinggitan kag nagapaniklod, iya gintikwang ang iya kariton, gani nagkalaula ang mga apa sang sorbete. Wala ako sing mahimo sang ginpanglapak niya ang mga apa. Madumduman ko pa ang dalaga nga nagaluhod sa dalan, nga ginatinguhaan nga salbaron ang nagkalapudpod nga apa, nga nagatululo ang luha sang kasubo sa iya guya. Indi ko malimtan ang iya hitsura, isa ka pahanumdom sang kawala sing kaluoy, kawala pag-ulikid, kakulang sang pag-intiendi nga masami naton ginahimo sa kada isa.
Sang isa pa nga hapon, malapit sa Paris, ako kag si tatay nagbisita sa kilala nga katedral sa Chartres. Si Malcolm Miller,1 isa ka kalibutanon nga eksperto parte sa sini nga katedral, nagtudlo sa tatlo ka set sang de-kolor nga kristal nga mga bintana sa Chartres. Siling niya may ginasugid ang mga ini nga istorya.
Ang una nga mga bintana nagapakita kanday Adan kag Eva nga nagabiya sang Hardin sang Eden.
Ang ikaduha nagasugid sang paanggid sang maayong Samariahanon.
Ang ikatatlo nagapakita sang Ikaduha nga Pagkari sang Ginuo.
Kon tingbon, ining mga de-kolor nga kristal nga mga bintana nagalaragway sang aton pagpanglakaton sa wala katapusan. Ginaimbitar kita sini nga abiabihon ang tanan nga may lugar sa Iya dalayonan.2
iStock.com/digitalimagination
Pareho kay Adan kag Eva, naglab-ot kita sa kalibutan sang mga sapinit kag ragiwriw.3
iStock.com/digitalimagination
Sa aton yab-ukon nga dalanon padulong sa Jerico, ginaatake kita, nagakapilasan, kag nagakabayaan sa sakit.4
Bisan pa nga dapat naton buligan ang kada isa, sa masami sa pihak kita sang dalan nagaagi, sa kon ano nga rason.
Pero, upod ang kaluoy, ang Maayong Samariahanon nagpundo kag ginpaayo ang aton mga pilas sang alak kag lana. Ang mga simbolo sang sakramento kag iban pa nga mga ordinansa, ang alak kag lana nagatudlo sa aton sa espirituhanon nga pagpang-ayo nga ara kay Jesucristo.5 Ginapasakay kita sang Maayong Samariahanon sa Iya kaugalingon nga asno ukon, sa pila ka istorya sa de-kolor nga kristal sang mga bintana, ginapas-an kita sa Iya mga abaga. Ginadala Niya kita sa dalayonan, nga nagarepresentar sang Iya Simbahan. Sa Dalayonan, siling sang Maayong Samariahanon, “Atipana sia; … ako sa akon pagbalik magabayad sa imo.”6 Ang Maayong Samariahanon, nga simbolo sang aton Manluluwas, nagapromisa nga magbalik, sa sini nga tion sa pagkahalangdon kag himaya.
iStock.com/digitalimagination
Sa sining tion sang Paskwa sang Pagkabanhaw, ginaimbitar kita ni Jesucristo nga mangin, pareho sa Iya, isa ka maayong Samariahanon, nga himuon ang Iya Dalayonan (Iya Simbahan) nga pasilungan sang tanan sa kabudlayan kag unos sa kabuhi.7 Nagahanda kita para sa Iya ginpangako nga Ikaduha nga Pagkari samtang adlaw-adlaw naton nga ginahimo sa “labing kubos sini”8 ang pareho sang himuon naton sa Iya. “Ang labing kubos sini” amo ang tagsa sa aton.
Sa aton pag-upod sa Maayong Samariahanon sa Dalayonan, matun-an naton ang lima ka butang parte kay Jesucristo kag sa aton kaugalingon.
Una, nagakadto kita sa Dalayonan bilang kita, upod ang mga kakulangan kag kapaltahan nga ara sa tagsa sa aton. Apang ang kada isa sa aton may importante nga maamot. Ang aton pagpanglakaton padulong sa Dios masami may kaupod. Nagapasakop kita bilang nagaisa nga komunidad—bisan sa pag-atubang sang mga pandemya, mga bagyo, mga sunog, mga tig-ilinit ukon sa malinong nga pagtigana sang pang-adlaw-adlaw nga mga panginahanglan. Nagabaton kita sang inspirasyon samtang nagahinambalanay kita, nagapamati sa kada tawo, lakip na sang tagsa ka sister, kag sa Espiritu.
Samtang nagabag-o ang aton mga tagipusuon kag ginabaton naton ang Iya imahe sa aton nawong,9 makita naton Sia kag ang aton kaugalingon sa Iya Simbahan. Sa Iya, makakita kita sang kaathagan, indi pagsumpakilay. Sa Iya, makakita kita sang rason nga maghimo sang maayo, rason nga mangin maayo, kag sa pagpatubo sang ikasarang nga mangin mas maayo pa gid. Sa Iya, madiskubrehan naton ang nagapadayon nga pagtuo, nagahilway nga pagkadi-maiyaiyahon, maulikdon nga pagbag-o, kag pagsalig sa Dios. Sa Iya Dalayonan, makita naton kag mapadalom ang aton personal nga relasyon sa Dios, nga aton Amay, kag kay Jesucristo.
Nagapaabot Sia sa aton nga magbulig sa paghimo sang Dalayonan nga lugar nga kinahanglan Niya nga ini mangin. Sa aton pagtanyag sang aton mga talento kag pinakamaayo nga pagpaninguha, ang Iya espirituhanon nga mga dulot magapabakod man kag magapakamaayo.10
Isa ka interpreter sa Espanyol nagsiling sa akon, “Elder Gong, nahibal-an ko paagi sa Espiritu kon ano ang imo inughambal para akon malubad,” siling sining matinuohon nga utod, “paagi sa dulot sang paghambal sang lainlain nga mga lenggwahe.”
Ang dulot sang pagtuo kag pasalig nagaabot, nga makita sa lainlain nga paagi sa lainlain nga mga sitwasyon. Isa ka pinalangga nga sister ang nakabaton sang espirituhanon nga kaumpawan sang magtaliwan ang iya bana bangud sa COVID-19. Siling niya, “Nakahibalo ako nga ako kag ang akon pinalangga nga bana magaupod liwat.” Sa lain nga sitwasyon sa COVID, isa pa ka pinalangga nga sister ang nagsiling, “Nabatyagan ko nga dapat ko magpangabay sa Ginuo kag sa mga doktor nga hatagan pa sang dutay pa nga tion ang akon bana.”
Ikaduha, ginapangabay Niya kita nga himuon ang Iya Dalayonan nga lugar sang kaayo kag kaligwa, kon sa diin pwede ang tanan magtipon, nga may lugar para sa tanan. Bilang mga disipulo ni Jesucristo, ang tanan patas, wala sang segunda-klase nga grupo.
Ang tanan ginaabiabi nga magtambong sa pang-sakramento nga mga miting, iban pa nga mga miting sa Domingo, kag sosyal nga pagtililipon.11 Ginasimba naton ang aton Manluluwas sing matinahuron, nga madinumdumon kag may konsiderasyon sa kada isa. Ginatan-aw kag ginakilala naton ang kada tawo. Nagayuhum kita, nagatupad sa mga isahanon nga nagapungko, nagapangilala, nagalakip sang bag-o nga mga miyembro, nagabalik nga kauturan, mga lamharon nga babayi kag lamharon nga lalaki, tagsa ka pinalangga nga bata sa Primary.
Nga ginabutang ang aton mga kaugalingon sa ila lugar, ginaabiabi naton ang mga abyan, mga bisita, mga bag-o saylo, masako nga mga indibidwal nga madamo sang ginasakuan. Nagapangasubo, nagakalipay, kag ara kita para sa isa kag isa. Kon magkabos kita sa aton mga handum kag nagadali, wala nakatalupangod, nagahusga, ukon may pinasulabi, nagapangayo kita sang kapatawaran sang kada isa kag nagatinguha nga mangin mas maayo.
Isa ka pamilya halin sa Africa nga nagaistar na karon sa Estados Unidos ang nagsiling, “Halin sa una nga adlaw, ang mga miyembro sa Simbahan mainabyanon kag maabiabihon. Ginpabatyag sang tanan sa amon nga kabahin kami. Wala sang nagpakanubo sa amon.” Hambal sang tatay, “Ang Balaan nga Biblia nagatudlo nga ang mga bunga sang ebanghelyo nagahalin sa mga gamot sang ebanghelyo.” “Kag ang mga misyonero,” siling sang tatay kag nanay, “gusto namon nga magdinalagko ang amon anak nga lalaki kag babayi nga pareho sadtong mga misyonero.” Mga kauturan, kabay nga mainit naton nga abiabihon ang tanan sa Iya Dalayonan.
Ikatatlo, sa Iya Dalayonan, matun-an naton nga ang pagkaperpekto ara kay Jesucristo, indi sa pagkaperpekto sang kalibutan. Indi matuod nga perpekto, ang pagkaperpekto nga “pang-Instagram” makapabatyag sa aton nga may kakulangan, nga kontrolado sang mga like, ukon pagbaton sang iban sa social media. Sa kabaliskaran, ang aton Manluluwas, nga si Jesucristo nakahibalo sang tanan parte sa aton nga indi naton gusto mahibal-an sang iban, kag palangga Niya gihapon kita. Ang Iya ebanghelyo nagahatag sing madamo nga kahigayunan nga magbag-o kag mag-uswag, nga nangin posible bangud sang Iya nagabayad-sala nga sakripisyo.12 Ginaimbitar Niya ang tagsa sa aton nga mangin maayo nga Samariahanon, nga wala nagahusga kag mas mapinatawaron sa aton mga kaugalingon kag sa kada isa, bisan samtang nagatinguna kita nga mas tumanon ang Iya mga kasuguan.
Ginabuligan naton ang aton mga kaugalingon samtang ginabuligan naton ang kada isa. Isa ka pamilya nga akon kilala nagaistar malapit sa masako nga dalan. Ang mga nagabiyahe masami nagapundo para mangayo sang bulig. Isa ka aga temprano pa nga nakabati ang pamilya sang mabaskog nga pagpanuktok sa ila pwertahan. Kapoy kag nagabalaka kon sin-o ayhan ini sa alas 2:00 a.m., namensar sila kon, sa sini nga hugada, may iban nga makabulig. Sang nagpadayon ang pagpanuktok, nabatian nila, “Sunog—may sunog sa likod sang inyo balay!” Ang Maayo nga mga Samariahanon nagabuligay.
Ikaapat, sa Iya Dalayonan, nangin bahin kita sang komunidad sa ebanghelyo nga nasentro kay Jesucristo, nga naangkla sa ginpanumbalik nga kamatuoran, buhi nga mga propeta kag mga apostoles, kag sa isa pa ka testamento nahanungod kay Jesucristo—ang Libro ni Mormon. Ginadala Niya kita sa Iya Dalayonan kag sa Iya man balay—ang balaan nga templo. Ang balay sang Ginuo isa ka lugar kon diin, pareho sa pilason nga tawo sa dalanon pakadto sa Jerico, ang Maayong Samariahanon sarang magtinlo kag magbulong sa aton, maghanda sa aton nga makabalik sa presensya sang Dios, kag mag-isa sa aton sa wala katapusan sa panimalay sang Dios. Ang Iya mga templo bukas para sa tanan nga nagapangabuhi sang Iya ebanghelyo nga may pagtuo kag pagkamatinumanon.
Ang pagkasadya sa templo nagalakip sang pag-isa sa ebanghelyo sa tunga sang lainlain nga mga legasiya, kultura, mga lenggwahe, kag mga henerasyon. Sa pagbungkag sang duta para sa Templo sang Taylorsville Utah, ang 17-anyos nga si Max Harker nagpaambit sang legasiya sang pagtuo sang pamilya nga nagsugod anum na ka henerasyon ang nagligad sa iya lolo sa lolo-sa-tuhod nga si Joseph Harker kag iya asawa nga si Susannah Sneath. Sa ginpanumbalik nga ebanghelyo ni Jesucristo, ang tagsa sa aton sarang mangin mapag-on nga kaw-id sa mga henerasyon sang aton pamilya.
Sa ulihi, ikalima, nagakasadya kita nga palangga sang Dios ang Iya mga anak sa aton lainlain nga mga ginhalinan kag mga sirkumstansya, sa tagsa ka pungsod, kabikahan, kag hinambalan, nga may lugar para sa tanan sa Iya Dalayonan.
Sa masobra 40 anyos, ang mga miyembro sang Simbahan padayon nga nagalapta sa mga nasyon. Halin sang 1998, mas madamo nga mga miyembro sang Simbahan ang nagaistar sa gwa sangsa sa sulod sang Estados Unidos kag Canada. Sa 2025, ginapaabot naton nga pareho na kadamo ang mga miyembro sang Simbahan nga nagapuyo sa Latin America kag Estados Unidos kag Canada. Ang pagtipon sang matinuohon nga mga himata ni Tatay Lehi nagatuman sang propesiya. Ang matinuohon nga mga Santos, lakip na ang sa ginplastaran sang mga pionero, nagapabilin nga pulundohan sang debosyon kag serbisyo para sa bug-os-kalibutan nga Simbahan.
Dugang pa, ang kalabanan sang hamtong mga mga miyembro sang Simbahan sa karon wala sing tiayon, balo, ukon diborsyado. Isa ini ka dako nga pagbag-o. Nagalakip ini sang masobra tunga sang aton mga kauturan sa Relief Society kag masobra tunga sang aton hamtong nga kauturan sa priesthood. Ining demograpiko nga hitabo nagapadayon sa bilog nga Simbahan halin sang 1992 kag sa Simbahan sa Estados Unidos kag Canada halin sang 2019.
Ang aton estado sa atubang sang Ginuo kag sa Iya Simbahan indi tungod sang aton estado sa kasal kundi sa aton pagtinguna nga mangin matinuohon kag isganan nga mga disipulo ni Jesucristo.13 Gusto sang mga hamtong nga kabigon nga mga hamtong kag mangin responsable kag makigbahin bilang mga hamtong. Ang mga disipulo ni Jesucristo nagagikan sa bisan diin, sa tagsa ka porma, kadakuon, duag, kag edad, ang tagsa may mga talento, matarong nga mga handum, kag dako kaayo nga mga ikasarang sa pagbugay kag pag-alagad. Adlaw-adlaw naton nga ginatinguhaan nga sundon si Jesucristo nga may pagtuo padulong sa paghinulsol14 kag nagadugay nga kalipay.
Sa sining kabuhi, kon kaisa nagahulat kita sa Ginuo. Ayhan wala pa kita makalab-ot sa gusto kag handum naton padulungan sa palaabuton. Isa ka debotado nga sister nagsiling, “Ang paghulat sing matinuohon sa Ginuo para sa Iya mga bugay isa ka balaan nga paagi sang pagkabuhi. Indi ini pagkabigon nga may kaluoy, pagpaubos sa iban, ukon paghusga kundi sang sagrado nga kadungganan.”15 Mientras, nagakabuhi kita sa karon, nga wala nagahulat kon san-o magsugod ang kabuhi.
Si Isaias nagapromisa, “Ang mga nagahulat sa Ginuo magabag-o sang ila kusog; magatimbuok sila nga may mga pakpak subong sang mga agila; magadalagan sila kag indi paglapyuon; magalakat sila kag indi pagpunawon.”16
Ang aton Maayong Samariahanon nagapromisa nga magbalik. Nagakatabo ang mga milagro kon ginaatipan naton ang kada isa pareho sa Iya himuon. Kon magpalapit kita nga may masinulub-on nga mga tagipusuon kag mahinulsulon nga mga espiritu,17 makakita kita sang tingug kay Jesucristo kag malikupan sang Iya mahinangpanon nga mga butkon sang kasigurohan.18 Ang sagrado nga mga ordinansa nagatanyag sang pagkabahin sa kasugtanan kag sang “gahum sang pagkadiosnon”19 sa pagtinlo sang pangsulod nga tuyo kag panggwa nga aksyon. Upod ang Iya mapinalanggaon nga kaayo kag pagkamainantuson, ang Iya Simbahan ang aton mangin Dalayonan.
Samtang nagahatag kita sang lugar sa Iya Dalayonan, nga ginaabiabi ang tanan, ang aton Maayong Samariahanon sarang magapaayo sa aton sa aton yab-ukon nga mga dalanon sa kabuhi. Upod ang perpekto nga gugma, ang aton Amay kag ang Iya Anak, nga si Jesucristo, nagapromisa sang “paghidaet sa sining kalibutan, kag kabuhi nga wala’y katapusan sa kalibutan nga magaabot”20—“agud nga kon diin ako didto man kamo.”21 Nagapasalamat ako nga nagasaksi kag nagapamatuod sa sagrado kag balaan nga ngalan ni Jesucristo, amen.