Indi Subong sang Paghatag sang Kalibutan
Ang mga instrumento nga aton kinahanglan para makahimo sang mas masanag nga bwas-damlag kag magpauswag sang ekonomiya sang matuodtuod nga kaayohan bugana nga ginatigana sang ebanghelyo ni Jesucristo.
Antes sang una nga Paskwa sang Pagkabanhaw, sang si Jesus naghingapos sang bag-ong pangsakramento nga ordinansa nga Iya ginhatag sa Dose [ka apostoles], nagsugod Sia sa iya matahum nga nagapamilinbilin nga pamulongpulong kag nagpadayon pakadto sa Getsemani, pagluib, kag paglansang sa krus. Apang, sang nabatyagan ang kabalaka kag ayhan bisan ang hayag nga kahadlok nga ginpakita sang pila sadto sa ila, Sia nagsiling sa ila (kag sa aton):
“Dili malisang ang inyo mga tagipusuon: magtuo kamo sa Dios, magtuo man kamo sa akon. …
“Indi ko kamo pagbayaan nga mga ilo: Magabalik ako sa inyo. …
“Ang paghidaet ginabilin ko sa inyo, ang akon paghidaet ginahatag ko sa inyo, indi subong sang paghatag sang kalibutan, ang paghatag ko sa inyo. Dili malisang ang inyo mga tagipusuon, ukon mahadlok.”1
Ang makahalangkat nga mga tinion nagaabot sa sining mortal nga kalibutan, lakip na sa mga matinuohon, apang ang nagapasalig nga mensahe ni Cristo amo nga bisan Sia, nga cordero sang pascua, mangin daw kaangay sang “inughalad nga karnero sa atubang sang [iya] mga manug-alot”2 Sia wala sapayan sini magabangon, subong sa ginsiling sang salmista, agud mangin “aton dalangpan kag kusog, ang [aton] dalayon nga kabulig sa [tinion sang] kalisud.”3
Nga narealisar kon ano kabudlay sang mga inoras nga gin-atubang ni Cristo samtang nagahilapit Sia sa krus kag para sa Iya mga disipulo nga dalhon ang Iya ebanghelyo sa kalibutan sa kasagsagan sang panahon, updi ninyo ako subong sa kaangot nga mensahe para mga miyembro sang Simbahan sang Manluluwas sa ulihing mga adlaw. Ining mensahe nagasandig sa makahalawhaw nga kadamuon sang mga bersikulo sa Libro ni Mormon parte sa lainlain nga klase sing kinagamo, halin sa wala katapusan nga pagkaulugtasan nanday Laman kag Lemuel tubtob sa katapusan nga mga inaway nga nagalakip sang ginatos ka libo nga mga soldado. Isa sa pinakahayag nga rason sining paghatag importansya amo nga bangud ang Libro ni Mormon ginsulat para mga bumalasa sa ulihing mga adlaw, ining mga tagsulat (nga nakaeksperiyensya mismo sing madamo nga inaway) mapanagnaon nga nagapaandam sa aton nga ang kasingki kag kinagamo mangin talalupangdon nga kinaiya sang mga kaangtanan sa katapusan nga mga inadlaw.
Siyempre, ang akon teoriya parte sa pagbinaisay sa ulihing mga adlaw indi na orihinal. Duha ka libo ka tuig ang nagligad, ang Manluluwas nagpaandam nga sa ulihing mga adlaw may matabo nga “mga inaway, kag mga kinunokuno sang mga inaway,”4 nga sang ulihi nagsiling nga “ang paghidaet [paga]kuhaon sa duta.”5 Matuod gid nga ining Prinsipe sang Paghidaet, nga nagtudlo sing maathag nga ang pagbinaisay iya sang yawa,6 nagahibi upod ang Iya Diosnon nga Amay, para sa tawhanon nga panimalay sa panahon naton karon nga “wala sing gugma,” siling sa balaan nga kasulatan, kag indi makahibalo kon paano magpangabuhi sing inupdanay nga may paghigugma.7
Mga kauturan, makita matuod naton ang sobra nga kagamo, kaakig, kag kabilogan nga kawala sing respeto sa palibot naton. Maayo lang, ang karon nga henerasyon wala sang Ikatatlong Inaway Pangkalibutanon nga pagaawayon, kag wala man naton naeksperiyensyahan ang kalibutanon nga pagkalusod sang ekonomiya pareho sang natabo sang 1929 nga nagpadulong sa Dakong Kaiwaton. Apang, nagapangatubang kita sang klase sang Ikatatlong Inaway Pangkalibutanon nga indi ang pagpakig-away agud dugmukon ang aton mga kaaway kundi isa ka kampanya nga magtipon ang mga anak sang Dios agud mas atipanon pa gid ang kada isa kag magbulig sa pag-ayo sang mga pilas sang kalibutan nga aton makita sa kalibutan nga nagakinagamo. Ang Dakong Kaiwaton nga aton karon ginaatubang wala sing kalabtanan sa pagkadula sang aton mga sinuptan kundi mas may kalabtanan sa pagkadula sang aton pagsalig sa kaugalingon, nga may tunay nga kakulangan sa pagtuo kag paglaum kag gugma sa isigkatawo sa aton palibot. Pero ang mga instrumento nga aton kinahanglan para makahimo sing mas masanag nga bwas-damlag kag magpauswag sang ekonomiya sang matuodtuod nga kaayohan sa sosyedad bugana nga ginatigana sang ebanghelyo ni Jesucristo. Indi kita makabatas—kag ang ining kalibutan indi makabatas—sang aton kapaslawan nga gamiton sing lubos ining mga konsepto sang ebanghelyo kag nagapabakod nga mga kasugtanan sa personal kag sa publiko.
Gani, sa kalibutan nga “ginbayo sang unos, kag wala mapaumpawi,” subong sang ginsiling ni Jehova nga ini mangin, paano naton makita ang gintawag Niya nga “kasugtanan sang … paghidaet”? Makita naton ini paagi sa pagliso sa Iya nga nagsiling nga kaluoyan Niya kita kag upod ang “walay dulunan nga kaayo” magahatag sing paghidaet sa aton mga kabataan.”8 Wala sapayan sang makahaladlok nga mga propesiya kag makatulublag nga balaan nga mga kasulatan nga nagapahayag nga ang paghidaet pagakuhaon sa duta, ang mga propeta, lakip na ang aton pinalangga nga si Russell M. Nelson, nagtudlo nga wala ina nagakahulugan nga pagakuhaon ini sing indibidwal sa aton!9 Gani, sini nga Paskwa sang Pagkabanhaw aton tinguhaon nga ipangabuhi ang paghidaet sing personal, nga ginadapat ang grasya kag nagapaayo nga balanyos sang Pagbayad-Sala sang Ginuong Jesucristo sa aton kaugalingon kag sa aton mga pamilya kag sa ila nga aton malab-ot sa aton palibot. Maayo lang, bisan makakilibot, ining makapaumpaw nga balanyos maangkon naton nga “wala sing kwarta kag wala sing presyo.”10
Ang amo nga bulig kag paglaum kinahanglan kaayo tungod sa sining kalibutanon nga kongregasyon karon may madamo nga ginabudlayan sa pila ka mga hangkat—pisikal ukon emosyonal, sosyal ukon pinansyal, ukon isa ka dosena nga iban pa nga mga problema. Pero madamo sa mga ini ang indi gid naton masarangan nga sabton nga kita lang, kay ang bulig kag paghidaet nga aton ginakinahanglan indi ang sahi nga “ginahatag sang kalibutan.”11 Indi, kay sa mabudlay matuod nga mga problema kinahanglan naton inang ginasiling sang balaan nga mga kasulatan nga “mga gahum sang langit,” kag agud magamit ining mga gahum kinahanglan naton magpangabuhi suno sa ginasiling sang amo man nga balaan nga mga kasulatan nga “mga prinsipyo sang pagkamatarong.”12 Karon, ang paghangop sinang koneksyon sa tunga sang prinsipyo kag gahum amo ang mayor nga leksyon nga daw indi gid matun-an sang tawhanon nga pamilya, siling sang Dios sang langit kag duta!13
Kag ano inang mga prinsipyo? Gani, sulit-sulit nga ginsulat ang mga ini sa balaan nga kasulatan, liwat-liwat nga ginatudlo ang mga ini sa mga komperensya kasubong sini, kag sa aton dispensasyon, ang Propeta nga si Joseph Smith gintudloan sang mga ini bilang sabat sa iya kaugalingon nga bersyon sang pagtangis “Dios ko, Dios ko, ngaa bala nga ginpabayaan mo ako?”14 Sa matugnaw, pinabay-an nga bilanggoan sang Liberty, gintudloan sia nga ang mga prinsipyo sang pagkamatarong nagalakip sinang mga birtud sang pagpasensya, pagkamainantuson, kalulo, kag gugma nga matuod-tuod.15 Kon wala ining mga prinsipyo, piho gid nga magapangatubang kita sa ulihi sang indi paghangpanay kag pagdumot.
Tuhoy sa sina, mahambal ako sing makadali parte sa pagkawala sa pila ka bahin sining mga prinsipyo sang pagkamatarong sa aton panahon. Sa masami, masinadyahon ako, malipayon nga klase sang tawo, kag kadako kaayo sang maayo kag matahum sa aton kalibutan. Sigurado, mas madamo ang aton materyal nga mga bugay sangsa ano man nga henerasyon sa kasaysayan, pero sa ika-21 nga siglo nga kultura kag masami man sa Simbahan, makakita kita sa gihapon sang mga kabuhi nga ginabudlayan, nga may mga kompromiso nga nagaresulta sang tuman kadamo nga naguba nga mga kasugtanan kag tuman kadamo sang nasaklaw nga mga balatyagon. Binagbinaga ang baraghal nga lenggwahe nga nagaanggid sa sekwal nga pagpakasala, nga pareho makita pirme sa mga pelikula ukon sa telebisyon, ukon talupangda ang sekswal nga pagbastos kag iban pa nga porma sang sala nga pangginawi sa ulubrahan nga pirme naton mabasahan sa karon. Parte sa pagkamatinumanon sa kasugtanan, ang sagrado masami kaayo nga ginahimo nga kinaandan lang kag ang balaan masami ginapasipalahan Sa mga nagakatentar nga maglakat ukon maghambal ukon maggiho sa sini nga paagi—“subong sang paghatag sang kalibutan,” kon hambalon pa—indi kamo magpaabot nga magadala ini sang mahidaeton nga eksperiyensya; ginapromisa ko sa inyo sa ngalan sang Ginuo nga indi ini matabo. “Ang pagkamalaut wala gid nga mas-a nangin kalipayan,”16 ginsiling anay sang isa ka dumaan nga propeta. Pagkatapos sang sinaot, ang manugtukar kinahanglan gid nga mabayran, kag sa masami ang bayad amo ang mga luha kag pagkanugon.17
Ukon ayhan makita naton ang iban pa nga porma sang pag-abuso ukon pagpakahuya. Dapat doble ang aton paghalong bilang mga disipulo sang Ginuong Jesucristo nga indi magpasakop sa amo sina nga pamatasan. Indi kita dapat makasala sang bisan ano nga klase sang pag-abuso ukon indi matarong nga pagdumala ukon imoral nga pagpuwersa—indi sa pisikal ukon emosyonal ukon sa pang-simbahan ukon bisan ano nga klase. Madumduman ko ang kapagsik ni Pangulong Gordon B. Hinckley sang maghambal sia sa kalalakihan sang Simbahan parte sa iya gintawag nga mga “manugpigos sa ila mismo mga puluy-an”:18
“Daw ano ka makahalanusbo kag tuman ka makangilil-ad nga ang asawa ginaabuso,” siling niya. “Ang bisan sin-o nga lalaki sa sining Simbahan nga nagaabuso sa iya asawa, nga nagapakanubo sa iya, nga nagainsulto sa iya, nga nagahimo sing indi matarong nga pagdumala sa iya indi nagakaangay magkapot sang priesthood. … Indi [sia] nagakaangay mag-uyat sang temple recommend.”19 Pareho nga talamayon, siling niya, ang pag-abuso sa bata—ukon ang bisan ano nga klase sang pag-abuso.20
Sa madamo kaayo nga higayon, ang masami matinuohon nga mga lalaki, mga babayi, kag bisan pa gani mga kabataan nakasala sa gihapon sa panghambal nga indi manami, labi na ang makahalit, sa mga nahugpong sa ila paagi sa balaan nga ordinansa sa templo sang Ginuo. Ang tanan may kinamatarong nga palanggaon, nga makabatyag sang paghidaet, kag makabatyag sang seguridad sa puluy-an. Palihog, tani tinguhaan naton nga magpabilin ang ina nga balatyagon dira sa puluy-an. Ang promisa sang pagkamahidaeton amo nga mangin kaupod ninyo pirme ang Balaan nga Espiritu kag ang mga bugay magaabot sa inyo “nga wala ginpilit” tubtob sa wala’y katapusan.22 Wala sing nagagamit sang matalom nga dila ukon masakit nga mga tinaga kag sa gihapon “nagakanta sang nagatubos nga gugma.”22
Magahingapos ako kon sa diin ako nagsugod. Bwas na ang Paskwa sang Pagkabanhaw, tion agud nga ang matarong nga mga prinsipyo sang ebanghelyo ni Jesucristo kag sang Iya Pagbayad-Sala “magligad”—magligad sa kagamo kag pagbinaisay, magligad sa kasubo kag kalapasan, kag sa ulihi magligad sa kamatayon. Tion ini sa pagpangako sang hugot nga katampad sa pulong kag buhat sa Cordero sang Dios, nga “[nagpas-an] sang aton mga kalisud, kag nagdala sang aton mga kasubo,”23 sa Iya determinasyon nga tapuson ang buluhaton sa kaluwasan para sa aton.
Sa pihak sang pagluib kag kasakit, pagmaltrato kag kapintas, kag samtang ginapas-an ang natingob nga mga sala kag kasubo sang tawhanon nga panimalay, ang Anak sang buhi nga Dios nagatulok sa malaba nga banas sang mortalidad, nagatulok sa aton sining pagtapos sang semana, kag nagasiling, “Ang paghidaet ginabilin ko sa inyo, ang akon paghidaet ginahatag ko sa inyo: indi subong sang paghatag sang kalibutan ang paghatag ko sa inyo. Dili malisang ang inyo mga tagipusuon, ukon mahadlok.”24 Mag-angkon sang bulahan, malipayon, mahidaeton nga Paskwa sang Pagkabanhaw. Ang dalagko nga mga bugay sini nabayaran na sang Prinsipe sang Paghidaet, nga akon ginahigugma sa bug-os kong tagipusuon, nga ining Simbahan Iya, kag sa Iya pat-od ako nga nagasaksi, bisan ang Ginuong Jesucristo, amen.