Mangin Hilway Kamo
Si Jesucristo amo ang kasanag nga dapat naton bayawon bisan sa madulom nga tinion sang aton kabuhi sa duta.
Pinalangga kong mga kauturan, malipayon gid ako sa pribelihiyo nga maghambal sa inyo halin sa Aprika. Isa ka bugay ang makaangkon sang teknolohiya sa karon kag magamit ini sa pinakaepektibo nga paagi para lab-uton kamo sa bisan diin man kamo.
Sang Septyembre 2019, kami ni Sister Mutombo, samtang nagaalagad bilang lideres sa Maryland Baltimore Mission, nakaangkon sang pribelihiyo sa pagbisita sang pila sa mga lugar sang kasaysayan sang Simbahan sa Palmyra, New York, samtang nagatambong sa seminar sa pagkalider sang misyon. Natapos ang amon pagbisita sa Sagrado nga Kakahuyan. Ang amon tuyo sa pagbisita sa Sagrado nga Kakahuyan indi agud makabaton sang espesyal nga pagpahayag ukon palanan-awon, pero nabatyagan matuod namon ang presensya sang Dios sa sining sagrado nga lugar. Napuno ang amon mga tagipusuon sang pagpasalamat kay Propetang Joseph Smith.
Sang nagapabalik na kami, natalupangdan ni Sister Mutombo nga kadako gid sang akon yuhum samtang nagamaheho, gani namangkot sia, “Ano ang rason nga ginakunyag ka gid?”
Ang sabat ko, “Mahal ko nga Nathalie, magapangibabaw gid pirme ang kamatuoran sa sayop, kag indi magapadayon ang kadulom sa kalibutan tungod sa ginpanumbalik nga ebanghelyo ni Jesucristo.”
Ginduaw sang Dios nga Amay kag ni Jesucristo ang lamharon nga si Joseph Smith agud dalhon sa kasanag ang natago nga mga butang agud mabaton naton ang “ihibalo sang mga butang subong, … sadto, kag sa [palaabuton]” (Doktrina kag mga Kasugtanan 93:24).
Pagkatapos sang masobra duha ka gatos ka tuig, madamo sa gihapon ang nagapangita sang mga kamatuoran nga kinahanglanon agud mangin hilway sa pila ka mga tradisyon kag mga kabutigan nga ginapalapta sang kaaway sa bilog nga kalibutan. Madamo ang “nabulagan sang pagpatalang sang mga tawo” (Doktrina kag mga Kasugtanan 123:12). Sa iya Sulat sa mga taga-Efeso, gintudlo ni Pablo: “Pagmata, ikaw nga nagakatulog, kag bangon gikan sa mga patay, kag si Cristo magasilak sa imo” (Mga Taga-Efeso 5:14). Nagpromisa ang Manluluwas nga Sia ang mangin kasanag sa tanan nga nagapamati sang Iya mga pulong (tan-awa sa 2 Nefi 10:14).
Treintay-singko ka tuig ang nagligad, nabulagan man ang akon mga ginikanan kag desperado nga naghandum nga mahibal-an ang kamatuoran kag nabalaka kon diin sila makadto para makita ini. Pareho nga natawo ang akon mga ginikanan sa baryo, kon diin ang mga tradisyon nagpanggamot na sa mga kabuhi sang mga indibidwal kag mga pamilya. Pareho nila nga ginbayaan ang ila baryo sang hubin pa sila kag nagpasiyudad, nga nagahandum sang mas maayo nga kabuhi.
Nagpakasal sila kag nagsugod sang ila pamilya sa simple kaayo nga paagi. Halos walo kami kabilog sa isa ka gamay nga balay—ang akon mga ginikanan, duha sang akon mga utod nga babayi kag ako, kag isa ka pakaisa nga nagapuyo upod sa amon sadto. Nagapamensar ako kon bala pamilya gid kami matuod, kay wala kami ginatugotan nga magpanyapon sa pareho nga lamisa upod sa amon mga ginikanan. Kon mag-abot si tatay halin sa obra, pagsulod gid niya sa balay, ginahambalan kami nga maglakat kag didto lang sa gwa. Malip-ot kaayo ang amon mga gab-i, kay indi kami makatulog tungod sa kakulang sang paghiliusa kag matuod nga pagpalanggaanay sa pag-asawahay sang amon mga ginikanan. Indi lang gamay ang amon balay, madulom pa ini nga lugar. Antes makilala ang mga misyonero, nagtambong kami sa lainlain nga mga simbahan kada Domingo. Maathag nga may ginapangita ang amon mga ginikanan nga indi mahatag sang kalibutan.
Nagpadayon ini tubtob nakilala namon si Elder kag Sister Hutchings, ang una nga gulang na nga mag-asawa nga misyonero nga gintawag sa pag-alagad sa Zaire (nga ginakilala na subong nga DR sang Congo ukon Congo-Kinshasa). Sang nagsugod kami nga makigkita sa sining mabuot nga mga misyonero, nga daw mga anghel nga naghalin sa Dios, natalupangdan ko nga may nagliwat sa amon pamilya. Pagkatapos sang amon bunyag, matuod nga nagsugod kami sa padayon nga pagbag-o sa pangginawi tungod sang ginpanumbalik nga ebanghelyo. Ang mga pulong ni Cristo nagsugod na sa pagpadako sang amon nga kalag. Nagsugod ini sa pagpasanag sang amon paghangop kag nangin manamit sa amon, tungod kay ang mga kamatuoran nga amon nabaton maathag kag makita namon ang kasanag, kag ining kasanag nagasanag kag nagasanag kada adlaw.
Ining paghangop sang ngaa sang ebanghelyo nagabulig sa amon nga mas mangin pareho sa Manluluwas. Ang kadakuon sang amon balay wala nagliwat; amo man ang amon kondisyon sa sosyedad. Pero nasaksihan ko ang pagbag-o sang tagipusuon sa akon mga ginikanan samtang nagapangamuyo kami adlaw-adlaw, aga kag gab-i. Nagtuon kami sang Libro ni Mormon; nagahiwat kami sang family home evening; matuod kami nga nangin pamilya. Kada Domingo nagabugtaw kami alas 6:00 sang aga para maghanda sa pagsimba, kag nagabiyahe kami sing inoras para makakadto sa mga miting sa Simbahan kada semana nga wala nagareklamo. Manami ini nga eksperiyensya saksihan. Kami, nga sadto nagalakat sa kadulom, nagtabog sang kadulom sa tunga namon (tan-awa sa Doktrina kag mga Kasugtanan 50:25) kag nakakita sang “dako nga kapawa” (2 Nefi 19:2).
Natandaan ko isa ka adlaw sang indi ko gusto magbugtaw sing temprano sa aga para sa amon pang-pamilya nga pangamuyo, nagreklamo ako sa akon mga utod nga babayi, “Wala na gid kita iya sang iban nga ginahimo diri sa balay, kundi mangamuyo, mangamuyo, mangamuyo.” Nabatian ni tatay ang akon komento. Nadumduman ko ang iya reaksyon samtang mapinalanggaon pero mapag-on niya ako nga gintudloan, “Mientras nga ari ka diri sa balay, magapangamuyo ka, magapangamuyo, magapangamuyo.”
Ang mga pulong ni tatay nagasulit-sulit sa akon palamatin-an kada adlaw. Ano sa banta ninyo ang ginahimo namon ni Sister Mutombo sa amon mga kabataan sa karon? Nagapangamuyo kami, nagapangamuyo, kag nagapangamuyo. Amo ini ang amon legasiya.
Ang tawo nga nabun-ag nga bulag kag ginpaayo ni Jesucristo, pagkatapos nga piliton sang iya mga kasilingan kag sang mga Fariseo, nagsiling:
“Ang tawo nga ginatawag si Jesus naghimo sing lunang, kag ginhamlitan niya ang akon mga mata, kag nagsiling sa akon, Kadto ka sa Siloe, kag magpanghugas: gani nagkadto ako kag nanghugas kag nakabaton ako sing [panulukan]. …
“… Isa ka butang [nga] nahibal-an ko [amo] nga, sadto bulag ako, karon [sarang] na ako makakita” (Juan 9:11, 25).
Mga bulag man kami sadto kag makakita na karon. Dako ang nangin epekto sa amon pamilya sang ginpanumbalik nga ebanghelyo sugod sadto. Ang pag-intiendi sang ngaa sang ebanghelyo nagbugay sang tatlo ka henerasyon sang akon pamilya kag padayon nga magabugay sa madamo pa nga henerasyon nga magaabot.
Si Jesucristo amo ang kasanag nga nagasilak sa kadulom. Ang mga nagasunod sa Iya “indi maglakat sa kadudulman, kundi may kapawa nga nagahatag sang kabuhi” (Juan 8:12).
Sa halos isa ka tuig, sa tungatunga sang 2016 kag 2017, ang katawhan sa rehiyon sang Kasai nakaeksperiyensya sang malubha nga trahedya. Isa ato ka madulom kaayo nga panahon para sa mga tawo tungod sa inaway sa tunga sang tradisyunal nga grupo sang mga soldado kag pwersa sang gobyerno. Naglapta ang kagamo sa mga banwa sa Probinsya sang Kasai-Sentral pakadto sa mas dako nga rehiyon sang Kasai. Madamo nga mga tawo ang nagbiya sang ila mga puluy-an para makaluwas kag nagpanago sa kasiutan. Wala sila sing pagkaon ukon tubig ukon wala gid sang bisan ano pa dira, kag lakip diri ang pila sa mga miyembro sang Ang Simbahan ni Jesucristo sang mga Santos sa Ulihing mga Adlaw sa Kananga nga area. Pila sa mga miyembro sang Simbahan ang ginpamatay sang mga rebelde.
Si Brother Honoré Mulumba sang Nganza Ward sa Kananga kag ang iya pamilya ang pila lang sa nagpanago sa ila balay, nga wala makahibalo kon diin makadto tungod ang tanan nga dalan nahimo na nga patag-awayan. Isa ka adlaw pila ka kasilingan nga rebelde ang nakatalupangod sang presensya ni Brother Mulumba kag sang iya pamilya kay isa ka gab-i naggwa sila para mangita sang utan sa lagwerta sang pamilya para may makaon. Isa ka grupo sang mga rebelde ang nagkadto sa ila balay kag dayon ginpwersa sila pagwa kag ginsilingan sila nga magsunod sa ila mga ginahimo ukon mapatay.
Maisog si Brother Mulumba nga nagsiling sa ila, “Miyembro ako sang Ang Simbahan ni Jesucristo sang mga Santos sa Ulihing mga Adlaw. Ginbaton ko kag sang akon pamilya si Jesucristo kag may pagtuo kami sa Iya. Magapadayon kami nga matinuohon sa amon mga kasugtanan kag batunon namon nga mapatay.”
Ginsilingan nila sila, “Kay ginpili ninyo si Jesucristo, kaunon sang mga ido ang inyo mga lawas,” kag nagpromisa sila nga mabalik. Pero wala sila nagbalik, kag nagpabilin didto ang pamilya sing duha ka bulan kag wala na sila nagpakita liwat. Ginpadayon ni Brother Mulumba kag sang iya pamilya ang kasanag sang ila pagtuo. Gindumdom nila ang ila mga kasugtanan kag naamligan sila.
Si Jesucristo amo ang kasanag nga dapat naton bayawon bisan sa madulom nga tinion sang aton kabuhi sa duta (tan-awa sa 3 Nefi 18:24). Kon ginapili naton nga sundon si Jesucristo, ginapili naton nga bag-uhon kita. Ang lalaki ukon babayi nga nagbag-o para kay Cristo pagapangunahan ni Cristo, kag magapamangkot kita, pareho sa ginhimo ni Pablo, “[Ginuo, ano bala ang buot mo ipahimo sa akon]?” (Mga Binuhatan 9:6). Kita “[magasunod] sa iya mga tikang” (1 Pedro 2:21). Kita “magagawi, subong sang paggawi niya” (1 Juan 2:6). (Tan-awa sa Ezra Taft Benson, “Born of God,” Tambuli, Okt. 1989, 2, 6.)
Nagapamatuod ako sa Iya nga napatay, ginlubong, kag nabuhi liwat sa ikatatlo nga adlaw kag nagkayab pa-langit agud nga ikaw kag ako makabaton sang mga bugay sang imortalidad kag pagkahitaas. Sia “ang kapawa, … ang kabuhi, kag ang kamatuoran” (Eter 4:12 Sia ang pangontra kag bulong sa kagumon sang kalibutan. Sia ang talaksan sang kalidad para sa pagkahitaas, nga amo si Jesucristo. Sa ngalan ni Jesucristo, amen.