Mahimo Ninyo Tipunon ang Israel!
Sigurado gid ako nga masarangan ninyo ini nga mga lamharon tungod sang butang sa inyo pagkatawo kag sang dako kaayo nga gahum sa sulod ninyo.
Halos tatlo ka tuig na ang nagligad, si Pangulong Russell M. Nelson nag-agda sang tanan nga lamharon sang Ang Simbahan ni Jesucristo sang mga Santos sa Ulihing mga Adlaw nga mag-entra sa “batalya sang mga lamharon sang Ginuo agud tipunon ang Israel” sa magtimbang nga bahin sang belo. Nagsiling sia, “Ang ina nga pagtipon ang pinakaimportante nga butang nga nagakatabo sa kalibutan sa karon nga panahon.”1 Sigurado gid ako nga masarangan ninyo ini nga mga lamharon—kag mahimo ninyo ini sing maayo—tungod sang (1) butang sa inyo pagkatawo kag sang (2) dako kaayo nga gahum sa sulod ninyo.
Sang nagligad nga kuwarenta anyos ka tuig, ang duha ka misyonero gikan sa aton Simbahan nakabatyag nga ginatuytuyan sa isa ka balay sa New Jersey, sa Estados Unidos. Sang ulihi, milagroso nga ang duha ka ginikanan kag ang tanan sa 10 ka kabataan ginbunyagan. Sa mga pulong sang propeta, ila “ginpapangibabaw ang Dios”3 sa ila mga kabuhi. Ukon “sa amon mga kabuhi.” Ako ang ika-tatlo nga bata. Nagaedad ako 17 anyos sang magdesisyon ako nga maghimo sang permanente nga kasugtanan nga sundon si Jesucristo. Pero pakta kon ano pa gid ang akon gindesisyonan? Indi ako magserbe sang full-time nga misyon. Sobra na ina. Kag wala man ini ginapaabot sa akon, indi bala? Bag-o pa lang ako nga miyembro sang Simbahan. Wala ako sing kuwarta. Isa pa, bisan nga bag-o pa lang ako naggradweyt sa pinakaistrikto nga hayskul nga malapit sa West Philadelphia kag nag-atubang sang pila ka makahaladlok nga mga hangkat, sa tago nahadlok gid ako nga magbiya sa balay sing duha ka tuig.
Ang Inyo Matuod nga Pagkatawo
Pero natun-an ko nga ako kag ang tanan nga katawhan nagpuyo upod sa aton Amay nga Langitnon bilang Iya espiritu nga mga anak antes kita natawo. Kinahanglan mahibal-an sang iban, pareho man sang akon nahibal-an, nga luyag gid Niya nga ang tanan Niya nga mga anak makaagom sang kabuhi nga wala katapusan upod sa Iya. Gani, antes pa nga may natawo sa kalibutan, ginpresentar Niya sa tanan ang Iya perpekto nga plano sang kaluwasan kag kalipayan, nga upod si Jesucristo bilang aton Manluluwas. Ang masubo, ginpamatukan ni Satanas ang plano sang Dios.3 Suno sa libro sang Bugna, “may inaway sa langit”!4 Tuso nga ginpatalang ni Satanas ang ikatlo nga bahin sang espiritu nga mga anak sang Amay nga Langitnon nga ipapangibabaw sia imbes ang Dios.5 Magluwas sa inyo! Nakita sang Apostoles nga si Juan nga nadaug ninyo si Satanas “bangod sang pulong sang [inyo] pagpamatuod.”6
Ang pagkahibalo sang akon matuod nga pagkatawo, sa bulig sang akon patriarchal blessing, naghatag sa akon sang kaisog kag pagtuo sa pagbaton sang pangagda ni Pangulong Spencer W. Kimball nga tipunon ang Israel.7 Mangin pareho man ini sa inyo, mahal kong mga abyan. Ang paghibalo nga nadaug ninyo si Satanas paagi sa pulong sang inyo testimonya sang una magabulig sa inyo sa “pagpalangga, pagpaambit, kag pag-agda”8 sa karon kag sa dalayon—sa pag-agda sa iban nga magpalapit kag magtan-aw, magpalapit kag magbulig, kag magpalapit kag magpasakop, samtang ang inang amo man nga inaway para sa mga kalag sang mga anak sang Dios mabaskog nga nagapadayon.
Ang Mabaskog nga Pagtuo sa sulod Ninyo
Ano naman ang parte sa dako kaayo nga gahum sa sulod ninyo? Hunahunaa ini: nagsinggit kamo sa kalipay9 nga magkadto sa isa ka nahulog nga kalibutan sa diin atubangon sang tanan-tanan ang pisikal kag espirituhanon nga kamatayon. Indi gid naton madaug ang bisan diin sini nga kita lang. Magaantos kita indi lamang tungod sa aton kaugalingon nga mga sala kundi sa mga sala man sang iban. Ang katawhan magaeksperiyensya sang tagsa ka mahunahuna nga klase sang kasubo kag kapaslawan10—tanan-tanan nga may belo sang pagkalipat sa aton mga hunahuna kag ang pinakamalain nga kaaway sang kalibutan nga nagapadayon sa pagpuntirya kag pagtentar sa aton. Ang tanan nga paglaum sa pagbalik nga nabanhaw kag matinlo sa balaan nga presensya sang Dios nasandig tanan sa isa ka Persona nga nagatuman sang Iya promisa.11
Ano ang nagpaisog sa inyo nga magpadayon? Si Pangulong Henry B. Eyring nagtudlo, “Nagkinahanglan sing pagtuo kay Jesucristo agud sakdagon ang plano sang kalipayan kag ang papel ni Jesucristo diri bisan pa nga tuman kagamay sang inyo nahibaluan sa mga hangkat nga inyo pagaatubangon sa mortalidad.”12 Sang si Jesucristo nagpromisa nga magakari Sia sa sining kabuhi sa duta kag ihatag ang Iya kabuhi agud tipunon13 kag luwason kita, wala kamo nagpati lang sa Iya. Kamo nga “dungganon nga mga espiritu”14 may “tuman kadako nga pagtuo” nga nakita ninyo ang Iya promisa nga may kapat-uran.15 Indi Sia makabutig, gani nakita ninyo Sia nga daw napaagay na Niya ang Iya dugo para sa inyo, antes pa Sia natawo.16
Sa simboliko nga mga pulong ni Juan, inyo “gindaug si [Satanas] bangod sang dugo sang Kordero.”17 Si Pangulong Dallin H. Oaks nagtudlo nga sa sina nga kalibutan “nakita [ninyo] ang katapusan halin sang ginsuguran.”18
Ibutang naton nga isa ka adlaw antes kamo maglakat sa eskuwelahan, isa sang inyo mga ginikanan naghimo sang matuod nga promisa nga hatagan kamo sang inyo paborito nga pagkaon sa inyo pagpuli! Nalipay gid kamo! Samtang ara kamo sa eskuwelahan ginahunahuna ninyo nga ginakaon na ninyo inang pagkaon, kag masaboran na ninyo ini. Siyempre, ginsugid ninyo ining maayong balita sa iban. Ang pagpaabot sang pagpuli nagapalipay gid sa inyo nga ang mga test kag mga hangkat sang eskuwelahan daw kahapos lang. Wala sing makapadula sang inyo kalipay ukon makapaduda sa inyo tungod sigurado gid ang promisa! Kaanggid sini, antes kamo nga “dungganon nga mga espiritu” natawo, natun-an ninyo nga tan-awon ang mga promisa ni Cristo sa sining pat-od nga paagi, kag natilawan ninyo ang Iya kaluwasan.19 Ang inyo dako nga pagtuo pareho sa mga maskulo nga mas nagabakod kag nagadako sa dalayon nga ehersisyo, pero ang mga ini ara na ngadaan sa sulod ninyo.
Paano ninyo pukawon ang inyo higante nga pagtuo kay Cristo kag gamiton ini sa pagtipon sang Israel subong kag pagdaug liwat kay Satanas? Paagi sa pagtuon liwat nga paabuton kag tan-awon nga may amo sa gihapon nga kapat-uran ang promisa sang Ginuo nga tipunon kag luwason sa karon. Panguna Niya nga ginagamit ang Libro ni Mormon kag Iya mga propeta agud tudloan kita kon paano. Antes pa kay Cristo, ang Nefinhon nga “mga propeta, kag … mga pari, kag … mga manunudlo … [naglugpay sa mga tawo] sa pagtulok sa palaabuton sa Mesias, kag magpati sa iya nga magaabot nga daw yara na sia.”20 Ang propetang si Abinadi nagtudlo, “Kag karon kon si Cristo wala makakari sa kalibutan, nga nagahambal sang mga butang nga magaabot nga daw nag-abot na ang mga ini, wala kuntani sing natabo nga pagtubos.”21 Pareho kay Alma, si Abinadi “[nag]paabot nga may mata sang pagtuo,”22 kag nakita ang pat-od nga promisa sang kaluwasan sang Dios bilang natuman na. Ila “nadaug si [Satanas] paagi sa dugo sang Kordero, kag … sa pulong sang ila testimonya” antes pa natawo si Cristo, pareho man sa inyo. Kag ginhatagan sila sang Gino sang gahum sa pag-agda kag pagtipon sang Israel. Himuon Niya ang amo man para sa inyo samtang nagapaabot kamo nga may pagtuo, magatan-aw nga nagatipon ang Israel—sa bug-os nga kalibutan kag sa inyo kaugalingon nga “mga grupo”23—kag ginaagda ang tanan!
Ginatos ka mga misyonero ang nagpasad sang ila mabaskog nga antes-sining-kabuhi nga pagtuo kay Cristo paagi sa pagpanan-aw sinang ila nakadtuhan ukon natudloan nga nagasul-ob sang pang-bunyag kag pang-templo nga mga panapton. Sa pamulong-pulong nga gintig-ulohan “Begin with the End in Mind [Magsugod nga Ginahunahuna ang Katapusan],”24 si Pangulong Nelson nagpaambit sang personal nga halimbawa sa paghimo sini kag nagpanulin sa mga lider sa misyon nga tudloan ang aton mga misyonero sa paghimo sang amo man. Ang paghibalo nga gingamit nila ining dako nga pagtuo kay Jesucristo sa kabuhi antes sa duta, nakabulig gid ini sa aton pinalangga nga mga misyonero nga “pamatian Sia”25 kag pahulagon ang ila dako kaayo nga pagtuo sa pagtipon sang Israel suno sa ginpromisa sang Ginuo.
Siyempre, ang paghunahuna sang mga kabutigan nagahalit sang pagtuo.26 Mga abyan ko, ang hungod nga paghunahuna ukon pagtan-aw sa mga butang nga nagakontra sa kon sin-o gid kamo, ilabi na ang pornograpiya, magapaluya sang inyo pagtuo kay Cristo kag, kon wala sing paghinulsol, makapaguba pa sini. Palihog gamita ang inyo mga imahinasyon sa pagdugang sang pagtuo kay Cristo, indi sa pagguba sini.
Ang Programa para sa mga Kabataan kag mga Lamharon
Ang programa para sa mga Kabataan kag mga Lamharon isa ka pamaagi sang propeta agud buligan kamo nga mga lamharon nga pabaskugon pa gid ang inyo dako nga pagtuo. Si Pangulong Oaks nagtudlo, “Ang ini nga programa gindesinyo agud buligan kamo nga mangin mas pareho sa aton Manluluwas sa apat ka bahin: espiritwal, sosyal, pisikal, kag sa kinaalam.”27 Samtang kamo nga mga lamharon—nagapanguna—sa pagpangabuhi sang ebanghelyo, pag-atipan sa iban, pag-agda sa tanan nga magbaton sang ebanghelyo, paghugpong sang mga pamilya sa wala katapusan, kag pag-organisar sang masadya nga aktibidades,28 ang dako nga pagtuo kay Cristo nga ara sa inyo sa kabuhi antes sa duta magabalik liwat kag pabaskugon kamo agud himuon ang Iya buluhaton sa sini nga kabuhi!
Dugang pa, ang personal nga mga lalambuton, “ilabi na ang malip-ot nga mga lalambuton,”29 makabulig sa inyo nga pukawon liwat ang inyo mabaskog nga pagtuo. Kon magpahamtang kamo sang maayo nga lalambuton, nagapaabot kamo, pareho sang inyo ginhimo sadto, kag ginalantaw kon ano ang luyag sang inyo Amay nga Langitnon nga kamo ukon ang iban mangin.30 Dayon planohan ninyo kag pangabudlayan agud makuha ini. Si Elder Quentin L. Cook nagtudlo, “Indi pagpakanuboa ang importansya sang pagplano, pagpahamtang sang mga lalambuton … , kag [sa pag-agda sa iban]—tanan nga may ara sang mata sang pagtuo.”31
Kamo ang magapili! Ang Ginuo nagsiling parte sa inyo, “Ang gahum [sa pagpili] yara sa ila.”32 Si Elder Neil L. Andersen nagpaathag, “Ang inyo pagtuo magatubo indi paagi sa higayon kundi paagi sa pagpili.”33 Nagsiling man sia, “[Bisan ano] nga tampad nga mga pamangkot [nga may ara kamo] … pagasabton nga may pagpasensya kag may mata sang pagtuo.”34
Nagapamatuod ako nga (1) ang inyo matuod nga pagkatawo kag (2) ang dako kaayo nga gahum sang pagtuo kay Cristo sa sulod ninyo magabulig sa inyo nga “buligan ang kalibutan sa paghanda para sa pagbalik sang Manluluwas paagi sa pag-agda sa tanan nga magpalapit kay Cristo kag magbaton sang mga bugay sang Iya Pagbayad-Sala.”35 Kabay nga ipaambit naton tanan ang kalipay sang pat-od nga promisa sang Libro ni Mormon:
“Ang mga matarong nga nagapamati sa … mga propeta, kag … nagapaabot kay Cristo sing may kalig-on … wala sapayan sang tanan nga paghingabot … indi magkalamatay.
“Kundi si [Cristo] … magaayo sa ila, kag makaangkon sila sing paghidaet upod sa iya.”36
Sa ngalan ni Jesucristo, amen.