Ang Personal nga Pagpanglakaton sang Anak sang Dios
Bilang mga anak sang Dios sa kasugtanan, ginapalangga naton, ginatahod, ginasagod, ginaamligan, kag ginaabiabi inang mga espiritu nga nagaabot halin sa premortal nga kalibutan.
Apektado ang kada isa sa aton sang kalibutanon nga pandemya, sang ang pamilya kag kaabyanan wala ginpaabot nga nagtaliwan sa pihak nga kinabuhi. Luyag ko nga kilalahon ang tatlo nga aton ginakahidlawan, nga nagarepresentar sadtong aton mga ginapalangga sing labi.
Ini si Brother Philippe kag si Sister Germaine Nsondi. Si Brother Philippe Ngondi nagaalagad bilang patriarka sang Brazzaville Republika sang Congo nga Stake sang sia mapatay. Isa sia ka doktor sang medisina nga maalwan nga nagpaambit sang iya mga talento sa iban.1
Ini si Sister Clara Elisa Ruano de Villareal sang Tulcán, Ecuador. Ginbaton niya ang ginpanumbalik nga ebanghelyo sa edad nga 34 anyos kag isa ka pinalangga nga lider. Nagpaalam ang iya pamilya sa iya nga ginakanta ang iya paborito nga himno nga, “I Know That My Redeemer Lives.”2
Ini si Brother Ray Tuineau sang Utah, upod ang iya matahum nga pamilya. Ang iya asawa, nga si Juliet, nagsiling, “Gusto ko nga [madumduman sang akon mga anak nga lalaki] nga [si tatay nila] nagtinguha gid nga unahon pirme ang Dios.”3
Nagsiling ang Ginuo, “Mag-inupdanay kamo sa gugma sa bagay nga maghibi kamo bangod sa pagkadula sinang mga nagakapatay.”4
Samtang nagahibi kita, nagakalipay man kita sa mahimayaon nga Pagkabanhaw sang aton Manluluwas. Tungod sa Iya, ang aton mga mahal sa kabuhi kag kaabyanan nagapadayon sang iya pagpanglakaton sa wala katapusan. Sa ginpaathag ni Pangulong Joseph F. Smith: “Indi naton sila malimtan; wala kita nagauntat sa pagpalangga sa ila. … Nag-abante na sila; nagaabante kita; kag nagatubo kita pareho nga sila nagatubo.”5 Si Pangulong Russell M. Nelson nagsiling, “Ang aton mga luha sang kasubo … mangin mga luha sang pagpaabot.”6
Nahibal-an na Naton ang parte sa Kabuhi antes Matawo
Wala lang ginapasangkad sang aton wala katapusan nga panulukan ang aton pag-intiendi sang mga nagapadayon sang ila pagpanglakaton sa pihak nga kinabuhi kundi nagabukas man sang aton pag-intiendi sang mga nagasugod pa lang sa ila pagpanglakaton kag nagasulod pa lang sa dutan-on nga kabuhi.
Ang tagsa ka tawo nga nagakari sa duta pinasahi nga anak nga lalaki ukon babayi sang Dios.7 Ang aton personal nga pagpanglakaton wala lamang nagasugod sa pagkabun-ag. Antes kita matawo, ululupod kita sa isa ka kalibutan sang pagpanghanda kon sa diin kita “nagbaton sang [aton] una nga mga leksyon sa kalibutan sang mga espiritu.”8 Siling ni Jehova kay Jeremias, “Sa wala ko pa ikaw mahuman sa tiyan nakilala ko ikaw; kag sa wala pa ikaw maggwa sa tiyan ginpakabalaan ko ikaw.”9
May mga nagapamangkot kon bala ang kabuhi nagasugod, sa pagporma sang embryo, ukon sa pagsugod pitik sang kasingkasing, ukon sang sarang na sang lapsag nga mabuhi sa gwa sang taguangkan, pero para sa aton, wala sing duda nga ang espiritu nga mga anak sang Dios ara sa ila personal nga mga pagpanglakaton pakadto sa duta para magbaton sang lawas kag maeksperiyensyahan ang mortalidad.
Bilang mga anak sang Dios sa kasugtanan, ginapalangga naton, ginatahod, ginasagod, ginaamligan, kag ginaabiabi inang mga espiritu nga nagaabot halin sa premortal nga kalibutan.
Ang Dalayawon nga Kontribusyon sang Kababayin-an
Para sa babayi, ang magpanganak isa ka dako nga sakripisyo sa pisikal, sa emosyunal, kag ekonomikanhon. Ginapalangga kag ginapasidunggan naton ang dalayawon nga kababayin-an sa sining Simbahan. Upod ang kaalam kag paghangop, ginadala ninyo ang mga palas-anon sang inyo pamilya. Nagapalangga kamo. Nagaalagad kamo. Nagasakripisyo kamo. Nagapabakod kamo sang pagtuo, nagaminister sa mga nagakinahanglan, kag nagaamot sing dako sa sosyedad.
Ang Sagrado nga Responsibilidad sang Pag-amlig sang Kabuhi
Tinuig na ang nagligad, nga nagakabalaka gid sa kadamuon sang aborsyon sa kalibutan, si Pangulong Gordon B. Hinckley naghambal sa kababayin-an sang Simbahan sang mga tinaga nga magamit gid sa aton panahon karon. Siling niya: “Kamo nga mga asawa kag mga iloy amo ang angkla sang pamilya. Kamo ang nagabun-ag sang kabataan. Daw ano kadako kag kasagrado sina nga responsibilidad. … Ano ang nagakatabo sa aton kapasalamatan sa kasagrado sang kabuhi sang tawo? Ang aborsyon isa ka kalainan, mapintas kag matuodtuod kag makangilil-ad, nga nagalapta sa kalibutan. Nagapakitluoy ako sa kababayin-an sa sining Simbahan nga likawan ini, nga magpangibabaw diri, nga magpalayo sa mga makakompromiso nga mga sitwasyon nga nagahimo sini nga daw maayo tulukon. Mahimo nga may pila ka mga sirkumstansya nga pwede ini matabo, pero limitado lang gid ini.10 … Mga iloy kamo sang mga anak nga lalaki kag babayi sang Dios, nga ang mga kabuhi sagrado. Ang pag-amlig sa ila isa ka hinatag-sang-Dios nga responsibilidad nga indi pwede bale-walaon.”11
Si Elder Marcus B. Nash nagpaambit sa akon sang istorya sang 84-anyos nga babayi nga, sa iya interbyu sa bunyag, “nag-ako nga nagpahulog [malawig na nga tinuig antes].” Upod ang madalom nga emosyon, siling niya: “Gindala ko ang kabug-at sang pagpahulog sang bata sa adlaw-adlaw sang akon kabuhi sa sulod sang kwarentay-singko ka tuig. … Bisan ano ang himuon ko indi makakas ang sakit kag pagkakonsensya. Nadulaan na ako sing paglaum tubtob nga gintudloan ako sang matuod nga ebanghelyo ni Jesucristo. Natun-an ko kon paano maghinulsol … kag gulpi lang napuno ako sing paglaum. Nahibal-an ko na gid man nga sarang ako mapatawad kon matuodtuod ako nga maghinulsol sang akon mga sala.”12
Daw ano ang aton pagpasalamat sa diosnon nga mga dulot sang paghinulsol kag kapatawaran.
Ano ang Aton Mahimo?
Ano ang aton responsilibidad bilang mahidaeton nga mga disipulo ni Jesucristo? Ipangabuhi naton ang mga kasuguan sang Dios, itudlo ang mga ini sa aton kabataan, kag ipaambit ini sa iban nga maluyag mamati.13 Ipaambit naton ang aton madalom nga balatyagon parte sa kasagrado sang kabuhi sa mga nagahimo sinang mga desisyon sa sosyedad. Bisan indi nila maintiendihan sing lubos ang aton ginapatihan, pero nagapangamuyo kita nga mas maintiendihan nila kon ngaa, para sa aton, ining mga desisyon mas masobra pa sangsa kon ano ang gusto sang tawo sa iya kaugalingon nga kabuhi.
Kon may nagbusong nga wala ginapaabot, maglab-ot kita nga may pagpalangga, pagpaisog, kag, kon kinahanglan, pinansyal nga bulig, sa pagpabakod sang iloy para ibun-ag ang iya anak kag mapadayon ang iya pagpanglakaton sa mortalidad.14
Ang Katahum sang Pag-ayop (Adoption)
Sa amon pamilya, kadako sang bugay sa amon sang duha ka dekada na ang nagligad, isa ka 16-anyos nga dalagita ang nakahibalo nga nagabusong sia. Indi sila kasado sang amay sang bata, kag indi nila makita ang ila kaugalingon nga nagaupod para padakuon ang bata. Ang dalagita nagapati nga ang kabuhi nga iya ginadala malahalon. Nagbun-ag sia sang bata nga babayi kag gintugtan ang isa ka matarong mga pamilya nga ayupon ini bilang ila anak. Para kay Bryce kag Jolinne, sia ang sabat sa ila mga pangamuyo. Ginngalanan nila sia nga Emily kag gintudloan sia nga magsalig sa iya Amay nga Langitnon kag sa Iya Anak, nga si Jesucristo.
Nagdako si Emily. Daw ano ang amon pagpasalamat nga si Emily kag ang amon apo, nga si Christian, nagluyagay kag ginkasal sa balay sang Ginuo. Si Emily kag Christian may ara naman karon sang ila kaugalingon nga bata nga babayi.
Ginsulat ni Emily sining nagligad: “Sa sulod sining anum ka bulan sang pagbusong, nakaangkon ako sang tion nga padaluman ang mga hitabo [sang] akon kaugalingon nga pagkabun-ag. Ginpanumdom ko ang akon mismo iloy, nga 16 anyos pa lamang sadto. Naeksperiyensyahan ko ang mga sakit kag pagbag-o upod sang pagbusong, indi ko mapunggan ang magpamensar kon daw ano kabudlay sa hubin pa nga edad sang 16. … Nagatulo ang luha ko bisan sa subong kon madumduman ko ang akon mismo iloy, nga nakahibalo nga indi niya mahatag sa akon ang kabuhi [nga ginhandum niya para sa akon kag maalwan nga ginbutang] ako sa adopsyon. Indi ko matungkad kon ano ayhan ang iya inagyan sinang siyam ka bulan—nga ginabantayan nga may pagpanghusga samtang nagaliwat ang iya lawas, nawad-an sang kahigayunan nga maeksperiyensya ang pagkatin-edyer, nga nakahibalo nga pagkatapos sining buhat sang gugma sang iloy, ibutang na niya ang iya anak sa mga braso sang lain nga iloy. Nagapasalamat ako sa iya maalwan nga pagpili, nga wala niya ginpili nga gamiton ang iya pagbuot sa paagi nga magakakas sang akon kahilwayan sa pagbuot.” Hingapos ni Emily, “Nagapasalamat gid ako sa diosnon nga plano sang Amay nga Langitnon, sa akon dalayawon nga mga ginikanan nga [nagpalangga kag nag-atipan] sa akon, sa mga templo kon diin sarang kita mahugpong sa aton mga pamilya sa katubtuban.”15
Ang Manluluwas “nagkuha sing bata nga diutay, kag ginpatunga sia sa ila: kag sang ginkugos niya sia, nagsiling sia sa ila, Ang bisan sin-o nga magbaton sang isa nga subong sining bata nga diutay sa akon ngalan, nagabaton sa akon”16
Kon ang Matarong nga mga Handum Wala Pa Matuman
Ginapahayag ko ang akon pagpalangga kag kaluoy sa matarong nga mga magtiayon nga nagpakasal kag indi makaangkon sang kabataan nga ila gid ginahandum kag sa mga babayi kag lalaki nga wala makaangkon sang oportunidad sa pagpakasal suno sa layi sang Dios. Ang wala malab-ot nga mga handum sa kabuhi mabudlay intiendihon kon tan-awon lamang sa perspektibo sang mortalidad. Bilang alagad sang Ginuo, ginapromisa ko nga mientras matinuohon kamo kay Jesucristo kag sa inyo mga kasugtanan, mabaton ninyo ang nagakaangay nga mga bugay sa sining kabuhi kag ang inyo matarong nga mga handum sa wala katapusan nga orasan sang Ginuo.17 May kalipay gihapon sa pagpanglakaton sa kabuhi bisan pa nga indi tanan sa aton matarong nga mga handum ang matuman.18
Pagkatapos mabun-ag, ang kabataan padayon nga nagakinahanglan sang aton bulig. Ang iban desperado nga nagakinahanglan sini. Kada tuig paagi sa nagaulikid nga mga bishop kag sa inyo maalwan nga mga kontribusyon sa fast offering kag humanitarian nga pondo, nabugayan ang kabuhi sang minilyon nga kabataan. Ang Unang Panguluhan nag-anunsyo sang nagligad lang sang dugang nga 20 milyones dolyares para buligan ang UNICEF sa ila pang-kalibutan nga pagpaninguha nga manghatag sang duha ka bilyon nga bakuna.19 Palangga sang Dios ang mga kabataan.
Ang Sagrado nga Desisyon sang Pagpamata
Makaalarma nga bisan sa pila sa pinakamanggaranon nga mga pungsod sa kalibutan, diutay lang nga kabataan ang nagakabun-ag.20 “Ang kasuguan sang Dios para sa Iya mga kabataan sa pagmuad kag pagpuno sa duta nagapabilin gihapon nga may puersa.”21 Kon san-o magpamata kag kon pila ang bataon pribado nga mga desisyon nga himuon sa tunga sang bana kag asawa kag sang Ginuo. Upod ang pagtuo kag pangamuyo, ining sagrado nga mga desisyon sarang nga mangin matahum, mapanagnaon nga mga eksperiyensya.22
Ipaambit ko ang istorya sang pamilya Laing sang Sur sang California. Ginsulat ni Sister Rebecca Laing:
“Sang tig-ilinit sang 2011, daw ka perpekto gid sang kabuhi sa amon pamilya. Malipayon kami sa amon pag-asawahay upod ang apat ka kabataan —nga nagaedad 9, 7, 5, kag 3. …
“Ang akon pagbusong kag pagbata [nangin] delikado … [kag] pamatyag namon [grabe] ang bugay sa amon nga makaangkon sang apat ka kabataan, [nga nagahunahuna] nga kompleto na ang amon pamilya. Sang Oktubre, samtang nagapamati sa pangkabilogan nga komperensya, nakabatyag ako sang indi manegar nga pamatyagan nga makaangkon kami sang isa pa ka bata. Sang ginbinagbinag kag ginpangamuyoan namon ni LeGrand, … nahibal-an namon nga may lain nga plano ang Dios para sa amon sangsa amon na nga naplano.
“Pagkatapos sang isa pa ka mabudlay nga pagbusong kag pagbata, ginbugayan kami sang matahum nga lapsag nga babayi. Ginngalanan namon sia nga Brielle. Isa sia ka milagro. Pila lang ka tion pagkatapos niya mabata, samtang ara pa sa [balataan], nabatian ko ang indi manegar nga tingug sang Espiritu: ‘May isa pa.’
“Tatlo ka tuig ang nagligad, isa naman ka milagro, si Mia. Si Brielle kag Mia nagdala sang dako kaayo nga kalipay sa amon pamilya.” Nasiling niya, “Ang mangin bukas sa direksyon sang Ginuo kag ang pagsunod sang Iya plano magadala gid sa aton pirme sang mas dako nga kalipayan sangsa … magsalig lang sa aton kaugalingon nga pag-intiendi.”23
Palangga sang Manluluwas ang tagsa ka bilidhon nga bata.
“Kag kinuha niya ang ila magagmay nga mga kabataan, sing isa-isa, kag ginpakamaayo sila. …
“Kag … ginbayaw nila ang ila mga mata ayon sa langit, … kag nakita nila ang mga anghel nga nagapanaog gikan sa langit … sa tunga sang kalayo; kag [ang mga anghel] …ginpalibutan yadtong magagmay nga mga kabataan, … kag ang mga anghel nag-alagad sa ila.”24
Nagapamatuod ako nga ang inyo personal nga pagpanglakaton bilang anak sang Dios wala nagsugod sa una nga pagsulod sang hangin sang kalibutan sa inyo baga, kag indi ini matapos sa katapusan ninyo nga ginhawa sa duta.
Kabay nga aton pirme dumdumon nga ang tagsa ka espiritu nga anak sang Dios magakari sa duta sa iya mismo personal nga pagpanglakaton.25 Kabay nga abiabihon naton sila, amligan sila, kag pirme sila palanggaon. Sa inyo pagbaton sining bilidhon nga kabataan sa ngalan sang Manluluwas kag buligan sila sa ila pagpanglakaton sa wala katapusan, ginapromisa ko sa inyo nga bugayan kamo sang Ginuo kag ibubo sa inyo ang Iya pagpalangga kag pagkahamuot sa inyo. Sa ngalan ni Jesucristo, amen.