Kamatuoran kag ang Plano
Kon nagapangita kita sang kamatuoran parte sa relihiyon, dapat kita maggamit sang espirituhanon nga mga pamaagi nga nagakabagay sa sina nga pagpangita.
Ang moderno nga pagpahayag nagatumod sa kamatuoran bilang ang “ihibalo sang mga butang sa kon ano sila sa karon, kag kon ano sila sang una, kag kon ano sila sa palaabuton” (tan-awa saDoktrina kag mga Kasugtanan 93:24). Amo ina ang ang perpekto nga kahulugan sang plano sang kaluwasan kag sang “Ang Panimalay: Isa ka Proklamasyon sa Kalibutan.”
Nagakabuhi kita sa tion sang labi nga ginpalapad kag ginpalapta nga impormasyon. Pero indi tanan sining impormasyon matuod. Kinahanglan naton nga maghalong sa aton pagpangita sang kamatuoran kag pagpili sang mga balasahon para sina nga pagpangita. Indi naton pagkabigon ang kasikat ukon awtoridad sa sekular nga kaalam bilang kalipikado nga ginhalinan sang kamatuoran. Dapat kita maghalong sa pagsandig sa impormasyon ukon laygay nga ginahatag sang mga artista, sikat nga mga atleta, ukon di-kilala nga mga ginhalinan sa internet. Ang kasampaton sa isa ka topiko indi dapat pagkabigon nga kasampaton sa kamatuoran sa iban pa nga mga topiko.
Dapat man kita maghalong sa motibo sang nagahatag sang impormasyon. Amo kon ngaa ang mga kasulatan nagapaandam sa aton batok sa butig nga pagkapari (tan-awa sa 2 Nefi 26:29). Kon ang ginhalinan wala sang nagapakilala ukon di-kilala, ang impormasyon mahimo nga indi man masaligan.
Ang aton personal nga mga desisyon dapat mabase sa impormasyon gikan sa palasandigan nga kalipikado sa topiko kag hilway sa maiya-iyahon nga mga motibo.
I.
Kon nagapangita kita sang kamatuoran parte sa relihiyon, dapat kita maggamit sang espirituhanon nga mga pamaagi nga nagakabagay sa sina nga pagpangita: pangamuyo, ang saksi sang Balaan nga Espiritu, kag ang pagtuon sang balaan nga mga kasulatan kag sang mga pulong sang moderno nga mga propeta. Pirme ako nagakasubo kon makabati ako parte sa isa ka tawo nga nagahambal nga nawad-an sang relihiyoso nga pagtuo bangod sang kalibutanon nga mga pagtudlo. Ang may yara sadto sang espirituhanon nga palanan-awon mahimo nga mag-antos sang ila-mismo-gintuga nga espirituhanon nga pagbulag. Pareho sa ginhambal ni Pangulong Henry B. Eyring, “Ang ila problema wala sa mga bagay nga abi nila ila makita; kundi yara sa wala pa nila makita.”
Ang mga pamaagi sang siyensya nagagiya sa aton padulong sa ginatawag naton nga kamatuoran sa siyensya. Pero “kamatuoran sa siyensya” indi ang bug-os nga kabuhi. Ang mga wala nagatuon “paagi sa pagtuon kag paagi man sa pagtuo” (tan-awa saDoktrina kag mga Kasugtanan 88:118) nagalimite sang ila paghangop sang kamatuoran sa kon ano lang ang sarang nila pamatud-an sa pamaagi sang siyensya. Nagabutang ina sang artipisyal nga sablag sa ila pagpangita sang kamatuoran.
Si Pangulong James E. Faust nagsiling: “Ang mga [nabunyagan] na nagarisgo sang ila wala’y katapusan nga kalag sa indi mahinalungon nga pagsunod sang secular nga ginhalinan sang pagtuon lamang. Nagapati kita nga ang Ang Simbahan ni Jesucristo sang mga Santos sa Ulihing mga Adlaw may kabug-osan sang ebanghelyo ni Cristo, ang ebanghelyo ang amo ang kahulugan sang kamatuoran kag wala’y katapusan nga pagpasanag.”
Masalapuan naton ang matuod kag nagadugay nga kalipayan paagi sa pagkilala kag pag-akto sa kamatuoran parte sa kon sin-o kita, ang kahulugan sang mortal nga kabuhi, kag kon diin kita makadto kon mapatay kita. Ina nga mga kamatuoran indi matunan paagi sa siyensya ukon kalibutanon nga mga pamaagi.
II.
Magahambal na ako parte sa ginpanumbalik nga mga kamatuoran sang ebanghelyo nga tig-una sa doktrina sang Ang Simbahan ni Jesucristo sang mga Santos sa Ulihing mga Adlaw. Palihog binag-binaga ining mga kamatuoran sing maayo. Ginapaathag sang mga ini ang parte sa aton doktrina kag mga ginahimo, ayhan lakip na ang pila ka mga butang nga wala pa mahangpan.
May Dios, nga amo ang mapinalanggaon nga Amay sang mga espiritu sang tanan nga nabuhi na ukon magakabuhi pa.
Ang gender [sahi] wala’y katapusan. Antes kita matawo sa sining kalibutan, nagkabuhi kita tanan bilang lalaki kag babayi nga mga espiritu sa presensya sang Dios.
Bago lang naton mabatian ang Tabernacle Choir sa Temple Square nga nagkanta “I Will Follow God’s Plan.” Amo ina ang plano nga ginpasad sang Dios agud nga ang tanan Niya nga espirituhanon nga mga anak sarang mag-uswag sa wala’y katapusan. Importante kaayo ang ina nga plano sa kada isa sa aton.
Sa idalom sinang plano, ang Dios nagtuga sining kalibutan bilang isa ka lugar kon sa diin ang Iya pinalangga nga espirituhanon nga mga anak sarang matawo sa mortalidad agud magbaton sang pisikal nga lawas kag agud makaangkon sang oportunidad para mag-uswag sa wala’y katapusan paagi sa paghimo sang matarong nga mga pagpili.
Agud mangin mapuslanon, ang mortal nga mga pagpili kinahanglan gid nga himuon sa tunga sang nagakontrahanay nga mga puwersa sang maayo kag malain. Kinahanglan gid nga may oposisyon kag, gani, isa ka kaaway, nga gintabog bangud sang pagrebelde kag ginpahanugotan nga magsulay sa mga anak sang Dios nga maghimo sang kontra sa plano sang Dios.
Ang katuyoan sang plano sang Dios amo nga hatagan ang Iya mga anak sang oportunidad nga magpili sang kabuhi nga wala’y katapusan. Sarang lang ini matuman paagi sa pag-eksperiyensya sang mortalidad kag, pagkatapos sang kamatayon, paagi sa pagtubo sa pihak nga kinabuhi sa kalibutan sang mga espiritu.
Sa tion sang mortal nga kabuhi, tanan kita madagtaan sang sala sa aton pagpaidalom sa malain nga mga pagsulay sang kaaway, kag sa ulihi mapatay kita. Ginbaton naton inang mga hangkat nga nagasalig sa pangako sang plano nga ang Dios nga aton Amay magatigana sang isa ka Manluluwas, ang Iya Bugtong nga Anak, nga magasalbar sa aton paagi sa pangkabilugan nga pagkabanhaw padulong sa may lawas nga kabuhi pagkatapos sang kamatayon. Ang Manluluwas magatigana man sang pagpasag-uli agud bayran ang bili agud ang tanan matinluan gikan sa sala sa mga kondisyon nga Iya ginplastar. Ina nga mga kondisyon naglakip sang pagtuo kay Cristo, paghinulsol, pagpabunyag, ang dulot sang Balaan nga Espiritu, kag iban pa nga mga ordinansa nga ginahikot paagi sa awtoridad sang priesthood.
Ang dako nga plano sang kalipayan sang Dios nagahatag sang perpekto nga balance sa wala’y katapusan nga hustisya kag sa kaluoy nga sarang naton batunon paagi sa Pagpasag-uli ni Jesucristo. Nagatugot man ini sa aton nga maliwat sa bag-o nga mga tinuga kay Cristo.
Isa ka mapinalanggaon nga Dios ang nagalab-ot sa kada isa sa aton. Nakahibalo kita nga paagi sa Iya pagpalangga kag tungod sa Pagpasag-uli sang Iya Bugtong nga Anak, “ang tanan nga katawhan sarang maluwas, paagi sa pagtuman sang mga kasuguan kag mga ordinansa sang [Iya] Ebanghelyo.” (Ang mga Artikulo sang Pagtuo 1:3; pagdagmit gindugang).
Ang Simbahan ni Jesucristo sang mga Santos sa Ulihing mga Adlaw nakilala sing husto bilang isa ka Simbahan nga nakasentro sa pamilya. Pero ang wala maintiendihan sing maayo amo nga ang aton pagkasentro-sa-pamilya nagatutok sa labaw pa sa mortal nga mga kaangtanan. Ang wala’y katapusan nga mga kaangtanan tig-una man sa aton aton teolohiya. “Ang panimalay ginmando sang Dios.” Sa idalom sang dako nga plano sang aton mapinalanggaon nga Tagtuga, ang misyon sang Iya ginpanumbalik nga Simbahan amo ang pagbulig sa mga anak sang Dios nga maangkon ang labing mataas nga bugay sang pagkahitaas sa selestiyal nga ginharian, nga sarang lamang maangkon paagi sa wala’y katapusan nga pag-asawahay sa tunga sang isa ka lalaki kag isa ka babayi (tan-awa sa Doktrina kag mga Kasugtanan 131:1–3). Nagapamatuod kita sa mga panudlo sang Ginuo nga “ang gender [sahi] isa ka kinahanglanon nga kinaiya sang indibidwal para sa wala pa mabun-ag, sa mortal, kag wala’y katapusan nga palatandaan kag katuyuan” kag nga “ang pag-asawahay sa tunga sang isa ka lalaki kag isa ka babayi labing importante sa Iya wala’y katapusan nga plano.”
Sa katapusan, tuman ka dako sang pagpalangga sang Dios sa bagay nga, magluwas sa pila nga hungod sa buot nga nangin mga anak sang yawa, nagahatag Sia sang kapalaran sang himaya para sa tanan Niya nga mga anak. “Ang tanan Niya nga mga anak” nagalakip sang tanan nga minatay. Nagahikot kita sang mga ordinansa para sa ila sa tal-os nila sa aton mga templo. Ang katuyuan sang Simbahan ni Jesucristo amo nga himuon nga takos ang Iya mga anak para sa labing mataas nga halintang sang himaya, nga amo ang pagkahitaas ukon kabuhi nga wala’y katapusan. Para sa mga indi maluyag ukon kalipikado sa sina, nagtigana ang Dios sang iban pa, pero mas manubo, nga mga ginharian sang himaya.
Ang bisan sin-o nga nakaintiende sining wala’y katapusan nga mga kamatuoran nakahangop kon ngaa kita nga mga miyembro sang Ang Simbahan ni Jesucristo sang mga Santos sa Ulihing mga Adlaw nagapensar sang subong sini kag nagahimo sang ginahimo naton.
III.
Sambiton ko karon ang pila ka pagdapat sining wala’y katapusan nga mga kamatuoran, nga maintiendihan lamang suno sa plano sang Dios.
Una, ginatahod naton ang indibidwal nga kahilwayan sa pagpili. Halos tanan nakahibalo sang dako nga paghimud-os sang ginpanumbalik nga Simbahan nga isulong ang relihiyoso nga kahilwayan sa Estados Unidos kag sa bug-os nga kalibutan. Ining mga paghimud-os wala lamang nagasulong sang aton mismo mga interes kundi, suno sa Iya plano, nagatinguha nga buligan ang tanan nga mga anak sang Dios na matagamtam ang kahilwayan sa sa pagpili.
Ika-duha, kita isa ka misyonero nga katawhan. Kon kaisa ginapamangkot kita kon ngaa nagapadala kita sang mga misyonero sa tuman kadamo nga mga pungsod, bisan pa sa Cristohanon nga mga katawhan. Nagabaton kita sang pareho nga pamangkot kon ngaa nagahatag kita sang minilyon nga dolyares sa tawhanon nga bulig sa mga tawo nga indi mga miyembro sang aton Simbahan kag kon ngaa wala naton ginaangot ining bulig sa aton pang-misyonero nga pagpaninguha. Ginahimo naton ini bangid ginakabig naton ang tanan nga mortal nga mga anak sang Dios—ang aton mga kauturan—kag luyag naton ipaambit ang aton espirituhanon kag temporal nga bugay sa tanan.
Ika-tatlo, sagrado ang mortal nga kabuhi sa aton. Ang aton dedikasyon sa plano sang Dios nagapangayo sa aton nga kontrahon ang aborsyon kag euthanasia [pagbulig sa kamatayon sang mga tawo nga may malubha nga balatian].
Ika-apat, may mga natublag sa pila ka mga panan-aw sang Simbahan parte sa kasal kag mga kabataan. Ang aton ihibalo sang ginpahayag nga plano sang kaluwasan sang Dios nagapangayo sa aton nga pamatukan ang sosyal kag legal nga mga impluwensya sa karon nga maglisa sa tradisyunal nga kasal kag maghimo sang mga pagbago nga nagapalibog ukon nagabag-o sang sahi ukon nagadula sang mga kinalain sa tunga sang mga lalaki kag mga babayi. Nakahibalo kita nga ang mga relasyon, mga kinaugali, kag mga ginahimo sang lalaki kag babayi importante sa pagtuman sang dako nga plano sang Dios.
Ika-lima, may yara man kita sang pinasahi nga panan-aw sa mga kabataan. Ginatan-aw naton ang pagpamata kag pagbatiti sang mga bata nga bahin sang plano sang Dios kag isa ka makalilipay kag sagrado nga responsibilidad sang mga ginhatagan sang gahum agud magpartisipar sa sini. Sa aton panan-aw, ang labing mataas nga manggad sa kalibutan kag sa langit amo ang aton mga anak kag ang aton kaliwatan. Gani, dapat naton itudlo kag ipakigbato ang mga prinsipyo kag mga hilikuton nga nagahatag sang pinakamaayo nga kahimtangan para sa pag-uswag kag kalipayan sang kabataan—tanan nga kabataan.
Sa ulihi, pinalangga kita nga mga anak sang isa ka Amay nga Langitnon, nga nagtudlo sa aton nga ang pagkalalaki kag ang pagkababayi, ang kasal sa tunga sang lalaki kag babayi, kag ang pagpamata kag pagbatiti sa mga kabataan importante sa Iya dako nga plano sang kalipayan. Ang aton posisyon sa sining tig-una nga mga prinsipyo masami nagapaakig sa mga kontra sa Simbahan. Ginakabig naton ina nga ini malikawan. Ang oposisyon parte sang plano, kag ang labing mabaskog nga pagkontra ni Satanas nagatumod sa bisan ano nga labing importante sa plano sang Dios. Nagatinguha sia nga gub-on ang buluhaton sang Dios. Ang iya mayor nga pamaagi amo ang pakanubuon ang Manluluwas kag sa Iya diosnon nga awtoridad, panason ang epekto sang Pagpasag-uli ni Jesucristo, punggan ang maghinulsol, palsipikahon ang rebelasyon, kag kontrahon ang indibidwal nga pagkamay-salabton. Nagatinguha man sia nga palibugon ang sahi, gumunon ang kasal, kag punggan ang pagpamata—ilabi na gid sa mga ginikanan nga magapadako sang ila kabataan sa kamatuoran.
IV.
Ang buluhaton sang Ginuo nagapadayon wala’y sapayan sa organisado kag padayon nga oposisyon nga nagaatubang sa aton samtang nagatinguha kita nga idapat ang mga panudlo sang Simbahan ni Jesucristo sang mga Santos sa Ulihing mga Adlaw. Para sa mga nahuyang sa sinang oposisyon, ginatanyag ko ining mga laygay.
Dumduma ang prinsipyo sang paghinulsol nga nangin posible paagi sa gahum sang Pagpasag-uli ni Jesucristo. Subong sang panghangkat ni Elder Neal A. Maxwell, indi kita mangin isa sadtong mga “mas luyag pa nga bag-uhon ang Simbahan sangsa bag-uhon ang ila kaugalingon.”
Subong sang pangagda ni Elder Jeffrey R. Holland:
“ Magkapot sing malig-on sa inyo na nga nahibal-an kag magtindog nga mabakod tubtob mag-abot ang dugang nga ihibalo. …
“… Sa sining Simbahan, ang aton nahibaluan pirme gid nga magapirde sang wala naton mahibaluan.”
Gamita ang pagtuo sa Ginuong Jesucristo, nga amo ang unang prinsipyo sang ebanghelyo.
Ang ulihi, magpangayo sang bulig. Ang aton mga lider sa Simbahan nagapalangga sa inyo kag nagapangayo sang espirituhanon nga giya agud mabuligan kamo. Nagatigana kami sang madamo nga mga palasandigan subong sang mga makita ninyo sa LDS.org kag iban pa nga mga suporta para sa pagtuon sang ebanghelyo sa puluy-an. May yara man kita sang mga ministering nga kautoran nga gintawag sa paghatag sang mapinalanggaon nga bulig.
Ang aton mapinalanggaon nga Amay nga Langitnon maluyag nga ang Iya mga anak makaangkon sang kalipayan nga amo ang katuyuan sang aton pagtuga. Inang malipayon nga kapalaran amo ang kabuhi nga wala’y katapusan, nga sarang naton mabaton paagi sa pagdutdot pasulong sa masami ginatawag sang aton propeta nga si Pangulong Russell M. Nelson, “ang banas sang kasugtanan.” Yari ang iya ginhambal sa iya una nga mensahe bilang Pangulo sang Simbahan: “Magpadayon sa banas sang kasugtanan, Ang inyo dedikasyon sa pagsunod sa Manluluwas paagi sa paghimo sang mga kasugtanan upod sa Iya kag dayon sa pagtuman sinang mga kasugtanan magabukas sang pwertahan sa tanan nga espirtuhanon nga mga bugay kag pribelihiyo nga pwede maangkon sang mga lalaki, mga babayi, kag mga kabataan sa bisan diin.”
Nagapamatuod ako sing maligdong nga ang mga ginhambal ko matuod, kag nangin posible ang mga ini paagi sa mga panudlo kag sa Pagpasag-uli ni Jesucristo, nga nagahimo sini tanan nga posible sa idalom sang dako nga plano sang Dios, ang aton Wala’y Katapusan nga Amay. Sa ngalan ni Jesucristo, amen.