2:3

Kari, Magpamati sa Tingog sang Propeta

Ni Bishop Dean M. Davies

Unang Manuglaygay sa Nagapangulo nga Bishopric

Kon ginapabakod naton ang gawi sang pagpamati kag pagsunod sa pulong sang mga buhi nga propeta, paga-anihon naton ang mga bugay nga wala’y katapusan.

Nga nagahambal parte sa Pangulo sang Ang Simbahan ni Jesucristo sang mga Santos sa Ulihing mga Adlaw, ang Ginuo nagpahayag:

“Kag sa liwat, ang buluhaton sang Pangulo sang palangakoan sang Mataas nga Priesthood amo ang magpanguna sa bilog nga simbahan, kag mangin kaanggid kay Moises—

“ … Huo, mangin isa ka manugtan-aw, manugbugna, manugbadbad, kag propeta, nga nagaangkon sang tanan nga regalo sang Diyos nga ginahatag niya sa pangulo sang simbahan” (Doktrina kag mga Kasugtanan 107:91–92; pagdagmit gindugang).

Bulahan ako nga masaksihan ang pila ka mga regalo sang Dios sa Iya mga propeta. Mahimo ko bala isaysay sa inyo ang isa ka sagrado nga eksperiyensya? Antes sa sining akon palangakoan subong, nagbulig ako sa pagpangita sang mga duta nga patindogan sang mga templo. Pagkatapos sang September 11, 2001, nangin mabudlay ang pagtabok sa mga dulonan sang Estados Unidos. Tungod sina, ang mga miyembro sang Simbahan naghinguyang sang duha tubtob tatlo ka oras sa pagbiyahe halin sa Vancouver, Canada pakadto sa templo sa Seattle Washington. Si President Gordon B. Hinckley, ang Pangulo sang Simbahan sadto, nagsiling nga ang isa ka templo sa Vancouver magabugay sa mga miyembro sang Simbahan didto. Gintugotan ang pagpangita sang lugar para sa templo, kag pagkatapos nga gintan-aw namon ang mga propyedad nga iya sang Simbahan, nagtan-aw man kami sang iban pa nga mga propyedad na indi iya sang Simbahan.

May matahum nga lugar malapit sa Trans-Canadian Highway nga gintigana sang gobiyerno nga gamiton para sa relihiyoso nga mga katuyoan. Mahapos matultulan ang propyedad, may madamo nga manami nga mga kahoy, kag kitaon gid sa linibo nga nagalabay nga mga motorista.

Ginpresentar namon ang lugar sa bulanan nga miting sang Komite Sa Pagpatindog-sang-Templo gamit ang mga litrato kag mga mapa. Gintugotan ni President Hinckley ang pag-obra sang kontrata kag paghimo sang kinahanglanon nga mga pagtuon sa lugar. Sang Disyembre sina nga tuig, ginbalitaan namon ang komite nga natapos na ang pagtuon, kag nangayo kami sang pahanugot nga baklon ang propyedad. Pagkatapos nga nabatian ni President Hinckley ang amon report, nagsiling sia, “Pamatyag ko, dapat kon tan-awon ining lugar.”

Sa sina nga bulan, duha ka adlaw pagkatapos sang Paskwa, nagkadto kami sa Vancouver upod sila ni President Hinckley, President Thomas S. Monson, kag Bill Williams, isa ka arkitekto sang templo. Ginsugat kami ni Paul Christensen, ang Stake President didto, kag gindala niya kami sa lugar. Medyo maulanon kag magal-umon sadto, pero naggwa si President Hinckley sa salakyan kag naglakat-lakat sa bilog nga propyedad.

Sang nakatiner-tiner na kami sa lugar, ginpamangkot ko si President Hinckley kon gusto sia magtan-aw sang iban pa nga mga lugar nga ginapilian. Nagsiling sia, huo, maluyag sia. Kay man, paagi sa pagtan-aw sa iban nga mga propyedad, nakomparar namon ang ila tagsa ka mga kinaayo.

Naglibot kami sa daku nga bahin sang Vancouver sa pagtan-aw sang iban pa nga mga propyedad, kag sang ulihi nagbalik liwat sa orihinal nga lugar nga amon ginhalinan. Siling ni President Hinckley, “Matahum ini nga lugar.” Dayon namangkot siya, “Pwede bala kita makakadto sa aton Simbahan nga malapit lang diri?”

“Huo, President,” sabat namon.

Nagbalik kami sa mga salakyan kag nagmaneho pakadto sa malapit nga Simbahan. Pag-abot namon didto, nagsiling si President Hinckley, “Maliko kita diri sa wala.” Nagliko kami kag gin-usoy ang karsada nga gintudlo sang propeta. Ang alagyan medyo taklaron.

Pagkalab-ot gid sang salakyan sa ibabaw sang bungyod, hambal ni Presidente Hinckley, “Pundo diri, pundo diri.” Gintudlo niya ang duta sa tuo kag nagsiling, “Ano sa panan-aw ninyo ini nga propyedad? Diri ang lugar sang templo. Diri ang gusto sang Ginuo nga matindog ang templo. Mabakal bala ninyo? Mabakal bala ninyo?”

Wala pa namon nalantaw ini nga propyedad. Mas malayo ini sa mayor nga kalye, kag wala may nakabutang nga ginabaligya ini. Pagsabat namon nga wala kami nakahibalo, nagtudlo liwat si President Hinckley sa propyedad kag nagsiling, “Ini ang lugar para sa templo.” Nagtiner pa kami sang pila ka minutos dayon nagpa-airport kami para magpauli.

Pagkadason nga adlaw, kami ni Brother Williams ginpatawag ni President Hinckley sa iya opisina. Gindrowing na niya ang tanan sa papel: ang mga kalye, ang kapilya, kon diin maliko, kag ang marka nga X kon diin ipatindog ang templo. Namangkot siya kon ano ang nakuha namon nga impormasyon. Ginhambalan namon sia nga kabudlay sang ginpili niya nga propyedad. Tatlo ang tag-iya: ang isa taga-Canada, ang isa taga-India, kag ang isa naman taga-China! Kag wala sing nagakaigo nga pahanugot halin sa gobiyerno nga pwede gamiton ang lugar sa relihiyoso nga mga katuyoan.

“Tinguhai gid ninyo,” hambal niya.

Dayon ang mga milagro nagkalatabo . Sa pila lang ka bulan, nabakal namon ang propyedad, kag dason ang siyudad sang Langley, British Columbia, naghatag sang pahanugot sa pagpatindog sang templo.

Sa pagbinag-binag sini nga eksperyensya, mapainubuson ako sa paghibalo nga bisan may pormal kami nga tinun-an ni Brother Williams kag tinuig nga eksperyensya sa pagpamakal sang propyedad kag pag-disensyo sang templo, si President Hinckley wala sing amo sina nga pormal nga tinun-an, pero may yara sia sing mas masobra pa—ang regalo sa propeta nga makita ang palaabuton. Napanan-aw niya ang lugar kon sa diin dapat ipatindog ang templo sang Diyos.

Sang ginsugo sang Ginuo ang una nga mga santos sa sini nga dispensasyon nga magpatindog sang templo, nagsiling Sia:

“Apang ipatindog ang isa ka balay sa akon ngalan suno sa halimbawa nga akon ipakita sa ila.”

“Kag kon ang akon mga tawo indi magpatindog sini suno sa halimbawa nga akon ipakita … , indi ko pagbatonon ini halin sa ila mga kamot” (Ang Doktrina kag mga Kasugtanan 115:14–15).

Parehas sa una nga mga santos, amo man sa aton subong: ang Ginuo nagpahayag sadto kag padayon nga nagapahayag sa Pangulo sang Simbahan sang mga sulundan kon paano ang ginharian sang Diyos dumalahan sa aton panahon. Kag nagagiya man siya sa kada isa kon paano mangabuhi, agud batonon sang Ginuo ang aton panggawi.

Sang Abril 2013 naghambal ako sang dako nga pagtinguha nga palig-onon ang pundasyon sang kada templo agud sigurohon nga indi maguba sang mga bagyo kag kalamidad. Pero ang pundasyon una pa lang. Ang templo may madamo nga mga bato nga ginapasigo suno sa ginplano nga mga sulundan. Kon luyag naton nga ang aton mga kabuhi mangin pareho sa mga templo nga ginatinguhaan naton nga ipatindog suno sa gintudlo sang Ginuo (tan-awa sa 1 Mga Taga-Corinto 3:16–17), mamangkot kita sa aton mga kaugalingon, “Ano ang mga bato nga ibutang naton agud ang aton kabuhi mangin mas manami, dungganon, kag makabato sa mga bagyo sang kalibutan?”

Makita naton ang sabat sa sini nga pamangkot sa Libro ni Mormon. Parte sa Libro ni Mormon, ang Propetang si Joseph Smith nagsiling, “Ginhambalan ko ang mga kautoran nga ang Libro ni Mormon amo ang pinakahusto nga libro sa kalibutan, kag ang salandigan nga bato sang aton relihiyon, kag mas makapalapit ang tawo sa Dios paagi sa pagsunod sa mga panudlo sini sangsa bisan ano pa man nga libro” (pauna sang Libro ni Mormon). Sa pauna sang Libro ni Mormon, ginatudloan kita nga ang sin-o man nga makabaton sang diosnon nga panaksihon halin sa Balaan nga Espiritu [nga ang Libro ni Mormon pulong sang Dios, makahibalo man paagi sa pareho nga gahum nga si Jesucristo amo ang Manluluwas sang kalibutan, nga si Joseph Smith amo ang Iya manugbugna kag [propeta sang Pagpanumbalik], kag ang Simbahan ni Jesucristo sang mga Santos sa Ulihing mga Adlaw amo ang ginharian sang Ginuo nga ginpahamtang liwat sa kalibutan.”

Gani, ari ang pila ka importante nga mga bato sa aton kaugalingon nga pagtuo kag testimonya:

Si Jesucristo amo ang Manluluwas sang kalibutan.
Ang Libro ni Mormon pulong sang Dios.
Ang Simbahan ni Jesucristo sang mga Santos sa Ulihing mga Adlaw amo ang ginharian sang Dios sa kalibutan.
Si Joseph Smith isa ka propeta, kag may ara kita sang mga buhi nga propeta sa kalibutan subong.

Sang sini lang nga binulan, nakapamati ako sa tagsa ka pamulongpulong ni President Nelson sa pangkabilogan nga kumperensya sumugod sang una siya nga nangin Apostoles. Nagpabag-o ini sang akon kabuhi. Sa akon pagtuon kag pagpamalandong sa natipon nga kalam ni President Nelson sa sulod sang 34 katuig, klaro kag nagahisanto nga mga tema ang makita sa iya mga panudlo. Ang kada tema may kaangtanan sa sinang importante nga mga bato nga ginhambal bag-o lang ukon sa importante nga mga bato sa pagpatindog sang aton personal nga mga templo. Lakip dira ang pagtuo kay Ginuong Jesucristo, paghinulsol, bunyag para sa kapatawaran sang mga sala, ang regalo sang Balaan nga Espiritu, pagtubos sang mga patay kag buluhaton sa templo, pagpakabalaan sang adlaw nga Dominggo, nga nagasugod sa katuyuan nga magpadayon sa dalan sang kasugtanan. Nagpamulong si President Nelson parte sini tanan nga may pagpalangga kag katutom.

Ang pamuno nga sadsaran nga bato sang Simbahan kag sang aton kabuhi amo si Jesucristo. Ini ang Simbahan Niya. Si President Nelson ang Iya propeta. Ang mga panudlo ni President Nelson nagasaksi kag nagapahayag sang kabuhi kag kinaugali ni Jesucristo. Nagahambal sia sing mapinalanggaon kag maalam parte sa kinaiya sang Manluluwas kag sa Iya misyon. Kag pirme man siya nagahatag sang mainit nga panaksihon sang diosnon nga palangakoan sang mga buhi nga propeta—ang mga Pangulo sang Simbahan—nga gin-alagaran niya.

Subong, pribilehiyo naton nga suportahan siya bilang ang buhi nga propeta sang Ginuo sa kalibutan. Naanad na kita sa pagsuporta sa mga lider sang Simbahan paagi sa balaan nga sulundan sang pag-alsa sang kamot agud ipakita ang aton pagbaton kag pagsakdag. Bag-o lang naton ginhimo ini. Pero ang matuod-tuod nga pagsuporta labaw sangsa pisikal nga palatandaan. Pareho sang ginatalupangod sa Ang Doktrina kag mga Kasugtanan 107:22, ang Unang Pangulohan dapat “itib-ong paagi sa pagsalig, pagtuo, kag pagpangamuyo sang simbahan.” Lubos kag tunay naton nga masuportahan ang buhi nga propeta kon ginapauswag naton ang sulundan sang pagsalig sa iya mga pulong, nga may pagtuo nga maghulag, kag dayon magpangamuyo sang padayon nga mga bugay sang Ginuo sa iya.

Kon ginapanumdum ko si President Russell M. Nelson, ginapatawhay ako sang pulong sang Manluluwas sang nagsiling Sia nga, “Kag kon magpamati ang akon katawhan sa tingug ko, kag sa tingug sang mga alagad ko nga akon ginpili nga maggiya sa ila, tan-awa, ginasiling ko sa inyo, indi sila pagpabalhinon sa ila lugar” (Ang Doktrina kag mga Kasugtanan 124:45).

Ang pagpamati kag pagsunod sa mga buhi nga propeta may daku, bisan pa gani makapabag-o-kabuhi nga epekto sa aton. Ginapabakod kita. May yara kita sing mas daku nga kasegurohan kag pagsalig sa Ginuo. Mabati-an naton ang pulong sang Ginuo. Mabatyagan naton ang pagpalangga sang Diyos. Mahibal-an naton kon paano magpangabuhi nga may katuyoan.

Palangga kag ginasuportahan ko si President Russell M. Nelson kag ang iban pa nga gintawag bilang mga propeta, mga manugtan-aw, kag mga manugbugna. Ginapamatud-an ko nga may yara sia sang mga regalo nga ginhatag sang Ginuo sa iya, kag nagasaksi ako nga kon pabakuron naton sa aton mga kabuhi ang gawi sang pagpamati kag pagsunod sa tingog sang mga buhi nga propeta, ang aton kabuhi mapasad suno sa diosnon nga sulundan sang Ginuo para sa aton kag anihon naton ang mga bugay nga wala’y katapusan. Ang pangagda ginatanyag sa tanan. Kari, magpamati sa tingog sang propeta; huo, kari kay Cristo kag mabuhi. Sa ngalan ni Jesucristo, amen.