2:3

Pagpahamtang sang Pundasyon Sang Dako Nga Buluhaton

Ni Elder Steven R. Bangerter

Sang Kapituan

Ang mga leksyon nga ginatudlo paagi sa mga tradisyon nga ginapasad naton sa aton panimalay, bisan magagmay kag simple, may dako nga importansya sa kalibutan sa karon.

Bilang mga ginikanan sa Sion, may balaan kita nga obligasyon nga pukawon sa aton mga kabataan ang kaukod kag dedikasyon sa kalipayan, kasanag, kag mga kamatuoran sang ebanghelyo ni Jesucristo. Sa pagpadako sang aton kabataan, nagapasad kita sang mga tradisyon sa sulod sang puluy-an kag nagapahamtang sang mga sulundan sang komunikasyon kag mga pangginawi sa aton mga kaangtanan sa pamilya. Sa paghimo sini, ang mga tradisyon nga ginapasad naton dapat magtudok sang mabakod, indi malingkang nga mga kinaiya sang kaayo sa aton mga kabataan nga magahatag sa ila sang kabaskog sa pag-atubang sang mga hangkat sa kabuhi.

Sa madamo nga tinuig ang amon pamilya nagahiwat sang tuigan nga tradisyon nga mag-kamping sa ibabaw sang Uintah Mountains sa naaminhan-nasidlangan sang Utah. Nagabiyahe kami sang 20 milya (32 km) sa batuhon nga dalan pakadto sa matahum nga nalupyakan nga ginalibutan sang matag-as ang mga bukid kag ginaagyan sang suba nga may mabugnaw kag matin-aw nga tubig. Tagsa ka tuig, nga nagalaum nga mapabakod ang bili sang doktrina sang ebanghelyo kag mga kahiwatan sa tagipusuon sang amon kabataan kag mga apo, ginapangabay namon ni Susan ang tagsa sa amon anum ka anak nga lalaki kag ang ila pamilya nga maghanda sang malip-ot nga mensahe parte sa topiko nga sa pamatyag nila importante nga elemento sa pagpasad sang isa ka puluy-an nga nasentro kay Cristo. Dayon nagatipon kami para sa isa ka pangpamilya nga debosyunal sa isa ka malinong nga lugar, kag ang kada isa magpaambit sang ila mensahe.

Sini nga tuig, ginsulat sang amon mga apo ang tema sang ila mensahe sa mga bato kag dayon, sing isa-isa, ila ginlubong ang mga bato nga nagatululupad, nga nagasimbolo sang sigurado nga pundasyon kon sa diin ginapasad ang isa ka malipayon nga kabuhi. Yara sa ila anum tanan ka mga mensahe ang wala nagabag-o, wala’y katapusan nga kamatuoran nga si Jesucristo amo ang sadsaran nga bato sina nga pundasyon.

Sa mga pulong ni Isaias, “Busa, amo ini ang ginasiling sang Ginuong Dios, Yari karon, nagabutang ako sa Sion nga sa sadsaran sing bato, bato nga natilawan, bilidhon nga pamag-ang, nga sadsaran nga malig-on.” Si Jesucristo amo inang bilidhon nga pamag-ang sa pundasyon sang Sion. Sia amo ang nagpahayag kay Propetang Joseph Smith: “Gani, indi ka magkakapoy sa paghimo sang maayo, bangud ginapasad mo ang pundasyon sang isa ka dako nga buluhaton. Kag gikan sa magagmay nga mga butang ang dalagko nga mga butang nagakahanabo.”

Ang mga leksyon nga ginatudlo paagi sa mga tradisyon nga ginapasad naton sa aton panimalay, bisan magagmay kag simple, may dako nga importansya sa kalibutan sa karon. Ano nga mga magagmay kag simple nga mga butang nga, kon ipasad, magahikot sang dako nga buluhaton sa mga kabuhi sang aton kabataan?

Si Pangulong Russell M. Nelson sang nagligad nagpamulong-pulong sa isa ka dako nga kongregasyon malapit sa Toronto, Canada, kag maathag nga ginpadumdum ang mga ginikanan sang aton sagrado nga responsibilidad nga tudluan ang aton kabataan. Kalakip sa tig-una nga mga responsibilidad nga ginsambit, si Pangulong Nelson nagdagmit sang aton katungdanan bilang mga ginikanan nga tudloan ang aton kabataan nga mahangpan kon ngaa nagaambit kita sang sakramento, ang kahulugan sang mabun-ag sa kasugtanan, kag ang importansya sang paghanda para sa kag pagbaton sang patriarchal blessing, kag iya ginpaisog ang mga ginikanan sa pagpanguna sa pagbasa sang balaan nga mga kasulatan bilang pamilya. Paagi sa sini nga mga pagpaninguha, ang aton pinalangga nga propeta nagatulod sa aton nga himuon ang mga puluy-an naton nga “santwaryo sang pagtuo.”

Sa Libro ni Mormon, ginsulat ni Enos ang dako nga kapasalamatan nga iya nabatyagan para sa ehemplo sang iya amay, nga “gintudluan [niya] ako sa iya hinambalan, kag subong man sa disiplina kag pagtudlo sang Ginuo.” Upod ang dako nga emosyon, si Enos nagsinggit, “Kag bulahan ang ngalan sang akon Dios tungod sini.”

Bilidhon sa akon ang magagmay kag simple nga mga tradisyon nga amon ginahimo sa amon puluy-an sa masobra 35 ka tuig sang amon pag-asawahay. Madamo sa amon mga tradisyon ang malinong, pero makahulugan. Halimbawa:

Sa mga gab-i nga wala ako sa balay, nahibal-an ko nga sa idalom sang direksyon ni Susan, ang pinakamagulang nga anak nga lalaki ang nagaako sang responsibilidad sa pagpanguna sa pamilya sa pagbasa sang balaan nga mga kasulatan kag pagpangamuyo.
Isa pa ka tradisyon—wala kami nagagwa sa balay ukon nagatapos sang tawag sa telepono nga wala nagasiling nga, “Palangga ta ka.”
Ginbugayan ang amon kabuhi bangod sang regular nga paghatag sang tiyempo nga personal nga mainterbyu ang tagsa namon ka anak nga lalaki. Sa isa ka interbyu ginpamangkot ko ang akon anak parte sa iya handum kag pagpanghanda nga mag-alagad sa misyon. Pagkatapos sang paghinambalanay, makadali kami nga naghipos agud magpanumdom; dayon nagsandig sia paatubang kag madinumdumon nga nagsiling, “Tay, nadumduman mo sang bata pa ako kag nagsugod nga interbyuhon mo kami?” Siling ko, “Huo.” “Ti,” hambal niya, “Ginpangako ko sa imo sadto nga magmisyon ako, kag kamo ni Nanay nagpangako sa akon nga magmisyon kamo kon magtigulang na kamo.” Dayon liwat nga naglinong. “May problema bala kamo nga nagapugong sa inyo nga magmisyon—kay basi makabulig ako?”

Ang tayuyon, maayo nga mga tradisyon sa pamilya nga nagalakip sang pangamuyo, pagbasa sang balaan nga kasulatan, family home evening, kag pagtambong sa mga miting sa Simbahan, bisan daw magagmay kag simple, nagatuga sang kultura sang pagpalanggaanay, respeto, paghiliusa, kag seguridad. Sa katuyuan sang paghimo sini, ang aton mga kabataan mapangapinan batok sa nagakalayo nga mga baslay sang kaaway nga nagaduging sa kalibutanon nga kultura sa aton panahon karon.

Ginapadumdum kita sang maalam nga laygay ni Helaman sa iya mga anak: “Dumduma nga sa bato sang aton Manunubos, nga amo si Cristo, ang Anak sang Dios, nga kamo kinahanglan gid nga magpasad sang inyo sadsaran; agud kon ang yawa magapadala sang iya mamadlos nga mga hangin, huo, sang iya mga baslay sa buhawi, huo, kon ang tanan niya nga bato nga hielo kag ang iya mabaskog nga dalimuos magatupa sa inyo, mangin wala ini sing gahum sa pagpangibabaw sa inyo sa pagguyod sa inyo paidalom sa kadadalman sang kapiutan kag nagapadayon nga kasubo, tungod sang bato nga sa diin kamo napasad, nga amo ang isa ka pat-od nga sadsaran nga kon diin ang mga tawo magapasad indi sila mahulog.”

Tinuig na ang nagligad, sang nagaalagad ako bilang batan-on pa nga bishop, isa ka gulang na nga lalaki ang nag-ayo nga mag-istorya sa akon. Ginlaragway niya ang iya pagbiya sa Simbahan kag sa mga matarong nga mga tradisyon sang iya ginikanan sang lamharon pa sia. Gindetalye niya ang kasakit sang buot nga iya inagyan sa kabuhi samtang ginapangita ang nagadugay nga kalipay sa tunga sang hingalit nga kalipay nga ginatanyag sang kalibutan. Karon, sa iya katigulangon, nabatyagan niya ang malolo, kon kis-a liwat-liwat nga paghutik sang Espiritu sang Dios nga nagagiya sa iya pabalik sa mga leksyon, mga kahiwatan, mga balatyagon, kag espirituhanon nga proteksyon sang bata pa sia. Nagpasalamat sia sa mga tradisyon sang iya ginikanan, kag sa moderno nga pulong, ginsulit niya ang ginsinggit ni Enos: “Bulahan ang ngalan sang akon Dios tungod sini.”

Sa akon eksperiyensya, ang pagbalik sining pinalangga nga lalaki sa ebanghelyo komon sa kadam-an kag nagaliwat-liwat ini sa mga anak sang Dios nga nagabiya sing makadali, lamang nga magbalik sa mga pinanudlo kag mga naandan sang lamharon pa sila. Sa sina nga mga tion, makit-an naton ang kaalam sang nagsulat sang hulubaton, nga naglaygay sa mga ginikanan, “Hanasa ang bata sa dalanon nga dapat niya paglaktan: kag bisan tigulang na sia, indi sia magtalikod sa sini.”

Ang tanan nga ginikanan nagaagi sang tion sang kapaslawan kag nagkalain-lain nga lebel sang determinasyon kag kabakod sa pagpadako sang kabataan. Apang, kon ang mga ginikanan nagapakita sang pagtuo paagi sa pagtudlo sang kabataan sing pranka, mapinalanggaon kag sa paghimo sang tanan nga ila masarangan agud buligan sila, magabaton sila sang mas dako nga paglaum nga ang mga binhi nga ila ginatanom magapanggamot sa tagipusoon kag pamensaron sa ila kabataan.

Si Moises nakaintiendi sang tig-una nga kakinahanglanon sang tayuyon nga pagtudlo. Ginlaygay niya, “Kag itudlo mo [ining mga pulong] sing makugihon sa imo mga anak, kag hambalon mo sila sa nagalingkod ka sa imo balay, kag sa nagalakat ka sa dalanon, kag sa nagahigda ka, kag sa nagabangon ka.”

Magluhod kita sa tupad sang aton kabataan sa pagpangamuyo bilang pamilya, atipanon naton sila paagi sa paghimud-os nga maghiwat sang makahulugan nga pagbasa sang balaan nga mga kasulatan, pasensyoso, mapinalanggaon naton sila nga ginaatipan samtang nagapasakop kita sing ululupod sa family home evening, kag nagakalisod kita para sa ila nga nagaluhod sa tunga sang aton pribado nga mga pangamuyo sa langit. O, daw ano ang kaluyag naton nga ang mga binhi nga aton ginatanom magapanggamot sa tagipusoon kag pamensaron sang aton kabataan.

Nagapati ako nga indi pamangkot kon bala ang aton kabataan “nakaintiendi” sa tunga sang aton pagtudlo, pareho sang pagtinguha nga magbasa sang balaan mga kasulatan ukon maghiwat sang family home evening ukon magtambong sa Mutual ukon iban nga mga miting sa Simbahan. Indi pamangkot kon bala sa amo nga mga tinion nahangpan nila ang importansya sinang mga kahiwatan kundi laban kon bala kita, bilang mga ginikanan, nagapakita sang nagakaigo nga pagtuo agud sundon ang laygay sang Ginuo nga matutom nga magpangabuhi, magtudlo, magpaathag, kag magpahamtang sang mga lalab-uton nga inspirado sang ebanghelyo ni Jesucristo. Isa ini ka paghimud-os nga dala sang aton pagtuo—ang aton pagpati nga pila ka adlaw ang mga binhi nga gintanom sa ila pagkalamharon magapanggamot kag magtubo kag magdako.

Ang mga bagay nga ginahambalan naton, ang mga butang nga ginawali kag ginatudlo naton ang nagahibalo sang mga butang nga matabo sa tunga naton. Sa aton pagpasad sang maayo mga mga tradisyon nga nagatudlo sang doktrina ni Cristo, ang Balaan nga Espiritu magapamatuod sang kamatuoran sang aton mensahe kag magaatipan sang mga binhi sang ebanghelyo nga ginatanom sing madalom sa mga tagipusoon sang aton kabataan paagi sa aton mga paghimud-os. Nagapamatuod ako sa sini sa ngalan ni Jesucristo, amen.