Ang Kalipay sa Di-maiyaiyahon nga Pag-alagad
Nagpromisa kita sa aton Amay sa Langit nga alagaran naton Sia kag ang iban nga tawo sing may gugma kag tumanon ang Iya pagbuot sa tanan nga butang.
Pagkatapos sang nagligad nga pangkabilugan nga komperensya, madamo ang nagapamangkot sa akon kon: “Komportable bala ang mga pulungkuan sa atubangan?” Ang sabat ko pirme: “Ang mga pulungkuan sa atubangan komportable kaayo kon indi ka maghambal.” Matuod, indi bala? Ang akon pulungkuan indi gid tama ka komportable sining kumperensya, pero nagapasalamat gid ako sa bugay kag dungog nga makahambal sa inyo sini nga gab-i.
Kon kaisa sa aton pag-alagad, sari-sari nga pagserbisyo ang aton mahimo. Ang iban medyo komportable kag ang iban indi, pero nagpromisa kita sa aton Amay sa Langit nga alagaran naton Sia kag ang iban nga tawo sing may gugma kag tumanon ang Iya pagbuot sa tanan nga butang.
Pila katuig ang nagligad, natun-an sang mga youth sa Simbahan nga “kon kamo ‘nagaalagad sa Dios’ [tan-awa saDoctrine and Covenants 4:2], nagapasakop kamo sa pinakaimportante nga biyahe sa tanan. Nagabulig kamo sa Dios sa pagpadasig sang Iya buluhaton, kag isa ini ka daku, malipayon kag dalayawon nga eksperiyensya.” Biyahe ini nga para sa tanan—bisan pila ang edad—kag biyahe man nga nagatuytoy sa aton sa ginhambal sang aton pinalangga nga propeta nga “dalan sang kasugtanan.”
Apang, ang masubo, yari kita sa maiya-iyahon nga kalibutan nga ang mga tawo pirme nagapamangkot, “Ano ang makuha ko diri?” imbis sang “Sin-o ang mabuligan ko subong?” ukon “Paano ko mas maalagaran ang Ginuo sa akon calling?” ukon “Ginahatag ko bala ang tanan ko nga ikasarang sa Ginuo?”
Daku nga ehemplo sa akon sing di-maiyaiyahon nga pag-alagad si Sister Victoria Antonietti. Si Victoria isa sang mga titser sa Primary sa akon branch sa Argentina sang nagadaku ako. Kada Martes sang hapon, sa amon pagtipon para sa Primary, ginadal-an niya kami sang chocolate cake. Nanamitan ang tanan sang cake—magluwas sa akon. Nalainan ako sang chocolate cake! Kag bisan nga ginhawa gid niya nga ipaambit sa akon ang cake, ginabalibaran ko pirme ang iya pananyag. .
Isa ka adlaw, pagkatapos niya paambit sang chocolate cake sa iban nga kabataan, ginpamangkot ko sia, “ngaa indi ka magdala sang lain nga cake—pareho abi sang orange ukon vanilla?”
Nagkadlaw sia sing makadali, kag nagsiling sa akon, “Ngaa indi mo pagtilawan bisan diutay lang? Ini nga cake himo sa espesyal nga ingrediente, kag ginapromisa ko nga kon tilawan mo, manamitan ka gid!”
Nagtulok ako sa palibot, kag sa akon pagkasorpresa, ang tanan daw nanamitan gid sang cake. Nagsugot ako nga tilawan ini. Napaktan bala ninyo kon ano ang natabo? Nauyonan ko!” Amo ato ang pinakauna nga tion nga nanamian ako sang chocolate cake.
Madamo pa nga tinuig ang nagligad sang nahibal-an ko ang sekreto nga ingrediente sa chocolate cake ni Sister Antonietti. Nagabisita kami sang akon kabataan sa akon iloy kada semana. Sa isa sining mga pagbisita, nagakaon kami ni Mama sang chocolate cake, kag ginsugiran ko sia kon paano una ko nga nauyunan ang chocolate cake. Dayon, ginpasanagan niya ako sang bilog nga istorya.
“Bal-an mo, Cris,” siling ni Mama, “Si Victoria kag iya pamilya wala sing daku nga ikasarang, kag kada semana nagapili sia kon bala mabayad sa bus nga sakyan nila sang iya apat ka kabataan pakadto sa Primary ukon mabakal sang ingrediente sa chocolate cake para sa iya klase sa Primary. Pirme niya ginapili ang chocolate cake sangsa bus, kag nagalakat sila sang iya kabataan sing masobra duha ka milya [3 km] pakadto-pakari, bisan ano man ang tiempo.”
Sadto nga adlaw mas naapresyar ko ang iya chocolate cake. Mas importante, nahibal-an ko nga ang sekreto nga ingrediente sa cake ni Victoria amo ang gugma niya sa iya mga ginaalagaran kag ang iya di-maiyaiyahon nga sakripisyo para sa amon.
Ang pagpanumdum sa cake ni Victoria nagabulig sa akon sa pagdumdum sang di-maiyaiyahon nga sakripisyo sa wala nagalubad nga leksyon nga gintudlo sang Ginuo sa Iya mga disipulo sang nagalakat Sia pakadto sa bahandian sang templo. Nahibal-an ninyo ang istorya. si Elder James E. Talmage nagpanudlo nga may 13 ka baul,“kag diri ginahulog sang mga tawo ang ila amot para sa [lainlain] nga katuyuan nga makita suno [sa] nakasulat sa mga kahon.” Si Jesus naglantaw sang sari-sari nga mga tawo nga nagahulog sang kwarta. Ang iban nagahatag nga “sinsero ang katuyuan” samtang ang iban nagahulog sing “dalagku nga kantidad sang pilak kag bulawan,” nga nagalaum nga makit-an, talupangdon, kag dayawon bangud sang ila mga amot.
“Isa sa kadam-an ang imol nga babaying balo, nga … nagbutang sa isa ka bahandian sing duha ka gamay nga sensilyo nga ginatawag lepta; ang iya amut katumbas sang tunga ka sentimo sang kwarta sa Amerika. Gintawag sang Ginuo ang Iya mga disipulo, kag gintudlo ang imol nga balo kag ang iya amot, kag nagsiling: ‘Sa pagkamatuod nagasiling ako sa inyo, Ining imol nga babaying balo nagbutang sing labi pa sa tanan nga amot sa bahandian: Kay sila tanan nag-amot gikan sa ila kabuganaan; apang sia sa iya kinawad-on nagbutang sang tanan niya, bisan ang tanan nga iya inugpangabuhi ’ [Marcos 12:43–44].”
Ang balo wala sing talalupangdon nga tindog sa sosyedad sang iya panahon. Apang may mas importante sia nga ginakaptan: ang iya katuyuan putli, kag ginhatag niya ang iya tanan nga ikasarang. Ayhan naghatag sia sing diutay sangsa iban, mas mahipos sangsa iban, lain sangsa iban. Sa mata sang pila, ang iya ginhatag kubos, pero sa mata sang Manluluwas, nga “nakahibalo sang mga hunahuna kag katuyuan sang tagipusuon,” ginhatag niya ang iya tanan.
Sisters, ginahatag bala naton ang aton tanan sa Ginuo nga wala sing pagduhaduha? Ginahatag bala naton ang aton tion kag mga talento agud nga ang mga ulihing-tubo makatuon nga higugmaon ang Ginuo kag tumanon ang Iya mga kasuguan? Nagaminister bala kita sa mga yara sa aton palibot kag sa mga gintugyan sa aton sing may pag-ulikid kag katutum—nga ginahatag ang aton panahon kag kusog nga sarang magamit sa iban nga paagi? Ginapangabuhi bala naton ang duha ka daku nga sugo—nga higugmaon ang Dios kag Iya kabataan? Inang gugma masami nga ginapakita sa pag-alagad.
Si President Dallin H. Oaks nagpanudlo: “Ang aton Manluluwas naghatag sang Iya kaugalingon sa di-maiya-iyahon nga pag-alagad. Nagpanudlo sia nga ang tagsa sa aton dapat magsunod sa Iya paagi sa pagpaiway sang aton maiyaiyahon nga mga huyog agud mag-alagad sa iban.”
Pagpadayon niya:
“Isa ka kinaandan nga ehemplo sang pagkalipat sa kaugalingon sa pag-alagad sa iban … amo ang sakripisyo sang mga ginikanan para sa ila kabataan. Ang mga iloy nagaantus sang sakit kag pagpaiway sang ila mga prayoridad kag kasulhay sa pagbun-ag kag pagpadaku sang tagsa ka bata. Ang mga amay nagapasibo sang ila kabuhi kag mga prayoridad agud masakdag ang pamilya. …
“… Nagakalipay man kita sa inang mga nagatatap sa mga miyembro sang pamilya nga may kasablagan kag tigulang nga mga ginikanan. Wala sing bisan isa sining pag-alagad ang nagapamangkot, ano ang makuha ko diri? Tanan sini nagapangayo sang pagpaiway sang personal nga kasulhay para sa di-maiyaiyahon nga pag-alagad. …
“[Kag] tanan sini nagapakita sing wala paglubad nga prinsipyo nga mas malipayon kita kag mas kuntento kon nagahikot kita kag nagaalagad para sa kon ano ang aton mahatag, indi para sa kon ano ang aton makuha.
“Ang aton Manluluwas nagatudlo sa aton nga sundon Sia paagi sa paghimo sang kinahanglanon nga mga sakripisyo sa pagkalipat sang kaugalingon sa di-maiyaiyahon nga pag-alagad sa iban.”
Si President Thomas S. Monson nagpanudlo man nga “Ayhan, kon mag-atubang na kita sa aton Tagtuga, indi kita pagpamangkuton, ‘Pila ka posisyon ang imo ginkaptan?’ kundi, ‘Pila ka tawo ang imo nabuligan?’ Sa pagkamatuod, indi gid ninyo mahigugma ang Ginuo tubtob nga maalagaran ninyo Sia paagi sa pag-alagad sa Iya katawhan.”
Kon sayuron, sisters, indi importante kon nagpungko kita sa komportable ukon indi-komportable nga pulungkuan sa bilog nga miting. Indi man gani importante kon, bangud kinahanglanon, naggwa kita sa pasilyo agud pahipuson ang nagahibi nga bata. Ang importante amo nga nagkadto kita nga luyag mag-alagad, nga nakita naton ang aton mga ginaminister kag gintamyaw sila sing malipayon, kag ginpangilala ang aton mga katupad sa pulungkuan—nga nagadab-ot sa pagpakig-abyan bisan pa nga indi kita ang gintugyanan nga magminister sa ila. Kag segurado nga importante gid nga himuon naton ang tanan naton nga ginahimo nga may espesyal nga ingrediente sang pag-alagad upod ang gugma kag sakripisyo.
Nahibaloan ko nga indi naton kinahanglan maghimo sang chocolate cake agud mangin madinalag-on ukon dedikado nga titser sa Primary, tungod indi ato parte sa cake. Parte ato sa gugma sa likod sang pagbuhat.
Nagasaksi ako nga ang gugma ginapasagrado sang sakripisyo—ang sakripisyo sang isa ka titser kag ilabi na gid paagi sa labing daku kag wala’y katapusan nga sakripisyo sang Anak sang Dios. Nagapamatuod ako nga buhi Sia! Palangga ko Sia kag luyag ko nga sikwayon ang maiyaiyahon nga mga huyog agud nga maghigugma kag magtatap ako pareho sa Iya. Sa ngalan ni JesuCristo, amen.