Ang Partisipasyon sang mga Sister sa Pagtipon sang Israel
Nagapangabay ako sa inyo bilang propeta, mga kababayin-an sa Simbahan, sa pagporma sang palaabuton paagi sa pagbulig tipon sang nagalapta nga Israel.
Makalilipay nga makaupod kamo, pinalangga ko kag bilidhon nga mga sister. Ayhan ang ulihi nga eksperiyensya magahatag sa inyo sang ideya kon ano ang nabatyagan ko para sa inyo kag sa diosnon nga mga abilidad nga ginbugay sa inyo.
Isa ka adlaw samtang nagahambal sa isa ka kongregasyon sa Nabagatnan nga Amerika, ginlangkag ako sa akon topiko, kag sa isa ka importante nga bahin, siling ko, “Bilang iloy sang 10 ka kabataan, makahambal ako nga …” Kag padayon ko nga gintapos ang akon mensahe.
Wala ko matalupangdi nga ginmitlang ko ang tinaga nga iloy. Ang akon taglubad, nga abi nagsala lang ako, gin-islan ang tinaga nga iloy sang amay, gani wala makahibalo ang kongregasyon nga gintumod ko ang kaugalingon bilang iloy. Pero nabatian ini sang akon asawa nga si Wendy, kag naham-ot sia sa pagkatabinas ko.
Sa sina nga tion, ang kaluyag sang akon tagipusuon nga maghimo sang kinalain sa kalibutan—nga mahimo lamang sang isa ka iloy—nag-awas sa akon dughan. Sa tinuig, kon pamangkuton ako kon ngaa ginpili ko nga mangin doktor sa medisina, pareho lang ang akon sabat: “Bangod indi ako pwede magpili nga mangin iloy.”
Tandai nga tagsa nga gamiton ko ang tinaga nga iloy, wala lamang ako nagatumod sa mga babayi nga nagkaagi pamata ukon adoptar sang kabataan sa sini nga kabuhi. Ginatumod ko ang tanan nga hamtong nga anak nga babayi sang aton Ginikanan nga Langitnon. Ang tagsa ka babayi isa ka iloy bangod sang iya wala’y katapusan nga diosnon nga kinaiya.
Gani sini nga gab-i, bilang amay sang 10 ka kabataan—siyam ka babayi kag isa ka lalaki—kag bilang Pangulo sang Simbahan, ginapangamuyo ko nga mabatyagan ninyo ang balatyagon ko para sa inyo—sa kon sin-o kamo kag sa tanan nga kaayo nga mahimo ninyo. Wala sing makahimo sang ginahimo sang isa ka matarong nga babayi. Wala sing makakopya sang impluwensya sang isa ka iloy.
Sarang kag masami mapabutyag sang kalalakin-an ang pagpalangga sang Amay nga Langitnon kag sang Manluluwas sa iban. Pero ang mga babayi may kapinasahi sa paghimo sini—isa ka diosnon nga ikasarang. May ikasarang kamo nga mabatyagan kon ano ang kinahanglan sang iban—kag kon san-o nila ini kinahanglan. Madab-ot ninyo, mapaumpawan, matudloan, kag mapabakod ang isa ka tawo sa iya mismo tion sang pagkinahanglan.
Lain ang panglantaw sang mga babayi sa mga butang sangsa mga lalaki, kag huo, kinahanglan namon ang inyo panan-awan! Ang inyo kinaiya nagatudlo sa inyo nga pamensaron ang iban anay, nga pamensaron ang epekto sang isa ka aksyon sa iban.
Pareho sang ginhambal ni Pangulong Eyring, ang aton mahimayaon nga Iloy nga si Eba—upod ang iya importante nga panan-awon sang plano sang aton Amay nga Langitnon—amo ang nag-umpisa sang ginatawag naton nga ‘‘ang Pagkapukan.” Ang iya maalam kag maisog nga pagpili kag ang nagasuporta nga desisyon ni Adan ang nag-idog pasulong sang plano sang kalipayan sang Dios. Ginhimo nila nga posible para sa aton nga makakari sa duta, magbaton sang lawas, kag mapamatud-an nga pilion naton nga magtindog para kay Jesucristo karon, pareho sang antes pa kita sa kalibutan.
Pinalangga kong mga sister, may espesyal kamo nga espirituhanon nga mga ikasarang kag huyog. Karon nga gab-i ginaagda ko kamo, upod ang tanan nga paglaum sa akon tagipusuon, nga magpangamuyo agud mahangpan ang inyo espirituhanon nga mga ikasarang—nga patubuon, gamiton, kag palaparon ini, sing masobra pa sa nahimo ninyo. Mabag-o ninyo ang kalibutan kon himuon ninyo ini.
Bilang mga babayi, ginapaisog ninyo ang iban kag nagapahamtang sang talaksan nga bagay sundon. Hatagan ko kamo sang diutay nga ihibalo parte sa duha ka mayor nga mga anunsyo nga ginhimo sa nagligad nga pangkabilugan nga komperensya. Kamo, mahal ko nga mga sister, ang nangin yabi sa kada isa.
Una, sa ministering. Ang pinakamataas nga talaksan sa ministering amo ang iya sang aton Manluluwas nga si Jesucristo Sa kabilugan, ang mga babayi subong, kag halin pa sadto, mas malapit sa sinang talaksan sangsa mga lalaki. Kon matuod kamo nga naga-minister, ginasunod ninyo ang inyo balatyagon sa pagbulig sang iban nga mas mabatyagan ang pagpalangga sang Manluluwas. Ang huyog nga mag-minister duna sa matarong nga kababayin-an. May mga kilala ako nga babayi nga nagapangamuyo kada adlaw, “Sin-o bala ang luyag Mo nga buligan ko sini nga adlaw?”
Antes sang Abril 2018 nga anunsyo parte sa mas mataas kag mas balaan nga paagi sang pag-atipan sa iban, ang masami ginahimo sang iban nga mga lalaki amo ang tsekan ang ila toka sa home teaching nga “tapos na” kag obrahon naman ang masunod nga hilikuton.
Pero kon inyo mabatyagan nga ang sister nga inyo ginabisitahan nagakinahanglan sing bulig, nag-aksyon kamo sa gilayon kag bisan sa bug-os pa nga bulan. Amo nga, kon paano kamo naga-visiting teaching ang nagpadasig sinang pagligwat pakadto sa ministering.
Ika-duha, sang naligad nga pangkabilugan nga komperensya, ginliwat ang mga korum sang Melchizedek Priesthood. Sang ginpangamuyuan namon kon paano buligan ang mga lalaki sang Simbahan nga mangin mas epektibo sa ila mga responsibilidad, maid-id namon nga ginpadaluman ang halimbawa sang Relief Society.
Sa Relief Society, ang mga babayi sa nagkalain-lain nga edad kag halintang sang kabuhi ang nagatilipon. Ang kada dekada sang kabuhi nagadala sang pinasahi nga mga hangkat, pero, yara kamo, tagsa ka semana, nagaupdanay, nagatubo kag nagatudloanay sang ebanghelyo, kag nagahimo sang matuod nga kinalain sa kalibutan.
Karon, nga ginasunod ang inyo halimbawa, ang mga nagakapot sang Melchizedek Priesthood mga miyembro na sang elders quorum. Ining mga lalaki nga nagaedad halin 18 tubtob 98 (basi masobra pa), nga may pareho man katuhay nga inagihan sa priesthood kag sa Simbahan. Ining mga kauturan nga lalaki sarang na makahimo sang mas mabakod nga kaangtanan sang mga lalaki, magtuon sing ululupod, kag magbugay sa iban sing mas maayo.
Nadumduman ninyo nga sang nagligad nga Hunyo, ako kag si Sister Nelson nakighambal sa mga lamharon sang Simbahan. Gin-agda namon sila nga mag-entra sa batalya sang mga lamharon sang Ginuo agud magbulig tipon sang Israel sa magtimbang nga bahin sang kabuhi. Ining pagpanipon amo ang “pinakadako nga hangkat, ang pinakadako nga kawsa, kag ang pinakadako nga buluhaton sa duta sa karon”!
Isa ini ka kawsa nga nagakinahanglan gid sang kababayin-an, bangod ang mga babayi ang nagaporma sang palaabuton. Gani sini nga gab-i nagapangabay ako sa inyo bilang propeta, mga kababayin-an sa Simbahan, sa pagporma sang palaabuton paagi sa pagbulig tipon sang nagalapta nga Israel.
Sa diin bala kamo pwede magsugod?
Nagatanyag ako sang apat ka mga pangagda:
Una, ginaagda ko kamo nga magpasakop sa 10-ka adlaw nga puasa sa social media kag sa iban pa nga medya nga nagadala sang negatibo ukon indi matinlo nga panghunahuna sa inyo. Magpangamuyo agud mahibal-an kon ano nga mga impluwensya ang dulaon sa inyo pagpuasa. Ang epekto sang 10-ka adlaw nga puasa magapakibot sa inyo. Ano ang inyo natalupangdan pagkatapos magpahuway sa mga panan-awan sang kalibutan nga nagasamad sang inyo espiritu? May pabag-o bala kon sa diin ninyo karon gusto gamiton ang inyo oras kag kusog? May nagliwat bala sa inyo mga prayoridad—bisan diutay lang? Ginaagda ko kamo nga isulat kag sundon ang tagsa ka pagpabatyag.
Ikaduha, ginaagda ko kamo nga basahon ang Libro ni Mormon halin karon tubtob sa katapusan sang tuig. Bisan daw imposible sa tunga sang tanan nga hilikuton sa inyo kabuhi, kon batunon ninyo ining imbitasyon nga hugot sa buot, ang Ginuo magabulig sa inyo nga makakita sang paagi nga malab-ot ini. Kag, sa inyo pagtuon sing mainampuon, ginasaad ko nga ang mga langit magabukas para sa inyo. Ang Ginuo magabugay sa inyo sang mas dako nga inspirasyon kag rebelasyon.
Samtang nagabasa kamo, ginapaisog ko kamo nga markahan ang tagsa ka bersikulo nga nagasambit ukon nagatumod sa Manluluwas. Dayon, hungda nga maghambal parte kay Cristo, nga magkalipay kay Cristo, kag magwali parte kay Cristo sa inyo mga pamilya kag kaabyanan. Kamo kag sila mas magalapit sa Manluluwas sa sini nga proseso. Kag ang mga pagbag-o, bisan ang mga milagro, amat-amat nga matabo.
Sini nga aga gin-anunsyo ang parte sa bag-o nga iskedyul sa Dominggo kag sa sentro-sa-puluy-an, suportado-sang-Simbahan nga kurikulum. Kamo, pinalangga ko nga mga sister, amo ang yabi sa kadalag-an sining bag-o, balanse kag nagaangot nga nga pagtinguha sa pagtudlo-sang-ebanghelyo. Palihog tudloi ninyo ang inyo mga pinalangga kon ano ang inyo ginatun-an sa balaan nga mga kasulatan. Tudloi sila kon paano magliso sa Manluluwas para sa Iya nagapang-ayo kag nagatinlo nga gahum kon sila makasala. Kag tudloi sila kon paano magsandig sa Iya nagapabaskog nga gahum tagsa ka adlaw sa ila mga kabuhi.
Ikatatlo, magplastar sang sulukdan sang regular nga pagtambong sa templo. Mahimo nga nagakinahanglan ini sang mas dako nga sakripisyo sa inyo kabuhi. Ang mas regular nga pagkadto sa templo magatugot sa Ginuo nga tudloan kamo nga magsandig sa Iya gahum sang Priesthood nga ginhatag sa inyo sa templo. Para sa inyo nga malayo ang puluy-an sa templo, ginaagda ko kamo nga tun-an sing mainampuon ang parte sa mga templo sa balaan nga mga kasulatan kag sa mga pulong sang buhi nga mga propeta. Tinguhai nga mas makahibalo, mas makahangop, nga mas makabatyag tuhoy sa mga templo sangsa karon.
Sa aton bilog-kalibutan nga debosyonal para sa mga lamharon sang Hunyo, naghambal ako parte sa isa ka pamatan-on nga ang kabuhi naliwat sang ginbayluhan sang iya mga ginikanan ang iya smartphone sang piud-piod nga telepono. Ang iloy sining pamatan-on maisog nga babayi sang pagtuo. Nakita niya ang iya anak nga nagaamat liw-as sa pagpili sang mga makapugong sa iya nga mag-alagad sa isa ka misyon. Gindala niya ang iya mga pag-ampo sa templo agud mahibal-an kon ano ang pinakamaayo agud mabuligan ang iya anak. Dayon ginsunod niya ang tagsa ka pagpabatyag.
Siling niya: “Nabatyagan ko ang Espiritu nga nagagiya sa akon nga tan-awon ang telepono sang bata ko sa partikular nga mga oras agud dakpon ang partikular nga mga butang. Indi ako makahibalo maggamit sining mga smartphone, pero ang Espiritu naggiya sa akon sa mga social media nga wala ko gani ginagamit! Nakahibalo ako nga ang Espiritu nagabulig sa mga ginikanan nga nagapangayo sang giya para protektahan ang ila mga kabataan. [Sang primero] naakig ang anak ko sa akon. … Pero pagligad lang sang tatlo ka adlaw, ginpasalamatan niya ako! Nabatyagan niya ang kinalain.”
Ang pangginawi kag pamatasan sang iya anak naglain gid kaayo. Mas nangin mabinuligon sia sa balay, mas nagayuhum, kag mas nagapamati sa simbahan. Nanamian sia magserbe sang isa ka tion sa tulugmawan sang templo kag maghanda para sa iya misyon.
Ang akon ikaapat nga pangagda, sa inyo nga husto na sa edad, nga magpartisipar gid sa Relief Society. Ginaagda ko kamo nga tun-an ang pahayag sang katuyuan sang Relief Society sa karon. Makatalandog ini. Mahimo ini nga maggiya sa inyo sa pagpatubo sang inyo kaugalingon nga pahayag sang katuyuan sa inyo kaugalingon nga kabuhi. Ginaalungay ko sa inyo nga tilawan ang mga kamatuoran sa deklarasyon sang Relief Society nga ginbalhag halos 20 ka tuig na ang nagligad. Isa ka ginkuwadro nga kopya sini nga deklarasyon ang nagakabit sa dingding sang Unang Panguluhan. Ginakunyag ako tagsa nga basahon ko ini. Ginalaragway sini kon sin-o kamo kag kon kay sin-o kamo ginakinahanglan sang Ginuo sa sini mismo nga tion samtang inyo ginahimo ang inyo bahin sa pagbulig tipon sang nagalapta nga Israel.
Mga pinalangga ko nga mga sister, kinahanglan namon kamo! Kami “nagakinahanglan sang inyo kabakod, sang inyo pagkahaylo, sang inyo pagsalig, sang inyo ikasarang sa pagpanguna, sang inyo kaalam, kag sang inyo mga tingug.” Indi gid namon matipon ang Israel nga wala kamo.
Palangga ko kamo kag ginapasalamatan kamo kag karon ginabendisyunan kamo sang ikasarang nga ibilin ang kalibutan samtang nagabulig kamo sa sining importante kag ginadalian nga hilikuton. Mahimo naton sing ululupod ang tanan nga ginapahimo sa aton sang aton Amay nga Langitnon agud ihanda ang kalibutan para sa Ika-duhang Pagkari sang Iya Hinigugma nga Anak.
Si Jesus ang Cristo! Iya ini Simbahan. Sa sini ako nagapamatuod sa ngalan ni Jesucristo, amen.