2:3

Ang Tanan Kinahanglan Nga Magdala Sa Ila Kaugalingon Sang Ngalan Nga Ginhatag Sang Amay

Ni Elder Paul B. Pieper

Sang Seventy

Ang ngalan sang Manluluwas nagaisahanon nga may pinasahi nga gahum nga kinahanglanon naton. Amo lang ini ang ngalan kon sa diin mangin posible ang kaluwasan.

Sang nagligad nga mga semana, nagpartisipar ako sa bunyag sang pila ka otso-anyos nga mga kabataan. Nakasugod na sila sa pagtuon sang ebanghelyo ni Jesucristo halin sa ila mga ginikanan kag mga manunudlo. Ang binhi sang ila pagtuo kay Jesus nagsugod na sa pagtubo. Kag karon naghandum sila nga sundon Sia paagi sa pagpabunyag para magpamiyembro sa Iya ginpanumbalik nga Simabahan. Sang nakit-an ko ang ila kalangkag, natingala ako kon ano ang ila pag-intyende sa isa ka importante nga parte sang ila kasugtanan sa bunyag: ang ila pangako nga dalhon sa ila kaugalingon ang ngalan ni Jesucristo.

Halin sa ginsuguran, ginpahayag sang Diyos ang labi nga importansya sang ngalan ni Jesucristo sa Iya plano para sa aton. Isa ka anghel nagtudlo sa aton una nga amay nga si Adan, “Ang tanan nga imo pagahimuon, himuon mo sa ngalan sang Anak, kag maghinulsol ka kag dalayon nga magtawag sa Diyos sa ngalan sang Anak.”

Sa Libro ni Mormon, ang propeta nga si Haring Benjamin nagtudlo sa iya katawhan, “wala sing iban nga ngalan nga ginhatag ukon bisan ano nga iban pa nga paagi nga sa amo ang kaluwasan magaabot.”

Ginsulit sang Ginuo ang ining kamatuoran kay Propeta Joseph Smith: “Tan-awa, si Jesucristo amo ang ngalan nga ginhatag sang Amay, kag wala sing iban nga ngalan kon sa diin maluwas ang tawo.”

Sa aton panahon, si Pangulong Dallin H. Oaks nagtudlo nga “sila nga magapakita sang pagtuo sa sagrado nga ngalan ni Jesucristo … kag magasulod sa iya kasugtanan … makapanubli sang nagapasag-uli nga sakripisyo ni Jesucristo.”

Luyag sang aton Amay nga Langitnon nga klarohon sing mayo nga ang ngalan sang Iya Anak, nga si Jesucristo, indi isa lamang sa madamo. Ang ngalan sang Manluluwas may pinasahi nga gahum nga kinahanglanon naton. Amo lang ini ang ngalan kon sa diin mangin posible ang kaluwasan. Paagi sa pagpat-in sang kamatuoran sa tagsa ka dispensasyon, ang aton mapinalanggaon nga Amay nagapasalig sang tanan niya nga kabataan nga may yara sing dalan pabalik sa Iya. Pero bisan may segurado nga dalan, indi buot silingon nga basta na lang kita makabalik. Ang Dios naghambal nga kinahanglan naton nga maghulag: “Gani, ang tanan nga mga lalake [kag mga babayi] kinahanglan nga mag-dala sa ila kaugalingon sang ngalan nga ginhatag sang Amay.”

Para mabaton ang makaluwas nga gahum nga yara lamang sa ngalan ni Cristo, kinahanglan naton “magpaubos [sang aton kaugalingon] sa atubang sang Dios … kag maglakat nga may buong nga mga tagipusoon kag mahinulsolon nga mga espiritu … kag mangin [handa]nga dalhon sa [aton kaugalingon] ang ngalan ni Jesucristo” kag dira mangin takos, pareho sa akon otso-anyos nga mga abyan, nga “pagabatonon sa iya simbahan paagi sa pagpabunyag.”

Ang tanan nga sinsero nga nagahandum nga dalhon sa ila kaugalingon ang ngalan sang Manluluwas kinahanglan mangin takos kag magpabunyag bilang pisikal nga pamatuod sa Dios sang ila desisyon. Apang ang pagpabunyag panugod lamang.

Ang pulong nga “dalhon indi lang simple. Isa ini ka pulong sang paghulag nga may madamo sing buot silingon. Subong man, ang pangako nga dalhon ang ngalan ni Jesucristo kinahanglan may paghulag kag may madamo nga talaksan.

Halimbawa, isa ka buot silingon sang pulong nga “dalhon”, amo ang pag-dala sang ukon pagbaton sa sulod sang lawas sang isa ka tawo, subong abi kon kita mag-“dala sang isa ka ilimnon. ” Sa pagdala sa aton kaugalingon sang ngalan ni Jesucristo, nagapangako kita nga “dalhon naton ang Iya mga pinanudlo, ang Iya mga pamatasan, kag ang Iya paghigugma sa aton pagkatawo agud ang mga ini mangin parte kon si sin-o kita. Gani ang importansya sang pangagda ni Pangulong Nelson sa mga YSA nga “magpangamuyo kag magtutom sa pagtuon para maintyendihan ang kahulugan sang tagsa ka nanarisari nga ngalan kag titulo sang [Manluluwas] paramismosa [ila]” kag magpaayaw sa mga pulong ni Cristo sa balaan nga kasulutan, labi na ang Libro ni Mormon.

Isa pa ka buot silingon sang pulong nga “dalhon” amo nga batonon naton ang isa ka tawo sa iya palangakoan o batonon ang kamatuoran sang isa ka prinsipyo. Kon dalhon naton sa aton kaugalingon ang ngalan ni Cristo, ginabaton naton Sia bilang Manluluwas naton kag ginapangabuhi naton ang Iya mga pinanudlo bilang giya sa aton mga kabuhi. Sa tagsa ka makahuluganon nga desisyon nga aton ginahimo, mahimo naton”dal-on ang Iya ebanghelyo agud mangin matinud-anon kag masilundon nga ginapangabuhi ini sa bug-os naton nga tagipusuon, kusog pamensaron, kag kapagsik.

Ang pulong nga dalhon nagabuot man silingon nga i-upod naton ang aton kaugalingon sa isa ka katuyoan. Kalabananan sa aton ang nakaagi na sa pagdala sang responsibilidad sa olubrahan o mag-upod sa isa ka katuyoan ukon kawsa. Kon dalhon naton sa aton kaugalingon ang ngalan ni Cristo, ginadala naton sa aton kaugalingon ang mga responsibilidad sang isa ka matuodtuod nga disipulo, nagapangapin kita sa Iya katuyoan, kag “nagatindog kita bilang saksi [Niya] sa tanan nga tion kag sa tanan nga butang, kag sa tagsa ka lugar nga [aton] mahimo pagapuy-an.” Si Pangulong Nelson nagtawag sa “tagsa nga lamharon nga babayi kag tagsa nga lamharon nga lalaki … nga magpasakop sa batalyon sang mga lamharon sang Ginuo para magbulig sa pagtipon sang Israel.” Kag tanan kita malipayon nga patihon ang panawagan sang propeta nga gamiton ang ngalan sang Iya ginpanumbalik nga Simbahan nga ginpahayag Mismo sang Manluluwas: Ang Simbahan ni Jesucristo sang mga Santos sa Ulihing mga Adlaw.

Sa proseso sang pagdala sang ngalan sang Manluluwas sa aton kaugalingon, kinahanglan naton maintyendihan nga pareho ang katuyoan ni Cristo kag ang katuyoan sang Iya Simbahan. Indi gid ina pwede bulagon. Pareho man, sa aton pagkasumulunod sa Manluluwas kag ang aton maukod nga pagpartisipar sa Iya Simbahan indi gid pwede bulagon. Kon maguba ang aton pangako sa isa, maguba man ang aton pangako sa isa pa, kasubong nga nagasunod ang gab-i sa adlaw.

Ang mga iban nagakahuya nga dalhon ang ngalan ni Jesucristo kag ang Iya katuyoan kay ginakabig nila ini nga estrikto kaayo, nagalimita, kag daw nagabukot. Pero sa pagkamatuod, ang pagdala sang ngalan ni Cristo makapahilway kag nagapasanyog sa aton. Makapukaw ini sang handum nga nabatyagan naton sang ginbaton naton ang plano sang Dios paagi sa pagtuo sa Manluluwas. Nga amo sini ang handum sa aton tagipusoon, aton madiskubrehan nga ang matuod-tuod nga tinutuyo sang mga diosnon nga mga dulot kag mga talento nga ginhatag sang Dios sa aton, mabatyagan naton ang iya makapapagsik nga pagpalangga, kag magatubo ang aton mga kabalaka para sa kaayuhan sang iban. Kon dalhon naton ang ngalan sang Manluluwas, ginapangapyutan gid naton ang tagsa ka maayong butang, kag mangin kapareho kita sa Iya.

Tandaan gid naton nga ang pagdala sang ngalan sang Manluluwas isa ka pangako sang kasugtanan—sumugod sa kasugtanan sang bunyag. Si Pangulong Nelson nagtudlo, “Ang [aton] pangako nga sundon ang Manluluwas paagi sa paghimo kag pagtuman sang mga kasugtanan, magabukas sang pwertahan sa tanan nga espiritwal nga bugay kag pribilehiyo.” Isa sa mga langitnon nga pribilehiyo halin sa pagdala sang ngalan sang Manluluwas paagi sa pagpabunyag amo nga pwede ka na magbaton sang sunod nga ordinansa, ang aton pagkumpirma. Sang ginpamangkot ko ang isa sa mga otso-anyos ko nga abyan kon ano ang kahulugan sang pagdala sang ngalan ni Cristo para sa iya, simple lang sia nga nagsabat, “Buot silingon mahimo ako maubayan sang Balaan nga Espiritu.” Husto sia.

Ang dulot sang Balaan nga Espiritu ginabaton paagi sa pagkumpirma pagkatapos sang bunyag. Ini nga dulot amo ang prebelihiyo kag oportunidad nga makaupod pirme ang Balaan nga Espiritu. Kon magpamati kita kag magsunod sa Iya mahinay, gamay nga tingug, giyahan niya kita sa dalan sang kasugtanan nga aton ginsudlan sang nabunyagan kita, nagapaandam man sia sa aton kon ginatentar kita nga maghimo sang sala, kag ginabuligan niya kita nga maghinulsol kag magbag-o. Ang sentro naton pagkatapos sang bunyag, amo ang pagpabilin sang Balaan nga Espiritu nga yara sa aton pirme agud makapadayon kita sa pag-uswag sa aton dalan sang kasugtanan. Ang Balaan nga Espiritu makabulig lang sa aton kon matinlo ang aton kabuhi kag nagalikaw kita sa sala.

Amo ini ang rason nga ginhatagan kita sang Ginuo sang pamaagi nga suliton ang nagatinlo nga epekto sa isa naman ka ordinansa—ang sakramento. Kada semana, mahimo kita “magpamatuod … nga [kita]handa nga dalhon sa [aton kaugalingon] ang ngalan sang Anak” sa liwat paagi sa pagdab-ot kag pagdala sang simbolo sang lawas kag dugo sang Ginuo sa aton mga kamot—ang tinapay kag tubig—kag isulod ini sa mismong aton mga kalag. Sa baylo, ang Manluluwas magapatawad liwat sa aton agud mangin takos kita sa paggiya sang Balaan nga Espiritu. Indi bala ini isa ka ebidensya sang wala’y dulunan nga kaluoy nga makita lamang sa ngalan ni Jesucristo? Samtang ginadala naton ang Iya ngalan sa aton kaugalingon Iya ginadala sa Iya kaugalingonkag sa gihapon ang Iya “butkon sang kaluoy nakauntay” para hakson kita Niya sang paghigugma.

Ang sakramento semanal nga nagapadumdum sa aton nga ang pagdala sa aton kaugalingon sang ngalan ni Jesucristo isa ka buhi kag nagapadayon nga pangako, indi lang natabo sang nabunyagan kita. Padayon kag sulit-sulit naton nga mapangalipay “inang sagrado, balaan nga halad, nga wala mahangpan sang tawo, nga matubos ang aton mga sala kag mag-ambit sang iya lawas kag dugo.” Gani, kon maintyendehan sang mga anak sang Dios nga dako ang mga bugay ang magaabot kon dalhon nila ang ngalan ni Cristo, magkalipay sila pirme kag magsinadya kag pirme sila maghandum nga mag-sulod sa mga kasugtanan sa ila Dios.

Kon aton sundon ining sagrado nga dalan sang kasugtanan, ang aton pangako nga dalhon ang ngalan ni Jesucristo magapabaskog sa aton para “tipigan pirme ang [Iya] ngalan nga nakasulat pirme sa [aton] mga tagipusuon.” Pagahigugmaon naton ang Dios kag ang aton mga kasilingan, kag magahandum kita nga alagaran sila. Pagatumanon naton ang Iya mga kasuguan kag magahandum nga magpalapit sa Iya paagi sa pagsulod pa gid sa dugang nga mga kasugtanan upod Niya. Kag kon mabatyagan naton nga maluya kita kag indi naton mahimo ang matarong naton nga mga handum, magapakitluoy kita sang kabaskog nga yara lamang sa Iya ngalan, kag pagabuligan Niya kita. Kon padayon kita sa pagkatutom, ang adlaw maga-abot nga makita kag makaupod naton Sia, kag makita man naton nga nangin kapareho na kita sa Iya, nga mangin takos kita sa pagbalik sa presensya sang Amay.

Kay tungod segurado ang promesa sang Manluluwas: sila nga “nagapati sa ngalan ni Jesucristo, kag nagasimba sa Amay sa iya ngalan, kag magpadayon sa pagtuo sa iya ngalan tubtob sa katapusan” maluwas sa ginharian sang Dios. Upod sa inyo, nagakalipay ako nga nangin posible ining mga wala’y tupong nga mga bugay paagi sa pagdala sang ngalan ni Jesucristo, kon kay sin-o kag sa ngalan niya akon ginapamatud-an, amen.