Madalom kag Dalayon nga Pagkahaylo sa Amay nga Langitnon kag kay Ginuong Jesucristo
Ang katuyoan namon amo nga ibalanse ang pagsimba kag ang mga eksperyensya sa puluy-an sa bagay nga magdako gid ang aton pagtuo kag espirituwalidad kag mapadalom ang aton pagkahaylo.
Suno sa bag-o lang nga ginhambal ni Pangulong Russell M. Nelson, dugay na ang mga lider sang Simbahan nga nagahikot sang plano nga “nakasentro sa puluy-an kag ginasuportahan sang Simbahan sa pagtuon sang doktrina, pagpabaskog sang pagtuo, kag pagpaisog sang mas dako nga personal nga pagsimba.” Tapos, ginpahayag ni Pangulong Nelson ang pagbag-o agud matigayon ang “bag-o nga balanse kag pag-angot sa pagtudlo sang ebanghelyo sa puluy-an kag sa Simbahan.”
Agud mahimo ini nga mga katuyuan—nga ginlaragway kag suno sa direksyon ni Pangulong Russell M. Nelson kag desisyon sang Konseho sang Unang Pangulohan kag Korum sang Dose ka mga Apostoles—sumugod Enero 2019, bag-ohon ang skedyul sang mga miting sa Domingo sa masunod nga paagi.
Skedyul sang mga Miting sa Domingo
Ang mga miting sa Simbahan kon Domingo magalakip sang sakramento nga 60 ka minuto kada Domingo, nga nasentro sa Manluluwas, sa ordinansa sang sakramento, kag espiritual nga mga mensahe. Pagkatapos sang diotay nga tion para magkadto sa klase, ang mga miyembro sang Simbahan magatambong sa 50 ka minuto nga klase nga magbulos-bulos kada Domingo:
-
Ang Sunday School pagahiwaton sa una kag ika-tatlo nga Domingo sang bulan.
-
Ang mga miting sang mga korum sang Priesthood, Relief Society, kag Young Women pagahiwaton sa ika-duha kag ika-apat nga Domingo.
-
Ang mga miting sa ika-lima nga Domingo mangin sa idalom sang direksyon sang bishop.
Ang Primary pagahiwaton kada semana sa amo man nga 50 ka minuto kag magalakip sang pagkanta kag mga klase.
Tuhoy sa skedyul sang miting sa Domingo, ang mga mataas nga mga lider sang Simbahan nakahibalo sing madamo na nga tinuig nga mabudlay ang tatlo ka oras nga skedyul sa simbahan kon Domingo para sa pila naton ka mahal nga miyembro. Labi ini nga matuod para sa mga ginikanan nga may magagmay nga kabataan, mga kabataan sa Primary, sa tigulang nga mga miyembro, sa bag-o nga mga hinaylo, kag iban pa.
Pero labaw pa sa sining pagbag-o ang pagpalip-ot lang sang panimbahon sa Domingo. Nagpasalamat si Pangulong Nelson sa kadamo sang nahimo tungod sa inyo kaukod sa mga nagligad nga imbitasyon. Sia kag ang tanan nga mga lider sang Simbahan gusto nga magdala sang dugang pa nga kalipay sang ebanghelyo—sa mga ginikanan, kabataan, lamharon, mga single adult, katigulangan, mga bag-o nga hinaylo, kag sa mga ginatudloan sang mga misyonero—paagi sa isa ka bag-o nga programa nga nakasentro sa puluy-an kag ginasuportahan sang Simbahan. Ang mga katuyoan kag mga bugay nga angot sa sining pagbag-o kag iban pa nga mga pagbag-o sang sini lang nagalakip sang masunod:
-
Pagpadalum sang pagkahaylo sa Amay nga Langitnon kag kay Ginuong Jesucristo kag pagpabakod sang aton pagtuo sa Ila.
-
Pagpabakod sang mga indibidwal kag mga pamilya paagi sa kurikulum nga nakasentro sa puluy-an kag ginasuportahan sang Simbahan nga makabulig sa ila nga mangabuhi sang ebanghelyo sing malipayon.
-
Pagpadungog sa adlaw nga Inugpahuway, nga nagatutok sa ordinansa sang sakramento.
-
Pagbulig sa tanan nga anak sang Amay nga Langitnon sa duha kabahin sang belo paagi sa buluhaton sang misyonero kag pagbaton sang mga ordinansa kag mga kasugtanan kag mga bugay sang templo.
Pagtuon sang Ebanghelyo nga Nakasentro sa Puluy-an kag Ginasuportahan sang Simbahan
Ini nga skedyul sa Domingo nagahatag mas dako nga tiyempo para sa home evening kag sa pagtuon sang ebanghelyo sa balay sa Domingo, ukon sa iban nga tion nga pilion sang indibidwal kag mga pamilya. Ang pangpamilya nga kahiwatan pwede himuon sa Lunes sang gab-i ukon sa iban nga tion. Ang mga lider indi dapat magskedyul sang mga miting ukon kahiwatan sa Simbahan sa mga Lunes sang gab-i. Pero ang mga oras sa home evening, pagtuon sang ebanghelyo, kag mga kahiwatan para sa mga indibidwal kag mga pamilya pwede i-skedyul suno sa ila sirkumstansya.
Pagapanamion pa gid ang pagtuon sang ebanghelyo sa puluy-an sang pamilya kag indibidwal paagi sa isa ka nagasanto nga kurikulum kag bag-o nga resource nga Come, Follow Me para sa mga indibidwal kag mga pamilya nga nagasanto sa ginatudlo sa Sunday School kag Primary. Sa Enero, ang mga klase sang Simbahan sa mga lamharon kag mga hamtong sang Sunday School kag Primary magatuon sang Bag-ong Katipan (New Testament). Ang bag-o nga tulun-an sa puluy-an nga resource Come, Follow Me para sa mga indibidwal kag mga pamilya—nagasakop man sang Bag-ong Katipan—gindesinyo agud makabulig sa mga miyembro nga makatuon sang ebanghelyo sa puluy-an. Nagapaathag ini: “Ini nga resource para sa tagsa ka indibidwal kag pamilya sa Simbahan. Gindesinyo ini sa pagbulig [sa aton sing mas maayo] nga matun-an ang ebanghelyo—bisan sa [aton] kaugalingon ukon upod ang [aton] pamilya. … Ang mga outline sa sini nga [bag-o] nga resource gin-organisar sa sinimana … nga skedyul.”
Ang bag-o nga Pang-Primary nga mga leksyon sa Come, Follow Me nga ginatudlo sa simbahan magasunod sa pareho nga sinimana nga skedyul. Ang mga klase sa Sunday School sang mga hamtong kag mga lamharon sa una kag ika-tatlo nga Domingo ipasanto para magsuporta sang bag-o nga pangpuluy-an nga resource nga Come, Follow Me. Sa ika-duha kag ika-apat nga Domingo, ang mga hamtong sa priesthood kag Relief Society magapadayon sa pagtuon sang mga panudlo sang mga lider sang Simbahan, nga ginatutokan ang kinaron nga mga mensahe sang moderno nga mga propeta. Ang mga Young Women kag Aaronic Priesthood young men naman magatuon sang mga topiko sang ebanghelyo sa sina nga mga Domingo.
Ang bag-o nga pangpuluy-an nga resource nagahatag sang “Mga Ideya para sa Pang-Pamilya nga Pagtuon sang Balaan nga Kasulatan kag Family Home Evening.” Ang mga outline para sa tagsa ka semana nagalakip sang maayo nga mgaideya kag mga kahiwatan sa pagtuon para sa mga indibidwal kag mga pamilya. Ang resource nga Come, Follow Me para sa mga indibidwal kag mga pamilya may yara man sing madamo nga mga ilustrasyon nga makabulig sa patuon sang indibidwal kag pamilya, ilabi na para sa mga bata. Ipanghatag ini nga resource sa kada pamilya sa Disyembre sining tuig.
Sa una nga diskurso niya sa mga miyembro sang Simbahan sang Enero, si Pangulong Nelson naglaygay sa aton nga maghanda para sa Ika-duha nga Pagkari ni Jesucristo paagi sa paglakat sa banas sang kasugtanan.
Tungod sa sitwasyon sang kalibutan subong, mas kinahanglan pa gid naton ang indibidwal nga pagkahaylo kag pagpabakod sang pagtuo sa Amay nga Langitnon kag kay Jesucristo kag Iya Pagbayad-sala. Amat-amat kita ginhanda sang Ginuo para sa delikado nga panahon nga ginaatubang naton subong. Sang nagligad nga mga tinuig, gingiyahan kita sang Ginuo nga tutokan ang pinakaimportante nga mga butang, lakip ang:
-
Pagpadungog sa adlaw nga Inugpahuway kag ang sagrado nga ordinansa sang sakramento nga ginahatagan importansya sa katapusan nga tatlo ka tuig..
-
Sa idalom sang direksyon sang bishop, ang ginpabaskog nga mga Elders Quorum kag mga Relief Society nakatutok sa katuyoan kag diosnon nga mga responsibilidad sang Simbahan kag sa pagbulig sa mga miyembro sa paghimo kag pagtuman sang sagrado nga mga kasugtanan.
-
Maayo ang pagbaton sang ministering sa mas mataas kag mas balaan nga paagi.
-
Pagsugod nga may tuyo sa kaisipan, ang mga kasugtanan sa templo kag pag-alagad sa family history nagahimo nga nasentro nga bahin sang banas sang kasugtanan.
Ang pagbag-o nga ginpahayag sini nga aga isa pa gid ka halimbawa sang paggiya para sa mga pagtilaw sang aton panahon.
Ang tradisyonal nga kurikulum sang Simbahan nagtutok sa eksperyensya sang panimbahon sa Domingo. Kahibalo kita nga kon mas maayo ang pagtudlo kag mas handa sing espirituhanon ang mga miyembro sang klase, mas manami ang aton eksperyensya sa Simbahan kon Domingo. Bulahan kita kay masami ang Espiritu nagadugang kag nagapabaskog sang pagkahaylo sa Simbahan.
Ang bag-o nga kurikulum nga nakasentro sa puluy-an kag ginasuportahan sang Simbahan kinahanglan nga mag-impluwensya sing mabaskog sang pagtuman kag pagginawi sang pamilya kag indibidwal sa relihiyon. Kahibalo kita sang espiritual nga impluwensya kag madalum kag dalayon nga pagkahaylo nga pwede matabo sa puluy-an. Pila na katuig ang nagligad, may pagtuon nga ginpahamtang nga para sa mga lamharon ang impluwensya sang Balaan nga Espiritu masami dala ang indibidwal nga pagbasa sang balaan nga kasulatan kag pagpangamuyo sa puluy-an. Ang katuyoan naton amo nga ibalanse ang eksperyensya sa Simbahan kag sa puluy-an agud magdako ang pagtuo kag espiritualidad, kag magpadalom sang aton pagkahaylo sa Amay nga Langitnon kag kay Ginuong Jesucristo.
Sa sini nga bahin sang pagbag-o nga nasentro sa puluy-an kag ginasuportahan sang Simbahan, ang tagsa ka indibidwal kag pamilya pwede magpili sing mainampuon kon paano kag san-o ini himuon. Halimbawa, makabugay gid ini sa tanan nga pamilya pero base sa lokal nga mga kinahanglanon lubos nga nagakabagay sa mga YSA, single adults, single nga mga ginikanan, part-member nga mga pamilya, bag-o nga mga miyembro, kag iban pa nga magtipon sa mga grupo sa gwa sang kinaandan nga panimbahon agud maapresyar ang pagtipon-tipon sa ebanghelyo kag mapabakod sa pagtuon sing ulolupod sang resource nga nasentro sa puluy-an kag ginasuportahan sang Simbahan. Pwede ini himuon sing bisan sin-o nga gusto sini.
Sa madamo nga lugar sa kalibutan, nagapabilin ang mga tawo sa simbahan pagkatapos sang panimbahon agud mag-inupdanay. Wala sa ginpahayag nga pagbag-o nga makasablag sa sining manami kag makalilipay nga buhat.
Para mabuligan ang mga miyembro nga maghanda para sa Adlaw nga inugpahuway, may pila ka ward nga nagapadala sang email, text, ukon mensahe sa social media sa tunga sang simana. Bangod sa sining pagbag-o, ginapaisog gid namon kamo nga maghimo sina. Ini nga komunikasyon magapadumdum sa mga miyembro parte sa skedyul sang miting sa Domingo para sa sina nga simana, pati ang topiko sang leksyon sa klase, kag suporta sa padayon nga pagkahaylo sa ebanghelyo sa puluy-an. Dugang pa sina, ang mga miting sang mga hamtong sa Domingo magapatigayon man sang impormasyon agud iangot ang pagtuon sa Simbahan kag sa puluy-an kada simana.
Ang pang-sakramento nga miting kag ang mga klase kinahanglan binagbinagon sing mainampuon agud sigurohon nga ang mga prayoridad sa espiritual nadagmit sa pang-administratibo nga mga hilikuton. Halimbawa, ang mga pahibalo pwede ibutang na lang sa komunikasyon sa tunga sang simana ukon sa naimprinta nga programa. Samtang may pangamuyo sa pangbukas kag sa pangtakop sang sacrament miting, ang ika-duha nga miting kinahanglan lang sang pangtakop nga pangamuyo.
Parehas sa ginmuno kagina, ang bag-o nga skedyul sa Domingo masugod sa Enero 2019. May madamo nga rason sini. Ang duha nga pinakaimportante amo nga, una, mahatagan kita tiyempo sa pagpanghatag sang resource nga Come, Follow Me sa mga indibidwal kag mga pamilya kag, ika-duha, mahatagan tiyempo ang mga stake president kag mga bishop agud areglaron ang mga skedyul sa miting agud mas temprano mag-miting ang mga ward sa adlaw.
Sa pagtinguha sang mga lider nga magbaton sang rebelasyon, ang paggiya nga nabaton nila sa nagligad nga mga tinuig amo nga pabaskugon ang sakrament miting, padunggan ang Adlaw nga inugpahuway, kag paisogon kag buligan ang mga ginikanan kag mga indibidwal nga himuon ang ila mga puluy-an nga ginhalinan sang espiritwal nga kabakod kag dugang nga pagtuo—isa ka lugar sang kasadya kag kalipay.
Pinasahi nga mga Bugay
Ano ang kahulugan sini nga mga pagbag-o para sa mga miyembro sang Ang Simbahan ni Jesucristo sang mga Santos sa Ulihing mga Adlaw? Sigurado kami nga mabugayan ang mga miyembro sa pinasahi nga mga paagi. Ang Domingo pwede mangin isa ka adlaw sang pagtuon sang ebanghelyo kag pagtudlo sa simbahan kag sa puluy-an. Matuodtuod nga makapalipay sa aton ang Adlaw nga inugpahuway kon ang mga indibidwal kag mga pamilya magtipon-tipon, maghimo sang family history, mag-ministering, mag-alagad, magsimba sing personal, kag magkasadya upod ang pamilya.
May pamilya sa Brazil nga miyembro sa isa ka stake sa diin ang bag-o nga resource sa puluy-an nga Come, Follow Me gintestingan. RM ang tatay nga si Fernando, kag sia kag ang asawa niya nga si Nancy may apat ka kabataan. Ginsaysay niya: “Sang ginpresentar sa amon stake ang programa nga Come, Follow Me, nalangkag gid ako, kag napinsar ko nga ‘maliwat gid ang amon pagtuon sang balaan nga kasulatan sa balay.’ Natabo gid ini sa akon puluy-an, kag bilang lider sang Simbahan, nakita ko man ang pagbag-o sa iban nga mga panimalay. … Nagbulig ini sa amon nga mastoryahan ang parte sa balaan nga kasulatan sa puluy-an namon. Ako kag ang akon asawa nakaangkon sing mas madalom nga paghangop parte sa gintun-an nga topiko. … Nakabulig ini sa amon … nga mapadako ang amon ihibalo sa ebanghelyo kag mapadako ang amon pagtuo kag testimonya. … Nagapamatuod ako … nga ang inspirasyon sini halin sa Ginuo agud nga ang dalayon kag epektibo nga pagtuon sang mga prinsipyo kag mga doktrina nga yara sa balaan nga kasulatan nagadala sing dugang nga pagtuo, testimonya, kag kasanag sa mga pamilya … sa isa ka padayon nga nagalaglag nga kalibutan.”
Sa mga stake nga napaidalom sa pilot test sa bilog nga kalibutan, positibo kaayo ang reaksyon sa bag-o nga pangpanimalay nga resource nga Come, Follow Me. Madamo ang nagsugid nga halin sa pagbasa lang sang balaan nga mga kasulatan, nagatuon na sila subong sang balaan nga mga kasulatan. Kag nabatyagan sang tanan nga ang eksperyensya nagpabaskog sang ila pagtuo kag may manami nga epekto sa ward.
Madalom kag Dalayon nga Pagkahaylo
Ang lalab-uton sini nga mga pagbag-o amo nga ang mga hamtong kag ang ulihing tubo nga henerasyon makaangkon sang madalom kag dalayon nga pagkahaylo. Nakasulat sa una nga pahina sang resource para sa indibidwal kag pamilya: “Ang katuyoan sang tanan nga pagtuon kag pagtudlo sang ebanghelyo amo nga padalumon ang aton pagkahaylo kag buligan kita nga mangin mas pareho kay Jesucristo. … Gani kinahanglan naton nga magsandig kay Cristo agud magbag-o ang aton mga tagipusuon.” Mabuligan ini paagi sa paglab-ot “sa gwa sang klase pasulod sa tagipusuon kag puluy-an sang isa ka tawo. Kinahanglan naton nga magtinguha adlaw-adlaw nga maintiendihan kag ipangabuhi ang ebanghelyo. Ang matuodtuod nga pagkahaylo kinahanglan sang impluwensya sang Balaan nga Espiritu.”
Ang pinakaimportante nga lalab-uton kag labing dako nga bugay sang madalom kag dalayon nga pagkahaylo amo ang pagbaton sing nagakaangay sang mga kasugtanan kag mga ordinansa sa banas sang kasugtanan.
Nagasalig kami sa inyo nga magsugilanonay kamo kag magtinguha sa pagbaton sang rebelasyon sa paghimo sining mga pagbag-o—kag indi magsobra ukon magkontrol sang mga indibidwal ukon mga pamilya. May igahatag nga dugang nga impormasyon sa sunod nga mga komunikasyon, lakip ang isa ka sulat halin sa Unang Pangulohan kag enclosure.
Nagapamatuod ako sa inyo nga sa mga paghinambalanay sang Konseho sang Unang Pangulohan kag sang Korum sang Dose ka Apostoles sa templo, kag pagkatapos nga nangayo ang aton mahal nga propeta sang rebelasyon halin sa Ginuo sa pagsulong sining mga pagbag-o, nakabaton ang tanan sang mabaskog nga kompirmasyon sini. Si Russell M. Nelson amo ang aton buhi nga Pangulo kag propeta. Ang mga ginpahayag subong nga adlaw magabunga sang dalagko nga mga bugay sa tanan nga magbaton sini nga mga pagbag-o kag magpangayo sang giya sang Balaan nga Espiritu. Mangin mas malapit kita sa aton Amay nga Langitnon kag sa Ginuo kag Manluluwas, nga si Jesucristo, nga ginasaksihan ko gid. Sa ngalan ni Jesucristo, amen.