Ang Aton mga Natun-an kag Indi Gid Malipatan
Kon lantawon ninyo ang inyo kabuhi sing mainampuon, nagapati ako nga makita ninyo ang madamo nga paagi nga ginagiyahan kamo sang Ginuo sa sining panahon sang kabudlayan.
Mahal kong mga kauturan, ginapaabot ko ining birtwal nga miting upod sa inyo. Ang katapusan nga tion nga naghiwat kita sang priesthood nga sesyon sa pangkabilogan nga komperensya amo sang Abril 2019. Kadamo gid ang natabo sang nagligad nga duha ka tuig! Ang pila sa inyo namatyan sang mga pinalangga. Ang iban nawad-an sang mga trabaho, pangabuhian, ukon nagbalatian. Ang iban naman nadulaan sang pagbatyag sing paghidaet ukon paglaum para sa palaabuton. Ang akon tagipusuon nagadab-ot sa tagsa sa inyo nga nag-antos sang mga ini ukon sang iban pa nga mga kawad-on. Padayon ako nga nagapangamuyo nga pasulhayon kamo sang Ginuo. Samtang padayon ninyo nga ginapapangibabaw ang Dios sa inyo kabuhi, nakahibalo ako nga pareho man kadako ang Iya paglaum parte sa inyo palaabuton.
Sa tunga sang mga kawad-on nga aton naeksperiyensyahan, may mga butang man kita nga nakit-an. Ang iban nakasalapo sang mas madalom nga pagtuo sa aton Amay nga Langitnon kag sa Iya Anak nga si Jesucristo. Madamo ang nakasalapo sang bag-o nga panan-aw sa kabuhi—ang panan-aw nga wala sing katapusan. Mahimo nga nakasalapo kamo sing mas mabaskog nga mga kaangtanan sa inyo mga pinalangga kag upod sa Ginuo. Nagalaum ako nga nakasalapo kamo sang dugang nga ikasarang agud pamatian Sia kag makabaton sang personal nga rebelasyon. Ang mabudlay nga mga pagtilaw masami nagahatag sang mga oportunidad nga magtubo nga indi kuntani matabo sa iban nga paagi.
Hunahunaa ang nagligad nga duha ka tuig. Paano kamo nag-uswag? Ano ang inyo natun-an? Ayhan primero nagahandum kamo nga tani makabalik sa 2019 kag didto na lang kamo! Pero kon tan-awon ninyo ang inyo kabuhi sing mainampuon, nagapati ako nga makakita kamo sing madamo nga paagi nga ginagiyahan kamo sang Ginuo sa sining panahon sang kabudlayan, nga ginabuligan kamo nga mangin mas matutum, mas nahaylo nga tawo—matuod nga tawo sang Dios.
Nakahibalo ako nga ang Dios may dalagko kag dalayawon nga mga plano para sa aton—sing indibidwal kag sing tingob. Upod sang kaluoy kag pagpasensya, nagasiling Sia:
“Magagmay kamo nga kabataan, kag indi pa ninyo mahangpan kon ano kadako ang mga bugay nga may yara ang Amay … [nga] ginhanda para sa inyo;
“Kag indi ninyo mabatas ang tanan nga butang subong; apang, magkalipay kamo, kay giyahan ko kamo.”1
Mahal kong mga kauturan, nagasaksi ako nga Sia sadto pa, kag sa karon, matuod gid nga nagagiya sa aton, kon magtinguha kita nga pamatian Sia. Gusto Niya kita nga magtubo kag magtuon, bisan sa—ayhan ilabi na gid sa tion sang—pagtilaw.
Ang pagtilaw amo ang pinakamaayo nga manunudlo. Ano ang inyo natun-an sang nagligad nga duha ka tuig nga luyag ninyo pirme madumduman? Tanan kita may lainlain nga sabat, pero luyag ko ipanugyan ang apat ka leksyon nga tani aton natun-an kag indi gid malipatan.
Leksyon 1: Ang Puluy-an Ang Sentro sang Pagtuo kag Pagsimba
Sa masami kon ang Ginuo nagapaandam sa aton parte sa mga peligro sang katapusan nga mga adlaw, ginalaygayan Niya kita nga: “Magtindog kamo sa balaan nga mga lugar, kag indi maisdog.”2 Ining “balaan nga mga lugar” pat-od nga nagalakip sang mga templo sang Ginuo kag mga balay-tilipunan. Apang tungod ang aton ikasarang nga magtipon sa sining mga lugar gindumilian sa nagkalainlain nga mga kahimtangan, natun-an naton nga isa sang pinakabalaan nga lugar sa duta amo ang puluy-an—huo, bisan ang inyo puluy-an.
Mga kauturan, ginakaptan ninyo ang priesthood sang Dios. “Ang mga kinamatarong sang pagkapari indi mahamulag sa mga gahum sang langit.”3 Kamo kag ang inyo pamilya nakabaton sang mga ordinansa sang priesthood. Ara “sa mga ordinansa [sang priesthood nga] ang gahum sang pagkadiosnon ginapakita.”4 Ang ina nga gahum ara para sa inyo kag sa inyo pamilya sa inyo mismo nga puluy-an samtang ginatuman ninyo ang mga kasugtanan nga inyo ginhimo.5
185 katuig lamang ang nagligad, sa sini mismo nga adlaw, Abril 3, 1836, ginpanumbalik ni Elias (Elijah) ang mga yabi sang priesthood nga nagatugot sa aton mga pamilya nga maselyohan sing ululupod sa katubtuban. Amo kon ngaa kanami gid batyagon sang paghikot sang sakramento sa inyo puluy-an. Paano ini nagaapekto sa mga miyembro sang inyo pamilya nga makita kamo—nga ila tatay, lolo, bana, anak nga lalaki, ukon utod nga lalaki—nga nagahikot sining balaan nga ordinansa? Ano ang inyo himuon agud ipadayon inang sagrado nga balatyagon sa inyo pamilya?
Mahimo nga mabatyagan ninyo nga madamo pa ang inyo dapat himuon agud ang inyo puluy-an mangin tunay nga santuaryo sang pagtuo. Kon amo, palihog himoa ina! Kon kasado kamo, magsugilanon upod sa inyo asawa bilang inyo katuwang nga kaupod sa sining importante nga buluhaton. May pila lang ka mga lalambuton nga mas importante sangsa sini. Umpisa karon tubtob sa tion nga magkari liwat ang Ginuo, kinahanglan ang aton tanan nga mga puluy-an mangin mga lugar sang kalinong kag seguridad.6
Ang mga batasan kag mga aksyon nga nagaagda sang Espiritu magadugang sang kabalaan sang inyo puluy-an. Pat-od gid nga ang pagkabalaan madula kon may bisan ano sa inyo batasan ukon palibot nga nagasaklaw sang Balaan nga Espiritu, kay sa sina “magapalayo ang kalangitan.”7
Nakapamangkot bala kamo kon ngaa luyag sang GInuo nga himuon naton ang aton mga puluy-an nga sentro sang pagtuon sang ebanghelyo kag pagkabuhi sang ebanghelyo? Indi lang ini agud ihanda kita para sa, kag buligan kita nga makalampuwas, sa pandemya. Ang karon nga mga pagdumili sa pagtipon-tipon magauntat sa ulihi. Apang, ang inyo pangako nga himuon ang inyo puluy-an nga inyo panguna nga santuaryo sang pagtuo indi gid dapat mag-untat. Samtang ang pagtuo kag pagkabalaan nagabuhin sa sining nahulog nga kalibutan, ang inyo kakinahanglan sang balaan nga mga lugar magadugang. Ginapaisog ko kamo nga padayon ninyo nga himuon ang inyo puluy-an nga matuod nga balaan nga lugar “kag indi maisdog”8 gikan sa sinang importante nga lalambuton.
Leksyon 2: Kinahanglan Naton Ang Isa Kag Isa
Luyag sang Dios nga magpangabudlay kita sing magkaupod kag magbuligay. Amo ina kon ngaa ginapadala Niya kita sa duta sa mga pamilya kag ginaorganisar kita sa mga ward kag mga stake. Amo ina kon ngaa ginapangayo Niya sa aton nga mag-alagad kag mag-minister sa isa kag isa. Amo ina kon ngaa ginapangayo Niya sa aton nga magkabuhi sa kalibutan pero indi mangin iya sang kalibutan.9 Madamo kita sing mahimo nga nagainupdanay sangsa nagaisahanon.10 Ang plano sang kalipayan sang Dios mapaslawan kon ang Iya mga anak nagalayuay.
Ang ining karon lang nga pandemya nangin pinasahi tungod naapektuhan sini ang tanan-tanan sa kalibutan sing dululungan. Samtang ang iban nag-antos sing labi sangsa iban, tanan kita ginbudlayan sa pila ka paagi. Bangod sini, ang aton pareho nga pagtilaw may potensyal sa paghiusa sang mga anak sang Dios nga wala pa gid sadto matabo. Gani, mamangkot ako, ang ini bala nga pareho nga pagtilaw nagpasuod sa inyo sa inyo mga kaingod—sa inyo mga kauturan sa tabok sang kalye kag sa bilog nga kalibutan?
Parte sini, ang duha ka dalagko nga kasugoan makagiya sa aton: una, nga palanggaon ang Dios kag, ika-duha, nga palanggaon ang aton isigkatawo.11 Ginapakita naton ang aton pagpalangga paagi sa pag-alagad.
Kon may kilala kamo nga nagaisahanon, magbulig—bisan nga pamatyag ninyo nagaisahanon man kamo! Indi kinahanglan nga may rason kamo ukon mensahe ukon tuyo agud makapakig-angot. Magpangamusta lang kag ipakita ang inyo pagpalangga. Ang teknolohiya makabulig sa inyo. May pandemya ukon wala, ang tagsa ka pinalangga nga anak sang Dios kinahanglan makahibalo nga wala sia nagaisahanon!
Leksyon 3: Ang Inyo Korum sa Priesthood Indi Lang Basta Miting
Sa tion sang pandemya, ang mga miting sang mga korum sa Domingo ginkansela sa isa ka tion. Ang pila ka mga korum sa karon nagamiting na sing birtwal. Apang, ang buluhaton nga ginhatag sang Ginuo sa mga korum sang priesthood indi lang para magmiting. Ang mga miting gamay lamang nga bahin sang katuyoan sang korum kag sang mahimo sini.
Mga kauturan ko sa Aaronic Priesthood kag mga korum sang mga elder, pasangkara ang inyo panan-aw kon ngaa may ara kita sang mga korum. Paano luyag sang Ginuo nga gamiton ninyo ang korum agud humanon ang Iya buluhaton—sa karon? Magpangayo sang rebelasyon gikan sa Ginuo. Ipaubos ang inyo kaugalingon! Magpamangkot! Magpamati! Kon gintawag kamo agud magpanguna, maghinambalanay kamo bilang pangulohan kag upod sang mga miyembro sang korum. Ano man ang inyo palangakoan ukon tawag sa priesthood, ipapangibabaw ang Dios sa inyo pangako bilang miyembro sang inyo korum kag sa inyo pag-alagad. Eksperiyensyahi nga may kalipay ang pagkamatarong nga inyo mapahanabo samtang kamo “mapisan sa pagpakigbahin sa maayo nga kawsa.”12 Ang mga korum ara sa pinasahi nga posisyon sa pagpadasig sang pagtipon sang Israel sa magtimbang nga bahin sang belo.
Leksyon 4: Mabatian Naton Si Jesucristo Sing Mas Maayo Kon Nagapahimunong Kita
Nagakabuhi kita sa panahon nga ginpropesiya sang una, nga ang “tanan nga butang magginamo; kag pat-od nga ang mga tagipusuon sang mga tawo magapaslaw sa ila; kay ang kahadlok magapangibabaw sa tanan nga tawo.”13 Matuod ina antes sang pandemya, kag mangin matuod ina pagkatapos. Ang kinagamo sa kalibutan padayon nga magadugang. Sa kabaliskaran, ang tingug sang Ginuo indi nga “isa ka tingug sang daguob, kundi … isa ini ka mahinay nga tingug sang himpit nga kahugmay, nga [daw subong] ini sang isa ka hutik, kag [nagalapos] ini bisan sa kalag mismo.”14 Agud mabatian ninyo ining malinong nga tingug, kamo man kinahanglan magpahimunong!15
Sa isa ka tion, ang pandemya nagkanselar sang aktibidades nga sa masami nagapuno sang aton mga kabuhi. Sa indi madugay mahimo nga makapili na kita nga pun-on liwat ang ina nga tion sang kagalong kag kinagamo sang kalibutan. Ukon mahimo naton gamiton ang aton tion sa pagpamati sa tingug sang Ginuo nga nagahutik sang Iya paggiya, pagpasulhay, kag paghidaet. Ang malinong nga tion sagrado nga tion—tion nga magapatigayon sang pagbaton sang personal nga rebelasyon kag magapatudok sang paghidaet.
Disiplinaha ang inyo kaugalingon nga maghatag sing tion para mag-isahanon kag tion upod sa inyo mga pinalangga. Buksi ang inyo tagipusuon sa Dios sa pangamuyo. Hatagi sing tion ang pagtuon sang balaan nga mga kasulatan kag pagsimba sa templo.
Mahal kong mga kauturan, kadamo sang mga butang nga luyag sang Ginuo nga matun-an naton gikan sa aton mga eksperiyensya sa sining pandemya. Apat lang ang akon ginlista. Ginaagda ko kamo nga maghimo sang inyo kaugalingon nga lista, binagbinaga ini sing maayo, kag ipaambit ini sa inyo mga pinalangga.
Masanag ang palaabuton para sa nagatipig-sang-kasugtanan nga katawhan sang Dios.16 Ang Ginuo padayon nga magapanawag sa Iya mga alagad nga takos nga nagakapot sang priesthood agud magbugay, magpasulhay, kag magpabakod sang katawhan kag agud magbulig sa paghanda sang kalibutan kag sang katawhan sini para sa Iya Ika-duha nga Pagkari. Kinahanglan sang tagsa sa aton nga mangin takos sa sagrado nga ordinasyon nga aton nabaton. Mahimo naton ini! Nagapamatuod ako sa sini, upod ang akon pagpahayag sang pagpalangga para sa tagsa sa inyo, pinalangga kong kauturan, sa sagrado nga ngalan ni Jesucristo, amen.