Mga Makaluluoy
Kinahanglan naton ang tanan sa kada ward ukon branch—inang daw mga mabakod kag ang mahimo nga ginabudlayan. Ang tanan kinahanglanon.
Sang bata pa ako, madumduman ko ang pagsakay sa awto upod ang akon amay kag makita ang mga tawo sa kilid-dalan nga ara sa mabudlay nga mga kahimtangan ukon nagakinahanglan sang bulig. Ang akon amay pirme nagasiling “Pobrecito,” nga buot silingon “makaluluoy.”
Kon kis-a, nagalantaw ako sing maayo samtang ginabuligan sang akon amay ang madamo sining mga tawo, kapin pa kon magbiyahe kami padulong sa Mexico agud magbisita sa akon lolo kag lola. Masami sia makakita sang isa nga nagakinahanglan kag dayon sekreto nga ginakadtuan kag ginahatagan sang ginakinahanglan nila nga bulig. Natukiban ko sang ulihi nga ginabuligan niya sila sa pag-enrol sa eskwelahan, pagbakal sang pagkaon, ukon pagtigana sa kon ano nga paagi para sa ila kaayohan. Nagaminister sia sa “makaluluoy” nga iya masalapoan. Sa pagkamatuod, sa akon pagdako indi ako makadumdum sang tion nga wala may nagadayon sa amon nga nagakinahanglan sang lugar nga maistaran samtang nagatinguha sila nga magsandig sa kaugalingon. Ang paglantaw sining mga eksperiyensya nagpukaw sa akon sang balatyagon sang kaluoy sa akon isigka-lalaki kag babayi kag sa sinang mga nagakinahanglan.
Sa Preach My Gospel nagasiling diri: “Napalibotan kamo sang mga tawo. Malabyan ninyo sila sa dalanon, ginabisitahan sa ila mga balay, kag nagabiyahe upod sa ila. Mga anak sila tanan sang Dios, inyo mga utod. … Madamo sining mga tawo ang nagapangita sang katuyoan sa kabuhi. Nabalaka sila para sa ila palaabuton kag ila mga pamilya” (Preach My Gospel: A Guide to Missionary Service [2018], 1).
Sa madamo nga tinuig, samtang nagaalagad ako sa Simbahan, gintinguhaan ko nga pangitaon ang mga nagakinahanglan sang bulig sa ila mga kabuhi, pareho nga temporal kag espiritwal. Pirme ko mabatian ang tingug sang akon amay nga nagasiling, “Pobrecito,” makaluluoy man.
Sa Biblia makita naton ang manami nga halimbawa sang pag-atipan sa isa nga makaluluoy:
“Karon si Pedro kag si Juan nagasaka sa templo sa tion sang pangamuyo, nga ikasiam nga takna.
“Kag isa ka tawo nga piang [gikan] sa tiyan sang iya iloy gindala, mga ginbutang nila adlaw-adlaw sa gawang sang templo nga ginatawag Matahum sa pagpakilimos sa mga nagsulod sa templo;
“Sang pagkakita niya kay Pedro kag kay Juan nga manugsulod sa templo, nagpangayo sia nga limosan.
“Kag si Pedro, sang nagapaungot sang iya mga mata sa iya upod kay Juan, nagsiling, Tulok ka sa amon.
“Kag nagapati sia sa ila, nga nagapaabot nga may batunon sa ila.
“Apang si Pedro nagsiling, Wala ako [sang] pilak kag bulawan apang ang yari sa akon ginahatag ko sa imo: sa ngalan ni Jesucristo nga Nazaretnon, lakat ka.
“Kag ginkaptan niya sia sa kamot nga tuo kag ginpatindog sia, kag sa gilayon nagbaskog ang iya mga till kag mga bukobuko” (Mga Binuhatan 3:1–7; emphasis gindugang).
Sa pagbasa sining kasaysayan, naintriga ako sang paggamit sang tinaga nga nagpaungot. Ang tinaga nga nagpaungot nagakahulugan nga ituon ang mga mata ukon panghunahuna sa ukon magtulok sing maayo sa (tan-awa ang “fasten,” Dictionary.com). Sa pagtulok ni Pedro sa sining tawo, nakita niya sia sing lain sa iban. Nagtulok sia lampas sa iya sablag sa paglakat kag sa iya mga kahuyang kag nabatyagan nga ang iya pagtuo bastante agud mapaayo kag makasulod sa templo agud mabaton ang mga bugay nga iya ginahandum.
Natalupangdan ko nga gin-uyatan niya sia sa tuo nga kamot kag ginbutong sia patindog. Samtang ginabuligan niya ang tawo sa sini nga paagi, ang Ginuo milagroso nga nag-ayo sa iya, kag “nagbaskog ang iya mga tiil kag mga bukobuko” (Mga Binuhatan 3:7). Ang iya gugma para sa sini nga tawo kag ang iya handum nga buligan sia nagpadugang sang kapasidad kag ikasarang sa tawo nga maluya.
Samtang nagaalagad bilang Area Seventy, ginatigana ko ang kada Martes sang gab-i sa ministering nga mga pagbisita upod sa mga stake president sa mga lugar nga sakop sang akon responsibilidad. Ginpangabay ko sila nga maghimo sang appointment sa mga nagakinahanglan sang ordinansa sang ebanghelyo ni Jesucristo ukon sa mga wala sa karon nagatuman sang mga kasugtanan nga ila ginhimo. Paagi sa amon dalayon kag gintuyo nga ministering, ang Ginuo nagpakadako sang amon mga pagtinguha kag nakakita kami sang mga indibidwal kag mga pamilya nga nagakinahanglan. Ini ang mga “makaluluoy” nga nagaistar sa nagkalainlain nga mga estaka kon diin kami nagaalagad.
Isa ka bes, gin-updan ko si Pangulong Bill Whitworth, ang pangulo sang Sandy Utah Canyon View Stake, agud maghimo sang ministering nga mga pagbisita. Mapinangamuyuon sia parte sa kon sin-o ang dapat namon bisitahan, nga nagatinguha nga mag-angkon sang pareho nga eksperiyensya kay Nefi, nga “gin-ubayan sang Espiritu, sanglit wala mahibal-i nga daan ang mga butang nga dapat [niya] himuon” (1 Nefi 4:6). Ginpakita niya nga kon kita magminister, dapat giyahan kita sang rebelasyon sa ila nga labi gid nga nagakinahanglan sangsa magtamod lang sa listahan ukon magbisita sa mga tawo sa naplano nga paagi. Dapat kita tuytuyan sang gahum sang inspirasyon.
Madumduman ko ang pagkadto sa balay sang hubin nga mag-asawa, si Jeff kag Heather, kag ila gamay nga bata nga lalaki nga si Kai. Si Jeff nagdako nga aktibo nga miyembro sang Simbahan. Maayo gid sia nga atleta kag ginapatihan nga mangin madinalag-on sa iya karera. Nagsugod sia nga magpalayo sa Simbahan sang tin-edyer sia. Sang ulihi, naaksidente sia sa awto, nga nagliwat sang dalagan sang iya pangabuhi. Pagsulod namon sa ila balay kag pagkilalahay, namangkot si Jeff kon ngaa nagkadto kami sa pagpakigkita sa iya pamilya. Nagsabat kami nga may mga 3,000 ka mga miyembro nga nagaistar sa nasakpan sang estaka. Dayon ginpamangkot ko sia, “Jeff, sa tanan nga balay nga sarang namon bisitahan sini nga gab-i, sugiri kami kon ngaa ang Ginuo nagpadala sa amon diri.”
Sa sina, si Jeff nangin emosyonal kag nagsugod sa pagpaambit sa amon sang pila sang iya mga kabalaka kag mga problema nga ginaatubang nila bilang pamilya. Nagsugod kami sa pagpaambit sang lainlain nga mga prinsipyo sang ebanghelyo ni Jesucristo. Gin-agda namon sila nga maghimo sang pila ka pat-od nga mga butang nga sa primero dawsa makahalangkat pero sa ulihi magadala sang dako nga kalipay kag kasadya. Dayon ginahatagan ni Pangulong Whitworth si Jeff sang bendisyon sa priesthood agud buligan sia nga malampuwasan ang iya mga hangkat. Si Jeff kag Heather nagsugot nga himuon ang gin-agda namon nga himuon nila.
Pagligad sang isa ka tuig, nangin prebilihiyo ko ang makita si Jeff nga ginabunyagan ang iya asawa nga si Heather, nga miyembro sang Ang Simbahan ni Jesucristo sang mga Santos sa Ulihing mga adlaw. Nagahanda na sila subong sa pagsulod sa templo agud mahugpong bilang pamilya sa karon kag sa walay katapusan. Ang amon pagbisita nagbag-o sang lakat sang ila mga kabuhi pareho sa temporal kag espiritwal.
Ang Ginuo nagsiling:
“Karon, mangin tampad; tumana ang palangakoan nga ginpili ko para sa imo; buligi ang mga maluya, ibayaw ang mga kamot nga nagapalamuypoy, kag pabaskoga ang mga tuhod nga maluya” (Doktrina kag mga Kasugtanan 81:5).
“Kag sa paghimo sining mga butang magahimo ka sing labing dako nga kaayohan sa imo mga isigkatawo, kag magasulong sang himaya niya nga imo Ginuo” (Doktrina kag mga Kasugtanan 81:4).
Mga utod, si Apostol Pablo nagtudlo sang mayor nga elemento sa aton pagminister. Nagtudlo sia nga kita tanan “lawas ni Cristo, kag ang tagsatagsa mga bahin sa iya” (1 Mga Taga-Corinto 12:27) kag ang tagsa ka miyembro sang lawas kinahanglanon agud masiguro nga ang bug-os nga lawas mapabakod. Dayon nagtudlo sia sang gamhanan nga kamatuoran nga may dako nga epekto sa akon tagipusuon sang ginbasa ko ini. Siling niya, “Hinonoo kinahanglan ang mga bahin sang lawas nga daw amo ang maluya pa, kag yadtong mga bahin sang lawas nga ginahunahuna ta nga kubos sa pagkadungganon, sa ila sini ginahatag ta ang bugana pa nga dungog” (1 Mga Taga-Corinto 12:22–23; pagdagmit gindugang).
Gani, kinahanglan naton ang tanan sa kada ward kag branch—inang mga mabakod kag inang ayhan mga ginabudlayan. Ang tanan kinahanglanon sa importante nga pagpabakod sang bug-os nga “lawas ni Cristo.” Masami ako nagapanumdum kon sin-o ang wala nagasimba sa aton nagkalainlain nga mga kongregasyon nga makapabakod kag makakumpleto sa aton sa kabilogan.
Si Elder D. Todd Christofferson nagtudlo: “Sa Simbahan wala lang kita nagatuon sang diosnon nga doktrina; ginaeksperiyensyahan man naton ang paggamit sini. Bilang lawas ni Cristo, ang mga miyembro sang Simbahan nagaminister sa kada isa sa realidad sang adlaw-adlaw nga pagpangabuhi. Tanan kita indi perpekto. … Sa lawas ni Cristo, kinahanglan naton maghimo sing masobra pa sangsa magtuon sang mga konsepto kag ginpahitaas nga mga tinaga kag mag-angkon sang matuodtuod nga ‘personal’ nga eksperiyensya samtang nagatuon kita nga ‘mag-inupdanay sa gugma’ [Doktrina kag mga Kasugtanan 42:45]” (“Why the Church,” Liahona, Nob. 2015, 108–9).
Sang 1849, si Brigham Young may damgo kon sa diin nakita niya ang Propeta nga si Joseph Smith nga nagabakero sang daku nga panong sang mga karnero kag mga kanding. Ang pila sining mga sapat dalagko kag matahum; ang iban magagmay kag mahigko. Nadumduman ni Brigham Young nga nagtulok sia sa mga mata ni Propetang Joseph Smith kag nagsiling,“Joseph, ang imo panong ang pinakapinasahi… nga nakita ko sa bilog ko nga kabuhi; anhon mo ina sila?” Ang Propeta, nga daw wala nabalaka sa iya magamo nga panong, nagsabat lang, “[Brigham,] maayo sila tanan sa ila nahamtangan.”
Pagbugtaw ni Pangulong Young, nahangpan niya nga samtang ang Simbahan magatipon sang tanan nga sahi sang “mga karnero kag mga kanding,” iya responsibilidad nga pasudlon ang tanan kag tugotan ang kada isa nga malab-ot ang ila bug-os nga ikasarang samtang ginatindugan nila ang ila lugar sa Simbahan. (Ginpasibo halin sa Ronald W. Walker, “Brigham Young: Student of the Prophet,” Ensign, Peb. 1998, 56–57.)
Mga utod, ang ideya sang akon pamulongpulong nakuha ko sang nagapanumdum ako sing madalom parte sa isa nga indi subong aktibo sa Simbahan ni Jesucristo. Sing makadali, gusto ko maghambal sa tagsa sa ila. Si Elder Neal A. Maxwell nagtudlo nga “inang mga tawo masami nga nagapabilin nga malapit—apang wala nagapasakop sing lubos sa—Simbahan. Wala ini sila nagasulod sa simbahan, pero indi man sila maghalin sa balkon sini. Ini sila ang nagakinahanglan kag ginakinahanglan sang Simbahan, apang, sa pila ka bahin, ‘nagakabuhi nga wala’y Dios sa kalibutan’ [Mosias 27:31]” (“Why Not Now?,” Ensign, Nob. 1974, 12).
Suliton ko ang pangagda sang aton pinalangga nga Pangulong Russel M. Nelson sang una sia naghambal sa mga miyembro sang Simbahan. Siling niya: “Karon, sa tagsa ka miyembro sang Simbahan ginasiling ko, magpabilin sa dalan sang kasugtanan. Ang inyo pangako nga sundon ang Manluluwas paagi sa paghimo sang mga kasugtanan sa Iya kag dayon pagtuman sining mga kasugtanan ang magabukas sang pwertahan sang tagsa ka espirituhanon nga bugay kag pribelihiyo nga yara para sa mga lalaki, mga babayi, kag kabataan sa bisan diin.”
Dayon nagpangabay sia: “Karon, kon nagliw-as kamo sa dalan, ginaagda ko kamo upod ang tanan nga paglaum nga yara sa akon tagipusuon nga palihog magbalik na. Kon ano man ang inyo mga palaligban, ano man ang inyo mga hangkat, may lugar para sa inyo sa diri, sa Simbahan sang Ginuo. Kamo kag ang wala pa mabun-ag nga mga henerasyon pagabugayan sang inyo aksyon sa karon agud magbalik sa dalan sang kasugtanan” (“As We Go Forward Together,” ukon Liahona, Abr. 2018, 7; emphasis gindugang).
Nagasaksi ako nahanungod sa Iya, nga amo si Jesucristo, ang Nagapanguna nga Ministro kag Manluluwas naton tanan. Ginaagda ko ang tagsa sa akon nga pangitaon ang “mga pobrecitos,” ang “mga makaluluoy” sa tunga naton nga nagakinahanglan. Amo ini ang akon ginalauman kag ginapangamuyo sa ngalan ni Jesucristo, amen.