Ang Melchizedek Priesthood kag ang mga Yabi
Sa Simbahan ang awtoridad sang priesthood ginagamit sa idalom sang direksyon sang isa ka lider sang priesthood nga nagakapot sang mga yabi sang sina nga priesthood.
Ginpili ko nga magdugang hambal parte sa priesthood sang Dios, ang topiko nga ginhambal na sang tatlo ka nauna nga mga manughambal nga nagtudlo sa aton kon paano ang priesthood nagabugay sang mga kabuhi sang kababayin-an, lamharon nga mga babayi, kag lamharon nga mga lalaki.
Ang priesthood isa ka diosnon nga gahum kag awtoridad nga ginsalig sa tawo agud gamiton sa buluhaton sang Dios para sa kapuslanan sang tanan Niya nga anak. Ang Priesthood indi yadtong mga gin-ordin sa isa ka palangakuan sang priesthood ukon mga nagagamit sang awtoridad sini. Ang mga lalaki nga nagakapot sang priesthood indi ang priesthood. Samtang indi naton dapat tawgon ang gin-ordin nga mga lalaki bilang priesthood, nagakabagay nga tawgon sila nga mga nagakapot sang priesthood.
Ang gahum sang priesthood pareho nga ara sa Simbahan kag sa organisasyon sang pamilya. Pero ang gahum sang priesthood kag awtoridad sang priesthood lainlain ang pag-operar sa Simbahan kag sa pamilya. Ini tanan suno sa mga prinsipyo nga ginpahamtang sang Ginuo. Ang katuyuan sang plano sang Dios amo ang giyahan ang Iya mga anak padulong sa kabuhi nga wala katapusan. Ang mortal nga mga pamilya importante sa sinang plano. Ang Simbahan yara sa pagtigana sang doktrina, sang awtoridad, kag sang mga ordinansa nga kinahanglanon sa pagpadayon sang mga relasyon sa pamilya hasta sa katubtuban. Gani, ang organisasyon sang pamilya kag sang Simbahan ni Jesucristo may nagaisa nga nagapabakod nga relasyon. Ang mga bugay sang priesthood—pareho sang kabug-osan sang ebanghelyo kag mga ordinansa pareho sang bunyag, kumpirmasyon kag pagbaton sang regalo sang Balaan nga Espiritu, ang endowment sa templo, kag kasal sa katubtuban—mabaton sang pareho lalaki kag babayi.1
Ang priesthood nga ginatumod naton diri amo ang Melchizedek Priesthood, ginpanumbalik sa pagsugod sang Pagpanumbalik sang ebanghelyo. Sanday Joseph Smith kag Oliver Cowdery gin-ordin nanday Pedro, Santiago, kag Juan, nga nagdeklarar sang ila mga kaugalingon “nga nagaangkon sang mga yabi sang ginharian, kag sang dispensasyon sang kabug-osan sang mga panahon” (Doktrina kag mga Kasugtanan 128:20). Ining dumaan nga mga Apostoles nagbaton sinang awtoridad halin sa Manluluwas Mismo. Ang tanan nga iban pa nga mga awtoridad ukon palangakuan sa priesthood mga sugpon sang Melchizedek Priesthood (tan-awa sa Doktrina kag mga Kasugtanan 107:5), kay ini “nagakapot sang kinamatarong sang pangulohan, kag may gahum kag awtoridad sa tanan nga palangakoan sa simbahan sa bilog nga katuigan sang kalibutan” (Doktrina kag mga Kasugtanan 107:8).
Sa Simbahan ang awtoridad sang mas dako nga priesthood, ang Melchizedek Priesthood, kag sang mas nubo ukon ang Aaronic Priesthood ginagamit sa idalom sang direksyon sang isa ka lider sa priesthood, pareho sang bishop ukon president, nga nagakapot sang mga yabi sinang priesthood. Agud maintiendihan ang paggamit sang awtoridad sang priesthood sa Simbahan, kinahanglan naton maintiendihan ang prinsipyo sang mga yabi sang priesthood.
Ang Melchizedek Priesthood nga mga yabi sang ginharian ginhatag ni Pedro, Santiago, kag Juan, pero wala sina ginakompleto ang pagpanumbalik sang mga yabi sang priesthood. Ang iban nga mga yabi sang priesthood mas ulihi pa nag-abot. Pagkatapos sang dedikasyon sang una nga templo sa sining dispensasyon sa Kirtland, Ohio, tatlo ka mga propeta—si Moses, Elias, kag Elijah—nagpanumbalik “sang mga yabi sining dispensasyon,” lakip na ang mga yabi nahanungod sa pagtipon sang Israel kag sang buluhaton sa mga templo sang Ginuo (tan-awa sa Doktrina kag mga Kasugtanan 110), pareho sang ginlaragway ni Pangulong Eyring sing maathag.
Ang pinakapamilyar nga halimbawa sang gamit sang mga yabi amo ang paghikot sang mga ordinansa sang priesthood. Ang ordinansa isa ka pormal nga hilikuton nga tanda sang paghimo sang mga kasugtanan kag sang pagpromisa sang mga bugay. Sa Simbahan ang tanan nga mga ordinansa ginahikot sa idalom sang pahanugot sang lider sang priesthood nga nagakapot sang mga yabi sinang ordinansa.
Ang ordinansa masami ginahikot sang mga tawo nga gin-ordin sa isa ka palangakuan sa priestood nga nagahikot sa idalom sang direksyon sang isa nga nagakapot sang mga yabi sang priesthood. Halimbawa, ang mga nagakapot sang nagkalainlain nga mga palangakuan sang Aaronic Priesthood ang nagapanguna sa ordinansa sang sakramento sa idalom sang mga yabi kag direksyon sang bishop, nga nagakapot sang mga yabi sang Aaronic Priesthood. Ang amo man nga prinsipyo ginasunod sa mga ordinansa sang priesthood kon sa diin nagaopisyar ang mga babayi sa templo. Bisan pa nga wala nagakapot ang kababayin-an sang palangakuan sa priesthood, nagahikot sila sang sagrado nga mga ordinansa sa templo sa idalom sang pahanugot sang pangulo sang templo, nga nagakapot sang mga yabi sang mga ordinansa sa templo.
Isa pa ka halimbawa sang awtoridad sang priesthood sa idalom sang direksyon sang isa nga nagakapot sang mga yabi amo ang pagtudlo sang mga lalaki kag babayi nga gintawag sa pagtudlo sang ebanghelyo, sa mga klase sa ila mga ward ukon sa patag sang misyon. Iban pa nga mga halimbawa amo yadtong mga nagakapot sang mga posisyon sang liderato sa ward kag nagagamit sang awtoridad sang priesthood sa ila pagkalider tungod sa ila mga calling kag sa idalom sang pagkapain (set apart) kag sa direksyon sang lider sang priesthood nga nagakapot sang mga yabi sa ward ukon sa stake. Amo ini ang paagi sang paggamit sang awtoridad kag gahum sang priesthood sa Ang Simbahan ni Jesucristo sang mga Santos sa Ulihing mga Adlaw.2
Ginagamit man ang awtoridad sang priesthood kag nagakatuman ang mga bugay sini sa mga panimalay sang mga Santos sa Ulihing mga Adlaw. Sa panimalay ginatumod ko ang nagakapot-sang-priesthood nga lalaki kag babayi nga kasado kag ang ila kabataan. Ginlakip ko man ang mga kinatuhay sa naandan nga mga relasyon tuga sang kamatayon ukon diborsyo.
Ang prinsipyo nga ang awtoridad sang priesthood magamit lamang sa idalom sang direksyon sang nagakapot sang mga yabi para sa sinang buluhaton tig-una sa Simbahan, pero indi sini sakop ang pamilya. Halimbawa, ang amay nagapamuno kag nagagamit sang priesthood sa iya pamilya paagi sa awtoridad sang priesthood nga iya ginakaptan. Indi niya kinahanglan sang direksyon ukon pahanugot sang isa nga nagakapot sang mga yabi sang priesthood para himuon ang iya nagkalainlain nga hilikuton sa pamilya. Nagalakip ini sang paglaygay sang mga miyembro sang iya pamilya, paghiwat sang mga miting sang pamilya, paghatag sang mga bendisyon sang priesthood sa iya asawa kag kabataan, ukon paghatag sang bendisyon sa mga miyembro sang pamilya ukon iban pa.3 Ang mga awtoridad sang Simbahan nagatudlo sa mga miyembro sang pamilya pero wala nagadumala sang paggamit sang awtoridad sang priesthood sa pamilya.
Amo man nga prinsipyo ang ginasunod kon wala ang amay kag ang iloy amo ang lider sang pamilya. Nagapamuno sia sa iya puluy-an kag nagapatigayon sa pagdala sang gahum kag mga bugay sang priesthood sa iya pamilya paagi sa iya endowment kag pagselyo sa templo. Bisan indi sia awtorisado sa paghatag sang mga bendisyon sang priesthood nga pwede lamang mahatag sang tawo nga nagakapot sang partikular nga palangakuan sang priesthood, pwede niya himuon ang tanan nga iban pa nga mga hilikuton sang pagkalider sa pamilya. Sa paghimo sini, ginagamit niya ang gahum sang priesthood para sa kaayuhan sang kabataan nga iya ginapamunoan sa iya pagkalider sa pamilya.4
Kon padakuon sang mga amay ang ila priesthood sa ila mismo pamilya, mas pauswagon pa gid sini ang misyon sang Simbahan sangsa iban nga ila himuon. Ang mga amay nga nagakapot sang Melchizedek Priesthood dapat nga maggamit sang ila awtoridad “paagi sa paghaylo, sa pagkamainantuson, sa kaayo kag kalulo, kag sa gugma nga matuod-tuod” (Doktrina kag mga Kasugtanan 121:41). Inang mataas nga talaksan sa paggamit sang tanan nga awtoridad sang priesthood pinakaimportante sa sulod sang panimalay. Ang mga nagakapot sang priesthood dapat man magtuman sang mga kasuguan agud maangkon nila ang gahum sang priesthood sa paghatag sang mga bendisyon sa mga miyembro sang ila pamilya. Dapat sila magkultibar sang mapinalanggaon nga relasyon sa pamilya agud ang mga miyembro sang pamilya maluyag magpangayo sa ila sang mga bendisyon. Kag ang mga ginikanan dapat magpaisog sang mas madamo nga mga bendisyon sang priesthood sa pamilya.5
Sa sining mga miting sa komperensya, samtang nagapasilong kita sing makadali sa aton mortal nga mga kabalaka sa makamamatay nga pandemiya, gintudloan kita sang dalagko nga mga prinsipyo sang wala katubtuban. Ginapaisog ko ang kada isa sa aton nga siguruhon nga “maayo” ang aton mata para mabaton ining mga kamatuoran sang wala katapusan agud ang aton mga lawas “mangin puno sang kapawa” (3 Nefi 13:22).
Sa Iya wali sa kadam-an nga narekord sa Biblia kag sa Libro ni Mormon, ang Manluluwas nagtudlo nga ang mortal nga mga lawas sarang mapuno sang kasanag ukon mapuno sang kadulom. Kita, siyempre, gusto nga mapuno sang kasanag, kag ang aton Manluluwas nagtudlo sa aton kon paano naton ini himuon. Dapat kita mamati sa mga mensahe parte sa mga kamatuoran sang katubtuban. Gingamit Niya nga halimbawa ang aton mata, nga amo ang nagapasulod sang kasanag sa aton mga lawas. Kon ang aton mata “maayo”—buot silingon, kon nagatutok kita sa pagbaton sang wala katapusan nga kasanag kag paghangop—ginpaathag Niya, “ang inyo lawas mangin puno sang kapawa” (Mateo 6:22; 3 Nefi 13:22). Apang kon ang aton “mata malain”—buot silingon, kon ginapangita naton ang kalainan kag ipasulod ina sa aton mga lawas—paandam Niya, “ang inyo bug-os nga lawas mangin puno sang kadudulman” (bersikulo 23). Buot silingon, ang kasanag ukon kadulom sa aton mga lawas nagadepende kon paano naton ginatan-aw—ukon ginabaton—ang wala katapusan nga mga kamatuoran nga ginatudlo sa aton.
Dapat naton sundon ang imbitasyon sang Manluluwas nga magpangita kag magpangayo para maintiendihan ang mga kamatuoran sang katubtuban. Nagapromisa Sia nga ang aton Amay sa Langit handa sa pagtudlo sa tanan sang mga kamatuoran nga ila ginapangita (tan-awa sa 3 Nefi 14:8). Kon handumon naton ini kag siguruhon nga maayo ang aton mata sa pagbaton sang mga ini, ang Manluluwas nagapromisa nga ang mga kamatuoran sang wala katubtuban “pagabuksan” sa aton (tan-awa 3 Nefi 14: 7–8).
Sa kabaliskaran, nagaharahara si Satanas sa paggumon sang aton pamensaron ukon sa pagpatalang sa aton sa importante nga mga butang pareho sang kon paano nagaoperar ang priesthood sang Dios. Ang Manluluwas nagpaandam parte sa “di-matuod nga mga [propeta], nga nagapalapit sa inyo sa panapton sang karnero, apang sa sulod manunukob nga mga lobo sila” (3 Nefi 14:15). Ginhatagan Niya kita sining palatandaan para buligan kita nga pilion ang kamatuoran sa lainlain nga mga panudlo nga makapalibog sa aton: “Makilala ninyo sila sa ila mga bunga,” gintudlo Niya (3 Nefi 14:16). “Ang maayo nga kahoy indi makadala sing malain nga bunga, ukon ang malain nga kahoy sing maayo nga bunga” (bersikulo 18). Gani, dapat naton pangitaon ang resulta—“ang mga bunga”—sang mga prinsipyo nga ginatudlo kag ang mga propeta nga nagatudlo sini. Amo ina ang pinakamaayo nga sabat sa madamo nga mga pagpamatok nga mabatian naton batok sa Simbahan kag sa mga doktrina kag polisiya kag liderato sini. Sunda ang tanda nga gintudlo sang Manluluwas. Pangitaa ang mga bunga—ang resulta.
Kon panumdumon naton ang mga bunga sang ebanghelyo kag sang ginpanumbalik nga Simbahan ni Jesucristo, nagakasadya kita kon paano ang Simbahan, sa mga tion sang kabuhi sang buhi sini nga mga miyembro, naglapta halin sa lokal nga mga kongregasyon sa Mga Kabukiran sang Weste sang Amerika sa mga lugar kon sa diin ang kalabanan sang iya 16 milyones ka mga miyembro nagapuyo sa mga pungsod sa gwa sang Estados Unidos. Upod sinang pagtubo, nakabatyag kita sang pagdako sang kapasidad sang Simbahan sa pagbulig sang iya mga miyembro. Nagabulig kita paagi sa pagtuman sang mga kasuguan, sa pagtuman sang mga responsibilidad sa pagwali sang ginpanumbalik nga ebanghelyo, sa pagtipon sang Israel, kag sa pagpatindog sang mga templo sa bilog kalibutan.
Ginapangunahan kita sang propeta, nga si Pangulong Russell M. Nelson, nga ginagamit sang Ginuo ang pagkalider para lab-uton ang progreso nga aton nabatyagan sa tion sang masobra duha ka tuig sang iya liderato. Karon pagabugayan kita nga magpamati kay Pangulong Nelson, nga magatudlo sa aton kon paano palaparon ang aton progreso sa sining ginpanumbalik nga Simbahan ni Jesucristo sa sining mabudlay nga panahon.
Nagapamatuod ako sang kamatuoran sining mga butang kag nagaupod sa inyo sa pagpangamuyo para sa aton propeta, nga amo ang aton madason nga pamatian, sa ngalan ni Jesucristo, amen.