2:3

Binagbinaga ang Kaayo kag Pagkawala Tupong sang Dios

Ni Elder Dale G. Renlund

Sang Korum sang Dose ka mga Apostoles

Ginaagda ko kamo nga panumdumon kada adlaw ang pagkawala tupong sang Amay nga Langitnon kag ni Jesucristo kag kon ano ang Ila ginhimo para sa inyo.

Sa bug-os nga kasaysayan, bisan kag ilabi na sa tinion sang kabudlayan, ginapaisog kita sang mga propeta nga dumdumon ang pagkawala tupong sang Dios kag binagbinagon ang Iya ginhimo para sa aton bilang mga indibidwal, mga pamilya, kag bilang katawhan.¹ Ang ini nga instruksyon makita sa bug-os nga balaan nga mga kasulatan pero mas matalupangdan sa Libro ni Mormon. Ang tig-ulo nga pahina nagapaathag nga isa sang mga katuyuan sang Libro ni Mormon ang “magpakita sa mga salin sang panimalay sang Israel kon ano kadako nga mga butang ang ginhimo sang Ginuo sa ila mga katigulangan.”² Ang Libro ni Mormon nagtakop upod ang pangabay ni Moroni: “Yari karon, ginalaygayan ko kamo nga kon inyo mabasa ining mga butang … nga inyo dumdumon kon nangin daw ano kamaluluy-on ang Ginuo sa mga anak sang tawo … kag binagbinagon ini sa inyo mga tagipusuon.”³

Ang katayuyon sang mga pangabay sang mga propeta nga dumdumon ang kaayo sang Dios maathag kaayo.⁴ Gusto sang aton Amay nga Langitnon nga aton panumdumon ang kaayo Niya kag sang Iya Pinalangga nga Anak, indi para sa Ila kalipayan kundi bangod sang impluwensya sang amo nga pagpanumdom sa aton. Paagi sa pagdumdom sang Ila kaayo, nagadako ang aton panglantaw kag pag-intiendi. Paagi sa pagpamensar sang Ila kaluoy, mangin mas mapainubuson kita, mainampuon, kag makusog.

Ang makatalandog nga eksperiyensya sang isa ka pasyente sadto nagapakita kon paano kita ginabag-o sang kapasalamatan sa kaalwan kag kaluoy. Sang 1987, nakilala ko si Thomas Nielson, isa ka maayo nga tawo nga nagakinahanglan sang heart transplant. 63 anyos na sia kag nagapuyo sa Logan, Utah, sa Estados Unidos. Pagkatapos sang pagserbisyo militar sang Ikaduhang Inaway Pangkalibutanon, ginpangasawa niya si Donna Wilkes sa Templo sang Logan Utah. Nangin mapagsik kag madinalag-on sia nga mason sang mga bricks. Sang gulang na sia nalipay gid sia nga mag-obra upod ang iya kamagulangan nga apo, nga si Jonathan, kon bakasyones. Nagtubo ang espesyal nga kalapit sa ila nga duha, tungod daw nakita ni Tom ang iya kaugalingon kay Jonathan.

Daw ginatak-an na si Tom maghulat sang donor sang kasingkasing. May pagkamatinalak-on sia nga klase sang tawo. Pirme niya ginalab-ot ang bisan ano nga tuyo nga iya ginapahamtang paagi sa kapisan kag grabe nga determinasyon. Nagapakigbato sa balatian sa kasingkasing, nga ang iya kabuhi nagaangan-angan, kon kaisa ginapamangkot ako ni Tom kon ano ang akon ginahimo para magdasig ang proseso. Nga nagalahog, nagpanugyan sia sang mga paagi nga pwede ko himuon para makakita ako gilayon sang kasingkasing para sa iya.

Isa ka malipayon pero makakululba nga adlaw, may mangin donor na sang kasingkasing para kay Tom. Ang kadakuon kag tipo sang dugo pareho gid, kag ang donor hubin pa, 16 anyos pa lang. Ang inugdonar nga kasingkasing iya ni Jonathan, ang pinalangga nga apo ni Tom. Sang temprano sina nga adlaw, malubha nga napilasan si Jonathan sang ang awto nga iya ginasakyan nabunggoan sang nagalabay nga tren.

Sang ginbisitahan ko si Tom kag Donna sa ospital, nagalalain sila. Mabudlay hunahunaon kon ano ang ila ginabatyag, nga nakahibalo nga ang kabuhi ni Tom mahimo nga masugpunan paagi sa kasingkasing sang ila apo. Sang primero, nagpamalibad sila nga batunon ang kasingkasing halin sa nagakalisod nga ginikanan ni Jonathan, ang ila anak nga babayi kag umagad. Ugaling, nakahibalo sanday Tom kag Donna, nga wala na nagaresponde ang utok ni Jonathan, kag nakaintiendi nga ang ila pagpangamuyo para sa magadonar wala nagtuga sang aksidente ni Jonathan. Indi, ang kasingkasing ni Jonathan isa ka regalo nga mahimo magbugay kay Tom sa tion sang iya panginahanglan. Nahibal-an nila nga mahimo may maayo nga resulta ang ining trahedya kag nagdesisyon nga magpadayon.

Nangin madinalag-on ang pag-transplant. Pagkatapos sini, nangin lain nga tawo si Tom. Masobra pa sa ikaayong lawas ukon kapasalamatan ang nangin pagbag--o. Ginsiling niya sa akon nga iya ginapanumdom kada aga si Jonathan, ang iya anak kag umagad, ang regalo nga iya nabaton, kag kon ano ang nangin kabaylo sinang regalo. Bisan kitaon gihapon ang iya duna nga kahilig magpakadlaw kag determinasyon, natalupangdan ko nga nangin mas maligdong, madinumdumon, kag maluluy-on si Tom.

Nabuhi si Tom sing dugang nga 13 ka tuig pagkatapos sang transplant, mga tinuig nga wala na kuntani sa iya. Ginsiling sa iya obitwaryo nga sa sining tinuig natugotan sia nga tandugon ang mga kabuhi sang iya pamilya kag sang iban pa nga may kaalwan kag pagpalangga. Pribado sia nga nagabulig kag isa ka ehemplo sang pagkapositibo kag determinasyon.

Pareho kay Tom, ang tagsa sa aton nakabaton sang mga regalo nga indi naton mahatag sa aton kaugalingon, mga regalo halin sa aton Amay nga Langitnon kag sa Iya Pinalangga nga Anak, lakip na ang pagtubos paagi sa nagabayad-sala nga sakripisyo ni Jesucristo.⁵ Nakabaton kita sang kabuhi sa sining kalibutan; magabaton kita sang pisikal nga kabuhi pagkatapos diri, kag wala katapusan nga kaluwasan kag pagkahitaas—kon pilion naton—tanan bangod sa Amay nga Langitnon kag kay Jesucristo.

Tagsa nga gamiton naton, benepisyuhan, ukon bisan gani panumdumon ining mga regalo, dapat naton binagbinagon ang sakripisyo, kaalwan, kag ang kaluoy sang mga naghatag. Ang pagtahod sa mga naghatag nagaapekto sa aton sing masobra pa sangsa pagpasalamat. Ang pagbinagbinag sang Ila mga regalo sarang kag dapat magbag-o sa aton.

Isa ka talalupangdon nga pagbag-o amo ang iya ni Alma nga Lamharon. Samtang si Alma “nagalibot nga [nagarebelde] batok sa Dios,”⁶ nagpakita ang isa ka anghel. Sa “isa ka tingug sang daguob,”⁷ gin-akigan sang anghel si Alma sa paghingabot sang Simbahan kag “pagbihag sang mga tagipusuon sang katawhan.”⁸ Nagdugang ang anghel sang sining laygay: “Maglakat ka, kag dumduma ang pagkabihag sang imo mga katigulangan …; kag dumduma kon daw ano kadalagko nga mga butang ang ginhimo [sang Dios] para sa ila.”⁹ Sa tanan nga posible nga mga laygay, amo ina ang ginhatagan importansya sang anghel.

Naghinulsol si Alma kag nakadumdom. Iya ginsugid sang ulihi ang laygay sang anghel sa iya anak nga si Helaman. Ginlaygay ni Alma, “Luyag ko nga himuon mo ang subong sang akon ginhimo, sa pagdumdom sang pagkabihag sang aton mga katigulangan; kay yara sila sadto sa pagkaulipon, kag wala sing makahilway sa ila luwas nga ini amo ang Dios ni Abraham, … Isaac, kag … Jacob; kag sia pat-od gid nga amo ang nagluwas sa ila sa ila mga kapipit-an.”¹⁰ Simple nga ginsiling ni Alma, “Ginabutang ko ang akon pagsalig sa iya.”¹¹ Naintiendihan ni Alma nga paagi sa pagdumdom sang paghilway sa pagkaulipon kag suporta sa tion sang “mga pagtilaw kag mga gumontang sang tagsa ka sahi,” makilala naton ang Dios kag ang kasegurohan sang Iya mga promisa.¹²

Pila lang sa aton ang may eksperiyensya nga pareho kapinasahi sang iya ni Alma, pero ang aton pagbag-o sarang nga mangin pareho kadalom. Ang Manluluwas nagpangako sang una:

“Hatagan ko kamo sang bag-ong tagipusuon, kag ibutang ko ang espiritu nga bag-o sa sulod ninyo: kag kuhaon ko ang tagipusuon nga batu-batuhon … , kag hatagan ko kamo sing tagipusuon nga unod.

“Ang ibutang ko sa sulod ninyo ang akon espiritu. …

“… Kag kamo mangin akon katawhan, kag ako mangin inyo Dios.”¹³

Ang nabanhaw nga Manluluwas naghambal sa mga Nefinhon kon paano nagasugod ining pagbag-o. Ginhambal Niya ang importante nga talandaan sa plano sang Amay nga Langitnon sang Sia nagsiling:

“Kag ginpadala ako sang akon Amay agud bayawon ako sa krus; kag pagkatapos nga mabayaw ako sa krus, agud mabutong ko ang tanan nga tawo palapit sa akon. …

“Kag sa amo nga kabangdanan ako ginbayaw; gani, paagi sa gahum sang Amay butungon ko ang tanan nga mga tawo palapit sa akon.”¹⁴

Ano ang kinahanglan ninyo para mabutong palapit sa Manluluwas? Binagbinaga ang pagpaidalom ni Jesucristo sa pagbuot sang Iya Amay, ang Iya pagdaog sa kamatayon, ang Iya pagdala sa Iya Kaugalingon sang inyo mga sala kag mga kapaltahan, ang Iya pagbaton sang gahum sang Amay para magpatunga para sa inyo, kag ang Iya perpekto nga pagtubos sa inyo.¹⁵ Kulang pa bala ining mga butang para mabutong kamo sa Iya? Hustohan ina para sa akon. Si Jesucristo “nagatindog nga bukas ang mga butkon, nagalaum kag handa nga paayuhon, patawaron, tinloan, pabakuron, limpyuhan, kag pakabalaanon [kamo kag ako].”¹⁶

Ining mga kamatuoran dapat maghatag sa aton sang bag-o nga tagipusuon kag magtulod sa aton nga pilion nga sundon ang Amay nga Langitnon kag si Jesucristo. Pero bisan ang bag-o nga mga tagipusuon “mahimo nga magtalang, … mahimo nga magbiya sa Dios nga [aton] ginapalangga.”¹⁷ Agud batuan ini nga huyog, kinahanglan naton nga binagbinagon kada adlaw ang mga regalo nga aton nabaton kag kon ano ang nalakip diri. Si Haring Benjamin naglaygay, “Luyag ko nga inyo dumdumon, kag dalayon nga huptan sa panumduman, ang pagkawala tupong sang Dios … kag ang iya kaayo kag pagkamainantuson tuhoy sa inyo.”¹⁸ Kon himuon naton ini, mangin kwalipikado kita sa dalagko nga langitnon nga mga bugay.

Ang pagbinagbinag sang kaayo kag kaluoy sang Dios nagabulig sa aton nga mangin mabinatyagon sa espirituhanon. Bilang resulta, ang mas dako nga pagkasensitibo sa espirituhanon magatugot sa aton nga mahibal-an ang kamatuoran sang tanan nga mga butang paagi sa gahum sang Balaan nga Espiritu.¹⁹ Nagalakip ini sang panaksihon sang kamatuoran sang Libro ni Mormon; ang pagkilala nga si Jesus amo ang Cristo, ang aton personal nga Manluluwas kag Manunubos; kag pagbaton nga ang Iya ebanghelyo ginpanumbalik sa sining ulihing mga adlaw.²⁰

Kon aton ginadumdom ang pagkawala tupong sang aton Amay nga Langitnon kag ni Jesucristo kag ang Ila ginhimo para sa aton, indi naton Sila pagbale-walaon, pareho nga wala ginbale-wala ni Tom ang kasingkasing ni Jonathan. Sa masinadyahon kag maligdong nga paagi, ginadumdom ni Tom kada adlaw ang trahedya nga naghatag sa iya sang sugpon sang kabuhi. Sa tunga sang kasadya sang ihibalo nga mahimo kita maluwas kag mapahitaas, kinahanglan naton panumdumon nga ang kaluwasan kag pagkahitaas ginhatag sa dako kaayo nga bili.²¹ Mahimo kita magkasadya nga may pagtahod sa paghibalo nga kon wala si Jesucristo, wala gid kita, pero upod sa Iya, mahimo kita makabaton sang pinakadako nga regalo nga mahatag sang Amay nga Langitnon.²² Sa matuod, ining pagtahod nagatugot sa aton nga mabaton ang promisa “nga kabuhi nga wala katapusan sa sining kalibutan” kag sa ulihi mabaton ang “kabuhi nga wala katapusan … bisan pa ang imortal nga himaya” sa kalibutan nga magaabot.²³

Kon panumdumon naton ang kaayo sang aton Amay nga Langitnon kag ni Jesucristo, nagadugang ang aton pagsalig sa Ila. Nagabag-o ang aton mga pangamuyo tungod nakahibalo kita nga ang Dios amo ang aton Amay kag Iya kita mga anak. Wala naton ginatinguhaan nga bag-uhon ang Iya pagbuot kundi ginatadlong naton ang aton pagbuot sa Iya kag ginaseguro sa aton kaugalingon ang mga bugay nga luyag Niya ihatag, sa kondisyon nga pangayuon naton ang mga ini.²⁴ Nagatinguha kita nga mangin mas mapailubon, mas matinlo, mas mabakod, mas Cristohanon.²⁵ Ang ining mga pagbag-o nagakalipikar sa aton sa dugang nga langitnon nga mga bugay.

Sa pagkilala nga ang tanan nga maayo nagahalin kay Jesucristo, mas epektibo naton nga mapahayag sa iban ang aton pagtuo.²⁶ Makaangkon kita sang kaisog kon makasugata sang daw imposible nga mga buluhaton kag sirkumstansya.²⁷ Mapabakod naton ang aton pangako nga tumanon ang mga kasugtanan nga aton ginhimo nga sundon ang Manluluwas.²⁸ Mapuno kita sang pagpalangga sang Dios, mangin maluyag magbulig sa mga nagakinahanglan nga wala sang paghusga, palanggaon ang aton kabataan kag padakuon sila sa pagkamatarong, maghupot sang kapatawaran sang aton mga sala, kag pirme nga magkasadya.²⁹ Ini ang halandumon nga mga bunga sang pagdumdom sang kaayo kag kaluoy sang Dios.

Sa kabaliskaran, ang Manluluwas nagpaandam, “Kag indi masaklaw sang tawo ang Dios, ukon wala sia nagakaakig sa bisan kay sin-o, luwas lang sa mga wala nagakilala sang Iya kamot sa tanan nga mga butang.”³⁰ Pamatyag ko wala nagakainsulto ang Dios kon malimtan naton Sia. Kundi, pamatyag ko nagakadismaya gid Sia sing dako. Nakahibalo Sia nga ginakakasan naton ang aton kaugalingon sang oportunidad nga magpalapit sa Iya paagi sa pagdumdom sa Iya kag sa Iya kaayo. Dayon madula ang aton oportunidad nga mas makapalapit Sia sa aton kag ang partikular nga mga bugay nga Iya ginpromisa.³¹

Ginaagda ko kamo nga panumdumon kada adlaw ang pagkawala tupong sang Amay nga Langitnon kag kon ano ang Ila ginhimo para sa inyo. Tugoti ang inyo pagbinagbinag sang Ila kaayo nga magbugkos sang inyo nagatalang-talang nga tagipusuon sa Ila.³² Binagbinaga ang Ila kaluoy, kag pagabugayan kamo sang dugang nga espirituhanon nga pagkamabinatyagon kag mangin mas pareho kay Cristo. Ang pagpamensar sang Ila paghangop magabulig sa inyo nga “magpadayon nga matinuohon tubtob sa katapusan,” tubtob nga “mabaton kamo sa langit” sa “pagpuyo upod sa Dios sa wala katapusan nga kalipay.”³³

Ang aton Amay nga Langitnon, nga nagatumod sa Iya Pinalangga nga Anak, nagsiling, “Pamatii Sia!”³⁴ Sa inyo pag-akto sa sina nga mga pulong kag pagpamati sa Iya, dumduma, sing masinadyahon kag maligdong, nga ang Manluluwas nanamian magpanumbalik sang butang nga indi ninyo mapanumbalik; luyag Niya nga bulngon ang mga pilas nga indi ninyo mabulong; luyag Niya kaayuhon ang indi na makay-o;³⁵ Iya ginabayran ang tanan nga kakulangan sang hustisya batok sa inyo;³⁶ kag nanamian Sia nga permanente nga paayuhon bisan sang nagawasak nga mga tagipusuon.³⁷

Samtang akon ginpanumdom ang mga regalo halin sa aton Amay nga Langitnon kag kay Jesucristo, natun-an ko ang Ila wala katapusan nga pagpalangga kag ang Ila indi matupungan nga kaluoy sa tanan nga mga anak sang Amay nga Langitnon.³⁸ Ang ining ihibalo nagbag-o sa akon, kag bag-uhon man kamo sini. Sa ngalan ni Jesucristo, amen.