2:3

Maayo nga Pundasyon sa Palaabuton

Ni Elder Gary E. Stevenson

Sang Korum sang Dose ka mga Apostoles

Sa magaabot nga tinuig, kabay nga tugtan naton ang pagpatahum sa Templo sang Salt Lake nga magatandog kag mag-inspirar sa aton.

Kasaysayan sang Templo sang Salt Lake

Balikan naton ang mainit nga hapon sang Hulyo 24, 1847, mga 2:00 p.m. Pagkatapos sang mabudlay nga 111-ka-adlaw nga biyahe upod ang 148 ka mga miyembro sang Simbahan nga nangin bahin sang una nga grupo nga nagpa-weste, si Brigham Young, anay Pangulo sang Korum sang Dose ka mga Apostoles, nga nagamasakit kag maluya tungod sa mountain fever, nagsulod sa Salt Lake Valley.

Duha ka adlaw pagkatapos, samtang nagapaayo sa iya masakit, ginpangunahan ni Brigham Young ang pila ka mga miyembro sang Korum sang Dose ka Mga Apostoles kag ang iban pa para maglibot. Ginrekord ni William Clayton, “Masulosobra isa ka kilometro pa-norte sang kampo, nakalab-ot kami sa matahum nga patag sang duta, matapan kag manami nga nagadulhog pa-weste.”¹

Si Brigham Young nga ginamarkahan ang lugar para sa templo

Samtang ginatulok ang lugar upod sa grupo, gulpi lang nagpundo si Brigham Young kag gintibsok ang iya baston sa duta, nga nagasinggit, “Diri magatindog ang Templo sang aton Dios.” Isa sa iya mga upod amo si Elder Wilford Woodruff, nga nagsiling nga ining mga tinaga “nag-igo sa [iya] nga daw kilat,” kag gintibsukan niya sang sanga ang duta para markahan ang agi sang baston ni Pangulong Young. Kwarenta arias (16 ha) ang ginpili para sa templo, kag gindesisyonan nga ang siyudad dapat plastaron “nga perpekto-kwadrado sa Norte & Sur, este & weste” nga ang templo ara gid sa sentro.²

Sa pangkabilogan nga komperensya sang Abril 1851, ang mga miyembro sang Simbahan isa nga nagboto sa mosyon nga magpatindog sang templo “sa ngalan sang Ginuo.”³ Pagligad sang duha ka tuig, sang Pebrero 14, 1853, gindedikar ni Heber C. Kimball ang lugar sa isa ka pangpubliko nga seremonya nga gintambungan sang pila ka libo nga mga Santos, kag ginbungkag ang duta para sa pundasyon sang Templo sang Salt Lake. Pagligad sang pila ka bulan , sang Abril 6, ang dalagko kaayo nga mga bato nga pang-pundasyon ang ginplastar kag gindedikar sa dako nga seremonya nga may parada sang mga bandera kag mga banda kag prosesyon nga ginpangunahan sang mga lider sa Simbahan halin sa daan nga tabernakulo padulong sa tilindugan sang templo, kon sa diin ang mga pamulong-pulong kag mga pangamuyo ginhambal sa tagsa sang apat ka pundasyon nga bato.⁴

Sa seremonya sang pagbungkag sang duta, ginsaysay ni Pangulong Young ang iya palanan-awon sang pagtapak gid niya sa duta samtang ginatulok nila ang palibot, nga nagasiling, “Nahibal-an ko [sadto], pareho sang nahibal-an ko subong, nga amo ini ang duta nga pagatindugan sang templo—ara yadto sa akon atubang.”⁵

Pulo ka tuig pagkatapos, naghatag si Brigham Young sang masunod nga panan-awon sang propeta sa pangkabilogan nga komperensya sang Oktobre 1863: “Gusto ko makita [ang] templo nga ginpatindog sa paagi nga makalampuwas ini sa milenya. Indi lamang ini ang templo nga aton pagatukuron; may ginatos pa sini nga ipatiukod kag idedikar sa Ginuo. Ining templo pagakilalahon nga una nga templo nga gintukod sa kabukiran sang mga Santos sang Ulihing mga Adlaw. … Gusto ko ina nga templo … nga magtindog bilang isa ka dalayawon nga monumento sang pagtuo, pagpursige kag kapisan sang mga santos sang Dios sa kabukiran.”⁶

Sa pagrebyu sining malip-ot nga kasaysayan, nahalawhaw ako sa pagkamanugpanan-aw ni Brigham Young—una, sa iya pagseguro nga, kutob sa posible kag, gamit ang mga pamaagi sa konstruksyon nga ara sa amo nga panahon kag lugar, ang Templo sang Salt Lake pagatukuron sa paagi nga magatiner sa bilog nga Milenya kag, ikaduha, ang iya pagpropesiya sang pagdamo sang mga templo sa palaabuton sa bilog nga kalibutan, bisan pa sa ginatos nga kadamuon.

Pagkay-o sang Templo sang Salt Lake

Pareho kay Brigham Young, ang aton propeta sa karon nagabantay sa Templo sang Salt Lake kag sang tanan nga iban pa nga may dako nga paghalong. Sa mga tinuig, ang Unang Panguluhan, mation-tion, nagalaygay sa Nagapamuno nga Bishopric nga siguruhon nga ang pundasyon sang Templo sang Salt Lake mabakod. Sang nagaserbisyo ako sa Nagapamuno nga Bishopric, sa pangabay sang Unang Panguluhan, ginrebyu namon ang kabilugan nga pasilidades sang Templo sang Salt Lake, lakip na ang pagtan-aw sang pinakabag-o nga teknolohiya sa panglinog nga disenyo kag pamaagi sa konstruksyon.

Ari ang pila ka mga bahin sang rebyu nga ginhatag sa Unang Panguluhan sang amo nga tion: “Sa disenyo kag konstruksyon sang Templo sang Salt Lake, ang pinakamaayo nga engineering, sagad nga mga trabahador, materyales sa konstruksyon, mga kagamitan sa sulod, kag iban pa nga mga materyales sadto nga panahon ang gingamit. Sugod sang dedikasyon sini sang 1893, ang templo mabakod nga nagatindog kag nagserbe nga parola sang pagtuo [kag] paglaum kag bilang kasanag sa katawhan. Dako nga paghalong ang ginahimo sa paggamit, pagtinlo, kag pagmentenar nga ara sa maayo nga kondisyon ang templo. Ang panggwa nga granite kag ang mga soleras sang salog kag bega ara sa maayo nga kondisyon. Ang bag-o nga mga pagtuon nagakumpirma nga ang lokasyon nga ginpili ni Brigham Young para sa templo maayo ang duta kag makadala sang mabug-at.”⁷

Ang rebyu nagpanugyan nga kinahanglanon ang normal nga pagkumpuni kag pagpanami para pabag-uhon kag pabakuron ang templo, lakip na sa plaza-plaza kag palibot, sa daan na nga mga linyada sa kuryente kag iban pa, kag sa lugar bulunyagan. Ugaling, ginrekomendar man ang separado, mas komprehensibo nga pagpabakod para sa linog halin sa pundasyon sang templo paibabaw.

Ang Pundasyon sang Templo

Sa inyo madumduman, dako kaayo ang partisipasyon ni Pangulong Brigham Young sa konstruksyon sang orihinal nga pundasyon sang templo, nga nagbenepisyo sa templo sing dako sugod sang pagkahuman sini 127 ka tuig na ang nagligad. Ang bag-o ginpanugyan nga pangkabilugan nga pagpabakod sang templo para sa linog magagamit sang base isolation technology, nga wala pa gani mapensaran sang panahon nga ginapatindog ini. Amo ini ang ginakabig nga pinakabag-o, pinakamaayo nga teknolohiya sa engineering para sa proteksyon sa linog.

Ining teknolohiya, nga bag-o lang ginhimo, nagasugod sa mismo pundasyon sang templo, nga nagahatag sang mapag-on nga depensa sa halit sang linog. Buot silingon, ginapabakod sini ang istraktura sang templo para magatindog ini, bisan pa nga ang duta kag palibot sini magatay-og kon maglinog.

Ang pagkaayo sang templo nga magagamit sining teknolohiya gin-anunsyo sang Unang Panguluhan sang nagligad nga tuig. Sa idalom sang direksyon sang Nagapamuno nga Bishopric, ang konstruksyon nagsugod pila ka bulan na ang nagligad, sang Enero 2020. Ginabulobanta nga matapos ini sa sulod sang apat ka tuig.

Pagsiguro sang Inyo Personal nga Pundasyon

Samtang ginapamensar ko ang masunod nga apat ka tuig sang kabuhi sining matahum, dungganon, mataas, kag makabibihag nga Templo sang Salt Lake, ginapanan-aw ko ini bilang tion sang pagbag-o sangsa tion sang pagsira! Sa amo man, pwede naton pamangkuton ang aton kaugalingon, “Paano bala ining dako nga pagbag-o sang Templo sang Salt Lake makainspirar sa aton nga himuon ang aton kaugalingon nga espirituhanon nga pagbag-o, pagkaayo, pagkatawo liwat, pagpapagsik, ukon pagpanumbalik?”

Ang pag-eksamin sang kaugalingon mahimo nga magpakita nga kita man kag ang aton mga pamilya makabenepisyo kon may himuon kita nga pagbag-o, bisan pa sa paghanda para sa linog! Mahimo naton sugdan ang amo nga proseso paagi sa pagpamangkot:

“Ano ang hitsura sang akon pundasyon?”

“Ano ang nalakip sa mabakod nga mga bato nga bahin sang akon personal nga pundasyon, nga ginatungtongan sang akon panaksihon?”

“Ano ang pundasyon nga mga elemento sang akon espirituhanon kag emosyunal nga karakter nga magabulig sa akon kag sa akon pamilya nga magpabilin nga mabakod kag indi matumba, bisan pa sa atubang sang nagapatay-og nga mga hitabo nga sigurado matabo sa aton mga kabuhi?”

Ining mga hitabo, pareho sa linog, masami mabudlay pakton kag may lainlain nga kabaskugon—mga pagpakigbato sa pamangkutanon ukon pagduhaduha, pag-atubang sang kasakit ukon kabudlayan, pagpakigbato sa personal nga kasaklaw sa mga lider sang Simbahan, mga miyembro, doktrina, ukon polisiya. Ang pinakamaayo nga depensa batok sa mga ini nasandig sa aton espirituhanon nga pundasyon.

Ano ayhan ang espirituhanon nga mga pundasyon sang aton personal kag pangpamilya nga pangabuhi? Mahimo nga simple lang ini, maathag kag malahalon nga mga prinsipyo sang pagpangabuhi sang ebanghelyo—pangamuyo sa pamilya; pagtuon sang balaan nga mga kasulatan, lakip na ang Libro ni Mormon; pagtambong sa templo; kag pagtuon sang ebanghelyo paagi sa Dali, Magsunod sa Akon kag home evening. Ang iban nga mga bulig nga makapabakod sa inyo espirituhanon nga pundasyon mahimo maglakip sang Mga Artikulo sang Pagtuo, ang proklamasyon sang pamilya, kag “Ang Buhi nga Cristo.”

Para sa akon, ang mga prinsipyo nga nalakip sa mga pamangkot nga ginahambalan bilang parte sang pagbaton sang temple recommend nagaserbe nga mabaskog nga basehan sang espirituhanon nga pundasyon—labi na ang una nga apat ka pamangkot. Ginakabig ko ang mga ini nga espirituhanon nga mga pundasyon.

Siyempre, pamilyar na kita sa sining mga pamangkot, kay ginbasa ini ni Pangulong Russell M. Nelson sa aton sing isa-isa sang nagligad nga pangkabilugan nga komperensya.

May pagtuo ka bala kag panaksihon sa Dios, ang Wala’y Katapusan nga Amay; sa Iya Anak nga si Jesucristo; kag sa Balaan nga Espiritu?
May panaksihon ka bala sa Pagbayad-Sala ni Jesucristo kag sa Iya papel bilang imo Manluluwas kag Manunubos?
May panaksihon ka bala sa Pagpanumbalik sang ebanghelyo ni Jesucristo?
Ginatib-ong mo bala ang Pangulo sang Ang Simbahan ni Jesucristo sang mga Santos sa Ulihing mga Adlaw bilang propeta, manugpanan-aw, kag manugpahayag sang rebelasyon kag bilang ang solo nga tawo sa kalibutan nga awtorisado sa paggamit sang tanan nga yabi sang priesthood?⁸

Nakita bala ninyo kon paano ninyo binagbinagon ining mga pamangkot bilang malahalon nga mga elemento sang inyo personal nga pundasyon para buligan kamo nga tukuron kag pabakuron ini? Nagpanudlo si Pablo sa mga taga-Efeso parte sa simbahan nga “gintukod sa sadsaran nga amo ang mga [apostoles] kag mga [propeta], nga si Cristo Jesus iya amo ang pangulong bato sang pamag-ang; nga sa iya ang bug-os nga tinukod ginpahaum sing tingub kag nagatubo nga sa balaan nga templo sang Ginuo.”⁹

Isa sa pinakadako nga kalipay sang akon kabuhi amo ang makilala kag mainspirar sang mga miyembro sang Simbahan sa bilog nga kalibutan nga buhi nga mga ehemplo sang pagtuo kay Jesucristo kag sa Iya ebanghelyo. May mapag-on sila nga personal nga mga pundasyon nga nagatugot sa ila nga batuan ang mga tinion sang pagtay-og nga may tayuyon nga pag-intiendi, wala sapayan sang ila kapaslawan kag kasakit.

Para ipakita ini sa mas personal nga lebel, sining nagligad lang naghambal ako sa lubong sang isa ka matahum, masinadyahon nga hubin pa nga asawa kag iloy (nga abyan man sang amon pamilya). Isa sia sang Numero Uno kag pursigido nga manughampang sang soccer sang makilala niya kag ginpamana ang iya bana nga estudyante sang dentistry. Ginbugayan sila sang matahum, maalam nga anak nga babayi. Maisog niya nga gin-atubang ang pila ka klase sang kanser sa sulod sang anum ka mabudlay nga tinuig. Wala sapayan sang sige-sige nga kabudlayan sa emosyunal kag pisikal, nagsalig sia sa iya mapinalanggaon nga Amay nga Langitnon kag masami ginasambit sang iya mga sumulunod sa social media ang iya sikat nga halambalanon: “Ang Dios ara sa mga detalye.”

Sa isa niya ka post sa social media, iya ginsulat nga may nagpamangkot sa iya, “Ngaa nagasige ka pa tuo sa tunga sang kasakit sang buot nga nagalibot sa imo?” Mapag-on sia nga nagsabat sa sining mga tinaga: “Bangud ang pagtuo lang ang nagapabakod sa akon sa sining mabudlay nga tion. Ang pag-angkon sang pagtuo wala nagakahulugan nga wala na sang may malain nga matabo. Ang pag-angkon sang pagtuo nagatugot sa akon nga magpati nga magasanag pa liwat. Kag ang inang kasanag mas mangin masanag tungod nagpadayon ako sa tunga sang kadulom. Sa kadamuon sang kadulom nga akon nasaksihan sa sulod sang tinuig, mas madamo ako sang nasaksihan nga kasanag. Nakakita ako sang mga milagro. Nabatyagan ko ang mga anghel. Nahibal-an ko nga ginakarga ako sang akon Amay nga Langitnon. Indi ko ina tanan maeksperiyensyahan kon mahapos lang ang kabuhi. Ayhan indi naton mapaktan ang palaabuton sining kabuhi, pero indi ang akon pagtuo. Kon pilion ko nga indi magtuo buot silingon ginapili ko nga maglakat lamang sa kadulom. Tungod kon wala ang pagtuo, kadulom na lang gid ang mabilin.”¹⁰

Ang iya indi mauyog nga panaksihon sang pagtuo sa Ginuong Jesucristo—sa iya mga pulong kag sa iya binuhatan—nangin inspirasyon sa iban. Bisan pa nga ang ila lawas maluya, ginbayaw niya ang iban para mangin mas mabakod.

Ginapanumdom ko ang indi maisip nga mga miyembro sang Simbahan, mga soldado nga pareho sining sister, nga nagalakat kada adlaw nga may pagtuo, nga nagatinguha nga mangin tampad kag wala nagaatras nga mga disipulo sang aton Manluluwas, nga si Jesucristo. Nagatuon sila parte kay Cristo. Nagawali sila parte kay Cristo. Nagatinguha sila nga sundon Sia. Bisan ang mga adlaw sang ila kabuhi nagaatubang sa estable ukon nagatay-og nga duta, nakahibalo sila nga ang ila espirituhanon nga pundasyon mabakod kag indi maidog.

Ini ang mga maukod nga mga kalag nga nakaintiendi sang madalom nga kahulugan sang mga tinaga nga “Daw ano kapag-on nga pundasyon, kamong mga Santos sang Ginuo” kag “kamong mga sa Manluluwas nagdangop.”¹¹ Wala tupong ang akon pagpasalamat nga makaupod ang mga naghanda sang espirituhanon nga pundasyon nga angayan tawgon nga mga Santos kag mga mabakod kag sigurado nga makabato sa madamo nga mga kabudlayan sang kabuhi.

Sa banta ko indi sobra nga iliwat-liwat ko sa paghambal ang importansya sining mabakod nga pundasyon sa aton personal nga mga kabuhi. Bisan sa hubin pa nga edad, ang aton kabataan sa Primary ginatudloan samtang nagakanta sining mismong kamatuoran:

Ang maalam nga tawo nagpatindog sang iya balay sa bato,
Kag ang mga ulan nag-abot. …
Nagbundak ang ulan kag, ang baha nag-abot,
Kag ang balay sa bato nagatindog pa.12

Ang balaan nga mga kasulatan nagapabakod sining pundasyon nga doktrina. Ang Manluluwas nagtudlo sa katawhan sang mga Amerika:

“Kag kon inyo dalayon nga himuon ining mga butang bulahan kamo, kay napasad kamo sa akon bato.

“Apang kon sin-o man sa tunga ninyo ang magahimo sing kapin ukon kulang sangsa mga ini wala mapasad sa akon bato, kundi napasad sa isa ka balas nga sadsaran; kag kon magbundak ang ulan, kag mag-abot ang mga baha, kag maghuyop ang mga hangin, kag maghampak sa ila, mapukan sila.”¹³

Sinsero nga nagalaum ang mga lider sang Simbahan nga ang dako nga renobasyon sang Templo sang Salt Lake magaamot sa katumanan sang handum ni Brigham Young nga makita ang “templo nga ginpatindog sa paagi nga magalampuwas ini sa milenya.” Sa magaabot nga tinuig, kabay nga ang ining mga pagpanami nga aton himuon sa Templo sang Salt Lake makatandog kag makainspirar sa aton, bilang mga indibidwal kag nga pamilya, agud nga kita man—sa pagpaanggid—“mapatindog sa paagi nga magalampuwas sa tunga sang milenya.”

Mahimo naton ini samtang ginatuman naton ang sugo ni Apostoles Pablo nga “[magtigana] sa [aton kaugalingon] sing maayong [pundasyon] sa palaabuton, nga [kita] magpanguyat sa kabuhi nga [wala katapusan].”¹⁴ Hugot ko nga ginapangamuyo nga ang aton espirituhanon nga pundasyon mangin sigurado kag indi maidog, nga ang aton panaksihon sang Pagbayad-Sala ni Jesucristo kag sa Iya papel bilang aton Manluluwas kag Manunubos mangin para sa aton ang aton mismo pangulo nga pundasyon nga bato.