Nagauna Sia sa Aton
Ang Ginuo nagapanguna sa Pagpanumbalik sang Iya ebanghelyo kag sa Iya Simbahan. Nahibal-an Niya sing perpekto ang palaabuton. Ginaagda Niya kamo sa buluhaton.
Pinalangga ko nga mga utod, nagapasalamat ako nga makaupod kamo sa sining pangkabilogan nga komperensya sang Ang Simbahan ni Jesucristo sang mga Santos sa Ulihing mga Adlaw. Sa iya pangagda nga hunahunaon ang paagi nga ang Pagpanumbalik sang Ginuo sang Iya Simbahan sa sining katapusan nga dispensasyon nagbugay sa aton kag sa aton mga pinalangga, si Pangulong Russel M. Nelson nagpromisa nga ang aton eksperiyensya indi lang mangin halandumon kundi indi gid malimtan.
Ang akon eksperiyensya nangin halandumon, pareho nga sigurado ako ang inyo amo man. Kon bala mangin indi ini malimtan nagadepende sa tagsa sa aton. Importante ina sa akon kay ang eksperiyensya sang paghanda para sining komperensya nagbag-o sa akon sa paagi nga luyag ko magpabilin. Tugoti ako nga magpaathag.
Ang akon pagpanghanda nagdala sa akon sa rekord sang isa ka hitabo sa Pagpanumbalik. Nabasahan ko na ang parte sa ina nga hitabo sing pila ka beses, pero pirme para sa akon, report ini sang isa ka importante nga miting nga nagalakip kay Joseph Smith, ang propeta sang Pagpanumbalik. Pero sa sini nga tion nakita ko sa rekord kon paano ang Ginuo nagapanguna sa aton, nga Iya mga disipulo, sa Iya Simbahan. Nakita ko ang kahulugan para sa aton nga mga tawo nga pangunahan sang Manluluwas sang kalibutan, ang Tagtuga—nga nakahibalo sang tanan nga butang, sang nagligad, sa karon, kag sa palaabuton. Ginatudloan Niya kita sing amat-amat kag ginagiyahan kita, nga wala nagapamilit.
Ang miting nga akon ginalaragway importante nga punto sa Pagpanumbalik. Isa ato ka miting sa Adlaw nga Inugpahuway nga ginhiwat sang Abril 3, 1836, sa Templo sang Kirtland sa Ohio, pito ka adlaw pagkatapos ini gindedikar. Ginlaragway ni Joseph Smith ining dako nga tion sa kasaysayan sang kalibutan sa simple nga paagi. Kalabanan sang iya panaysayon narekord sa Doktrina kag mga Kasugtanan seksyon 110:
“Pagkahapon, ginbuligan ko ang iban nga Pangulo sa pagpanagtag sang Panihapon sang Ginuo sa mga miyembro sang Simbahan pagkabaton sini halin sa Dose nga amo ang may pribilihiyo sa paghikot sa sagrado nga lamesa sini nga adlaw. Pagkatapos nga mahikot ining pag-alagad sa akon mga kauturan, nagkadto ako sa pulpito nga napapanaog na ang mga kurtina, kag nagluhod upod ni Oliver Cowdery sa hugot kag mahipos nga pagpangamuyo. Sa pagtindog tapos sang pagpangamuyo, ginpakita ang masunod nga panan-awon sa amon nga duha.”1
“Ginkakas ang belo sa amon mga panghunahuna, kag nabuksan ang mga mata sang amon paghangop.
“Ang Ginuo nakita namon nga nagatindog sa halambuyan sang pulpito sa atubang namon; kag sa idalom sang iya mga tiil may yara sang daw nabanigan sang puraw nga bulawan nga ang kolor daw nagabaga nga metal.
“Ang iya mga mata pareho sang dabadaba sang kalayo; ang buhok sa iya ulo puti pareho sang puraw nga niyebe; ang iya nawong nagasilak labaw pa sa kasanag sang adlaw; kag ang iya tingug pareho sang tunog sang daganas sang dalagko nga mga katubigan, bisan pa ang tingug ni Jehova nga nagasiling:
“Ako ang una kag ang katapusan; ako sia nga nagakabuhi, ako sia nga napatay; ako ang inyo mananabang sa Amay.
“Tan-awa, napatawad na ang inyo mga sala; matinlo na kamo sa akon atubang; gani, ibayaw ang inyo mga ulo kag magkasadya.
“Papangalipaya ang mga tagipusuon sang inyo mga kauturan, kag papangalipaya ang mga tagipusuon sang tanan ko nga katawhan nga nagtukod sining balay sa akon ngalan sa ila bug-os nga ikasarang.
“Kay tan-awa, ginbaton ko ining balay, kag magapabilin diri ang akon ngalan; kag magapakita ako sa akon katawhan sa kaluoy sa sining balay.
“Huo, magapakita ako sa akon mga alagad, kag magahambal sa ila sa akon kaugalingon nga tingug kon tumanon sang akon katawhan ang akon mga kasugoan, kag indi paghigkoan ining balaan nga balay.
“Huo magakalipay sing tuman ang mga tagipusuon sing linibo kag napulo ka linibo bangod sang mga bugay nga igabubo, kag sang endowment nga nahatag sa akon mga alagad sa sining balay.
“Kag ang kabantug sining balay magalapta sa iban nga lugar; kag ini ang pagsugod sang bugay nga igabubo sa mga ulo sang akon katawhan. Kag gani amo sini. Amen.
“Pagkatapos sining panan-awon, nabuksan liwat ang kalangitan sa amon; kag nagpakita si Moises sa amon, kag gintugyan sa amon ang mga yabi sang pagtipon sang Israel halin sa apat ka bahin sang kalibutan, kag sang pagpanguna sing napulo ka tribo halin sa duta sa norte.
“Pagkatapos sini, nagpakita si Elias, kag gintugyan ang dispensasyon sang ebanghelyo ni Abraham nga nagasiling: Paagi sa amon kag sa amon kaliwat pagapakamaayohon ang tanan nga henerasyon nga magasunod pa sa amon.
“Pagkatapos sining panan-awon, isa pa ka dako kag mahimayaon nga panan-awon ang nag-abot sa amon; kay si Elijah nga propeta nga gindala sa langit nga wala makatilaw sang kamatayon nagtindog sa atubang namon, kag nagsiling:
“Tan-awa, nag-abot na gid ang tion nga ginhambal paagi sa baba ni Malaquias—nga nagapamatuod nga dapat ipadala sia [Elijah] antes mag-abot ang dako kag makahaladlok nga adlaw sang Ginuo—
“Agud lisuon ang mga tagipusuon sang mga amay sa mga anak, kag ang mga anak sa mga amay, indi gani pagasakiton ang bilog nga duta sang sumpa—
“Gani, ang mga yabi sining dispensasyon gintugyan sa inyo mga kamot; kag paagi sini mahibaloan ninyo nga malapit na ang dako kag makahaladlok nga adlaw sang Ginuo nga yara na sa mga puwertahan.”2
Karon, nabasa ko na inang panaysayon sing madamo nga beses. Ginpamatud-an sang Balaan nga Espiritu sa akon nga ang panaysayon matuod. Pero sa akon pagtuon kag paghanda para sa sining komperensya, nakita ko sing mas klaro ang gahum sang Ginuo sa maid-id nga pagpanguna sa Iya mga disipulo sa Iya buluhaton.
Pito ka tuig antes gintugyan ni Moises kay Joseph ang mga yabi sang pagtipon sang Israel sa Templo sang Kirtland, “Natun-an ni Joseph sa tig-ulo nga pahina sang Libro ni Mormon nga ang katuyuan sini amo nga ‘[ipakita] sa mga salin sang panimalay sang Israel … nga ila mahibal-an ang mga kasugtanan sang Ginuo, nga wala sila pag-isikway sa walay katubtuban.’ Sang 1831, Ang Ginuo nagsiling kay Joseph nga ang pagtipon sang Israel magasugod sa Kirtland, ‘Kag halin didto [Kirtland], kon sin-o man ang pilion ko, magalakat sa tanan nga nasyon … kay ang Israel pagaluwason, kag giyahan ko sila.’”3
Bisan pa nga ang pangmisyonaryo nga buluhaton kinahanglan sa pagtipon sang Israel, ang Ginuo nag-inspirar sa Iya mga lider nga tudloan ang Dose, nga nangin pila sang aton una nga mga misyonero, “Dumduma, indi kamo dapat maglakat sa iban nga nasyon tubtob mabaton ninyo ang inyo endowment.”4
Daw importante gid ang Templo sang Kirtland sa amat-amat nga plano sang Ginuo sa indi magkubos sa duha ka rason: Una, si Moises naghulat tubtob ang templo mahuman agud ipanumbalik ang mga yabi sang pagtipon sang Israel. Kag ika-duha, si Pangulong Joseph Fielding Smith nagpanudlo nga “ang Ginuo nagsugo sa mga Santos sa pagtukod sang templo [ang Templo sang Kirtland] sa diin mapahayag niya ang mga yabi sang awtoridad kag sa diin ang mga apostoles sarang maendow kag mahanda sa pagpanapas sa iya ulubasan sa katapusan nga tion.”5 Bisan pa nga ang endowment sa templo sa pagkahibalo naton sa subong wala ginhatag sa Templo sang Kirtland, bilang katumanan sang propesiya, ginsugdan didto ang paghatag sang nagapanghanda nga mga ordinansa, upod ang pagbubo sang espirituhanon nga mga pagpahayag nga nagpabakod sadtong mga gintawag sa misyon upod ang ginpromisa nga paghatag sang “gahum halin sa kahitaasan”6 nga nagresulta sa dako nga pagtipon paagi sa pangmisyonaryo nga pag-alagad.
Pagkatapos nga ang mga yabi sang pagtipon sang Israel ginhatag kay Joseph, ang Ginuo nag-inspirar sang Propeta sa pagpadala sang mga miyembro sang Dose sa misyon. Sang nagatuon ako, nangin klaro sa akon nga ang Ginuo maid-id nga naghanda sang paagi para sa Dose nga maglakat sa mga misyon sa luwas sa diin ang mga tawo nahanda sa pagpati kag pagsakdag sa ila. Sa nagakaigo nga tion, linibo ang, paagi sa ila, pagadalhon sa ginpanumbalik nga Simbahan sang Ginuo.
Suno sa aton mga rekord, ginabulobanta nga 7,500 tubtob 8,000 ang ginbunyagan sa tion sang duha ka misyon sang Dose sa mga Isla sang Britanya. Ini ang nagpahamtang sang pundasyon sang pang-misyonaryo nga buluhaton sa Europa. Sa paghingapos sang ika-19 nga siglo, mga 90,000 ang nagtipon sa Amerika, nga ang kalabanan sini naghalin sa mga Isla sang Britanya kag Scandinavia.7 Ang Ginuo nag-inspirar kay Joseph kag sa matutom nga mga misyonero nga nagpangabudlay agud matigayon ang ani nga ayhan, sa amo nga tion, sobra sangsa ila masarangan. Apang ang Ginuo, sa Iya perpekto nga panan-aw kag pagpanghanda, naghimo sini nga posible.
Sigurado nga madumduman ninyo ang simple kag halos mabinalaybayon nga lengguahe sa seksyon 110 sang Doktrina kag mga Kasugtanan:
“Tan-awa, nag-abot na gid ang tion nga ginhambal paagi sa baba ni Malaquias—nga nagapamatuod nga dapat ipadala sia [Elias] antes mag-abot ang dako kag makahaladlok nga adlaw sang Ginuo—
“Agud lisuon ang mga tagipusuon sang mga amay sa mga anak, kag ang mga anak sa mga amay, indi gani pagasakiton ang bilog nga duta sang sumpa—
“Gani, ang mga yabi sining dispensasyon gintugyan sa inyo mga kamot; kag paagi sini mahibaloan ninyo nga malapit na ang dako kag makahaladlok nga adlaw sang Ginuo nga yara na sa mga puwertahan.”8
Nagapamatuod ako nga ang Ginuo nakakita sing malayo sa palaabuton kag kon paano Niya kita pangunahan agud buligan Sia nga matuman ang Iya mga katuyoan sa katapusan nga mga adlaw.
Sang nagaalagad ako sa Nagapamuno nga Bishopric madamo nga tinuig na ang nagligad, ginsugo ako sa pagtatap sang grupo sa design kag development nga naghimo sang ginatawag naton karon nga FamilySearch. Mahinalungon ako sa pagsiling nga “gintatap” ko ang paghimo sini sangsa magsiling nga “gindumalahan” ko ini. Madamo nga maalam nga mga tawo ang nagbiya sang mga karera kag nagkari sa pagtukod sang kon ano nga gusto sang Ginuo.
Ang Unang Panguluhan nagpahamtang sang katuyoan nga buhinan ang pagdinoble sang mga ordinansa. Ang ila dako nga palaligban amo nga indi mahibal-an kon bala ang mga ordinansa sang isa ka tawo nahimo na. Sa mga tinuig—ukon daw mga tinuig—ang Unang Panguluhan nagpamangkot sa akon, “San-o mo ini mapatapos?”
Upod sang pangamuyo, katutom, kag personal nga pagsakripisyo sang mga tawo nga may dalayawon nga mga abilidad, ang buluhaton natapos. Nag-abot ini sing amat-amat. Ang una nga buluhaton amo ang paghimo sang FamilySearch nga mahapos gamiton sinang mga indi sagad sa computer. Madamo pa nga mga pagbag-o ang nag-abot, kag nahibal-an ko nga magapadayon ang mga ini sa pag-abot, kay kon san-o nga nagasulong kita sa pagsolbar sang isa ka inspirado nga problema, ginabuksan naton ang puertahan sa dugang nga rebelasyon sa pag-uswag nga di-magkubos sa kaimportante apang indi pa makit-an. Bisan sa karon, ang FamilySearch nagauswag nga mangin kon ano ang kinahanglanon sang Ginuo para sa isa ka bahin sang Iya Pagpanumbalik—kag indi lang sa paglikaw sang pagdinoble sang mga ordinansa.
Ginatugotan kita sang Ginuo sa paghimo sang mga pag-uswag agud buligan ang mga tawo nga makabatyag sang kalapit kag bisan pa gani pagpalangga sa ila mga katigulangan kag kumpletohon ang ila mga ordinansa sa templo. Karon, pareho sa nahibal-an sang Ginuo nga sigurado matabo, ang mga lamharon na karon ang nangin mga manunudlo sang kompyuter sa ila mga ginikanan kag mga miyembro sa ward. Ang tanan nakasalapo sing dako nga kalipay sa sining pag-alagad.
Ang Espiritu ni Elijah nagabag-o sang mga tagipusuon sang mga hubin kag mga tigulang, kabataan kag mga ginikanan, mga kaapuhan kag mga kalolohan. Ang mga templo malapit na lang nga mag-iskedyul liwat sang mga oportunidad sa pagbunyag kag iban pa nga sagrado nga mga ordinansa. Ang handum nga mag-alagad sa aton mga katigulangan kag ang paghugpong sang mga ginikanan kag kabataan nagatubo.
Nakita sang Ginuo ang pag-abot sini tanan. Ginplanohan Niya ini, sing amat-amat, pareho sang Iya na nahimo sa iban nga mga pagbag-o sa Iya Simbahan. Gintatap Niya kag ginhanda ang matutom nga mga tawo nga nagapili nga maghimo sang mabudlay nga mga butang sing maayo. Mapinalanggaon nga pasensyoso Sia pirme sa pagbulig sa aton nga makatuon “dinalan sa dinalan, pagsulundan sa pagsulundan, diutay diri kag diutay didto.”9 Malig-on sia sa tiyempo kag pasunod sang Iya mga katuyoan, pero ginasiguro Niya nga ang sakripisyo sa masami nagadala sang nagapadayon nga mga bugay nga wala naton napanan-aw.
Magatakop ako sa pagpahayag sang akon kapasalamatan sa Ginuo—Sia nga nag-inspirar kay Pangulong Nelson nga agdahon ako nga maghimo sang sakripisyo sa paghanda para sining komperensya. Tagsa kag oras kag tagsa ka pangamuyo sa tion sang akon paghanda nagdala sang bugay.
Ginaagda ko ang tanan nga makabati sining mensahe ukon makabasa sining mga pulong nga magtuo nga ang Ginuo nagapanguna sa Pagpanumbalik sang Iya ebanghelyo kag Iya Simbahan. Nagauna Sia sa aton. Nahibal-an Niya sing perpekto ang palaabuton. Ginaagda Niya kamo sa buluhaton. Ginaupdan Niya kamo sa sini. May plano Sia nga ginpahamtang para sa inyo pag-alagad. Kag bisan pa nga nagasakripisyo kamo, makabatyag kamo sang kalipay samtang nagabulig kamo sa iban nga magtindog agud mangin handa para sa Iya pagkari.
Nagapamatuod ako sa inyo nga ang Dios nga Amay buhi. Si Jesus amo ang Cristo! Iya ini Simbahan. Kilala kag palangga Niya kamo. Ginagiyahan Niya kamo. Ginhanda Niya ang alagyan para sa inyo. Sa sagrado nga ngalan ni Jesucristo, amen.