Magkari kay Cristo—Pagpangabuhi bilang mga Santos sa Ulihing mga Adlaw
Makahimo kita sang mabudlay nga mga butang kag makabulig sa iban nga maghimo sang amo man, tungod nakahibalo kita kon kay sin-o kita makasalig.
Salamat, Elder Soares, para sa imo mabaskog kag mapanagnaon nga testimonya parte sa Libro ni Mormon. Sining ulihi lang, nakaangkon ako sing pinasahi nga oportunidad sa pag-uyat sang isa ka pahina sang orihinal nga manuskrito sang Libro ni Mormon. Sa sining partikular nga pahina, sa una nga tion sa sining dispensasyon, ining maisog nga mga pulong ni Nefi nasulat: “Malakat ako kag himuon ang mga butang nga ginasugo sang Ginuo, kay nahibal-an ko nga ang Ginuo wala nagahatag sing mga kasuguan sa mga anak sang tawo, luwas nga magahanda sia sang paagi para sa ila agud mahimo nila ang butang nga iya ginasugo sa ila.”1
Samtang ginauyatan ko ining pahina, napuno ako sang dako nga pagpasalamat para sa mga paghimud-os sang 23 anyos nga si Joseph Smith, nga naglubad sang Libro ni Mormon paagi sa “hiyas kag gahum sang Dios”2 Nagapasalamat man ako sa mga pulong sang lamharon nga Nefi, nga ginsugo sa paghikot sing tuman kabudlay nga buluhaton sa pagkuha sang mga lamina nga saway halin kay Laban.
Si Nefi nakahibalo nga kon padayon sia nga magtutok sa Ginuo, magmangin madinalag-on sia sa pagtuman sang ginsugo sang Ginuo sa iya. Nagpabilin sia nga nakatutok sa Manluluwas sa bilog niya nga kabuhi bisan pa nag-eksperiyensya sia sang mga tentasyon, pisikal nga mga pagtilaw, kag bisan pagluib sing pila sa iya malapit nga pamilya.
Si Nefi nakahibalo kon kay sin-o sia makasalig.3 Wala madugay pagkatapos sang iya pagtuaw, “O kailo ako nga tawo! Huo, ang akon tagipusuon nagakasubo tungod sang akon unod,”4 si Nefi nagsiling, “Ang akon Dios amo ang akon tagsakdag; gintuytuyan niya ako sa tunga sang akon mga kapipit-an sa kamingawan; kag iya ako gin-amligan sa mga tubig sang dako nga kadadalman.”5
Bilang mga sumulunod ni Cristo, indi kita makalikaw sa mga hangkat kag mga pagtilaw sa aton mga kabuhi. Masami kita nga obligado sa paghimo sang mabudlay nga mga butang nga, kon tilawan nga isahanaon, mangin makahalawhaw kag basi imposible pa. Kon batunon naton ang pangagda sang Manluluwas nga “magkari sa akon,”6 ihatag Niya ang suporta, kasulhayan, kag paghidaet nga kinahanglanon, pareho sa Iya ginhimo para kay Nefi kag Joseph. Bisan pa sa aton pinakadako nga mga pagtilaw, mabatyagan naton ang mainit nga paghakos sang Iya gugma kon magsalig kita sa Iya kag magbaton sang Iya pagbuot. Maeksperiyensyahan naton ang kalipay nga gintigana para sa Iya tampad nga mga disipulo, kay “si Cristo ang kalipay.”7
Sang 2014, samtang nagaalagad sa full-time nga misyon, ang amon pamilya nakaeksperiyensya sang wala ginapaabot nga hitabo. Samtang nagadulhog sa bungyod sa iya skateboard, ang amon agot nga bata nga lalaki natumba kag nag-agom sang malubha nga samad sa iya utok. Samtang nagalala ang iya sitwasyon, ginhingagaw sia sang mga mediko nga maoperahan.
Nagluhod ang amon pamilya sa salog sang bakante nga kuwarto sang ospital, kag ginbubo namon ang amon tagipusuon sa Dios. Sa tunga sining makalilibog kag masakit nga tion, napuno kami sang gugma kag paghidaet sang aton Amay nga Langitnon.
Wala kami nakahibalo kon ano ang matabo sa ulihi ukon kon makita pa namon nga buhi ang amon bata. Nakahibalo kami sing maathag nga ang iya kabuhi yara sa mga kamot sang Dios kag ang mga resulta, gikan sa wala katapusan nga panan-aw, mangin maayo para sa iya kag sa amon. Paagi sa dulot sang Espiritu, handa gid kami sa pagbaton sing bisan ano nga resulta.
Indi yadto mahapos! Ang aksidente nagresulta sa duha ka bulan nga pagtiner sa ospital samtang nagapangulo kami sa kapin 400 ka full-time nga misyonero. Ang amon bata nakaeksperiyensya sang dako nga pagkadula sang memorya. Ang iya pag-ayo naglakip sang malawig kag mabudlay nga pisikal, paghambal kag occupational nga mga terapiya. Ang mga hangkat nagpabilin, pero sang ulihi nakasaksi kami sang milagro.
Nahangpan namon sing maathag nga indi tanan nga pagtilaw nga aton ginaatubang magaresulta sa gusto naton. Apang, kon padayon kita nga nakatutok kay Cristo, makabatyag kita sang paghidaet kag makita naton ang mga milagro sang Dios, kon ano man ini, sa Iya tion kag sa Iya paagi.
May mangin mga tinion nga indi kita makakita sang bisan ano nga paagi nga ang karon nga sitwasyon magatapos sing maayo kag mahimo pa nga magpabutyag, pareho kay Nefi, “Ang akon tagipusuon nagakasubo tungod sang akon unod.”8 Mahimo nga may mga tinion nga ang aton gid lang paglaum amo ang yara kay Jesucristo. Daw ano nga bendisyon nga maangkon ang ina nga paglaum kag pagsalig sa Iya. Si Cristo amo ang pirme magatuman sang Iya mga promisa. Ang iya kapahuwayan nasiguro sa tanan nga magakari sa Iya.9
Ang aton mga lider luyag gid nga ang tanan makabatyag sang paghidaet kag kasulhay nga resulta sang pagsalig kag pagtutok sa Manluluwas nga si Jesucristo.
Ang aton buhi nga propeta, nga si Pangulong Russell M. Nelson, nagapahayag sang panan-awon sang Ginuo para sa kalibutan kag sa mga miyembro sang Simbahan ni Cristo: “Ang amon mensahe sa kalibutan simple lang kag sinsero: ginaagda namon ang tanan nga mga anak sang Dios sa duha ka bahin sang belo nga magkari sa ila Manluluwas, magbaton sang mga pagpakamaayo sang balaan nga templo, mag-angkon sang nagapadayon nga kalipay, kag magkaangay sa kabuhi nga wala katapusan.”10
Ini nga pangagda nga “magkari kay Cristo” may pat-od nga mga implikasyon para sa mga Santos sa Ulihing mga Adlaw.11 Bilang mga miyembro sang Simbahan sang Manluluwas, naghimo kita sang mga kasugtanan upod sa Iya kag nangin Iya espirituhanon nga inanak nga mga anak nga lalaki kag babayi.12 Ginhatagan man kita sang oportunidad nga magpangabudlay upod sa Ginuo sa pag-agda sa iban nga magkari sa Iya.
Kon magpangabudlay kita upod kay Cristo, ang aton bug-os nga pagpanikasog dapat yara sa sulod sang aton mismo mga puluy-an. May mangin mga tinion nga ang mga miyembro sang pamilya kag suod nga mga abyan magaatubang sang mga hangkat. Ang mga tingug sang kalibutan, kag siguro ang ila kaugalingon nga mga handum, mahimo magtulod sa ila nga duhaduhaan ang kamatuoran. Dapat himuon naton ang tanan nga aton masarangan agud buligan sila nga mabatyagan ang gugma sang Manluluwas kag aton pagpalangga. Madumduman ko ang bersikulo sa balaan nga kasulatan nga nangin aton pinalangga nga himno “Maghigugmaanay (Love One Another)” nga nagatudlo sa aton, “Sa sini … mabal-an sang mga tawo … nga kamo akon mga disipulo, kon nagahigugmaanay kamo.”13
Sa aton pagpalangga sang mga nagaduhaduha sang kamatuoran, ang kaaway sang tanan nga kalipay mahimo magpabatyag sa aton nga ginaluiban naton ang aton ginapalangga kon kita mismo padayon nga magpangabuhi sang kabug-osan sang ebanghelyo kag magtudlo sang iya sini mga kamatuoran.
Ang aton ikasarang sa pagbulig sa iban sa pagkari kay Cristo ukon pagbalik kay Cristo nasandig sing dako sa ehemplo nga aton ginapakita paagi sa aton kaugalingon nga personal nga pangako nga magpabilin sa banas sang kasugtanan.
Kon ang aton matuod-tuod nga handum amo ang luwason inang aton ginapalangga, kita mismo kinahanglan magpabilin sing malig-on kay Cristo paagi sa paghakos sang Iya Simbahan kag sang kabug-osan sang Iya ebanghelyo.
Sa pagbalik sa istorya ni Nefi, nakahibalo kita nga ang kahanda ni Nefi sa pagsalig sa Ginuo naimpluwensyahan sang kahanda sang iya mga ginikanan sa pagsalig sa Ginuo kag sa ila halimbawa sang ila pagtipig sang mga kasugtanan. Matahum ini nga ginapakita sa panan-awon ni Lehi sang kahoy sang kabuhi. Pagkatapos nga mag-ambit sang matam-is kag makapalipay nga prutas sang kahoy, si Lehi “nagpanghulong-hulong sa palibot, agud basi masalapuan [niya] man ang [iya] panimalay.”14 Nakita niya si Sarai, Sam, kag Nefi nga nagatindog “nga daw wala makahibalo kon diin sila dapat magpadulong.”15 Si Lehi dayon nagsiling, “Ginpaypay ko sila; kag gintawag ko man sila sa isa ka matunog nga tingug nga magpalapit sila sa akon, kag magkaon sang bunga.”16 Palihog tandai nga si Lehi wala nagbiya sang kahoy sang kabuhi. Nagpabilin sia sing espirituhanon upod sa Ginuo kag nag-agda sang iya pamilya nga magkadto sa kon sa diin sia magaambit sang prutas.
Ang kaaway nagasulay sang iban nga bayaan ang kalipay sang ebanghelyo paagi sa pagseparar sang mga pinanudlo ni Cristo sa Iya Simbahan. Ginapapati niya kita nga makapabilin kita sing malig-on sa banas sang kasugtanan nga kita lang, paagi sa aton kaugalingon nga espirituwalidad, nga wala nagasandig sa Iya Simbahan.
Sa sining ulihing mga adlaw, ang Simbahan ni Cristo ginpanumbalik agud buligan ang mga anak sang kasugtanan ni Cristo nga magpabilin sa banas sang Iya kasugtanan.
Sa Doktrina kag mga Kasugtanan mabasa naton, “Tan-awa, ini ang akon doktrina—kon sin-o man ang maghinulsol kag magkari sa akon, ang amo man naisip sa akon simbahan.”17
Paagi sa Simbahan ni Cristo, ginapabakod kita paagi sa aton mga eksperiyensya bilang isa ka komunidad sang mga Santos. Mabatian naton ang Iya tingug paagi sa Iya mga propeta, mga manugpanan-aw, kag mga manugpahayag sang rebelasyon. Labing importante, paagi sa Iya Simbahan ginahatagan kita sang tanan nga kinahanglanon nga mga bugay sang Pagbayad-Sala ni Cristo nga sarang lamang mabaton paagi sa pagpartisipar sa sagrado nga mga ordinansa.
Ang Simbahan ni Jesucristo sang mga Santos sa Ulihing mga Adlaw amo ang Simbahan ni Cristo sa duta, nga ginpanumbalik sa sining ulihing mga adlaw para sa kaayohan sang tanan nga anak sang Dios.
Nagapamatuod ako nga kon kita magkari kay Cristo kag magpangabuhi bilang mga Santos sa Ulihing mga Adlaw, pagabugayan kita nga may dugang sang Iya gugma, Iya kalipay, kag Iya paghidaet. Pareho kay Nefi, makahimo kita sang mabudlay nga mga butang kag makabulig sa iban nga maghimo sang amo man, tungod nakahibalo kita kon kay sin-o kita makasalig.18 Si Cristo ang aton kasanag, ang aton kabuhi, kag ang aton kaluwasan.19 Sa ngalan ni Jesucristo, amen.