2:3

Labi Kadungganon nga Calling

Ni Joy D. Jones

Pangkabilogan nga Pangulo sang Primary

Bilang mga babayi sang pagtuo, sarang naton gamiton ang mga prinsipyo sang kamatuoran sa mga eksperiyensya sang Propetang Joseph Smith nga nagahatag sang giya sa pagbaton sang aton kaugalingon nga rebelasyon.

Nagapasalamat ako nga magtutok sa paghambal karon parte sa nagapadayon nga mga buluhaton sang kababayin-an sa Pagpanumbalik. Maathag nga sa bilog nga kasaysayan ang mga babayi may pinasahi nga lugar sa plano sang aton Amay nga Langitnon. Si Pangulong Russell M. Nelson nagtudlo, “Mangin imposible takson ang impluwensya sang … kababayin-an, indi lamang sa mga pamilya kundi sa Simbahan man sang Ginuo, bilang mga asawa, iloy, kag mga lola; bilang mga utod kag tiya; bilang mga titser kag lider; kag ilabi na bilang mga halimbawa kag debotado nga mga tagpangapin sang pagtuo.” ¹

Sang bag-o pa ang Relief Society sa Nauvoo, 178 katuig na ang nagligad, si Propetang Joseph Smith naglaygay sa mga sister nga “magkabuhi suno sa [ila] pribelihiyo.” ² Ang ila ehemplo nagatudlo sa aton karon. Nagaisa nila nga ginsunod ang tingug sang propeta kag nagkabuhi nga may matutom nga pagtuo kay Jesucristo samtang nagabulig sila tukod sang pundasyon nga aton ginatindugan karon. Mga kauturan, aton naman tion. May diosnon kita nga tulumanon halin sa Dios, kag ang aton matinuohon, pinasahi nga mga kontribusyon importante.

Si Pangulong Spencer W. Kimball nagpaathag: “Ang mangin matarong nga babayi sa ulihing mga adlaw sa sining kalibutan, antes sang ikaduhang pagkari sang aton Manluluwas, isa ka labi kadungganon nga calling. Ang kusog kag impluwensya sang matarong nga babayi sa karon mahimo mangin pulo ka pilo sangsa mas malinong nga tinion.” ³

Nagpanawagan man si Pangulong Nelson: “Ginapangabay ko ang akon kauturan nga babayi [sa] Simbahan … nga mag-abante! Tindugi ang inyo husto kag kinahanglanon nga lugar sa inyo puluy-an, sa inyo komunidad, kag sa ginharian sang Dios—labi na subong sangsa nahimo na ninyo sadto.” ⁴

Sining nagligad lang, may pribelihiyo ako, upod ang isa ka grupo sang mga kabataan sa Primary, nga maatubang si Pangulong Russell M. Nelson sa replika sang balay sang mga Smith sa Palmyra, New York. Pamatii samtang nagatudlo ang aton pinalangga nga propeta sa kabataan sang kon ano ang ila mahimo para mag-abante.

1:55

Sister Jones: “Gusto ko mahibal-an kon may gusto kamo ipamangkot kay Pangulong Nelson. Nagapungko kamo karon upod sa propeta. May ara bala kamo sang gusto gid ipamangkot sa propeta? Sige, Pearl.”

Pearl: “Budlay bala mangin propeta? Sako ka bala tuod pirme?”

Pangulong Nelson: “Siyempre mabudlay. Ang magtinguha nga mangin mas pareho sa Manluluwas mabudlay. Halimbawa, sang ginhatag sang Dios ang Pulo ka Sugo kay Moises, diin Niya ginpakadto si Moises? Sa punta sa bukid, sa ibabaw sang Bukid Sinai. Gani naglakat si Moises pasaka sa punta sang ina nga bukid para kuhaon ang Pulo ka Sugo. Karon, pwede man magsiling ang Amay nga Langitnon, ‘Moises, dira ka sugod, kag diri ko masugod, kag kit-anay ta sa tunga-tunga.’ Indi, nanamian ang Ginuo sang pagtinguha, tungod ang pagtinguha nagadala sang mga premyo nga indi mag-abot kon wala ini. Halimbawa, nagatuon bala kamo mag-piano?”

Kabataan: “Huo.”

Pearl: “Nagatuon ako mag-violin.”

Pangulong Nelson: “Kag nagapraktis kamo?”

Kabataan: “Huo.”

Pangulong Nelson: “Ano ang matabo kon indi kamo magpraktis?”

Pearl: “Malipat ka.”

Pangulong Nelson: “Huo, kag indi ka magsagad, indi bala? Gani huo ang sabat, Pearl. Kinahanglan sang pagtinguha, pagpangabudlay, kapisan sa pagtuon, kag wala ini katapusan. Kanami! Kanami, kay pirme kita nagauswag. Bisan sa pihak nga kinabuhi nagauswag kita.”

Ang sabat ni Pangulong Nelson sa sining pinalangga nga mga kabataan para man sa tagsa sa aton. Nanamian ang Ginuo sang pagtinguha, kag ang pagtinguha nagadala sang mga premyo. Padayon kita nga magpraktis. Nagauswag kita pirme mientras nga nagatinguha kita nga sundon ang Ginuo. ⁵ Wala Sia nagapaabot nga perpekto dayon. Padayunon naton ang pagsaka sa aton personal nga Bukid Sinai. Pareho sang panahon sadto, ang aton pagpanglakaton nagakinahanglan sang pagtinguha, kapisan, kag pagtuon, apang ang aton katutom sa pagprogreso nagadala sang wala katapusan nga mga premyo. ⁶

Ano pa ang aton matun-an kay Propetang Joseph Smith kag sa Unang Palanan-awon parte sa pagtinguha, kapisan, kag pagtuon? Ang Unang Palanan-awon nagahatag sa aton sang direksyon sa aton pinasahi, nagapadayon nga buluhaton. Bilang mga babayi sang pagtuo, sarang naton gamiton ang mga prinsipyo sang kamatuoran sa mga eksperiyensya sang Propetang Joseph Smith nga nagahatag sang giya sa pagbaton sang aton kaugalingon nga rebelasyon. Halimbawa:

Nagatrabaho kita sa tunga sang mga kabudlayan.
Nagaliso kita sa balaan nga mga kasulatan sa pagbaton sang kaalam sa pag-akto.
Ginapakita naton ang aton pagtuo kag pagsalig sa Dios.
Ginabubo naton ang aton gahum sa pagpangabay sa Dios nga buligan kita nga tapnaon ang impluwensya sang kaaway.
Ginahalad naton ang mga handum sang aton tagipusuon sa Dios.
Nagatutok kita sa Iya kasanag nga nagagiya sa aton mga pagpili sa kabuhi kag nagaiwag sa aton kon magdangop kita sa Iya.
Nahibal-an naton nga kilala Niya ang kada isa sa aton sa ngalan kag may indibidwal nga mga tulumanon nga dapat tumanon. ⁷

Dugang pa, si Joseph Smith nagpanumbalik sang ihibalo nga kita may diosnon nga kapalaran kag wala katapusan nga bili. Bangud sinang relasyon sa aton Amay nga Langitnon, nagapati ako nga ginapaabot Niya nga magbaton kita sang rebelasyon halin sa Iya.

Gintulinan sang Ginuo si Emma Smith nga “pagabatunon ang Balaan nga Espiritu,” magtuon sing madamo, “ipahigad ang mga butang sining kalibutan, … pangitaon ang mga butang sang mas maayo nga kalibutan,” kag “magtuman sang [iya] mga kasugtanan” sa Dios. ⁸ Ang pagtuon importante sa pag-uswag, labi na nga ang dalayon nga pag-upod sang Balaan nga Espiritu nagatudlo sa aton kon ano ang dapat naton ipahigad—buot silingon inang makapalipat sa aton ukon magapadugay sang aton pag-uswag.

Si Pangulong Nelson nagsiling, “Ginapangabay ko kamo nga patubuon ang inyo espirituhanon nga ikasarang sa pagbaton sang rebelasyon.” ⁹ Dalayon ko nga upod ang mga pulong sang aton propeta samtang akon ginapanumdom ang ikasarang sang kababayin-an sa pag-abante. Nagapangabay sia sa aton, nga nagapakita nga ginadalian ini. Ginatudloan niya kita kon paano maglampuwas sa espirituhanon sa kalibutan nga balatianon-sa-sala paagi sa pagbaton kag pag-akto sa rebelasyon. ¹⁰ Kon himuon naton, ang pagtahod kag pagpangabuhi sang mga kasuguan sang Ginuo, ginapromisahan kita, pareho kay Emma Smith, sang “purung-purong sang pagkamatarong.” ¹¹ Si Propetang Joseph nagtudlo sang importansya sang paghibalo nga ang dalan nga aton ginalaktan sa sining kinabuhi aprubado sang Dios. Kon wala inang ihibalo, kita “magalapyo sa [aton] kaisipan, kag mapunaw.” ¹²

Sa sining komperensya, magapamati kita sang mga kamatuoran nga magainspirar sa aton nga magbag-o, mag-uswag, kag magtinlo sang aton mga kabuhi. Paagi sa personal nga rebelasyon, mapunggan naton ang ginatawag sang pila nga “pagkapunaw sa pangkabilogan nga komperensya”—kon nagapauli kita nga determinado nga himuon ini tanan subong. Madamo sang responsibilidad ang kababayin-an, pero imposible, kag indi kinahanglanon, nga himuon ini tanan sing dululungan. Ang Espiritu nagabulig sa aton nga hibaluon kon ano nga buluhaton ang tutokan sini nga adlaw. ¹³

Ang mapinalanggaon nga impluwensya sang Ginuo paagi sa Balaan nga Espiritu nagabulig sa aton nga mahibal-an ang Iya prayoridad sa aton pag-uswag. Ang pagsunod sa personal nga rebelasyon nagadul-ong sa personal nga pag-uswag. ¹⁴ Nagapamati kita kag nagagiho. ¹⁵ Ang Ginuo nagsiling, “Magpangayo sa Amay sa akon ngalan sa pagtuo, nga may pagpati nga mabaton ninyo, kag maangkon ninyo ang Balaan nga Espiritu, nga nagapahayag sang tanan nga butang nga kinahanglanon sa mga anak sang katawhan.” ¹⁶ Ang aton nagapadayon nga buluhaton amo ang magbaton sang nagapadayon nga rebelasyon.

Samtang nagataas ang aton abilidad sa paghimo sini, makabaton kita sang dugang nga gahum sa aton indibidwal nga mga buluhaton sa pagminister kag pagtuman sang buluhaton sang kaluwasan kag pagpahitaas—nga matuodtuod nga “ipahigad ang mga butang sining kalibutan, kag pangitaon ang mga butang sang mas maayo nga kalibutan.” ¹⁷ Dayon mas epektibo naton nga mainspirar ang aton ulihing-tubo nga himuon ang amo man.

Mga kauturan, tanan kita nagahandum sang gahum sang Dios sa aton mga kabuhi. ¹⁸ May matahum nga paghiliusa sa mga babayi kag lalaki sa pagpahanabo sang buluhaton sang Dios sa sini nga panahon. Mabaton naton ang gahum sang priesthood paagi sa mga kasugtanan, nga ginhimo una sa mga tubig ang pagbunyag kag dayon sa sulod sang mga dingding sang templo. ¹⁹ Si Pangulong Nelson nagtudlo sa aton, “Ang kada babayi kag kada lalaki nga nagahimo sang kasugtanan sa Dios kag nagatuman sining mga kasugtanan, kag nagapartisipar nga takos sa mga ordinansa sang priesthood, may direkta nga kinamatarong sa gahum sang Dios.” ²⁰

Ang personal ko nga pag-ako sini nga adlaw amo nga bilang babayi wala ko sadto pirme ginapanumdom nga ako makabaton, paagi sa akon mga kasugtanan, sang gahum sang priesthood. ²¹ Mga kauturan, kabay nga aton mahibal-an kag hatagan bili ang gahum sang priesthood samtang kita “nagauyat sa [aton] mga kasugtanan,” ²² nagapangabuhi sang kamatuoran sa balaan nga mga kasulatan, kag nagasunod sang mga pulong sang aton buhi nga mga propeta.

Maisog naton nga ideklara ang aton debosyon sa aton Amay nga Langitnon kag sa aton Manluluwas, “nga may di-mauyog nga pagtuo sa iya, nga nagasandig sing bug-os sa mga merito niya nga gamhanan sa pagluwas.” ²³ Magpadayon kita nga masinadyahon sa pagpanglakaton padulong sa aton pinakamataas nga espirituhanon nga ikasarang kag buligan ang ara sa aton palibot nga himuon ang amo man paagi sa pagpanguna, pagpalangga, serbisyo, kag kaluoy.

Si Elder James E. Talmage mapinalanggaon nga nagpahanumdom sa aton, “Ang pinakadako nga tagpangapin sang babayi kag pagkababayi amo si Jesus ang Cristo.” ²⁴ Sa katapusan nga sumada sang nagapadayon nga buluhaton sang kababayin-an sa Pagpanumbalik, kag sa aton tanan, ano nga buluhaton ang nagapangibabaw? Nagapamatuod ako nga ina amo ang magpamati sa Iya, ²⁵ magsunod sa Iya, ²⁶ magsalig sa Iya, ²⁷ kag ang mangin kasugpon sang Iya pagpalangga. ²⁸ Nahibal-an ko nga Sia buhi. ²⁹ Sa sagrado nga ngalan ni Jesucristo, amen.