Paano ang Priesthood Nagabugay sa mga Lamharon
Paagi sa priesthood, mahimo kita nga mapataas. Ang priesthood nagadala sang kasanag sa aton kalibutan.
Nagapasalamat ako nga ari ako diri. Sang nahibal-an ko nga may oportunidad ako nga maghambal sa inyo karon, nakabatyag ako sang kalangkag kag sa amo man sang pagpaubos. Ginpamensar ko sang maayo kon ano ang akon ihambal, kag kabay nga ang Espiritu magahambal sa inyo sing direkta paagi sa akon mensahe.
Sa Libro ni Mormon, ginhatagan ni Lehi sang bendisyon ang tagsa niya ka anak antes sia mapatay nga nagabulig sa ila nga makita ang ila mga kusog kag wala katapusan nga ikasarang. Ako ang agot sa walo ka kabataan, kag sang nagligad nga tuig ako na lang ang nabilin nga bata sa balay sa una nga tion. Nangin mabudlay sa akon nga wala sang utod nga malapit kag wala sing may maistorya pirme. May mga gab-i nga masubo ako kaayo. Nagapasalamat ako sa akon mga gininakan, nga nagtinguha gid nga buligan ako. Isa ka halimbawa sini sang nagtanyag ang akon tatay nga hatagan ako sang bendisyon sang priesthood para sa kaumpawan sa tion sang dako nga kabudlayan. Pagkatapos sang iya bendisyon, wala dayon nagliwat ang sitwasyon, pero nakabatyag ako sang kalinong kag pagpalangga halin sa akon Amay nga Langitnon kag halin sa akon tatay. Pamatyag ko maswerte ako nga may takos ako nga amay nga makahatag sang mga bendisyon sang priesthood sa tion nga kinahanglan ko kag nagabulig sa akon nga makita ang akon mga kusog kag wala katapusan nga ikasarang, pareho kay Lehi sang iya ginbendisyunan ang iya mga kabataan.
Bisan ano pa ang inyo mga sirkumstansya, mahimo kamo makaangkon pirme sang mga bugay sang priesthood. Paagi sa mga miyembro sang pamilya, mga abyan, mga ministering brother, mga lider sa priesthood, kag Amay nga Langitnon nga indi gid magpaslaw sa inyo, pwede kamo magbaton sang mga bugay sang priesthood. Si Elder Neil L. Andersen nagsiling: “Ang mga bugay sang priesthood labaw nga mas dako sangsa tawo nga ginpangabay sa paghatag sang bendisyon. … Kon kita takos, ang mga ordinansa sang priesthood magapauswag sang aton mga kabuhi.”1
Indi magduhaduha sa pagpangayo sang bendisyon kon kinahanglan ninyo sang dugang nga giya. Ara sa mabudlay naton nga tinion nga mas kinahanglan naton ang bulig sang Espiritu. Wala sang tawo nga perpekto, kag tanan kita nagaeksperiyensya sang mga kabudlayan. Ang pila sa aton mahimo nga magaantos sang kabalaka, depresyon, adiksyon, ukon mga pamatyagan nga indi kita bagay. Ang mga bendisyon sang priesthood makabulig sa aton nga malampuwasan ining mga kabudlayan kag makabaton sang kalinong samtang nagapadayon kita padulong sa palaabuton. Kabay nga tinguhaan naton nga magpangabuhi nga takos sa pagbaton sining mga bugay.
Isa pa ka paagi nga ginabugayan kita sang priesthood amo ang paagi sa mga patriarchal blessing. Nanuto ako nga basahon ang akon patriarchal blessing kon ginasuboan ako ukon nagaisahanon. Ginabuligan ako sini nga makita ang akon potensyal kag ang plano gid sang Dios para sa akon. Ginapasulhay ako sini kag ginabuligan nga makakita lampas sa akon dutan-on nga panan-awan. Ginapadumdom ako sini sang akon mga talento kag mga bugay nga akon mabaton kon magpangabuhi ako nga takos. Ginabuligan man ako sini nga madumdoman kag makabatyag sang kalinong nga ang Dios magasabat kag magabukas sang mga oportunidad para sa akon sa mismo tion nga kinahanglan ko gid ini.
Ang mga patriarchal blessing nagabulig handa sa aton nga magbalik sa pagpangabuhi upod sa aton Amay nga Langitnon. Nakahibalo ako nga ang mga patriarchal blessing naghalin sa Dios kag makabulig sa aton nga bayluhan ang aton mga kahuyang sang mga kusog. Indi ini mga mensahe halin sa mga manugpakot; ining mga bendisyon magatudlo sa aton kon ano ang aton kinahanglan mabatian. Daw pareho ini sang Liahona para sa kada isa sa aton. Kon unahon naton ang Dios kag mag-angkon sang pagtuo sa Iya, giyahan Niya kita sa aton kaugalingon nga mga kamingawan [wilderness].
Pareho sang ginbugayan sang Dios si Joseph Smith sang priesthood para nga ang mga bugay sang ebanghelyo mapanumbalik, makabaton man kita sang mga bugay sang ebanghelyo sa aton mga kabuhi paagi sa priesthood. Kada semana ginahatagan kita sang pribelihiyo kag oportunidad sa pag-ambit sang sakramento. Paagi sa sining ordinansa sang priesthood, sarang naton mabaton ang Espiritu sa pag-upod pirme sa aton, nga mahimo nga magtinlo kag maglimpyo sa aton. Kon pamatyag ninyo may kinahanglan kamo kakason sa inyo kabuhi, magpakig-angot sa isa ka sinaligan nga lider nga makabulig sa inyo nga maglakat sa husto nga dalan. Ang inyo mga lider makabulig sa inyo nga maangkon ang bug-os nga gahum sang Pagbayad-Sala ni Jesucristo.
Salamat sa priesthood, mahimo man naton mabaton ang mga bugay sang mga ordinansa sa templo. Sugod sang makasulod na ako sa templo, ginhimo ko nga tinutuyo kag prayoridad nga magkadto pirme. Sa paghatag tiyempo kag paghimo sang mga sakripisyo nga kinahanglanon para mangin mas malapit sa akon Amay nga Langitnon sa Iya balaan nga balay, ginbugayan ako paagi sa pagbaton sang mga rebelasyon kag mga pagpabatyag nga nakabulig gid sa akon sa bilog ko nga kabuhi.
Paagi sa priesthood, mahimo kita nga mapataas. Ang priesthood nagadala sang kasanag sa aton kalibutan. Si Elder Robert D. Hales nagsiling: “Kon wala ang gahum sang priesthood, ‘ang bilog nga duta lubos nga maguba’ (tan-awa sa D&K 2:1–3). Mangin wala sing kasanag, wala sing paglaum—kundi kadulom lamang.”2
Nagapamalakpak ang Dios para sa aton. Luyag Niya nga magbalik kita sa Iya. Kilala Niya kita sa personal. Kilala Niya kamo. Palangga Niya kita. Nakahibalo Sia parte sa aton kag ginabugayan kita bisan pa nga pamatyag naton indi kita takos sa mga ini. Nakahibalo Sia sang aton mga panginahanglan kag kon san-o naton ini kinahanglan.
“Pangayo, kag kamo hatagan; pangita, kag kamo makakita; panuktok, kag kamo pagabuksan:
“Kay ang tagsa-tagsa nga nagapangayo nagabaton; kag ang nagapangita makakita; kag ang nagapanuktok pagabuksan.”” (Mateo 7:7–8).
Kon wala pa kamo sang panaksihon parte sa priesthood, ginapaisog ko kamo sa pagpangamuyo kag pagpamangkot para mahibal-an ninyo sa inyo kaugalingon ang gahum sini, dayon basaha ang balaan nga mga kasulatan para mabatian ang mga pulong sang Dios. Nakahibalo ako nga kon tinguhaan naton nga eksperiyensyahon ang gahum sang priesthood sang Dios sa aton mga kabuhi, mabugayan kita. Sa ngalan ni Jesucristo, amen.