2:3

Makahulugan nga Espirituhanong mga Handurawan

Ni Elder Neil L. Andersen

Sang Korum sang Dose ka mga Apostoles

Kon ang personal nga mga kabudlayan ukon mga kondisyon sang kalibutan nga lampas sa aton kontrol nagapadulom sang aton alagyan, ang makahulugan nga espirituhanon nga mga handurawan gikan sa aton libro sang kabuhi kaangay sang nagabanaag nga mga bato nga nagabulig pasanag sang dalan sa unhan.

Deseotso ka tuig pagkatapos sang Unang Panan-awon, ang Propetang Joseph Smith nagsulat sang isa ka detalyado nga estorya sang iya inagihan. Nagpangatubang sia sang mga oposisyon, pagpanghingabot, pagpabudlay, mga pagpamahug, kag mapintas nga mga pagpang-atake.¹ Apang padayon sia nga maisog nga nagpamatuod sang iya Unang Panan-awon: “Matuod gid nga nakakita ako sang isa ka kasanag, kag sa tunga sinang kasanag nakakita ako sang duha ka mga Persona, kag sa pagkamatuod naghambal gid sila sa akon; kag bisan pa nga ginkaugtan ako kag ginhingabot sa pagsiling nga nakakita ako sang isa ka panan-awon, apang matuod ini. … Nahibaloan ko ini, kag nahibaloan ko nga nahibaloan ini sang Dios, kag indi ko ini mapanginwala.”²

Sa sining mabudlay nga mga tinion, ang pamensaron ni Joseph nagbalik sadtong mga nagkalatabo malapit duha ka dekada ang nagligad parte sa pagpalangga sang Dios sa iya kag sa mga hitabo nga naghanda sa kalibutan sa ginpropesiya nga Pagpanumbalik. Nga nagabinagbinag sang iya espirituhanon nga pagpanglakaton, siling ni Joseph: “Wala ako sang bisan isa nga ginabasol sa indi nila pagpati sa akon kasaysayan. Kon wala ko naagihan ang akon inagihan, ako mismo indi man kuntani makapati.”³

Apang ang mga inagihan matuodtuod, kag wala gid sia nalipat ukon nagpanginwala sang mga ini, mapinaubuson nga nagpamatuod sang iya testimonya sang nagsaylo sia sa Carthage. “Nagakadto ako pareho sang kordero sa ihawan,” siling niya, “apang kalmado ako pareho sang kaagahon sa tig-ilinit ang akon konsiyensya wala sang kalapasan sa Dios, kag sa mga tawo.”⁴

Ang Imo Makahulugan nga Espirituhanon nga mga Eksperiyensya

May leksyon para sa aton sa halimbawa sang Propetang si Joseph. Upod sa matawhay nga giya nga aton mabaton halin sa Balaan nga Espiritu, sa panalagsa, ang Dios gamhanan kag personal gid nga nagapasalig sa tagsa sa aton nga Sia nakakilala sa aton kag nagapalangga sa aton kag nga Sia pat-od kag bukas nga nagapakamaayo sa aton. Nian, sa aton mga tinion sang kabudlayan, ang Manluluwas nagabalik sining mga inagihan sa aton mga kaisipan.

Hunahunaa ang imo kaugalingon nga kabuhi. Sa mga tinuig, nakapamati ako sa linibo ka espirituhanon nga mga eksperiyensya gikan sa mga Santos sa Ulihing mga Adlaw sa bilog nga kalibutan, nga nagakumpirma sa akon nga wala sing bisan ano nga pagduhaduha nga ang Dios nakakilala kag nagapalangga sa tagsa sa aton kag may kalangkag Sia nga nagahandum nga magpahayag sang Iya kaugalingon sa aton. Ining mga inagihan mahimo mag-abot sa importante nga tinion sang aton mga kabuhi ukon sa primero sa pamatyag naton daw simple lang nga mga hitabo, apang sa masami may upod ang mga ini nga labi kabaskog nga espirituhanon nga pagkumpirma sang gugma sang Dios.

Ang pagpanumdum sining makahulugan nga espirituhanon nga mga inagihan nagapaluhod sa aton, nga nagapahayag pareho kay Propetang Joseph: “Ang akon nabaton halin sa langit. Nahibaloan ko ini, kag nahibaloan ko nga nakahibalo ang Dios nga nahibaloan ko ini.”⁵

Apat ka Mga Halimbawa

Binagbinaga ang imo kaugalingon nga makahulugan nga espirutuhanon nga mga handurawan samtang ginapaambit ko ang pila ka halimbawa halin sa iban.

Sang nagligad nga mga tinuig, isa ka gulang na nga patriarka sa stake nga may nagapalya nga mga balbula sa tagipusuon ang nagpakitluoy kay anay Dr. Russel M. Nelson nga magbulig, bisan pa nga sadto wala pa sing solusyon sa pag-opera sang may deperensya nga ikaduha nga balbula. Si Dr. Nelson sang ulihi nagpasugot nga sia ang maopera. Yari ang mga tinaga ni Pangulong Nelson:

“Pagkatapos nga makuha ang nagabara sa una nga balbula, ginbuksan namon ang ikaduha nga balbula. Nakita namon ini nga kumpleto apang naghabok gid sing maayo nga indi na ini makatrabaho sing husto. Samtang ginaeksamin ining balbula, isa ka mensahe ang maathag kaayo nga nagsulod sa akon hunahuna: Pagamayi ang kadakuon sang baba sang balbula. Ginpahayag ko ina nga mensahe sa akon kabulig. ‘Ang tisyu sang balbula mangin hustohan kon epektibo naton nga mapagamayan ang baba sang balbula sa normal sini nga takos.’

“Pero paano? … Isa ka larawan ang klaro ko nga nakita sa akon hunahuna, nga nagapakita kon paano tahion—pil-an dire kag isuok didto. … Akon pa sa gihapon madumduman ang imahe sa akon hunahuna—kumpleto nga may pintok-pintok nga mga linya kon sa diin dapat magaagi ang mga tahi. Ang pagkay-o natapos suno sa naplastar sa akon kaisipan. Gin-testingan namon ang balbula kag nakita nga dako kaayo ang gingamay sang tagas. Ang akon kabulig naghambal, ‘Isa ini ka milagaro.’”⁶ Ang patriarka nabuhi sa madamo pa nga tinuig.

Si Dr. Nelson gin-giyahan. Kag nahibaloan niya nga ang Dios nakahibalo nga nahibaloan niya nga sia gin-giyahan.

Ako kag si Kathy una nga nakilala si Beatrice Magré sa France 30 ka tuig ang nagligad. Sang sini lang naghambal si Beatrice sa akon parte sa iya inagihan nga nagpabaskog sang iya espirituhanon nga kabuhi pagkatapos gid lang sang iya bunyag bilang isa ka tin-edyer. Yari ang iya mga tinaga:

“Ang mga lamharon sa amon nga branch nagbiyahe upod ang ila mga lider sa Baybay sang Lacanau, isa ka oras kag tunga halin sa Bordeaux.

“Antes magpauli, isa sang mga lider ang nagdesisyon sa pagpaligo sa katapusan nga tion kag naglumpat sa mga balod nga nakaantepara. Sang magbutwa sia, ang iya antepara wala na. … Nadula ini sa kadagatan.

“Ang pagkadula sang iya antepara mangin kabangdanan nga indi na sia maka-drayb sang iya awto. Mahunong kami nga malayo sa amon puluy-an

“Isa ka sister nga puno sang pagtuo ang nagpanugyan nga mapangamuyo kami.

“Nagkumodkumod ako nga ang pangamuyo wala gid sang mabulig sa amon, kag na nagaalang-alang nga nag-upod ako sa grupo sa pagpangamuyo sing matunog samtang nagatindog kami sa malubog nga tubig nga tagahawak.

“Sang matapos ang pangamuyo, gin-untay ko ang akon mga butkon para basyahan ang kada isa. Samtang ginakutaw ko ang tubig, ang iya antepara nagtupa sa akon kamot. Isa ka mabaskog nga pamatyagan ang naglapos sa akon kalag nga ang Dios matuod nga nagapamati kag nagasabat sang aton mga pangamuyo.”⁷

Matapos ang kwarentay-singko ka tuig, nadumduman niya ini nga daw sa kahapon lang natabo. Ginbugayan si Beatrice, kag nahibaloan niya nga nakahibalo ang Dios nga nahibaloan niya nga sia ginpakamaayo.

Ang mga eksperiyensya nanday Pangulong Nelson kag Sister Magré layo kaayo, pero para sa ila nga duha, isa ka indi-malimtan nga makahulugan nga espirituhanon nga handurawan sang gugma sang Dios ang nagapabilin sa ila mga tagipusuon.

Ining makahulugan nga mga hitabo masami nga nagaabot sa pagtuon parte ginpanumbalik nga ebanghelyo ukon paagi sa pagpaambit sang ebanghelyo sa iban nga tawo.

Si Floripes Luzia Damasio kag si Neil L. Andersen

Ini nga larawan ginkuha sa São Paulo, Brazil, sang tuig 2004. Si Floripes Luzia Damasio sang Ipatinga Brazil Stake 114 anyos ang edad. Sa pag-istorya parte sa iya pagkahaylo, Si Sister Damasio nagsugid sa akon nga ang mga misyenero sa iya nga lugar naghatag sang bendisyon sang priesthood sa isa ka nagagrabe nga lapsag nga milagroso nga nag-ayo. Gusto niya nga makahibalo pa gid sing dugang. Samtang nagapangamuyo sia parte sa ila mensahe, isa ka indi-mapanginwala nga saksi sang Espiritu ang nagkumpirma sa iya nga si Joseph Smith isa ka propeta sang Dios. Sa edad nga 103, ginbunyagan sia, kag sa edad nga 104, nagbaton sia sang endowment. Sa tagsa ka tuig pagkatapos, nagabiyahe sia sing 14 ka oras sakay sa bus agud maghinguyang sang isa ka semana sa templo. Si Sister Damasio nakabaton sang langitnon nga kumpirmasyon, kag nahibaloan niya nga nakahibalo ang Dios nga nahibaloan niya nga ang saksi matuod.

Yari ang isa ka espirituhanon nga handurawan halin sa akon una nga misyon sa France 48 ka tuig na ang nagligad.

Samtang nagapamalaybalay, ako kag ang akon kaupod nagbilin sang Libro ni Mormon sa isa ka gulang na nga babayi. Sang pagbalik namon sa balay sang babayi mga isa ka semana ang nagligad, ginbuksan niya ang pwertahan. Antes pa nga may makahambal, akon nabatyagan ang isa ka matuodtuod nga espirituhanon nga gahum. Ang mabaskog nga mga balatyagon nagpadayon sang gin-agda kami ni Madam Alice Audubert nga magsulod kag ginsugiran kami nga ginbasa niya ang Libro ni Mormon kag iya nahibaloan nga matuod ini. Sang maghalin kami sa iya balay sina nga adlaw, nagpangamuyo ako, “Amay nga Langitnon, palihog, buligi ako nga indi ko gid malimtan ang akon nabatyagan sini gid lang.” Wala ko gid malimti.

Sa isa ka daw ordinaryo nga tion, sa isa ka pwertahan nga pareho sa ginatos kadamo nga iban pa, akon nabatyagan ang gahum sang langit. Kag nahibaloan ko nga nakahibalo ang Dios nga nahibaloan ko nga ang bintana sang langit ginbuksan.

Sing Indibidwal kag Indi Mapanghiwala

Ang makahulugan nga espirituhanon nga mga tinion nagaabot sa nagkalainlain nga panahon, kag sa nagkalainlain nga mga paagi, nga pinasahi para sa tagsa sa aton.

Panumduma ang imo paborito nga mga halimbawa sa balaan nga mga kasulatan. Yadtong mga nagapamati kay Apostoles Pedro “nasuntok sila sa ila [mga] tagipusuon.”⁸ Ang Lamanhon nga babayi nga si Abis nagapati sa “talalupangdon nga panan-awan sang iya amay.”⁹ Kag may nag-abot nga isa ka tingug sa hunahuna ni Enos.¹⁰

Ang akon abyan nga si Clayton Christensen naglaragway sang inagihan sa isa ka labing mapinangamuyuon nga pagbasa sang Libro ni Mormon sa sini nga paagi: “Isa ka matahum, mainit, mapinalanggaon nga Espiritu … ang naglibot sa akon kag naglapos sa akon kalag, nga nagalikop sa akon sa balatyagon sang gugma nga wala ko ginhunahuna nga akon mabatyagan [kag ining mga balatyagon nagapadayon sa tagsa ka gab-i]”¹¹

May mga tinion nga ang espirituhanon nga mga balatyagon nagasulod sa aton tagipusuon nga daw kalayo, nga nagapasanag sang aton kalag. Si Joseph Smith nagpaathag nga kon kis-a nagabaton kita sang “gulpiyada nga mga bahid sang mga ideya” kag sa panalagsa sang tunay nga pag-ilig sang kaalam.¹²

Si Pangulong Dallin H. Oaks, sa pagsabat sa isa ka sinsero nga tawo nga nagahambal nga wala pa gid nakaagi sang subong sina nga inagihan, naglaygay, “Ayhan ang imo mga pangamuyo liwat-liwat na nga ginsabat, ugaling kay ang imo ginapaabot amo ang isa ka dako nga senyales ukon isa ka dako nga tingug amo nga abi mo wala ka ginsabat.”¹³ Ang Manluluwas Mismo naghambal parte katawhan nga may dako nga pagtuo nga “gin-[pakaamayo] sa kalayo kag sa Balaan nga Espiritu, [apang sila] wala nila mahibal-i ini.”¹⁴

Paano Ninyo Sia Ginapamatian?

Sining karon lang aton nabatian si Pangulong Russell M. Nelson nga nagasiling: “Ginaagda ko kamo nga pamensaron sing madalom kag sa masami ang parte sining yabi nga pamangkot: Paano mo Sia ginapamatian? Ginaagda ko man kamo nga maghimo sang mga tikang nga pamatian Sia sing mas maayo kag sa mas masami.”¹⁵ Ginsulit niya inang imbitasyon sini nga aga.

Pamatian naton Sia sa aton mga pangamuyo, sa aton mga puluy-an, sa balaan nga mga kasulatan, sa aton mga himno, samtang nagakaangay kita nga nagaambit sang sakramento, sa aton pagpahayag sang aton pagtuo, sa aton pag-alagad sa iban, kag sa aton pagtambong sa templo kaupod ang pareho nga mga sumulunod. Ang makahulugan nga espirituhanon nga mga tinion nagaabot kon kita mapinangamuyuon nga nagapamati sa pangkabilogan nga komperensya kag kon mas labi naton nga ginatuman ang mga kasuguan. Kag mga kabataan, ining mga inagihan para man sa inyo. Dumduma, si Jesus “nagtudlo kag nag-alagad sa mga kabataan … kag [ang mga kabataan] nagpamulong … sang gamhanan kag makatilingala nga mga butang.”¹⁶ Ang Ginuo nagsiling:

“[Ining ihibalo] ginahatag sang akon Espiritu sa inyo, …kag paagi sa akon gahum mabasa ninyo ang mga [ini];

“Gani, makapamatuod kamo nga nabatian ninyo ang akon tingug, kag nakahibalo sang akon mga pulong.”¹⁷

Mahimo naton nga “pamatian Sia” bangud sang mga bugay sang wala tupong nga Pagbayad-sala sang Manluluwas.

Bisan indi kita makapili sang tion sa pagbaton sining makahulugan nga mga tinion, si Pangulong Henry B. Eyring naghatag sining laygay sa aton pagpanghanda: “Karon sa gab-i, kag sa bwas sa gab-i, mahimo kamo magpangamuyo kag magbinagbinag, nga nagapamangkot: Ang Dios bala nagpadala sang mensahe nga para gid sa akon? Nakita ko bala ang Iya mga kamot sa akon kabuhi ukon sa kabuhi sang akon [pamilya]?”¹⁸ Ang pagtuo, pagtuman, pagpaubos, kag tunay nga tinutuyo nagabukas sang mga bintana sa langit.¹⁹

Isa ka Paglarawan

1:19

Ang espirituhanon nga mga handurawan nagahatag sang kasanag

Pagbulig sa iban nga madiskubrehan liwat ang espirituhanon nga kasanag

Mahimo mo nga hunahunaon ang imo espirituhanon nga mga handurawan sa sini nga paagi. Upod ang sigisige nga pangamuyo, determinasyon nga tipigan ang aton mga kasugtanan, kag ang dulot sang Balaan nga Espiritu, magapalayag kita sa tunga sang kabuhi. Kon ang personal nga kabudlayan, pagpangduhaduha, ukon pagkaluya nagapadulom sang aton alagyan, ukon kon ang mga kahimtangan sa kalibutan nga indi naton makontrolar nagatulod sa aton sa pagpalibog parte sa palaabuton, ang makahulugan nga espirituhanon nga mga handurawan gikan sa aton libro sang kabuhi kaangay sang nagabanaag nga mga bato nga nagabulig pasanag sang dalan sa unhan, nagapasalig sa aton nga ang Dios nakakilala sa aton, nagapalangga sa aton, kag nagpadala sang Iya Anak nga si Jesucristo, agud buligan kita nga makapauli. Kag kon may yara sang magapahigad sang ila makahulugan nga mga handurawan kag nagatalang ukon naligban, ginaliso naton sila sa Manluluwas samtang nagapaambit kita sang aton pagtuo kag mga handurawan sa ila, nga ginabuligan sila nga matukiban liwat yadtong malahalon nga espirituhanon nga mga tinion nga ila sadto ginahatagan sang bili.

Ang iban nga mga inagihan tuman ka sagrado nga aton sila ginaprotektahan sa aton espirituhanon nga handurawan kag wala ginapaambit ang mga ini.²⁰

“Ang mga anghel naghambal paagi sa gahum sang Balaan nga Espiritu; gani, nagahambal sila sang mga pulong ni Cristo.”²¹

“Ang mga anghel [wala] nag-untat sa pag-alagad sa mga anak sang tawo.

“Kay yari karon, sakop sila sa iya [Cristo], sa pag-alagad suno sa … iya sugo, nga nagapakita sang ila mga kaugalingon sa ila nga may mabakod nga pagtuo kag isa ka malig-on nga kaisipan sa tagsa ka dagway sang pagkadiosnon.”²²

Apang “ang Mananabang, ang Espiritu Santo, … magatudlo sa inyo sang tanan nga butang, kag magapahanumdum sa inyo sang tanan.”²³

Tipigi ang inyo sagrado nga mga handurawan. Patihi ang mga ini. Isulat ang mga ini. Ipaambit ang mga ini sa inyo pamilya. Magsalig nga magaabot ang mga ini sa inyo halin sa inyo Amay nga Langitnon kag sa Iya Hinigugma nga Anak.²⁴ Tugoti ang mga ini nga magdala sang pasensya sa inyo mga pangduhaduha kag paghangop sa inyo mga kabudlayan.²⁵ Nagasaad ako sa inyo nga kon boluntaryo kamo nga magbaton kag mahinalungon nga nagapakamahal sang mga makahulugan nga espirituhanon nga mga hitabo sa inyo kabuhi, mas madamo pa ang magaabot sa inyo. Ang Amay nga Langitnon nakakilala sa inyo kag nagapalangga sa inyo!

Si Jesus ang Cristo, ang Iya ebanghelyo ginpanumbalik na, kag kon kita magapabilin nga matinuohon, nagapamatuod ako nga mangin Iya kita sa katubtoban, sa ngalan ni Jesucristo, amen.