Hosana kag Aleluya—Ang Buhi nga Jesucristo: Ang Sentro sang Pagpanumbalik kag Paskwa sang Pagkabanhaw
Sa sini nga panahon sang hosana kag aleluya, magkanta sang aleluya—kay magahari Sia tubtob sa katubtuban!
Mahal kong mga kauturan: upod sang hosana kag aleluya, ginasaulog naton ang buhi nga Jesucristo sa sining panahon sang nagapadayon nga Pagpanumbalik kag Paskwa sang Pagkabanhaw. Upod ang perpekto nga paghigugma, ang aton Manluluwas nagapasalig sa aton: “Kamo may paghidaet sa akon. Sa kalibutan kamo makaangkon sang kalisdanan: apang mag mangin masinadyahon kamo; nalutos ko ang kalibutan.”1
Pila ka tuig lang ang nagligad, sang kami ni Sister Gong nagbisita sa isa ka manami nga pamilya, ang ila lamharon nga anak, nga si Ivy, nagahuyahuya nga nagpagwa sang suludlan sang iya violin. Gin-alsa niya ang arko sang violin, ginhugtan ini kag ginbutangan sang rosin. Dayon ginbalik niya ang arko sa suludlan, nagduko, kag nagpungko. Bilang isa ka bag-uhan, ginpaambit niya ang tanan nga iya nabal-an parte sa violin. Karon, pila na ka tuig ang nagligad, si Ivy manami na gid magtukar sang byolin.
Sa sining dutan-on nga panahon, tanan kita medyo pareho kay Ivy kag iya byolin. Nagasugod kita sa sugod. Sa dalayon nga praktis, nagamayo kag nagasagad pa gid kita. Sa paglakat sang panahon, ang husto nga pagpili kag dutan-on nga mga eksperiyensya nagabulig sa aton nga mangin mas pareho sa aton Manluluwas samtang nagapangabudlay kita upod sa Iya sa Iya ulubasan2 kag nagasunod sa banas sang Iya kasugtanan.
Ang mga anibersaryo, lakip ining ika-200 nga anibersaryo (bicentennial), nagadagmit sang mga sulundan sang pagpanumbalik.3 Sa pagsaulog sang nagapadayon nga Pagpanumbalik sang ebanghelyo ni Jesucristo, nagahanda man kita para sa Paskwa sang Pagkabanhaw. Sa duha sini, nagakalipay kita sa pagbalik ni Jesucristo. Buhi Sia—indi lamang sang una, kundi subong; indi lamang para sa pipila, kundi para sa tanan. Nagkari Sia kag nagakari sa pag-ayo sang mga napaslawan, pagluwas sang mga bihag, paghatag panan-aw sa mga bulag, kag sa paghilway sinang mga ginadaogdaog.4 Kita ina tanan. Ang Iya nagapangtubos nga mga promisa magamit, wala sapayan sang aton nagligad, sang aton karon, ukon mga kabalaka para sa aton palaabuton.
Buwas Domingo de Ramos na. Sa naandan, ang mga palma sagrado nga simbolo sa pagpahatag sang kalipay sa aton Ginuo, pareho sang Madinalag-on nga Pagsulod ni Cristo sa Jerusalem, sa diin “dako nga kadam-an … nagkuha sang mga paklang kag naggwa sa pagsugata sa iya.”5 (Basi mangin interesado kamo nga mahibal-an nga ang orihinal sining larawan ni Harry Anderson nagakabit sa opisina ni Pangulong Russell M. Nelson, sa likod lang gid sang iya lamesa.) Sa libro nga Bugna, yadtong mga nagadayaw sa Dios kag sa Kordero nagahimo sini nga “nagabayo sing puro puti kag malaba, kag may ginauyatan sila nga mga dahon sang palma.”6 Upod sa “mga panapton sang pagkamatarong” kag “mga korona sang himaya,” ang mga palma nalakip sa pangamuyo sa pagdedikar (dedicatory prayer) sang Templo sang Kirtland.7
Siyempre, ang kaimportante sang Domingo de Ramos labaw pa sa kadam-an nga nagatamyaw kay Jesus upod ang mga palma. Sa Domingo de Ramos, si Jesus nagsulod sa Jerusalem sa mga paagi nga ginakilala sang mga matinuohon bilang katumanan sang propesiya. Subong nga ginpropesiya ni Zacarias8 kag sang Salmista (Psalmist), ang aton Ginuo nagsulod sa Jerusalem nga nagasakay sa tinday samtang ang kadam-an hungod nga nagasinggit “Hosana sa kahitaasan.”9 Ang hosana nagakahulugan nga “luwasa kami subong.”10 Sang una, pareho sa karon, nagakalipay kita, “Bulahan ang nagakari sa ngalan sang Ginuo.”11
Ang semana pagkatapos sang Domingo de Ramos amo ang Domingo sang Paskwa sang Pagkabanhaw. Si Pangulong Russell M. Nelson nagatudlo nga si Jesucristo “nagkari agud bayaran ang utang nga indi Iya, bangod nag-utang kita nga indi naton mabayaran.”12 Sa pagkamatuod, paagi sa Pagbayad-Sala ni Cristo, tanan nga anak sang Dios “sarang maluwas, paagi sa pagtuman sang mga kasugoan kag mga ordinansa sang Ebanghelyo.”13 Sa Paskwa sang Pagkabanhaw, nagakanta kita sang aleluya. Ang aleluya nagakahulugan nga “dayawon ka Ginuong Jehova.”14 Ang “Hallelujah Chorus” sa Handel’s Messiah isa ka pinalangga nga pahayag sa Paskwa sang Pagkabanhaw nga Sia ang “Hari sang mga hari, kag Ginuo sang mga Ginuo.”15
Ang sagrado nga mga hitabo sa ulot sang Domingo de Ramos kag Paskwa sang Pagkabanhaw amo ang istorya sang hosana kag aleluya. Ang hosana amo ang aton pangamuyo nga luwason sang Dios. Ang aleluya nagapabutyag sang aton pagdayaw kag pagpasalamat sa Ginuo para sa paglaum sang kaluwasan kag pangkahitaasan. Sa hosana kag aleluya ginakilala naton ang buhi nga Jesucristo bilang ang sentro sang Paskwa sang Pagkabanhaw kag pagpanumbalik sa ulihing mga adlaw.
Ang Pagpanumbalik sa ulihing mga adlaw nagasugod sa langitnon nga pagpahayag—ang literal nga pagpakita sang Dios nga Amay kag sang Iya Anak, nga si Jesucristo, sa lamharon nga propeta nga si Joseph Smith. Siling sang Propetang si Joseph, “Kon magtangla ka sa langit sing lima ka minutos, mas madamo ka mahibaloan sangsa magbasa ka sang tanan nga nasulat parte diri.”16 Bangod ang kalangitan nagbukas liwat, nakahibalo kita kag “nagapati sa Dios, ang Wala’y Katapusan nga Amay, kag sa Iya Anak nga si Jesucristo, kag sa Balaan nga Espiritu”17—ang balaan nga Panguluhan sang Dios.
Sang Paskwa sang Pagkabanhaw, Abril 3, 1836, sa una nga mga tinuig sang Pagpanumbalik, ang buhi nga Jesucristo nagpakita pagkatapos nga gindedikar ang Templo sang Kirtland. Ang mga nakakita sa Iya didto nagpamatuod parte sa Iya sa nasanto nga katuhay sang kalayo kag tubig: “Ang iya mga mata pareho sang dabadaba sang kalayo; ang buhok sa iya ulo puti pareho sang puraw nga niyebe; ang iya nawong nagasilak labaw pa sa kasanag sang adlaw; kag ang iya tingug pareho sang tunog sang daganas sang dalagko nga mga katubigan, bisan pa ang tingug ni Jehova.”18
Sa sina nga okasyon, ang aton Manluluwas nagpahayag, “Ako ang una kag ang katapusan; ako sia nga nagakabuhi, ako sia nga napatay; ako ang inyo mananabang sa Amay.”19 Sa liwat, ang nasanto nga katuhay—una kag katapusan, buhi kag napatay. Sia ang Alfa kag ang Omega, ang ginsuguran kag ang katapusan,20 ang pangulo kag manughimpit sang aton pagtuo.21
Pagkatapos nga magpakita si Jesucristo, si Moises, Elias, kag Elijah nag-abot man. Paagi sa diosnon nga direksyon, ining dakong mga propeta sang una nagpanumbalik sang mga yabi kag awtoridad sang priesthood. Gani, “ang mga yabi sining dispensasyon gintugyan”22 sa sulod sang Iya ginpanumbalik nga Simbahan agud pakamaayuhon ang tanan nga anak sang Dios.
Ang pag-abot in Elijah sa Templo sang Kirtland nagtuman man sang propesiya ni Malaquias sa Daan nga Katipan nga si Elijah magabalik “sa wala pa mag-abut ang dako kag makakulugmat nga adlaw sang Ginuo.”23 Sa paghimo sini, ang pagpakita ni Elijah nagdungan, pero indi man natabuan, sa tion sang Judio nga Pascua (Passover), nga ang amo nga tradisyon matinahuron nga nagapaabot sang pagbalik ni Elijah.
Madamo nga debotado nga Judio nga pamilya ang nagahanda para kay Elijah sa ila lamesa sa Pascua. Madamo ang nagapuno sang tasa agud mag-agda kag mag-abiabi sa iya. Kag ang pila, sa tion sang tradisyunal nga Seder sa Pascua, nagapadala sang bata sa puwertahan, kon kaisa ginabilin nga medyo bukas, agud tan-awon kon si Elijah ara sa gwa nga nagahulat nga agdahon nga magsulod.24
Bilang katumanan sang propesiya kag bilang bahin sang ginpromisa nga pagpanumbalik sang tanan nga butang,25 si Elijah nag-abot suno sa ginpromisa, sa Paskwa sang Pagkabanhaw kag sa pagsugod sang Pascua. Dala niya ang awtoridad sa paghugpong agud sekyohan ang mga pamilya sa duta kag sa langit. Suno sa gintudlo ni Moroni sa Propetang si Joseph, si Elijah “itanom niya sa mga tagipusuon sang mga anak ang mga promisa nga ginhimo sa mga amay, kag ang mga tagipusuon sang mga anak magaliso sa ila mga amay. Kon indi mangin amo sini,” si Moroni nagpadayon, “ang bilog nga duta lubos nga maguba sa pagkari [sang Ginuo].”26 Ang espiritu ni Elijah, isa ka pagpahayag sang Balaan nga Espiritu, nagapasuod sa aton sa aton mga henerasyon—sa nagligad, sa karon, kag sa palaabuton—sa aton mga listahan sang kaliwatan (genealogies), mga kasaysayan, kag serbisyo sa templo.
Dumdumon man naton sing makadali ang kahulugan sang Pascua. Ginadumdom sang Pascua amo ang pagluwas sa mga anak sang Israel gikan sa 400 katuig nga pagkaulipon. Ang libro nga Exodo nagasaysay kon paano ining pagluwas natabo pagkatapos sang mga kalalat-an sang mga paka, mga kuto, mga langaw, pagkamatay sang mga kahayupan, mga hubag, pilas, yelo kag kalayo, mga apan, kag tuman nga kadulom. Ang katapusan nga kalalat-an nagtuga sang kamatayon sang panganay sa duta pero indi sa mga puluy-an sang balay sang Israel kon—kon inang mga panimalay magbutang sang dugo sang walay dagta nga panganay nga kordero sa mga uluhan sang ila puwertahan.27
Ang anghel sang kamatayon nag-agi sa mga balay nga namarkahan sang dugo sang kordero.28 Ang ina nga pag-agi, ukon paglaktaw, nagarepresentar kay Jesucristo nga sa katapusan nagdaug sang kamatayon. Sa pagkamatuod, ang nagabayad-sala nga dugo sang Kordero sang Dios nagahatag sa aton Maayong Manugpahalab sang gahum sa pagtipon sang Iya katawhan sa tanan nga duog kag mga sirkumstansya padulong sa kaluwasan sang Iya panong sa duha ka bahin sang belo.
Talalupangdon, ang Libro ni Mormon nagalaragway sang “gahum kag pagkabanhaw ni Cristo”29—ang sentro sang Paskwa sang Pagkabanhaw—sa duha ka pagpanumbalik.
Una, ang pagkabanhaw nagalakip sang pisikal nga pagpanumbalik sang aton “kinaandan kag himpit nga lawas”; “tagsa ka butkon kag tiil kag buko-buko,” “bisan ang isa ka buhok sang ulo indi madula.”30 Ang ini nga promisa nagahatag sang paglaum sa ila nga nawad-an sang mga tiil; sa mga nawad-an sang ikasarang nga makakita, makabati, ukon maglakat; ukon ang mga ginakabig nga nadula tungod sa malala nga balatian, balatian sa pamensaron, ukon iban pa nga pagbuhin sa ikasarang. Pangitaon Niya kita. Himuon Niya kita nga kompleto.
Ang ikaduha nga promisa sang Paskwa sang Pagkabanhaw kag sang Pagbayad-Sala sang aton Ginuo amo nga sa espirituhanon, “tanan nga mga butang igapanumbalik sa ila nagakaigo nga pasunod”31 Ining espirituhanon nga pagpanumbalik nagapakita sang aton mga buhat kag mga handum. Pareho sang tinapay sa tubig,32 ginapanumbalik sini “ang abuot para sa sinang mabuot,” “maayo,” “matarong,” kag “maluluy-on.”33 Indi na makatilingala nga ang propetang si Alma naggamit sang tinaga nga panumbalik 22 ka beses34 samtang ginapadasig niya kita nga “makigbagay sing maayo, maghukom sing matarong, kag dalayon nga maghimo sing maayo.”35
Bangud ang “Dios mismo magapasag-uli para sa mga sala sang kalibutan,”36 ang Pagbayad-Sala sang Ginuo makaayo indi lamang sang kon ano sadto kundi dala ang kon ano ang sarang ini mangin. Bangud nahibal-an Niya ang aton mga kasakit, kalisod, mga balatian, ang aton “mga pagsulat sang tanan nga sahi,”37 mahimo Niya, nga puno sang kaawa, magtaban sa iya katawhan suno sa aton mga kahuyangan.38 Bangod ang Dios “isa ka perpekto, matarong nga Dios, kag isa ka maluluy-on man nga Dios,” ang plano sang kaluoy sarang “sa pagsabat sang mga ginapangayo sang hustisya.”39 Nagahinulsol kita kag nagahimo sang tanan naton nga masarangan. Ginalikupan Niya kita sa wala katapusan “sa mga butkon sang iya gugma.”40
Sa karon ginasaulog naton ang pagpanumbalik kag pagkabanhaw. Kaupod ninyo, nagakalipay ako sa nagapadayon nga Pagpanumbalik sang kabug-osan sang ebanghelyo ni Jesucristo. Sa amo man nga paagi duha ka gatos ka tuig na ang nagligad sini nga tigpamulak, ang kasanag kag rebelasyon padayon nga nagaabot paagi sa buhi nga propeta sang Ginuo kag sa Iya Simbahan nga gintawag sa Iya ngalan—Ang Simbahan ni Jesucristo sang mga Santos sa Ulihing mga Adlaw—kag paagi sa personal nga rebelasyon kag inspirasyon sang langitnon nga regalo sang Balaan nga Espiritu.
Kaupod ninyo, sa sining tion sang Paskwa sang Pagkabanhaw, nagapamatuod ako sa Dios, ang aton Wala Katapusan nga Amay, kag sa Iya Hinigugma nga Anak, ang buhi nga Jesucristo. Ang dutan-on nga mga tawo mapintas nga ginlansang kag sang ulihi nabanhaw. Apang ang buhi lamang nga Jesucristo sa Iya perpekto nga nabanhaw nga lawas ang may ara sa gihapon sang mga marka sang paglansang sa krus sa Iya mga kamot, mga tiil, kag kilid. Sia lamang ang makasiling, “Gintigib ko ikaw sa mga palad sang akon mga kamot.41 Sia lamang ang makasiling: “Ako ang sia nga gin-alsa. Ako si Jesus nga ginlansang sa krus. Ako ang Anak sang Dios.”42
Pareho kay diutay nga Ivy kag ang iya violin, kita sa pila ka bahin nagasugod pa lamang. Matuod gid, “ang wala makit-i sang mata, kag wala mabatii sang idulungog, ukon wala mapainu-ino sa hunahuna sang tawo, ini gin-aman sang Dios sa nagahigugma sa iya.”43 Sa sining tinion, madamo kita sang matun-an sa kaayo sang Dios kag sa aton diosnon nga potensyal para magdako ang pagpalangga sang Dios sa sulod naton samtang ginapangita naton Sia kag nagalab-ot sa kada isa. Sa bag-o nga pamaagi kag bag-o nga mga lugar, sarang kita mahimo kag mangin, dinalan sa dinalan, kaayo sa kaayo, sing isa-isa kag sing ulolupod.
Mahal kong mga kauturan sa bisan diin man, samtang nagapakighambal kag nagatuon kita sing ululupod, ang inyo pagtuo kag kaayo nagapuno sa akon sang kakunyag sa ebanghelyo kag pagpasalamat. Ang inyo testimonya kag pagpanglakaton sa ebanghelyo nagapalig-on sa akon testimonya kag akon pagpanglakaton sa ebanghelyo. Ang inyo mga kabalaka kag kalipay, ang inyo pagpalangga sa panimalay sang Dios kag komunidad sang mga Santos, kag inyo naangkon nga paghangop sang ginpanumbalik nga kamatuoran kag kasanag nagadugang sang akon kabug-osan sang ginpanumbalik nga ebanghelyo, nga ang buhi nga Jesucristo ang sa sentro sini. Ululupod kita nga nagasalig, “sa gal-um kag kasanag, Ginuo, updi ako.”44 Nagaisa nga nahibal-an naton, sa tunga sang aton mga ginapas-an kag ginakabalak-an, sarang kita mag-isip sang aton madamo nga mga bugay.45 Sa adlaw-adlaw nga mga detalye kag sa ginagmay kag simple nga mga butang, sarang naton mapahanabo ang dalagko nga mga butang sa aton mga kabuhi.46
“Kag matabo ini nga ang mga matarong pagapilion halin sa tunga sang tanan nga nasyon, kag magakari sa Sion nga nagakanta sang mga ambahanon sang wala’y katubtuban nga kalipay.”44 Sa sini nga panahon sang hosana kag aleluya, magkanta sang aleluya—kay magahari Sia tubtob sa katubtuban! Magsinggit sang hosana, sa Dios kag sa Kordero! Sa sagrado kag balaan nga ngalan ni Jesucristo, amen.