Mga Pangamuyo sang Pagtuo
Sa aton pagpangamuyo sa pagtuo, mangin isa kita ka importante nga bahin sa buluhaton sang Ginuo samtang Iya ginahanda ang kalibutan sa Iya Ika-duha nga Pagkari.
Ang pangamuyo ni Elder Maynes sa panugod sining unang sesyon sang pangkabilogan nga komperensya ginasabat. Ang inspirasyon nag-abot sa aton paagi sa matahum nga mga mensahe kag manami nga mga musika. Ang promisa ni Pangulong Russel M. Nelson nga ining komperensya mangin halandumon nagasugod na nga matuman.
Si Pangulong Nelson nagtalana sini nga tuig bilang “bicentennial nga panag-on nga nagasaulog sang 200 katuig halin sang ang Dios nga Amay kag ang Iya Hinigugma nga Anak, nga si Jesucristo, nagpakita kay Joseph Smith sa isa ka palanan-awon.” Si Pangulong Nelson nag-agda sa aton nga maghimo sang personal nga plano sa paghanda sang aton mga kaugalingon sa sini nga makasaysayan nga komperensya, sa diin nga ang saulog siling niya mangin “isa ka maimpluwensya nga pagbag-o sa kasaysayan sang Simbahan, kag ang inyo partisipasyon importante.”1
Pareho sa akon, ayhan inyo nabatian sa iya mensahe kag ginpamangkot ang inyo kaugalingon, “Sa ano nga paagi nga ang akon partisipasyon importante?” Ayhan inyo nabasa kag ginpangamuyoan ang parte sa mga hitabo sa Pagpanumbalik. Ayhan, labi pa sangsa sang-una, ginbasa ninyo ang mga sugilanon sadtong pila ka panahon sang ginpakilala sang Dios nga Amay ang Iya Hinigugma nga Anak. Ayhan nabasa ninyo ang mga tinion sang ang Manluluwas nakighambal sa mga anak sang aton Amay nga Langitnon. Nahibal-an ko nga nahimo ko yadtong mga butang kag labaw pa.
May nakit-an ako nga mga balasahon sa akon pagbasa parte sa priesthood sang Dios kag sang pagbukas sang mga dispensasyon. Napaubos ako samtang akon narealisar nga ang akon pagpanghanda para sa sini nga komperensya isa ka maipluwensya nga pagbag-o sa akon personal nga kasaysayan. Nabatyagan ko ang mga pagbag-o sa akon tagipusuon. Nabatygagan ko ang bag-o nga kapasalamatan. Nabatyagan ko ang pagkapuno sang kalipay sa pagpamensar nga maagda sa pagpartisipar sa sining pagsaulog sa nagapadayon nga Pagpanumbalik.
Akon ginahunahuna ang pamatyagan sang iban, nga tungod sa maayo nga pagpanghanda, mas masadya, positibo, kag mas determinado sa pag-alagad sa ano man nga kapasidad nga kinahanglanon sang Ginuo.
Ang mga di-kinaandan nga mga hitabo nga aton ginapasidunggan amo ang panugod sang gintagna nga katapusan nga dispensasyon, sa diin ang Ginuo nagahanda sang Iya Simbahan kag sang Iya katawhan, sila nga nagadala sang Iya ngalan, sa pagbaton sa Iya. Bilang bahin sang aton pagpanghanda para sa Iya pagkari, Iya kita sakdagon agud aton malampuwasan ang espirituhanon nga mga hangkat kag mga oportunidad nga wala pa makit-an sa kasaysayan sining kalibutan.
Sang Septyembre 1840, ang Propetang si Joseph Smith kag ang iya mga manuglaygay sa Unang Panguluhan nagpahayag sang masunod: “Ang buluhaton sang Ginuo sa sining katapusan nga mga inadlaw, isa sa pinakadako kag daw halos indi mahangpan sang mortal nga katawhan. Ang iya mga himaya indi basta malaragway, kag ang pagkahalangdon sini indi matupongan. Amo ini ang sitwasyon nga ginakalangkaran sang mga propeta kag mga matarong nga mga tawo sumugod sang pagtuga sang kalibutan pakadto sa sumunod nga mga henerasyon tubtob sa sining panahon; kag matuod gid nga ini ang dispensasyon sang kabug-usan sang mga panahon, sang ang tanan nga mga butang yara kay Jesucristo, sa langit man o sa duta, pagatipunon sa Iya, kag sang ang tanan nga butang igapanumbalik, suno sa ginhambal sang mga propeta halin sa pagsugod sang kalibutan; kay sa dira mahanabo ang mahimayaon nga katumanan sang mga promisa nga ginsaad sa mga katigulangan, samtang ang mga pagpakita sang gahum sang Labing Mataas mangin halangdon, mahimayaon kag wala sing tupong.”
Nagpadayon sila sa pagsiling: “Amon mabatyagan nga kinahanglan kita magsulong kag pagaisahon ang aton mga kusog para sa pagpasad sang Ginharian, kag pagpahamtang sang Priesthood sa ila kabug-osan kag himaya. Ang buhluhaton nga dapat humanon sa katapusan nga mga inadlaw isa sang dako nga importansya, kag magakinahanglan sang kusog, abilidad, talento, kag ikasarang sang mga Santos, agud ini magapadayon sa sina nga pagkahimaya kag katahum nga ginlaragway sang propeta nga si [Daniel] [tan-awa sa Daniel 2:34–35, 44–45]; kag gani magakinahanglan sang pagtutok sang mga Santos, sa paghuman sang mga buhat nga may kaangay sina nga kadakuon kag pagkahalangdon.”2
Madamo sang mga kapat-uran sa kon ano ang aton himuon kag kon san-o naton ini himuon sa nagapadayon nga Pagpanumbalik ang igapahayag pa. Pero ang Unang Pangulohan bisan pa sadtong bag-o pa lang nakahibalo sang pila sang kasangkaron kag kadalumon sang buluhaton nga ginpahamtang sang Ginuo para sa aton. Yari ang pila ka mga halimbawa kon ano ang aton nahibal-an nga matabo.
Paagi sa Iya mga Santos, ang Ginuo magatanyag sang bugay sang Iya ebanghelyo “sa tanan nga nasyon, kaliwatan, hinambalan, kag katawhan.”3 Ang teknolohiya kag mga milagro padayon nga magapakigbahin—subong man ang indibidwal nga “mga mangingisda sang mga tawo”4 nga nagaminister nga may gahum kag nagabaskog nga pagtuo.
Kita bilang katawhan magahiliusa pa gid sa tunga sang nagadugang nga konplikto. Pagatipunon kita sa espirituhanon nga kusog sang mga grupo kag mga pamilya nga puno sang kasanag sang ebanghelyo.
Bisan ang wala nagapati nga kalibutan magakilala sa Ang Simbahan ni Jesucristo sang mga Santos sa Ulihing mga Adlaw kag marealisar ang gahum sang Dios sa sini. Ang mga matinuohon kag maisog nga mga sumulunod wala kahadlok, mapainubuson, kag handa nga magadala sang ngalan ni Cristo sa tagsa ka adlaw sang ila mga kabuhi.
Paano, karon, ang tagsa sa aton makapartisipar sa sini nga buluhaton nga may kasubong nga kadakuon kag kahalangdon? Si Pangulong Nelson nagtudlo kon paano magtubo sa espirituhanon nga gahum. Kon ginakabig naton ang paghinulsol bilang isa ka masadya nga oportunidad tungod sang aton nagatubo nga pagtuo nga si Jesus amo ang Cristo, kon nakahangop kita kag nagapati nga ang Amay nga Langitnon nagapamati sang aton tagsa nga pangamuyo, kon nagatinguha kita sa pagtuman kag pagpangabuhi sang mga kasuguan, nagatubo kita sa aton ikasarang agud padayon nga magbaton sang rebelasyon. Ang Balaan nga Espiritu sarang nga mangin kaupod naton pirme. Ang balatyagon sang kasanag magapabilin sa aton bisan pa nga ang kalibutan sa aton palibot nagaamat nga magdulom.
Si Joseph Smith isa ka halimbawa kon paano magtubo sa sina nga sahi nga espirituhanon nga gahum. Ginpakita niya sa aton nga ang pangamuyo sang pagtuo amo ang yabi para sa rebelasyon gikan sa Dios. Nagpangamuyo sia sa pagtuo, nga nagapati nga ang Dios nga Amay magasabat sang iya pangamuyo. Nagpangamuyo sia sa pagtuo, nga nagapati nga paagi lamang kay Jesucristo nga sia sarang nga mahilway gikan sa kabasulanan nga iya nabatyagan tungod sa iya mga sala. Kag nagpangamuyo sia sa pagtuo, nga nagapati nga kinahanglan niya pangitaon ang matuodtuod nga Simbahan ni Jesucristo agud mabaton ina nga kapatawaran.
Sa bug-os niya nga pag-alagad bilang propeta, si Joseph Smith naggamit sang mga pangamuyo sang pagtuo agud padayon nga makabaton sang rebelasyon. Sa aton pag-atubang sa mga hangkat sa karon kag sa magaabot pa, kita man kinahanglan nga maggamit sang pareho man nga sulundan. Si Pangulong Brigham Young nagsiling, “Wala ako sang nahibal-an pa nga iban nga paagi para sa mga Santos sa Ulihing mga Adlaw magluwas nga magsige-sige sa pagpangamuyo agud ang Dios maggabay kag maghatag direksyon sa iya katawhan.”5
Ining mga tinaga halin sa mga pangamuyo sa sakramento dapat nga maglaragway sang aton adlaw-adlaw nga kabuhi: “Dumduma Sia pirme.” Ang “Sia” nagatumod kay Jesucristo. Ang masunod nga mga tinaga, “kag tipigan ang Iya mga kasuguan,” nagapanugyan kon ano ang buot silingon sini para sa aton nga dumdumon Sia.6 Sa aton pagdumdum pirme kay Jesucristo, mahimo kita magpamangkot sa malinong nga pangamuyo, “Ano ang gusto Niya nga akon himuon?”
Ang kasubong nga pangamuyo, nga gintanyag nga may pagtuo kay Jesucristo, ang nag-umpisa sining katapusan nga dispensasyon. Kag ini ang mangin sentro sang partisipasyon nga pagahimuon sang tagsa sa aton sa iya sini padayon nga pagpahayag. Akon nakita, subong man ninyo, ang matahum nga mga halimbawa sang kasubong nga pangamuyo.
Una si Joseph Smith. Nagpamangkot sia nga may pagtuo kaangay sang isa ka bata kon ano ang luyag sang Ginuo nga iya himuon. Ang Iya sabat nagbag-o sang kasaysayan sang kalibutan.
Para sa akon, ang importante nga leksyon nagahalin sa sabat ni Joseph sa pag-atake ni Satanas sang magluhod si Joseph agud mangamuyo.
Nakabalo ako halin sa akon eksperiyensya nga si Satanas kag ang iya mga alagad nagtinguha nga madulaan kita sang gana sa pagpangamuyo. Sang gingamit ni Joseph Smith ang tanan niya nga pwersa sa pagpanawag sa Dios agud luwason sia sa pwersa sinang nagatinguha sa paggapos sa iya, ang iya pangamuyo para sa bulig ginsabat kag nagpakita ang Amay nga Langitnon kag si Jesucristo.
Tuman gid ang pagpaninguha ni Satanas nga punggan ang pag-umpisa sang Pagpanumbalik tungod importante kaayo ang pangamuyo ni Joseph Smith. Kamo kag ako may magagmay nga mga partisipasyon sa nagapadayon nga Pagpanumbalik. Apang ang kaaway sang Pagpanumbalik magatinguha sa pagpugong sa aton sa pagpangamuyo. Ang ehemplo sang pagtuo ni Joseph kag ang iya determinasyon makapabaskog sa aton sa aton mga desisyon. Amo ini ang isa sa madamo nga mga rason kon ngaa ang akon mga pangamuyo nagalakip sang mga pagpasalamat sa Amay nga Langitnon para kay Propetang Joseph.
Si Enos sa Libro ni Mormon ang isa pa ka modelo para sa akon pangamuyo sa pagtuo samtang akon ginahimo ang akon partisipasyon sa nagapadayon nga Pagpanumbalik. Kon ano man ang inyo partisipasyon, mahimo ninyo sia himuon nga inyo personal nga manunudlo.
Pareho kay Joseph, si Enos nagpangamuyo nga may pagtuo. Ginlaragway niya ang iya eksperiyensya sa sini nga paagi:
“Kag ang akon kalag ginutom; kag nagluhod ako sa atubang sang akon Magbubuhat, kag nagtuaw ako sa iya sa hugot nga pangamuyo kag pag-ampo para sa akon kaugalingon nga kalag; kag sa bug-os nga adlaw nagtuaw ako sa iya; kag subong man, sang mag-abot ang gab-i ginbayaw ko pa gihapon ang akon tingug pataas sa bagay nga nakalambot ini sa mga langit.
“Kag may nag-abot nga isa ka tingug sa akon, nga nagasiling: Enos, ang imo mga sala ginpatawad na, kag ikaw pagapakamaayuhon.
“Kag ako, si Enos, nakahibalo nga ang Dios indi mahimo nga magbutig; gani, ang akon kabasulanan nasilhig sing lubos.
“Kag nagsiling ako: Ginuo, paano ini nahimo?
“Kag nagsiling sia sa akon: Tungod sang imo pagtuo kay Cristo, nga wala pa gid nimo sadto nabatii ukon nakita. Kag madamo nga mga tinuig ang magalabay antes niya ipakita ang iya kaugalingon sa unod; gani, maglakat ka, ang imo pagtuo ang nagpaayo sa imo.”7
Ang leksyon nga nagpakamaayo sa akon amo ang yara sa sining mga tinaga: “Tungod sang imo pagtuo kay Cristo, nga wala pa gid nimo sadto nabatii ukon nakita.”
Si Joseph Smith may pagtuo kay Cristo nga magkadto sa kakahuyan kag magpangamuyo man agud mabuy-an sa mga pwersa ni Satanas. Wala pa niya makita ang Amay kag ang Anak, apang nagpangamuyo sia sa pagtuo sa tanan nga kusog sang iya tagipusuon.
Ang eksperiyensya ni Enos nagtudlo sa akon sing kasubong kaimportante nga leksyon. Kon nagapangamuyo ako nga may pagtuo, ara ang Manluluwas bilang akon mananabang sa Amay kag akon mabatyagan nga ang akon mga pangamuyo nagalab-ot sa langit. Ang mga sabat nagaabot. Ang mga bugay mabaton. May paghidaet kag kalipay bisan sa tinion sang kabudlayan.
Akon madumduman, sang ako ang pinakabag-o nga miyembro sang Korum sang Dose ka mga Apostoles, nagluhod ako sa pagpangamuyo upod kay Elder David B. Haight. Ara sia sa mga pangidaron pareho sa akon sa karon, nga may mga hangkat nga akon man ginaeksperiyensya sa karon. Akon madumduman ang iya tingug samtang sia nagapangamuyo. Wala ko ginmuklat ang akon mga mata, pero sa pamatyag ko dawsa nagayuhum sia. Nagpakighambal sia sa Amay nga Langitnon nga may kasadya sa iya nga tingug.
Mabatian ko sa sa akon hunahuna ang iya kalipay sang sia nagsiling, “Sa ngalan ni Jesucristo.” Sa akon palamatin-an si Elder Haight daw nakabatyag nga ang Manluluwas nagakomporme sa sina nga tion sang mensahe nga iya ginpangamuyo sa Amay. Kag nakapiho ako nga pagabatunon gid ato nga may yuhum.
Ang aton abilidad agud mahimo ang aton importante nga kontribusyon sa makahalawhaw nga nagapadayon nga Pagpanumbalik magauswag samtang nagatubo kita sa aton pagtuo sa Ginuong Jesucristo bilang aton Manluluwas kag sa aton Amay nga Langitnon bilang aton Amay. Sa aton pagpangamuyo nga may pagtuo, mangin isa kita ka importante nga bahin sa buluhaton sang Ginuo samtang Iya ginahanda ang kalibutan sa Iya Ika-duha nga Pagkari. Nagapangamuyo ako nga tanan kita makakita sang kalipay sa paghimo sang buluhaton nga Iya ginaagda sa tagsa sa aton nga himuon.
Nagapamatuod ako nga si Jesucristo buhi. Ini ang Iya Simbahan kag ginharian sa duta. Si Joseph Smith amo ang propeta sang Pagpanumbalik. Si Pangulong Russell M. Nelson amo ang propeta sang Ginuo sa kalibutan karon. Sia ang nagakapot sang yabi sang priesthood sang Ang Simbahan ni Jesucristo sang mga Santos sa Ulihing mga Adlaw. Sa ngalan ni Jesucristo, amen.