2:3

Ang Gahum sang Libro ni Mormon sa Pagbag-o

Ni Elder Benjamin M. Z. Tai

Sang Kapitoan

Ang Libro ni Mormon nagahatag sang espirituhanon nga nutrisyon, nagapanugyan sang plano sa pag-aksyon, kag ginaangot kita sa Balaan nga Espiritu.

Pagkatapos rebyuhon ang report sa pinakaulihi nga pisikal nga eksaminasyon, nahibal-an ko nga kinahanglan ko maghimo sang mga pagbag-o sa pangginawi. Agud buligan ako, nagresita ang akon doktor sang plano sa nutrisyon kag ehersisyo, nga, kon pilion ko nga sundon ini, magahatag sa akon sang ikaayong lawas.

Kon magpaidalom sa espirituhanon nga eksaminasyon ang kada isa sa aton, ano ayhan ang aton matukiban? Ano ayhan nga mga pagbag-o ang iresita sang aton espirituhanon nga doktor? Para mangin mga tawo nga kinahanglan naton mangin, importante nga hibaluon naton ang dapat himuon kag himuon ang aton nahibal-an.

Si Jesucristo amo ang Dako nga Manugbulong.¹ Paagi sa Iya Pagbayad-Sala, ginabulong Niya ang aton mga pilas, ginadala sa Iya kaugalingon ang aton mga balatian, kag ginapaayo ang wasak naton nga mga tagipusuon.² Paagi sa Iya grasya mahimo nga magbaskog ang aton mga kahuyang.³ Ginaimbitar Niya kita nga magsunod sa Iya⁴ paagi sa pagtuon parte sa Iya, pagpamati sa Iya mga pulong, kag paglakat nga mapainubuson sa Iya Espiritu.⁵ Nagpromisa Sia nga buligan kita⁶ sa sining bug-os-kabuhi nga proseso sang pagbag-o, nga nagaliwat sa aton kag nagadala sang wala katapusan nga kalipay.⁷

Ginhatagan kita sang Manluluwas sang Libro ni Mormon bilang epektibo nga kasangkapan para magbulig sa pagbag-o. Ang Libro ni Mormon nagahatag sang espirituhanon nga nutrisyon, nagapanugyan sang plano sa pag-aksyon, kag ginaangot kita sa Balaan nga Espiritu. Ginsulat para sa aton,⁸ nagaunod ini sang pulong sang Dios nga may kaathag⁹ kag nagasugid sa aton sang aton pagkatawo, katuyuan, kag kapalaran.¹⁰ Upod sa Biblia, ang Libro ni Mormon nagasaksi kay Jesucristo¹¹ kag nagatudlo sa aton kon paano naton mahibal-an ang kamatuoran kag mangin pareho sa Iya.

Si Brother Saw Polo 58 anyos na sang makilala niya ang ginpanumbalik nga ebanghelyo ni Jesucristo. Sang nakilala ko sia, nagaserbisyo na sia bilang branch president sang pila ka tuig, pero nahibal-an ko nga wala pa niya mabasa ang Libro ni Mormon tungod wala pa ini sa iya lenggwahe nga Burmese. Sang ginpamangkot ko sia kon paano niya nahibal-an nga matuod ang libro nga wala ini ginabasa, nagsabat sia nga gintun-an niya libro sang Mga Istorya sa Libro ni Mormon paagi sa pagtan-aw sang mga litrato kada adlaw, gamit ang diksyonaryo sa paglubad sang mga tinaga sa Ingles, kag ginasulat ang iya mga natun-an. Ginpaathag niya, “Tagsa nga magtuon ako, ginapangamuyo ko ang akon natun-an, kag makabatyag ako sang kalinong kag kalipay, nagaathag ang akon pamensaron, kag nagahumok ang akon tagipusuon. Nabatyagan ko ang Balaan nga Espiritu nga nagasaksi sa akon nga ini matuod. Nahibal-an ko nga ang Libro ni Mormon pulong sang Dios.”

Pareho kay Brother Saw Polo, pwede tun-an sang kada isa sa aton ang Libro ni Mormon suno sa aton mga sirkumstansya. Kon handumon naton nga magtuo kag binagbinagon ang iya mga pinanudlo sa aton mga tagipusuon, pwede kita mamangkot sa Dios nga may pagtuo kon ang mga pinanudlo matuod.¹² Kon sinsero kita sa aton handum nga makahibalo kag may tunay nga intensyon sa pag-akto, sabton Niya kita sa aton mga tagipusuon paagi sa Balaan nga Espiritu. Paagi sa gahum sang Balaan nga Espiritu nga mahibal-an naton ang kamatuoran sang tanan nga mga butang.¹³ Kon mabaton naton ang diosnon nga saksi sang Libro ni Mormon, mahibal-an man naton paagi sa pareho nga gahum nga si Jesucristo amo ang Manluluwas sang kalibutan, nga si Joseph Smith Iya propeta, kag nga Ang Simbahan ni Jesucristo sang mga Santos sa Ulihing mga Adlaw amo ang Iya ginpanumbalik nga Simbahan.¹⁴

Sang bata pa ako nga manugsugod sang akon pangmisyonaryo nga serbisyo, nagsakay ako sa eroplano padulong sa Australia. Nagabatyag sang kasubo, kakulba, kag kakulangan pero kay nakapangako na nga magserbe, kinahanglan ko gid sang kasigurohan nga ang akon ginapatihan matuod. Nangamuyo ako kag ginbasa ang balaan nga mga kasulatan sing mas seryoso, pero samtang nagapadayon ang biyahe, nagdako na gid ang akon pagduda sa kaugalingon kag naglala ang akon pisikal nga kondisyon. Sang pila na ka oras ang akon pagpakigbato, naglakat ang flight attendant kag nagpundo sa tupad sang akon pulungkoan. Ginkuha niya ang ginabasa ko nga Libro ni Mormon sa akon kamot. Gintulok niya ang takop kag nagsiling, “Kanami sina nga libro!” dayon ginduhol niya balik ang libro kag nagpadayon lakat. Wala ko na sia makita liwat.

Samtang nagabalik sa akon ang iya ginhambal, klaro ko gid nga nabatian kag nabatyagan sa akon tagipusuon, “Ari Ako, kag nahibal-an ko kon sa diin ka. Himoa lang ang imo pinakamaayo, kay Ako na ang bahala sa iban.” Sa sina nga eroplano sa ibabaw sang Dagat Pasipiko. nabaton ko ang personal nga saksi paagi sa akon pagtuon sang Libro ni Mormon kag sang mga pagpabatyag sang Balaan nga Espiritu nga kilala ako sang Manluluwas kag nga ang ebanghelyo matuod.

Si Elder David A. Bednar nagpanudlo: “Ang paghibalo nga ang ebanghelyo matuod amo ang importansya sang panaksihon. Ang tayuyon nga katampad sa ebanghelyo amo ang importansya sang pagbag-o.”¹⁵ Ang pagbag-o nagapangayo nga kita mangin “magmanugtuman sang pulong, kag dili manugpalamati lamang.”¹⁶ Ang plano sang aksyon sang Ginuo para sa aton—ang doktrina ni Cristo—pinakamaathag nga ginatudlo sa Libro ni Mormon.¹⁷ Nagalakip ini sang:

Una, paggamit sang pagtuo kay Jesucristo paagi sa pagsalig sa Iya, pagtuman sang Iya mga kasuguan, kag paghibalo nga buligan Niya kita.¹⁸
Ikaduha, paghinulsol adlaw-adlaw sa aton mga kapaltahan kag pag-eksperiyensya sang kalipay kag kalinong kon patawaron Niya kita.¹⁹ Ang paghinulsol nagapangayo nga patawaron naton ang iban²⁰ kag nagabulig sa aton nga mag-abante. Ang Manluluwas nagpangako nga patawaron kita tagsa nga maghinulsol kita.²¹
Ikatatlo, paghimo kag pagtuman sang mga kasugtanan sa Dios paagi sa mga ordinansa pareho sang bunyag. Buligan kita sini nga magpadayon sa dalan sang kasugtanan padulong sa Iya.²²
Ikaapat, pagbaton sang regalo sang Balaan nga Espiritu. Ini nga regalo nagatugot nga pirme naton makaupod ang isa nga nagatinlo, nagapaumpaw, kag nagagiya sa aton.²³
Kag ikalima, pagpadayon tubtob sa katapusan paagi sa pagpadayon sa pag-abante samtang adlaw-adlaw nga nagapaayaw sa pulong ni Cristo.²⁴ Sa pagpaayaw sa Libro ni Mormon kag sa pagkapyot sing hugot sa mga pinanudlo sini, mahimo naton malampuwasan ang mga tentasyon kag makabaton sang giya kag proteksyon sa bilog naton nga kabuhi.²⁵

Paagi sa tayuyon nga pagpangabuhi sang doktrina ni Cristo sa aton mga kabuhi, malampuwasan naton ang inertia (pagpundo) nga nagasablag sang pagbag-o kag kahadlok nga nagapugong sang aksyon. Makabaton kita sang personal nga rebelasyon, kay ang Balaan nga Espiritu “maga pakita sa inyo sang tanan nga mga butang nga inyo dapat himuon,”²⁶ kag “mga pulong ni Cristo maga sugid sa inyo sang tanan nga mga butang nga inyo dapat himuon.”²⁷

Sa 20 ka tuig, si Brother Huang Juncong nagumon sa inom, sigarilyo, kag sobra nga panahor. Sang makilala si Jesucristo kag sa Iya ginpanumbalik nga ebanghelyo, naghandum si Brother Huang nga magbag-o para sa iya bata pa nga pamilya. Ang pinakadako niya nga hangkat amo ang pagpanigarilyo. Bilang isa ka chain-smoker, makapila na niya gintinguhaan nga mag-untat pero wala nagmadinalag-on. Isa ka adlaw ining mga tinaga sa Libro ni Mormon ang nagpabilin sa iya hunahuna: “sa isa ka bunayag nga tagipusuon, sa matuod-tuod nga tinutuyo.”²⁸ Bisan pa nga napaslawan ang nagliligad nga pagtinguha, nabatyagan niya nga mahimo niya nga magbag-o upod ang bulig sang Amay nga Langitnon kag ni Jesucristo.

Gin-isa sang full-time nga mga misyonero ang ila pagtuo upod sa iya kag naghatag sang plano para sa praktikal nga mga aksyon, kaupod ang madamo nga pangamuyo kag pagtuon sang pulong sang Dios. Upod ang sinseridad kag matuod-tuod nga tinutuyo, nag-akto si Brother Huang nga may matutom nga determinasyon kag natukiban niya nga kon mas tutokan niya ang pag-angkon sang bag-o nga mga pangginawi, pareho sang pagtuon sang Libro ni Mormon, nagakabuhinan ang iya pagtutok sa mga pangginawi nga gusto niya dulaon.

Sa pagdumdom sang iya eksperiyensya 15 ka tuig na ang nagligad, nagsiling sia, “Indi ko na madumduman kon san-o gid ako nag-untat sa pagpanigarilyo, pero mientras nga ginatinguhaan ko nga himuon adlaw-adlaw ang mga butang nga nahibal-an ko nga dapat ko himuon para imbitaron ang Espiritu sang Ginuo sa akon kabuhi kag padayon ini nga himuon, wala na ako nagakaengganyo sang sigarilyo kag wala na gid sumugod sadto.” Paagi sa pagpangabuhi sang mga pinanudlo sa Libro ni Mormon, nagbag-o ang kabuhi ni Brother Huang, kag nangin mas maayo sia nga bana kag amay.

Si Pangulong Russell M. Nelson nagpromisa: “Kon tun-an ninyo sing mainampuon ang Libro ni Mormon adlaw-adlaw, makahimo kamo sang mas maayo nga mga desisyon—adlaw-adlaw. Ginapromisa ko nga kon inyo padaluman pensar ang inyo ginatun-an, ang mga bintana sang langit magabukas, kag mabaton ninyo ang mga sabat sa inyo kaugalingon nga mga pamangkot kag direksyon sa inyo kaugalingon nga kabuhi. Ginapromisa ko nga sa inyo adlaw-adlaw nga pagpaayaw sa Libro ni Mormon, mahimo kamo nga mapangapinan batok sa mga kalainan sang aton panahon, bisan pa ang nagapanggapos nga salot sang pornograpiya kag iban pa nga nagabag-o sang panghunahuna nga mga adiksyon.”²⁹

Mahal kong kaabyanan, ang Libro ni Mormon pulong sang Dios, kag mangin mas malapit kita sa Iya kon tun-an naton ini.³⁰ Samtang aton ginaeksperimentohan ang mga pulong sini, makabaton kita sang saksi sang kamatuoran sini.³¹ Kon dalayon kita nga magpangabuhi suno sa mga pinanudlo sini, “madulaan kita sang kaluyag nga maghimo sang malain.”³² Ang aton tagipusuon, hitsura, kag kinaiya magabag-o nga mangin daw mas pareho sa Manluluwas.³³ Ginahatag ko ang akon pat-od nga saksi nga si Jesus amo ang Cristo, ang aton Manluluwas, Manunubos, kag Abyan. Sa ngalan ni Jesucristo, amen.