2:3

Pagsiguro sang Matarong nga Paghukom

Ni Elder James R. Rasband

Sang Kapitoan

Agud masiguro ang matarong nga paghukom, ang nagabayad-sala nga sakripisyo sang Manluluwas magahawan sang mga kahoy-kahoy sang kawala hinalung-ong kag sang masakit nga mga tunok sang halit nga gintuga sang iban.

Ang Libro ni Mormon Nagatudlo sang Doktrina ni Cristo

Sang nagligad nga Oktubre, si Pangulong Russell M. Nelson naghangkat sa aton nga binagbinagon kon paano mangin lain ang aton mga kabuhi kon ang “ihibalo nga aton naangkon halin sa Libro ni Mormon gulpi lang kuhaon?”¹ Ginhunahuna ko ang iya pamangkot, pareho nga sigurado ako ginhimo man sang madamo sa inyo. Isa ka panumduman ang nagabalik-balik sa akon—kon wala ang Libro ni Mormon kag ang iya kaathag parte sa doktrina ni Cristo kag Iya nagabayad-sala nga sakripisyo, diin ako madangop para sa paghidaet?

Ang doktrina ni Cristo—nga nagalakip sang nagaluwas nga mga prinsipyo kag ordinansa sang pagtuo kay Cristo, paghinulsol, bunyag, ang regalo sang Balaan nga Espiritu, kag pagpadayon sa katapusan—gintudlo sing madamo nga beses sa balaan nga mga kasulatan sang Pagpanumbalik apang may pinasahi nga gahum sa Libro ni Mormon.² Ang doktrina nagasugod sa pagtuo kay Cristo, kag ang tagsa ka elemento sini nagasandig sa pagsalig sa Iya nagabayad-sala nga sakripisyo.

Pareho sang gintudlo ni Pangulong Nelson, “Ang Libro ni Mormon nagahatag sang pinakakompleto kag pinakamasaligan nga paghangop sang Pagbayad-sala ni Jesucristo nga makit-an sa bisan diin.”³ Kon mas nagadugang ang aton paghangop parte sa langitnon nga regalo sang Manluluwas, mas mahibal-an naton, sa aton mga hunahuna kag sa aton mga tagipusuon,⁴ ang kamatuoran sang pasalig ni Pangulong Nelson nga “ang mga kamatuoran sa Libro ni Mormon may gahum sa pagpaayo, pagpaumpaw, pagpanumbalik, pagsakdag, pagpabakod, pagpasulhay, kag pagpalipay sang aton mga kalag.”⁵

Ang Pagbayad-Sala sang Manluluwas Nagapuno sang Tanan nga Ginapangayo sang Hustisya

Isa ka importante kag nagahatag-paghidaet nga amot sang Libro ni Mormon sa aton paghangop sang Pagbayad-sala sang Manluluwas amo ang iya sini panudlo nga ang maluluy-on nga sakripisyo ni Cristo nagatuman sang tanan nga ginapangayo sang hustisya. Pareho sang ginpaathag ni Alma, “Ang Dios mismo magapasag-uli para sa mga sala sang kalibutan, sa pagpahanabo sang plano sang kaluoy, sa pagsabat sang mga ginapangayo sang hustisya, agud ang Dios mangin isa ka himpit, matarong nga Dios, kag isa ka maluluy-on man nga Dios.”⁶ Ang plano sang kaluoy sang Amay⁷—ang ginatawag sang balaan nga mga kasulatan nga plano sang kalipay⁸ ukon ang plano sang kaluwasan⁹—indi matigayon luwas lang kon ang tanan nga ginapangayo sang hustisya masabat.

Pero ano gid bala ang “ginapangayo sang hustisya”? Hunahunaa ang kaugalingon nga eksperiyensya ni Alma. Dumduma nga bilang isa ka lamharon nga lalaki, si Alma naglibot nga nagatinguha “sa pagguba sa simbahan.”¹⁰ Sa pagkamatuod, ginsugiran ni Alma ang iya anak nga si Helaman nga sia “ginpaantos sang mga kasakit sang impiyerno” tungod madinalag-on niya nga “ginpamatay ang madamo sang mga anak sang [Dios]” paagi sa pagganoy sa “ila palayo padulong sa kalaglagan.”¹¹

Ginpaathag ni Alma kay Helaman nga naagom niya ang paghidaet sang ulihi sang “nadumduman niya ang ”panudlo sang iya amay “nahanungod sang pagkari ni Jesucristo … sa pagpasag-uli para sa mga sala sang kalibutan.”¹² Mahinulsulon nga Alma ang nagpangayo sang kaluoy ni Cristo¹³ kag dayon nalipay kag nasulhayan sang nahibal-an niya nga si Cristo nagbayad-sala para sa iya mga kasal-anan kag nagbayad sang tanan nga ginapangayo sang hustisya. Sa liwat, ano bala ang ginapangayo sang hustisya kay Alma? Pareho sang ginpanudlo mismo ni Alma sang ulihi, “Wala sing di-matinlo nga butang nga mahimo nga makapanubli sang ginharian sang Dios.”¹⁴ Gani, kabahin sang kaumpawan ni Alma amo siguro nga luwas kon ang kaluoy magpatunga, ang hustisya magapugong sa iya sa pagbalik agud magkabuhi upod sa Amay nga Langitnon.¹⁵

Ang Manluluwas Nagapaayo sang mga Pilas nga Indi Naton Mapaayo

Apang ang kalipay bala ni Alma nakatutok lang gid sa iya kaugalingon—sa iya paglikaw sa silot kag iya pagbalik sa amay? Nakahibalo kita nga si Alma nag-antos man parte sa iya mga ginganoy palayo sa kamatuoran.¹⁶ Apang si Alma sa iya kaugalingon indi makapaayo kag makapanumbalik sadtong tanan nga iya ginpatalang. Indi niya mismo masiguro nga mahatagan sila sing patas nga oportunidad nga matun-an ang doktrina ni Cristo kag mabugayan paagi sa pagpangabuhi sang iya sini makalilipay nga mga prinsipyo Indi na niya mapabalik ang basi nagkalamatay nga nabulagan gihapon sang iya butig nga mga panudlo.

Pareho sang gintudlo sadto ni Pangulong Boyd K. Packer: “Ang panumduman nga nagluwas kay Ama … amo ini: Ang ipanumbalik ang indi ninyo mapanumbalik, ang bulngon ang pilas nga indi ninyo mabulong, ang kay-uhon ang inyo ginguba kag indi na makay-o amo ang mismo katuyoan sang pagbayad-sala ni Jesucristo.”¹⁷ Ang makalilipay nga kamatuoran nga “nadumduman ni Alma” indi lang nga sia mismo sarang matinloan kundi amo man nga atong iya mga ginahalitan mabulong kag mapaayo.

Ang Sakripisyo sang Manluluwas Nagasiguro sang Matarong nga Paghukom

Tinuig antes si Alma naluwas sining makapaumpaw nga doktrina, si Haring Benjamin nagpanudlo parte sa kasangkaron sang pagpaayo nga ginatanyag sang nagabayad-sala nga sakripisyo sang Manluluwas Si Haring Benjamin nagpahayag nga “maayong balita sang dakong kalipay” ang ginpahibalo sa iya “sang isa ka anghel gikan sa Dios.”¹⁸ Lakip sadtong maayong balita ang kamatuoran nga si Cristo magaantos kag mapatay para sa aton mga sala kag mga sayop agud masiguro nga “isa ka matarong nga paghukom ang magaabot sa mga anak sang tawo.”¹⁹

Ano gid bala ang ginapangayo sang “matarong nga paghukom”? Sa madason nga bersikulo, si Haring Benjamin nagpaathag nga agud masiguro ang matarong nga paghukom, ang dugo sang Manluluwas nagbayad-sala “para sa mga sala sadtong mga nagkalapukan tungod sang paglapas ni Adan” kag para sadtong mga “nagkalamatay nga wala makahibalo sang kabubut-on sang Dios nahanungod sa ila, ukon sila nga walay hinalung-ong nga nakasala.”²⁰ Ang matarong nga paghukom nagapangayo man, panudlo niya, nga “ang dugo ni Cristo nagapasag-uli para” sa mga sala sang magagmay nga kabataan.²¹

Ining balaan nga mga kasulatan nagatudlo sang mahimayaon nga doktrina: ang nagabayad-sala nga sakripisyo sang Manluluwas nagapaayo, bilang libre nga regalo, sa mga nakasala nga walay hinalung-ong, sa sinang suno kay Jacob, “wala sang layi nga ginhatag.”²² Ang pagka-may-salabton sa sala nagadepende sa kasanag nga aton nabaton kag nagasandig sa aton ikasarang sa pagpili.²³ Nahibal-an naton ining nagapang-ayo kag nagapaumpaw nga kamatuoran tungod gid lang sang Libro ni Mormon kag iban pa nga balaan nga kasulatan sang Pagpanumbalk.²⁴

Siyempre, kon may ginhatag nga layi, nga nakahibalo kita sang pagbuot sang Dios, may salabton kita. Pareho sang gindagmit ni Haring Benjamin: “Kailo, kailo sa iya nga nakahibalo nga sia nagasupak batok sa Dios! Kay ang kaluwasan wala nagaabot bisan kay sin-o luwas nga ini paagi sa paghinulsol kag pagtuo sa Ginuong Jesucristo.”²⁵

Ini man maayong balita sang doktrina ni Cristo. Indi lang nga ang Manluluwas nagapaayo kag nagapanumbalik sinang mga nakasala nga walay hinalung-ong, kundi man, para sa mga nakasala batok sa kasanag, ang Manluluwas nagatanyag sang pagpaayo sa kondisyon sang paghinulsol kag pagtuo sa Iya.²⁶

Siguro “nadumduman” gid ni Alma ining duha ka kamatuoran. Si Alma ayhan makabatyag sang iya ginasiling nga “tuman kahimpit nga … kalipay”²⁷ kon sa panumduman niya ginluwas sia ni Cristo apang ginpabay-an nga nahalitan tubtob sa walay katapusan atong iya mga ginganoy palayo sa kamatuoran? Siyempre indi. Agud makabatyag si Alma sing lubos nga paghidaet, atong iya mga ginhalitan kinahanglanon man sang oportunidad nga mapaayo.

Pero paano gid bala sila—ukon inang aton sarang mahalitan—mapaayo? Bisan pa indi naton lubos mahangpan ang sagrado nga pamaagi nga ang nagabayad-sala nga sakripisyo sang Manluluwas nagapaayo kag nagapanumbalik, nakahibalo kita nga agud masiguro ang matarong nga paghukom, ang Manluluwas magahawan sang mga kahoy-kahoy sang kawalay hinalung-ong kag sang masakit nga mga tunok sang halit nga gintuga sang iban.²⁸ Sa sini ginapasiguro Niya nga ang tanan nga mga anak sang Dios hatagan sang oportunidad, nga may panulokan nga wala nalipdan, sa pagpili nga sundon Sia kag batunon ang dakung plano sang kalipayan.²⁹

Ang Manluluwas Magakay-o sang Tanan Nga Aton Ginguba

Ini nga mga kamatuoran ang naghatag kay Alma sang paghidaet. Kag ini man ang mga kamatuoran nga dapat maghatag sa aton sang dako nga paghidaet. Bilang tawhanon nga mga lalaki kag babayi, tanan kita makasalapay ukon kon kis-a makabunggo sa isa kag isa kag makahalit. Pareho sang mapamatud-an sang bisan sin-o nga ginikanan, ang kasakit nga upod sang aton mga sayop indi lamang ang kahadlok para sa aton kaugalingon nga silot kundi ang kahadlok nga basi ginlimitahan naton ang kalipay sang aton kabataan ukon sa pila ka paagi ginpunggan sila nga makita kag mahangpan ang kamatuoran. Ang mahimayaon nga promisa sang nagabayad-sala nga sakripisyo sang Manluluwas amo nga kon parte sa aton mga sayop bilang mga ginikanan, ginakabig Niya ang aton mga anak nga walay kabasolanan kag nagapromisa sang pagpaayo para sa ila.³⁰ Kag bisan pa nga nakasala sila batok sa kasanag—pareho sa aton tanan—ang Iya butkon sang kaluoy nauntay,³¹ kag Iya sila tubuson kon magtulok lang sila sa Iya kag magkabuhi.³²

Bisan pa nga ang Manluluwas may gahum sa pagkay-o sang indi naton makay-o, ginasugo Niya kita nga himuon ang tanan naton nga masarangan agud ang kabayaran mangin kabahin sang aton paghinulsol.³³ Ang aton mga sala kag mga sayop nagatublag indi lang sang aton relasyon sa Dios kundi sang aton man mga relasyon sa iban. Kon kis-a ang aton mga pagtinguha nga ayuhon kag ipanumbalik simple lang pareho sang pagpangayo sang pasensya, pero sa iban nga tinion ang kabayaran nagakinahanglan sang tinuig nga mapainubuson nga pagpanikasog.³⁴ Apang, para sa madamo sang aton mga sala kag mga sayop, indi naton lubos nga mapaayo inang aton mga nasakit. Ang matahum, nagahatag-paghidaet nga promisa sang Libro ni Mormon kag sang ginpanumbalik nga ebanghelyo amo nga ang Manluluwas magakay-o sang tanan nga aton naguba.³⁶ Kag kay-uhon man Niya kita kon magliso kita sa Iya sing may pagtuo kag maghinulsol sang mga kahalitan nga aton natuga.³⁶ Nagatanyag sia sining duha ka mga regalo tungod palangga Niya kita tanan sing may himpit nga gugma³⁷ kag bangud may pangako Sia nga siguruhon ang matarong nga paghukom nga nagatuman sang alangay hustisya kag kaluoy. Nagasaksi ako nga ini matuod sa ngalan ni Jesucristo, amen.