Introduksyon

Ang Libro ni Mormon isa ka libro sang balaan nga kasulatan nga kaanggid sa Biblia. Isa ini ka kasulatan sang pagpakigbagay sang Dios sa dumaan nga mga pumuluyo sang kadutaan sang Amerika kag nagaunod sang kabug-osan sang wala’y katubtuban nga ebanghelyo.

Ang libro ginsulat sang madamo nga dumaan nga mga propeta paagi sa espiritu sang propesiya kag rebelasyon. Ang ila mga pulong, nga ginsulat sa mga lamina nga bulawan, ginsambit kag ginpalip-ot sing isa ka propetang-tagsulat sang kasaysayan nga ginahingalanan kay Mormon. Ang kasulatan nagasugid sang kasaysayan sing duha ka dalagko nga sibilisasyon. Ang isa naghalin sa Jerusalem sadtong 600 B.C. kag sang ulihi natunga sa duha ka nasyon, nga nakilala bilang mga Nefinhon kag mga Lamanhon. Ang isa nag-abot sing mas una sang ginlabugay sang Ginuo ang mga lengguahe sa Tore sang Babel. Ini nga grupo nakilala bilang mga Jarednon. Pagkaligad sang linibo ka tuig, ang tanan naubos kalamatay luwas sa mga Lamanhon, kag sila amo ang panguna nga mga katigulangan sang Amerikano nga mga Indiyan.

Ang pinakasentro nga hitabo nga nasulat sa Libro ni Mormon amo ang personal nga pag-alagad sang Ginuong Jesucristo sa tunga sang mga Nefinhon pagkatapos gid sang Iya pagkabanhaw. Nagapaathag ini sang mga doktrina sang ebanghelyo, nagabalay sang plano sang kaluwasan, kag nagasugid sa mga tawo kon ano ang dapat nila himuon agud makaangkon sang paghidaet sa sini nga kabuhi kag wala’y katapusan nga kaluwasan sa kabuhi nga magaabot.

Sang makompleto ni Mormon ang iya mga sinulatan, gintugyan niya ang kasaysayan sa iya anak nga si Moroni, nga nagdugang sang pila ka mga pulong nga iya kaugalingon kag gintago ang mga lamina sa Bungyod sang Cumora. Sang Septyembre 21, 1823, ang amo man nga Moroni, nga sadto isa na ka ginhimaya, nabanhaw nga persona, nagpakita sa Propeta nga si Joseph Smith kag nagtudlo sa iya parte sa dumaan nga kasulatan kag ang natalana sini nga paglubad sa lengguahe nga Ingles.

Sang ulihi ang mga lamina gintugyan kay Joseph Smith, nga amo ang naglubad sang mga ini paagi sa dulot kag gahum sang Dios. Ang kasulatan ginabantala subong sa madamo nga lengguahe bilang isa ka bag-o kag dugang nga saksi nga si Jesucristo Anak sang buhi nga Dios kag nga ang tanan nga magpalapit sa Iya kag magtuman sang mga layi kag mga ordinansa sang Iya ebanghelyo mahimo nga maluwas.

Parte sini nga kasulatan ang Propeta nga si Joseph Smith nagsiling: “Ginsugiran ko ang mga kauturan nga ang Libro ni Mormon amo ang labing husto sa ano man nga libro sa duta, kag amo ang bato nga pamag-ang sang aton relihiyon, kag ang isa ka tawo mangin mas malapit sa Dios paagi sa pagsunod sang mga pagsulundan sini, sangsa ano pa man nga libro.”

Dugang pa kay Joseph Smith, ang Ginuo nag-aman sang onse pa gid nga makakita sang mga lamina nga bulawan sa ila mga kaugalingon agud mangin pinasahi nga mga saksi sang kamatuoran kag pagkadiosnon sang Libro ni Mormon. Ang ila sinulat nga mga testimonya ginalakip diri bilang “Ang Testimonya sang Tatlo ka Saksi” kag “Ang Testimonya sang Walo ka Saksi.”

Ginaagda namon ang tanan nga tawo sa bisan diin sa pagbasa sang Libro ni Mormon, sa pagbinag-binag sa ila mga tagipusuon sang mensahe nga unod sini, kag dayon sa pagpamangkot sa Dios, ang Wala’y Katapusan nga Amay, sa ngalan ni Cristo kon ang libro matuod. Yadtong magasunod sini nga paagi kag mamangkot sa pagtuo magaangkon sing isa ka testimonya sang kamatuoran kag pagkadiosnon sini paagi sa gahum sang Balaan nga Espiritu. (Tan-awa sa Moroni 10:3–5.)

Yadtong magaangkon sining diosnon nga saksi halin sa Balaan nga Espiritu mahimo man nga makahibalo paagi sa amo man nga gahum nga si Jesucristo amo ang Manluluwas sang kalibutan, nga si Joseph Smith amo ang Iya manugpahayag sang rebelasyon kag propeta sa sining ulihing mga adlaw, kag nga Ang Simbahan ni Jesucristo sang mga Santos sa Ulihing mga Adlaw amo ang ginharian sang Ginuo nga ginpasad liwat sa duta, bilang pagpanghanda sa Ika-duha nga Pagkari sang Mesias.