Malip-ot nga Paathag parte sa Libro ni Mormon

Ang Libro ni Mormon isa ka sagrado nga kasulatan sang mga katawhan sa dumaan nga Amerika kag nakurit sa mga lamina nga metal. Ang mga ginhalinan sining gintipon nga mga kasulatan nagalakip sang mga masunod:

1. Ang mga Lamina ni Nefi, nga may duha ka sahi: Ang magagmay nga mga lamina kag ang dalagko nga mga lamina. Ang nauna mas labi nga nagatutok sa espirituhanon nga mga bagay kag sa mga pag-alagad kag mga pinanudlo sang mga propeta, samtang ang naulihi gingamit kalabanan sa sekular nga kasaysayan sang natungdan nga katawhan (1 Nefi 9:2–4). Apang halin sa panahon ni Mosias, ang dalagko nga mga lamina nagalakip man sang mga bagay nga may tig-una nga espirituhanon nga importansya.

2. Ang mga Lamina ni Mormon, nga nagaunod sang kasaysayan nga pinalip-ot ni Mormon halin sa dalagko nga mga lamina ni Nefi, upod ang madamo nga komento. Ini nga mga lamina nagaunod man sang kasugpon sang kasaysayan nga ginsugid ni Mormon kag mga dugang sang iya anak nga si Moroni.

3. Ang mga Lamina ni Eter, nga nagasugid sang kasaysayan sang mga Jarednon. Ini nga kasulatan ginpalip-ot ni Moroni, nga nagdugang sang iya kaugalingon nga mga komento kag ginlakip ang kasulatan sa kabilogan nga kasaysayan sa idalom sang tig-ulo nga “Libro ni Eter.”

4. Ang mga Lamina nga Saway nga gindala sang katawhan ni Lehi halin sa Jerusalem sadtong 600 B.C. Nagaunod ang mga ini sang “lima ka libro ni Moises, … kag amo man sang kasulatan sang mga Judio halin sa ginsuguran, … tubtob sa pagsugod sang paghari ni Sedequias, hari sang Juda; kag amo man sang mga propesiya sang balaan nga mga propeta” (1 Nefi 5:11–13). Madamo nga sinambit nga mga dinalan halin sa sining mga lamina nga nagasambit kay Isaias kag iban pa nga mga propeta sa biblia kag mga propeta nga wala sa biblia, ang makita sa Libro ni Mormon.

Ang Libro ni Mormon nagaunod sang kinse ka mayor nga mga bahin ukon mga dibisyon, nga nakilala, luwas sa isa, bilang mga libro, nga sa kinaandan ginatawag sa ngalan sang tig-una nga tagsulat sang mga ini. Ang una nga bahin (ang una nga anum ka libro, nga nagatapos sa Omni) isa ka linubad halin sa magagmay nga mga lamina ni Nefi. Sa ulot sang mga libro ni Omni kag Mosias amo ang isa ka sinal-ot nga ginatawag ang mga Pulong ni Mormon. Ini nga sinal-ot nagaangot sang kasulatan nga nakurit sa magagmay nga mga lamina sa mga pinalip-ot nga kasulatan ni Mormon sa dalagko nga mga lamina.

Ang pinakamalawig nga bahin nga nagalakip sang kaundan halin sa Mosias tubtob sa Mormon kapitulo 7, linubad sang kasulatan sa dalagko nga mga lamina ni Nefi nga pinalip-ot ni Mormon. Ang panghingapos nga bahin, halin sa Mormon kapitulo 8 tubtob sa katapusan sang libro, ginkurit ni Moroni nga anak ni Mormon, nga, pagkatapos niya nga nahuman ang kasulatan sang kabuhi sang iya amay, naghimo sang isa ka pinalip-ot nga kasulatan sang mga Jarednon (bilang ang libro ni Eter) kag sang ulihi gindugang ang mga bahin nga nakilala bilang ang libro ni Moroni.

Sang ukon mga tuig A.D. 421, si Moroni, ang katapusan sang mga propetang-tagsulat sang kasaysayan nga Nefinhon, nagtakop sang sagrado nga kasulatan kag ginpatago ini sang Ginuo, agud ipagwa sa ulihing mga adlaw, suno sa gintagna sang tingug sang Dios paagi sa Iya dumaan nga mga propeta. Sang A.D. 1823, ining amo man nga Moroni, nga isa na ka binanhaw nga persona, nagbisita sa Propeta nga si Joseph Smith kag sang ulihi gintugyan ang kinurit nga mga lamina sa iya.

Parte sini nga edisyon: Ang orihinal nga pahina sang tig-ulo nga gilayon ginasundan sang pahina sang mga kaundan, ginkuha halin sa mga lamina kag kabahin sang sagrado nga kasulatan. Ang mga introduksyon nga naimprinta sa mga letra nga wala nagahilay patuo pareho sang sa 1 Nefi kag sang gilayon nga ginasundan sang Mosias kapitulo 9, kabahin man sang sagrado nga kasulatan. Ang mga introduksyon nga naimprinta sa mga letra nga nagahilay patuo pareho sang sa mga introduksyon sang kapitulo indi orihinal nga mga kasulatan kundi mga bulig sa pagtuon nga ginlakip agud mangin mahapos ang pagbasa.

Pila ka magagmay nga mga sayop sa teksto ang napadayon sa nagliligad nga mga edisyon sang Libro ni Mormon nga ginbantala sa Ingles. Ini nga edisyon nagaunod sang mga koreksyon nga ginatan-aw nga nagakabagay nga ipasanto sa mga manuskrito antes sang pagbantala kag sa nahauna nga mga edisyon nga gin-koreksyonan sang Propetang si Joseph Smith.