1 Tan-awa, mga kauturan ko, wala bala ninyo madumdumi ang pagbasa sang mga pulong sang propeta nga si Zenos, nga iya ginhambal sa panimalay ni Israel nga nagasiling:

2 Dungga, O kamo nga panimalay ni Israel, kag pamatii ang mga pulong nakon nga isa ka propeta sang Ginuo.

3 Kay tan-awa, amo ini ang siling sang Ginuo, ipaanggid ko ikaw, O panimalay ni Israel, pareho sa isa ka kultibado nga kahoy nga olivo, nga gindala sing isa ka tawo kag ginsagod sa iya katamnan; kag ini nagtubo, kag naggulang, kag nagsugod nga maggabok.

4 Kag natabo ini nga ang amo sang katamnan naglibot, kag nakita niya nga ang iya kahoy nga olivo nagsugod nga maggabok; kag nagsiling sia: Panapsan ko ini, kag sadulan ini palibot, kag saguron ini, agud nga basi pa lang manalingsing ini sing bag-o kag linghod nga mga sanga, kag indi ini malaya.

5 Kag natabo ini nga ginpanapsan niya ini, kag ginsadulan ini palibot, kag ginsagod ini suno sa iya pulong.

6 Kag natabo ini nga pagkatapos sang madamo nga mga inadlaw nagsugod ini sa pagpanalingsing sing medyo diutay, nga bag-o kag linghod nga mga sanga; apang tan-awa, ang punta nga bahin sang mga ini nagsugod nga malaya.

7 Kag natabo ini nga nakita ini sang amo sang katamnan, kag nagsiling sia sa iya alagad: Ginakasubo ko nga madula sa akon ini nga kahoy; gani, maglakat ka kag magpamuksi sang mga sanga halin sa isa ka talunon nga kahoy nga olivo, kag dal-a ang mga ini diri sa akon; kag panapson naton inang puno nga mga sanga nga nagasugod sa paglaya, kag idap-ong naton ang mga ini sa kalayo agud nga masunog ang mga ini.

8 Kag tan-awa, siling sang Ginuo sang katamnan, kuhaon ko ang madamo sining bag-o kag linghod nga mga sanga, kag isugpon ko ang mga ini sa bisan diin nga akon luyag; kag indi importante nga kon ang gamot sini nga kahoy malaya, mahimo ko nga matago ang bunga sini para sa akon kaugalingon; gani, kuhaon ko ining bag-o kag linghod nga mga sanga, kag isugpon ko ang mga ini sa bisan diin nga akon luyag.

9 Dal-on mo ang mga sanga sang talunon nga kahoy nga olivo, kag isugpon ang mga ini sa ginkuhaan sini; kag ining akon ginpamuksi idap-ong ko sa kalayo kag sunogon ang mga ini, agud nga indi maglapta ang mga ini sa duta sang akon katamnan.

10 Kag natabo ini nga ginhimo sang alagad sang Ginuo sang katamnan ang suno sa pulong sang Ginuo sang katamnan, kag ginpanugpon ang mga sanga sang talunon nga kahoy nga olivo.

11 Kag nagsugo ang Ginuo sang katamnan nga dapat ini sadulan palibot, kag panapsan, kag saguron nga nagasiling sa iya alagad: Ginakasubo ko nga madula sa akon ini nga kahoy; gani, agud nga basi pa lang maamligan ko ang mga gamot sini nga indi malaya ang mga ini, agud nga basi pa lang maamligan ko ang mga ini para sa akon kaugalingon, ginhimo ko ini nga butang.

12 Gani, maglakat ka; bantayi ang kahoy, kag sagura ini, suno sa akon mga pulong.

13 Kag ang mga ini ibutang ko sa pinakamanubo nga bahin sang akon katamnan, bisan diin nga luyag ko, indi ini importante sa imo; kag ini himuon ko agud nga maamligan ko sa akon kaugalingon ang kinaugali nga mga sanga sang kahoy; kag amo man, nga mahimo ko nga matago ang bunga sini tubtob sa madason nga patubas, para sa akon kaugalingon; kay ginakasubo ko nga madula sa akon ini nga kahoy kag ang bunga sini.

14 Kag natabo ini nga ang Ginuo sang katamnan naglakat, kag gintago ang kinaugali nga mga sanga sang kultibado nga kahoy nga olivo sa pinakamanubo nga mga bahin sang katamnan, ang iban sa isa kag ang iban sa isa pa gid, suno sa iya kabubut-on kag ikalipay.

15 Kag natabo ini nga isa ka malawig nga panahon ang naglabay, kag ang Ginuo sang katamnan nagsiling sa iya alagad: Dali, madulhog kita sa katamnan, agud nga magpangabudlay kita sa katamnan.

16 Kag natabo ini nga ang Ginuo sang katamnan, kag amo man ang alagad, nagdulhog sa katamnan sa pagpangabudlay. Kag natabo ini nga ang alagad nagsiling sa iya amo: Tan-awa, tulok diri; tan-awa ang kahoy.

17 Kag natabo ini nga ang Ginuo sang katamnan nagtulok kag nakita ang kahoy nga sa diin ang talunon nga mga sanga sang olivo ginsugpon; kag nagtubo ini kag nagsugod sa pagpamunga. Kag nakita niya nga maayo ini; kag ang bunga sini pareho sang kinaugali nga bunga.

18 Kag nagsiling sia sa alagad: Tan-awa, kinuha sang mga sanga sang kahoy nga talunon ang kahun-og sang gamot sini, nga ang gamot sini nagdala sing tuman nga kusog; kag tungod sang tuman nga kusog sang gamot sini ang talunon nga mga sanga nagdala sang kultibado nga bunga. Karon, kon wala naton pag-isugpon ining mga sanga, ang kahoy sini pat-od gid nga nalaya. Kag karon, tan-awa, magapanipon ako sang madamo nga bunga nga gindala sang kahoy sini; kag ang bunga sini igatigana ko tubtob sa madason nga patubas para sa akon kaugalingon.

19 Kag natabo ini nga ang Ginuo sang katamnan nagsiling sa alagad: Dali, makadto kita sa pinakamanubo nga bahin sang katamnan, kag tan-awon kon ang kinaugali nga mga sanga sang kahoy wala man magdala sing madamo nga bunga, agud nga matigana ko ang bunga sini tubtob sa madason nga patubas para sa akon kaugalingon.

20 Kag natabo ini nga nagkadto sila kon diin gintago sang amo ang kinaugali nga mga sanga sang kahoy, kag nagsiling sia sa alagad: Tan-awa ang mga ini; kag nakita niya ang una nga nagdala ini sing madamo nga bunga; kag nakita man niya nga maayo ini. Kag nagsiling sia sa alagad: Panguhaa ang mga bunga sini, kag itigana ini tubtob sa madason nga patubas, agud nga matago ko ini para sa akon kaugalingon; kay tan-awa, siling niya, sa sining malawig nga panahon ginsagod ko ini, kag nagdala ini sing madamo nga bunga.

21 Kag natabo ini nga ang alagad nagsiling sa iya amo: Ngaa nagkadto ka diri sa pagtanom sini nga kahoy, ukon sining sanga sang kahoy? Kay tan-awa, amo ini ang pinakapigaw nga bahin sa bug-os nga duta sang imo katamnan.

22 Kag ang Ginuo sang katamnan nagsiling sa iya: Indi ako paglaygayi; nahibal-an ko nga mapigaw ini nga bahin sang duta; gani, nagsiling ako sa imo, ginsagod ko ini sining malawig nga panahon, kag imo ginatan-aw nga nagdala ini sing madamo nga bunga.

23 Kag natabo ini nga ang Ginuo sang katamnan nagsiling sa iya alagad: Tulok diri; tan-awa nagtanom ako sing isa pa gid ka sanga sang kahoy; kag nahibal-an mo nga mas mapigaw pa gid ini nga bahin sang duta sangsa nauna. Apang, tan-awa ang kahoy. Ginsagod ko ini sining malawig nga panahon, kag nagdala ini sing madamo nga bunga; gani, panipuna ini, kag itigana ini tubtob sa madason nga patubas, agud nga matago ko ini para sa akon kaugalingon.

24 Kag natabo ini nga ang Ginuo sang katamnan nagsiling liwat sa iya alagad: Tulok diri, kag tan-awa man ang isa pa ka sanga, nga akon gintanom; tan-awa nga ginsagod ko man ini, kag nagdala ini sing bunga.

25 Kag nagsiling sia sa alagad: Tulok diri kag tan-awa ang katapusan. Tan-awa, ini gintanom ko sa isa ka maayo nga bahin sang duta; kag ginsagod ko ini sining malawig nga panahon, kag isa lamang ka bahin sang kahoy ang nagdala sing kultibado nga bunga, kag ang iban nga bahin sang kahoy nagdala sing talunon nga bunga; tan-awa, ginsagod ko ini nga kahoy pareho sang iban.

26 Kag natabo ini nga ang Ginuo sang katamnan nagsiling sa alagad: Pamuksia ang mga sanga nga wala nagdala sing maayo nga bunga, kag idap-ong ang mga ini sa kalayo.

27 Apang tan-awa, ang alagad nagsiling sa iya: Panapsan naton ini, kag sadulan ini palibot, kag saguron ini sing diutay pa nga panahon, agud basi magdala ini sing maayo nga bunga sa imo, agud nga imo ini matigana tubtob sa madason nga patubas.

28 Kag natabo ini nga ginsagod sang Ginuo sang katamnan kag sang alagad sang Ginuo sang katamnan ang tanan nga bunga sang katamnan.

29 Kag natabo ini nga naglabay ang malawig nga panahon, kag ang Ginuo sang katamnan nagsiling sa iya alagad: Dali, madulhog kita sa katamnan, agud nga magpangabudlay kita liwat sa katamnan. Kay tan-awa, ang tion nagahilapit na, kag ang katapusan magaabot sa indi madugay; gani, kinahanglan gid nga magtigana ako sing bunga tubtob sa madason nga patubas para sa akon kaugalingon.

30 Kag natabo ini nga ang Ginuo sang katamnan kag ang alagad nagdulhog sa katamnan; kag nagkadto sila sa kahoy nga ang kinaugali nga mga sanga ginbanggi, kag ang talunon nga mga sanga ginpanugpon sa sini; kag tan-awa puno sang tanan nga sari sang bunga ang kahoy.

31 Kag natabo ini nga gintilawan sang Ginuo sang katamnan ang bunga, ang tagsa ka sari suno sa iya sini kadamuon. Kag ang Ginuo sang katamnan nagsiling: Tan-awa, sining malawig nga panahon ginsagod naton ini nga kahoy, kag nakatigana ako para sa akon kaugalingon sing madamo nga bunga tubtob sa madason nga patubas.

32 Apang tan-awa, sa sini nga tion nagdala ini sing madamo nga bunga, kag wala sing isa sini nga maayo. Kag tan-awa, yara ang tanan nga sahi sang malain nga bunga; kag wala ini sing kapuslanan sa akon, bisan pa sang tanan naton nga pagpangabudlay; kag karon ginakasubo ko nga madula sa akon ini nga kahoy.

33 Kag ang Ginuo sang katamnan nagsiling sa alagad: Ano ang aton pagahimuon sa kahoy, agud nga matago ko liwat ang maayo nga bunga sini para sa akon kaugalingon?

34 Kag ang alagad nagsiling sa iya amo: Tan-awa, bangod ginpanugpon mo ang mga sanga sang talunon nga kahoy nga olivo ginsagod sang mga ini ang mga gamot, sa bagay nga nabuhi ang mga ini kag ang mga ini wala malaya; gani ginatan-aw mo nga maayo pa gihapon ang mga ini.

35 Kag natabo ini nga ang Ginuo sang katamnan nagsiling sa iya alagad: Ang kahoy wala sing kapuslanan sa akon, kag ang mga gamot sini wala sing kapuslanan sa akon samtang nga magadala ini sing malain nga bunga.

36 Apang, nahibal-an ko nga maayo ang mga gamot, kag para sa akon kaugalingon nga katuyoan gin-amligan ko ang mga ini; kag tungod sang ila tuman nga kusog nagdala ang mga ini tubtob subong, halin sa talunon nga mga sanga, sang maayo nga bunga.

37 Apang tan-awa, nagtubo ang talunon nga mga sanga kag gindaug ang mga gamot sini; kag bangod nga gindaug sang talunon nga mga sanga ang mga gamot sini nagdala ini sing madamo nga malain nga bunga; kag bangod nga nagdala ini sing madamo nga malain nga bunga imo ginatan-aw nga nagasugod ini nga malaya; kag mangin wala na ini sing pulos sa indi madugay, sa bagay nga mahimo na ini nga idap-ong sa kalayo, luwas lang kon maghimo kita sing kon ano nga paagi para sa sini agud maamligan ini.

38 Kag natabo ini nga ang Ginuo sang katamnan nagsiling sa iya alagad: Madulhog kita sa pinakamanubo nga mga bahin sang katamnan, kag tan-awon kon ang kinaugali nga mga sanga nagdala man sing malain nga bunga.

39 Kag natabo ini nga nagdulhog sila sa pinakamanubo nga mga bahin sang katamnan. Kag natabo ini nga ila nakita nga ang bunga sang kinaugali nga mga sanga nangin tamasukon man; huo, ang una kag ang ika-duha kag amo man ang katapusan; kag tanan sila nangin tamasukon.

40 Kag gindaug sang talunon nga bunga sang katapusan inang bahin sang kahoy nga nagdala sing maayo nga bunga, tubtob nga ang sanga nalaya kag napatay.

41 Kag natabo ini nga ang Ginuo sang katamnan naghibi, kag nagsiling sa alagad: Ano pa gid kuntani ang dapat ko nga ginhimo para sa akon katamnan?

42 Tan-awa, nahibal-an ko nga ang tanan nga bunga sang katamnan, luwas sa mga ini, nangin tamasukon. Kag karon ang mga ini nga sang una nagdala sing maayo nga bunga nangin tamasukon man; kag karon ang tanan nga kahoy sang akon katamnan wala na sing pulos luwas lang nga ini pagatapson kag idap-ong sa kalayo.

43 Kag tan-awa ining ulihi, nga ang iya sanga nalaya, gintanom ko sa isa ka maayo nga bahin sang duta; huo, bisan inang hamili sa akon labaw pa sa tanan nga iban pa nga bahin sang duta sang akon katamnan.

44 Kag imo nakita nga akon man gin-utod inang nagasablag sining bahin sang duta, agud nga matanom ko ini nga kahoy bulos sa sina.

45 Kag imo nakita nga ang isa ka bahin sini nagdala sing maayo nga bunga, kag ang isa ka bahin sini nagdala sing talunon nga bunga; kag bangod wala ko pagpamuksia ang mga sanga sini kag idap-ong ang mga ini sa kalayo, tan-awa, gindaug sang mga ini ang maayo nga sanga sa bagay nga nalaya ini.

46 Kag karon, tan-awa, bisan pa sang tanan nga pagtatap nga aton ginhimo sa akon katamnan, ang mga kahoy sini nangin tamasukon, sa bagay nga ang mga ini wala magdala sing maayo nga bunga; kag ang mga ini ginlauman ko nga maamligan, agud nga matigana ko kuntani ang bunga sini tubtob sa madason nga patubas para sa akon kaugalingon. Apang, tan-awa, nangin pareho ang mga ini sang talunon nga kahoy nga olivo, kag wala na sing pulos ang mga ini kundi nga pagatapson kag idap-ong sa kalayo; kag ginakasubo ko nga madula sa akon ang mga ini.

47 Apang ano pa gid kuntani ang dapat ko nga ginhimo sa akon katamnan? Ginpauyaya ko bala ang akon kamot, nga wala ko ini pagsagura? Wala, ginsagod ko ini, kag ginsadulan ko ini palibot, kag ginpanapsan ko ini, kag gin-abunohan ko ini; kag gin-untay ko ang akon kamot halos sa bilog nga adlaw, kag ang katapusan nagahilapit na. Kag ginakasubo ko nga pagatapson ko ang tanan nga kahoy sang akon katamnan, kag idap-ong ang mga ini sa kalayo agud nga masunog ang mga ini. Sin-o bala ini nga nagpalain sang akon katamnan?

48 Kag natabo ini nga ang alagad nagsiling sa iya amo: Indi ayhan ang kataason sang imo katamnan—wala ayhan gindaug sang mga sanga sini ang mga gamot nga maayo? Kag bangod gindaug sang mga sanga ang mga gamot sini, tan-awa nagtubo sing madasig ang mga ini sangsa kusog sang mga gamot, nga nagakuha sing kusog para sa ila kaugalingon. Tan-awa, ginasiling ko, indi ayhan ini ang kabangdanan nga ang mga kahoy sang imo katamnan nangin tamasukon?

49 Kag natabo ini nga ang Ginuo sang katamnan nagsiling sa alagad: Malakat kita kag panapson ang mga kahoy sang katamnan kag idap-ong ang mga ini sa kalayo, agud nga indi maglapta ang mga ini sa duta sang akon katamnan, kay nahimo ko na ang tanan. Ano pa gid kuntani ang dapat ko nga ginhimo para sa akon katamnan?

50 Apang, tan-awa, ang alagad nagsiling sa Ginuo sang katamnan: Hatagi ini sing diutay pa nga panahon.

51 Kag ang ginuo nagsiling: Huo, hatagan ko ini sing diutay pa nga panahon, kay ginakasubo ko nga madula sa akon ang mga kahoy sang akon katamnan.

52 Gani, panguhaon naton ang mga sanga sining akon ginpananom sa pinakamanubo nga mga bahin sang akon katamnan, kag isugpon naton ang mga ini sa kahoy nga kon diin naghalin ang mga ini; kag pamuksion naton halin sa kahoy inang mga sanga nga ang bunga labing mapait, kag isugpon ang kinaugali nga mga sanga sang kahoy bulos sa sina.

53 Kag ini pagahimuon ko agud nga ang kahoy indi malaya, agud nga, basi pa lang, maamligan ko sa akon kaugalingon ang mga gamot sini para sa akon kaugalingon nga katuyoan.

54 Kag, tan-awa, ang mga gamot sang kinaugali nga mga sanga sang kahoy nga akon gintanom bisan diin nga akon ginbuot mga buhi pa gihapon; gani, agud nga maamligan ko man ang mga ini para sa akon kaugalingon nga katuyoan, panguhaon ko ang mga sanga sini nga kahoy, kag isugpon ko ang mga ini sa ila. Huo, isugpon ko ang mga ini sa mga sanga sang kahoy nga sa diin naghalin ang mga ini, agud nga maamligan ko man ang mga gamot para sa akon kaugalingon, agud nga kon igo na sila nga mabakod basi pa lang nga magdala ang mga ini sing maayo nga bunga para sa akon, kag magakalipay pa gihapon ako sa bunga sang akon katamnan.

55 Kag natabo ini nga nagpanguha sila halin sa kinaugali nga kahoy nga nangin talunon, kag ginsugpon ini sa kinaugali nga mga kahoy nga nangin talunon man.

56 Kag nagpanguha man sila halin sa kinaugali nga mga kahoy nga nangin talunon, kag ginsugpon ini sa kahoy nga ila ginhalinan.

57 Kag ang Ginuo sang katamnan nagsiling sa alagad: Indi pagpamuksia ang talunon nga mga sanga halin sa mga kahoy, luwas sa sinang mga labing mapait; kag sa mga ini igasugpon ninyo ang suno sa sinang akon ginsiling.

58 Kag saguron naton liwat ang mga kahoy sang katamnan, kag panapsan naton ang mga sanga sini; kag pamuksion naton halin sa kahoy inang mga sanga nga nangin wala’y pulos, nga pat-od gid nga malaya, kag idap-ong ang mga ini sa kalayo.

59 Kag ini pagahimuon ko agud nga, basi pa lang, ang mga gamot sini magabakod tungod sang ila kaayo; kag tungod sang pag-ilis sang mga sanga, agud nga dag-on sang maayo ang malain.

60 Kag bangod nga naamligan ko ang kinaugali nga mga sanga kag ang mga gamot sini, kag nga napangsugpon ko liwat ang kinaugali nga mga sanga sa kahoy nga ila ginhalinan, kag naamligan ang mga gamot sang kahoy nga ila ginhalinan, nga, basi pa lang, ang mga kahoy sang akon katamnan mahimo nga magdala liwat sing maayo nga bunga; kag nga mahimo ako nga magkalipay liwat sa bunga sang akon katamnan, kag, basi pa lang, nga mahimo ako nga magkasadya sing tuman nga akon naamligan ang mga gamot kag mga sanga sang una nga bunga—

61 Gani, maglakat ka, kag magpanawag sing mga alagad, agud nga mahimo kita nga magpangabudlay sing matutum sa aton ikasarang sa katamnan, agud nga mahanda naton ang paagi, agud nga mahimo ko nga madala liwat ang kinaugali nga bunga, nga ang amo nga kinaugali nga bunga maayo kag ang labing hamili sa tanan nga iban pa nga bunga.

62 Gani, malakat kita kag magpangabudlay sa aton ikasarang sa sining katapusan nga tion, kay tan-awa, ang katapusan nagahilapit na, kag amo ini ang katapusan nga tion nga panapsan ko ang akon katamnan.

63 Isugpon ang mga sanga; sugori sa naulihi agud nga ang mga ini mahimo nga mag-una, kag nga ang nauna mahimo nga maulihi, kag saduli palibot ang mga kahoy, pareho nga gulang kag linghod, ang nauna kag ang naulihi; kag ang naulihi kag ang nauna, agud nga ang tanan mahimo nga masagod liwat sa katapusan nga tion.

64 Gani, saduli palibot ang mga ini, kag panapsi ang mga ini, kag abunohi liwat ang mga ini, sa katapusan nga tion, kay ang katapusan nagahilapit na. Kag kon ining katapusan nga mga sugpon magatubo, kag magdala sing kinaugali nga bunga, dayon igahanda ninyo ang paagi para sa ila, agud nga magtubo ang mga ini.

65 Kag samtang nagatubo ang mga ini panguhaon ninyo ang mga sanga nga nagadala sing mapait nga bunga, suno sa kusog sang maayo kag sang kadakuon sini; kag indi ninyo pag-uboson panghawan sa gilayon ang malain sini, kay basi nga ang mga gamot sini mangin tama kabaskog para sa sugpon, kag ang sugpon sini malaya, kag madulaan ako sang mga kahoy sang akon katamnan.

66 Kay ginakasubo ko nga madula sa akon ang mga kahoy sang akon katamnan; gani panguhaon ninyo ang malain suno sa pagtubo sang maayo, agud nga ang gamot kag ang ugbos mangin magkapareho ang kusog, tubtob nga dag-on sang maayo ang malain, kag ang malain pagatapson kag idap-ong sa kalayo, agud nga indi sila maglapta sa duta sang akon katamnan; kag sa amo nga paagi masilhig ko ang malain pagwa sa akon katamnan.

67 Kag ang mga sanga sang kinaugali nga kahoy isugpon ko liwat sa kinaugali nga kahoy;

68 Kag ang mga sanga sang kinaugali nga kahoy isugpon ko sa kinaugali nga mga sanga sang kahoy; kag sa amo nga paagi mapanumbalik ko liwat ang mga ini, agud nga magdala ang mga ini sing kinaugali nga bunga, kag mangin isa sila.

69 Kag ang malain ipanghaboy, huo, bisan pagwa sa bug-os nga duta sang akon katamnan; kay tan-awa, sining makaisa lamang pagapanapsan ko ang akon katamnan.

70 Kag natabo ini nga ginpadala sang Ginuo sang katamnan ang iya alagad; kag naglakat ang alagad kag ginhimo ang suno sa ginsugo sang ginuo sa iya, kag nagdala sing iban pa nga mga alagad; kag diutay lang sila.

71 Kag ang Ginuo sang katamnan nagsiling sa iya: Maglakat kamo, kag magpangabudlay sa katamnan, sa inyo ikasarang. Kay tan-awa, amo ini ang katapusan nga tion nga pagasaguron ko ang akon katamnan; kay ang katapusan nagahilapit na, kag ang panahon madasig nga magaabot; kag kon magpangabudlay kamo sa inyo ikasarang upod sa akon magakalipay kamo sa bunga nga akon igatigana para sa akon kaugalingon bilang pagpanghanda sa tion nga madali na lang mag-abot.

72 Kag natabo ini nga ang mga alagad naglakat kag nagpangabudlay sa ila ikasarang; kag ang Ginuo sang katamnan nagpangabudlay man upod sa ila; kag nagtuman sila sang mga kasugoan sang Ginuo sang katamnan sa tanan nga butang.

73 Kag nagsugod nga nangin may kinaugali nga bunga liwat sa katamnan; kag ang kinaugali nga mga sanga nagsugod sa pagtubo kag pagdabong sing tuman; kag ang talunon nga mga sanga nagsugod nga ginpamuksi kag ginpanghaboy; kag ginmentinar nila ang gamot kag ang ugbos sini nga magkapareho, suno sa kusog sini.

74 Kag sa amo nga paagi nagpangabudlay sila, upod ang tanan nga katutum, suno sa mga kasugoan sang Ginuo sang katamnan, bisan tubtob nga ang malain mapanghaboy pagwa sa katamnan, kag naamligan sang ginuo para sa iya kaugalingon sa bagay nga ang mga kahoy liwat nga nangin kinaugali nga bunga; kag nangin pareho sila sing isa ka lawas; kag ang mga bunga palareho; kag naamligan sang Ginuo sang katamnan para sa iya kaugalingon ang kinaugali nga bunga, nga labing hamili sa iya halin sa ginsuguran.

75 Kag natabo ini nga sang makita sang Ginuo sang katamnan nga ang iya bunga maayo, kag nga ang iya katamnan indi na tamasukon, ginpanawag niya ang iya mga alagad, kag nagsiling sa ila: Tan-awa, sa sining katapusan nga tion ginsagod naton ang akon katamnan; kag inyo makita nga ginhimo ko ang suno sa akon kabubut-on; kag naamligan ko ang kinaugali nga bunga, nga ini maayo, bisan kapareho sa ginsuguran. Kag bulahan kamo; kay bangod nangin matutum kamo sa pagpangabudlay upod sa akon sa akon katamnan, kag nagtuman sang akon mga kasugoan, kag nagdala liwat sa akon sang kinaugali nga bunga, ang akon katamnan indi na tamasukon, kag ang malain napanghaboy na, tan-awa mangin inyo ang kalipay upod sa akon tungod sang bunga sang akon katamnan.

76 Kay tan-awa, sa sining malawig nga tion igatigana ko ang bunga sang akon katamnan para sa akon kaugalingon tubtob sa madason nga patubas, nga madasig nga magaabot; kag sa katapusan nga tion ginsagod ko ang akon katamnan kag ginpanapsan ini, kag ginpangsadulan ini palibot, kag gin-abunohan ini; gani magatigana ako para sa akon kaugalingon sang bunga, sa malawig nga tion, suno sa sinang akon ginhambal.

77 Kag kon mag-abot ang tion nga ang malain nga bunga magaabot liwat sa akon katamnan, dayon ipahanabo ko nga mapanipon ang maayo kag ang malain; kag ang maayo igatigana ko para sa akon kaugalingon, kag ang malain ipanghaboy ko sa iya kaugalingon nga lugar. Kag dayon magaabot ang panahon kag ang katapusan; kag ipahanabo ko nga ang akon katamnan pagasunogon sang kalayo.