Espirituhanon nga mga Manggad
Samtang ginapakita ninyo ang pagtuo sa Ginuo kag sa Iya gahum sang priesthood, magatubo ang inyo ikasarang sa pagbaton sining espirituhanon nga manggad nga gintigana sang Ginuo.
Salamat sa sinang matahum nga musika. Samtang nagatindog kita tanan sa pagkanta sinang pangtunga-tunga nga kanta, “We Thank Thee, O God, for a Prophet,” may duha ka mabaskog nga mga pandumduman ang nag-abot sa akon. Isa amo ang parte kay Propetang Joseph Smith, ang propeta sang sini nga dispensasyon. Ang akon pagpalangga kag pagdayaw sa iya nagadako sa tagsa ka pagligad sang adlaw. Ang ikaduha nga panumduman natabo sang magtulok ako sa akon asawa, mga kabataan nga babayi, mga apo nga babayi, kag mga apo sa tuhod nga babayi. Pamatyag ko daw gusto ko angkunon ang kada isa sa inyo nga parte sang akon pamilya.
Pila na ka bulan ang nagligad, sa katapusan sang isa ka sesyon sang endowment sa templo, ginsiling ko sa akon asawa nga si Wendy, “Tani naintiendihan sang mga sister ang espirituhanon nga mga manggad nga ara para sa ila sa sulod sang templo.” Mga sister, masami ko kamo nga ginapanumdom, lakip na sang duha ka bulan nga nagligad sang nagbisita kami ni Wendy sa Harmony, Pennsylvania.
Ikaduha na namon nga kadto didto. Sa pareho nga beses nangin emosyonal gid kami samtang nagalakat sa sinang sagrado nga duog. Malapit sa Harmony sang si Juan Bautista nagpakita kay Joseph Smith kag ginpanumbalik ang Aaronic Priesthood.
Didto man sila ni Apostoles Pedro, Santiago, kag Juan nagpakita agud ipanumbalik ang Melchizedek Priesthood.
Sa Harmony si Emma Hale Smith nagserbisyo bilang una nga eskriba sang iya bana samtang ginalubad sang Propeta ang Libro ni Mormon.
Sa Harmony man nabaton ni Joseph ang isa ka rebelasyon nga nagapahayag sang pagbuot sang Ginuo para kay Emma. Gintulinan sang Ginuo si Emma sa pagpaathag sang balaan nga mga kasulatan, sa paglaygay sang Simbahan, sa pagbaton sang Balaan nga Espiritu, kag sa paggamit sang iya oras sa “pagtuon sing madamo.” Ginlaygayan man si Emma nga “ipahigad ang mga butang sining kalibutan, kag pangitaon ang mga butang nga mas maayo” kag magkapyot sing maayo sa iya mga kasugtanan sa Dios. Gintapos sang Ginuo ang Iya panulin upod sining mabaskog nga mga tinaga: “Amo ini ang akon tingug sa tanan.”
Tanan nga natabo sa sining area may dako nga epekto sa inyo mga kabuhi. Ang pagpanumbalik sang priesthood, kaupod sang laygay kay Emma, makagiya kag makabugay sa tagsa sa inyo. Handum ko gid nga inyo maintiendihan nga ang pagpanumbalik sang priesthood pareho kaimportante sa inyo bilang babayi subong sa bisan sin-o nga lalaki. Tungod ginpanumbalik ang Melchizedek Priesthood, ang pareho nga babayi kag lalaki nga nagatuman sang kasugtanan makabaton sang “tanan nga espirituhanon nga mga bugay sang simbahan” ukon, masiling naton, sang tanan nga espirituhanon nga mga manggad nga gintigana sang Ginuo para sa Iya kabataan.
Ang kada babayi kag kada lalaki nga nagahimo sang kasugtanan sa Dios kag nagatuman sining mga kasugtanan, kag nagapartisipar nga takos sa mga ordinansa sang priesthood, may direkta nga kinamatarong sa gahum sang Dios. Ang mga na-endow sa balay sang Ginuo nagabaton sang regalo sang gahum sang priesthood sang Dios paagi sa ila kasugtanan, upod ang regalo sang ihibalo kon paano gamiton inang gahum.
Ang mga langit pareho nga bukas sa kababayin-an nga nahatagan sang gahum sang Dios nga resulta sang ila mga kasugtanan sa priesthood sa mga lalaki nga nagakapot sang priesthood. Kabay nga inang kamatuoran magatatak sa tagsa ninyo ka tagipusuon bangud nagapati ako nga pagabag-uhon sini ang inyo kabuhi. Mga sister, may kinamatarong kamo nga magbaton sang gahum sang Manluluwas agud buligan ang inyo pamilya kag ang iban nga inyo ginapalangga.
Karon, mahimo nga masiling kamo sa inyo kaugalingon, “Kanami pamatian, pero paano ko ina himuon? Paano ko batunon ang gahum sang Manluluwas sa akon kabuhi?”
Indi ninyo makita ining proseso nga nasulat sa bisan ano nga manwal. Ang Balaan nga Espiritu amo ang inyo mangin personal nga manunudlo samtang inyo ginatinguhaan nga maintiendihan ang luyag sang Ginuo nga inyo mahibal-an kag buhaton. Indi madali ukon mahapos ining proseso, apang ini maka papagsik sa espirituhanon. Ano pa ayhan ang mas masadya sangsa magtrabaho upod sa Espiritu agud maintiendihan ang gahum sang Dios—ang gahum sang priesthood?
Ang sarang ko mahambal sa inyo amo nga ang pagbaton sang gahum sang Dios sa inyo kabuhi nagapangayo sang pareho nga mga butang nga ginpanulin sang Ginuo nga himuon ni Emma kag sang tagsa sa inyo.
Gani, ginaimbitar ko kamo nga tun-an sing mainampuon ang seksyon 25 sang Doktrina kag mga Kasugtanan kag diskubrehon kon ano ang gusto sang Balaan nga Espiritu nga itudlo sa inyo. Ang inyo personal nga espirituhanon nga pagpaninguha magadala sa inyo sang kalipay samtang kamo nagaagom, nagaintiendi, kag nagagamit sang gahum nga ginhatag sa inyo.
Kabahin sining pagpaninguha magapangayo sa inyo nga ipahigad ang madamo nga mga butang sang sining kalibutan. Kon kaisa halos ordinaryo na lang sa aton nga magsiling nga magtalikod sa kalibutan sang kagamo, lapnagon nga kalainan, kag sayop nga mga pilosopiya. Pero ang matuodtuod nga paghimo sini nagapangayo nga tan-awon ninyo sing maid-id kag masunson ang inyo kabuhi. Sa inyo paghimo sini, ang Balaan nga Espiritu magapabatyag sa inyo kon ano ang indi na kinahanglan, kon ano ang indi na bagay sa inyo oras kag kusog.
Sa inyo pagkambyo sang inyo atensyon sa kalibutanon, ang pila ka mga butang nga daw importante para sa inyo sa karon maganubo sang prayoridad. Kinahanglan ninyo nga magpangindi sa pila ka mga butang, bisan pa nga daw indi man ini malain. Sa inyo pagsugod kag pagpadayon sa sining bilog-nga-kabuhi nga proseso sang pagkonsagrar sang inyo kabuhi sa Ginuo, ang mga pagbag-o sa inyo panan-awan, balatyagon, kag espirituhanon nga kusog makakibot sa inyo!
Pero diutay lang nga paandam. May mga gusto nga paluyahon ang inyo ikasarang nga magpanawag sa gahum sang Dios. May mga magpaluya sang inyo pagsalig sa kaugalingon kag magpanubo sang inyo dalayawon nga espirituhanon nga kapasidad bilang matarong nga babayi.
Sigurado gid, indi gusto sang kaaway nga inyo maintiendihan ang kasugtanan nga inyo ginhimo sa bunyag ukon ang dako nga paghatag sang ihibalo kag gahum nga inyo nabaton ukon mabaton sa templo—sa balay sang Ginuo. Kag sigurado gid nga indi gusto si Satanas nga inyo maintiendihan nga sa tagsa ka tion nga nagaserbisyo kamo kag nagasimba sing takos sa templo, nagagwa kamo nga armado sang gahum sang Dios kag kaupod ang Iya mga anghel nga “nagabantay” sa inyo.
Si Satanas kag ang iya angheles padayon nga magabutang sang mga sablag nga magapungong sa inyo sa pag-intiendi sang espirituhanon nga mga regalo nga nagbugay ukon makabugay sa inyo. Sa malain nga palad, ang pila ka mga balabag mahimo nga resulta sang malain nga pamatasan sang iban. Nasuboan ako mamensar nga ang bisan sin-o sa inyo nakabatyag nga indi importante ukon wala ginpatihan sang isa ka lider sang priesthood ukon gin-abuso ukon ginluiban sang bana, amay, ukon sang kuntani abyan. Dako gid ang akon kasubo ang ang bisan sin-o sa inyo nagabatyag nga wala ginasapak, wala ginarespeto, ukon ginhukman sang sayop. Ang subong nga mga kalapasan wala sing lugar sa ginharian sang Dios.
Sa pihak nga bahin, ginasadyahan ako nga makabati sang mga lider sa priesthood nga mapisan nga nagapaisog sang partisipasyon sang kababayin-an sa mga konseho sa ward kag stake. Nagakainspirar ako sang tagsa ka bana nga nagapakita nga ang iya pinakaimportante nga responsibilidad sa priesthood amo ang pag-atipan sa iya asawa. Ginadayaw ko inang tawo nga ginarespeto sing dako ang ikasarang sang iya asawa nga magbaton sang rebelasyon kag ginakabig sia bilang katuwang sa ila pag-asawahay.
Kon naintiendihan sang isa ka lalaki ang katahum kag gahum sang matarong, nagahandum, na-endow nga babayi nga Santos sa Ulihing Adlaw, katingalahan bala kon gusto niya magtindog kada magsulod sia sa kwarto?
Halin sa umpisa sang panahon, ang kababayin-an ginbugayan sang pinasahi nga moral nga kompas—ang ikasarang sa pagkilala sang husto sa sayop. Ining regalo mas ginpadako sa ila nga nagahimo kag nagatuman sang mga kasugtanan. Kag nagatahaw ini sa mga hungod sa buot nga nagabale-wala sang mga kasuguan sang Dios.
Gusto ko idugang nga wala ko ginakakas ang responsibilidad sang kalalakin-an sa rekisitos sang Dios nga sila man dapat maghibalo sang husto kag sayop. Pero pinalangga ko nga mga sister, ang inyo ikasarang sa pagkilala sang kamatuoran sa sayop, ang mangin bantay sang moralidad sang sosyedad, importante kaayo sa sining ulihing mga adlaw. Kag nagasalig kami sa inyo nga tudloan ang iban nga himuon ang amo man. Gusto ko nga athagon ini kaayo: kon ang kalibutan madulaan sang moral nga pagkamatarong sang iya kababayin-an, ang kalibutan indi na mag-uswag.
Kita nga mga Santos sa Ulihing mga Adlaw indi iya sang kalibutan; iya kita sang Israel nga may kasugtanan. Gintawag kita sa paghanda sang katawhan para sa Ika-duhang Pagkari sang Ginuo.
Luyag ko athagon ang pila ka dugang nga punto nahanungod sa kababayin-an kag sa priesthood. Sang kamo ginpain sa pagserbisyo sa isa ka calling sa idalom sang direksyon sang isa nga nagakapot sang mga yabi sang priesthood—pareho sang inyo bishop ukon stake president—ginhatagan kamo sang awtoridad sang priesthood sa paggiho sa sina nga calling.
Sa amo man, sa sulod sang balaan nga templo awtorisado kamo nga maghikot kag manguna sa mga ordinansa sang priesthood tagsa ka tion nga magtambong kamo. Ang inyo endowment sa templo nagahanda sa inyo sa paghimo sini.
Kon ikaw endowed pero wala pa nakasal sa lalaki nga nagakapot sang priesthood kag may magsiling sa inyo, “Ahay wala ka iya sang priesthood sa imo puluy-an,” palihog intiendiha nga sayop ang ina nga pahayag. Mahimo nga wala sang tawo nga nagakapot sang priesthood sa inyo balay, pero nagbaton kag naghimo kamo sang sagrado nga mga kasugtanan upod sa Dios sa Iya templo. Sa sinang mga kasugtanan nagailig ang paghatag sang gahum sang Iya priesthood sa inyo. Kag tandai, kon mapatay ang inyo bana, kamo ang magapamuno sa inyo puluy-an.
Bilang matarong, na-endow nga babaying Santos sa Ulihing mga Adlaw, nagahambal kamo kag nagatudlo nga may gahum kag awtoridad sang Dios. Bisan sa pagpaisog ukon sa paghinambalanay, kinahanglan namon ang inyo tingug nga nagatudlo sang doktrina ni Cristo. Kinahanglan namon ang inyo mga ideya sa mga konseho sang pamilya, ward, kag stake. Ang inyo partisipasyon importante kag indi pang-dekorasyon!
Pinalangga ko nga mga sister, ang inyo gahum magadako samtang kamo nagaserbisyo sa iban. Ang inyo mga pangamuyo, pagpuasa, tion sa balaan nga mga kasulatan, pagserbisyo sa templo kag sa hilikuton sa family history magabukas sang kalangitan sa inyo.
Ginapangabay ko kamo nga tun-i sing mainapuon ang tanan nga mga kamatuoran nga inyo makita parte sa gahum sang priesthood. Pwede ninyo sugdan sa Doktrina kag mga Kasugtanan seksyon 84 kag 107. Ang inang mga seksyon magatuytoy sa inyo sa iban pa nga mga dinalan. Ang balaan nga mga kasulatan kag mga pinanudlo sang moderno nga mga propeta, mga manugtulok, kag mga manugpahayag puno sining mga kamatuoran. Samtang ang inyo pag-intiendi nagadako kag samtang ginapakita ninyo ang pagtuo sa Ginuo kag sa Iya gahum sang priesthood, magatubo ang inyo ikasarang sa pagbaton sining espirituhanon nga manggad nga gintigana sang Ginuo. Kon inyo ini himuon, makita ninyo nga mas makabulig kamo sa pagtuga sang wala katapusan nga mga pamilya nga nagahiliusa, naselyuhan sa templo sang Ginuo, kag puno sang pagpalangga sa aton Amay nga Langitnon kag kay Jesucristo.
Ang tanan naton nga pagpaninguha sa pag-minister sa kada isa, sa pagwali ang ebanghelyo, sa pagperpekto sang mga Santos, kag sa pagtubos sang mga minatay nagapadulong sa balaan nga templo. May yara na kita karon 166 ka mga templo sa bilog nga kalibutan, kag madamo pa ang maabot.
Sa nahibal-an ninyo, ang Salt Lake Temple, Temple Square, kag ang tupad nga plaza malapit sa Church Office Building pagakay-uhon sa isa ka proyekto nga masugod sa katapusan sining tuig. Ining sagrado nga templo dapat matipigan kag mahanda sa pag-inspirar sang palaabuton nga mga henerasyon, pareho sang pag-inspirar sini sa aton sa karon nga henerasyon.
Samtang nagadako ang Simbahan, mas madamo nga mga templo ang pagatukuron para ang mga pamilya makabaton sinang pinakadako sa tanan nga mga bugay, ang kabuhi nga wala katapusan. Ginakabig naton ang templo bilang ang pinakasagrado nga istraktura sa Simbahan. Tagsa nga ang mga plano sa pagpatindog sang bag-o nga templo ginalawag, nangin importante ini nga bahin sang aton kasaysayan. Sa aton nahambalan na sini nga gab-i, kamo nga mga sister importante sa buluhaton sa templo, kag ang templo amo ang lugar kon sa diin ninyo mabaton ang inyo pinakamataas nga espirituhanon nga mga manggad.
Palihog magpamati sang maayo kag maligdong kay akon na karon lawagon ang mga plano sa pagpatindog sang walo ka bag-o nga mga templo. Kon may isa nga lawagon sa lugar nga makahulugan sa inyo, ginapanugyan ko nga iduko lamang ang inyo ulo sing mainampuon nga may pagpasalamat sa inyo tagipusuon. Malipayon namon nga ginaanunsyo ang mga plano sa pagpatindog sang mga templo sa masunod nga mga lokasyon: Freetown, Sierra Leone; Orem, Utah; Port Moresby, Papua New Guinea; Bentonville, Arkansas; Bacolod, Philippines; McAllen, Texas; Cobán, Guatemala; kag Taylorsville, Utah. Salamat, pinalangga nga mga sister. Ginapasalamatan gid namon sing dako ang inyo pagbaton sining mga plano kag ang inyo maligdong nga reaksyon.
Karon, sa paghingapos, luyag ko nga magbilin sang bendisyon sa inyo, nga kabay inyo maintiendihan ang gahum sang priesthood nga ginhatag sa inyo kag nga inyo dugangan inang gahum paagi sa pagpakita sang inyo pagtuo sa Ginuo kag sa Iya gahum.
Pinalangga ko nga mga sister, upod ang dako nga pagtahod kag pagpasalamat, ginapahayag ko ang pagpalangga ko sa inyo. Sing mapainubuson, ginadeklarar ko nga ang Dios buhi! Si Jesus amo ang Cristo! Iya ini Simbahan. Ginapamatuod ko sa sagrado nga ngalan ni Jesucristo, amen.