2:3

Sa Gal-um kag Kasanag sang Adlaw, Ginuo, Updi Ako!

Ni Reyna I. Aburto

Ikaduha nga Manuglaygay sa Pangkabilugan nga Panguluhan sang Relief Society

Nagapamatuod ako sa inyo nga “sa gal-um kag kasanag sang adlaw” ang Ginuo magaupod sa aton, nga ang aton “mga kapipit-an [sarang] madaug sa kalipay kay Cristo,”

Isa sang aton pinalangga nga mga himno nagapautwas sang pangabay “Sa gal-um kag kasanag sang adlaw, Ginuo, updi ako!” Makaisa nakasakay ako sa eroplano sang naghilapit ini sa isa ka dako nga bagyo. Sang nagtamwa ako sa bintana, nakita ko ang madamol nga panganod sa ubos namon. Ang silak sang nagatunod nga adlaw nagbunggo sa mga panganod, nga nagapasanag kaayo sa mga ini. Sang wala madugayi ang eroplano nagpaubos sa madamol nga mga panganod, kag gulpi lang kami naputos sang kadulom nga nalimtan namon ang sobra nga kasanag nga amon nakita wala lang gid madugay.

Mahimo man nga magporma ang maitom nga mga panganod sa aton kabuhi, nga magalipod sa aton sa kasanag sang Dios kag bisan gani magtulod sa aton nga mamangkot kon ara pa bala inang kasanag para sa aton. Ang pila sining mga panganod amo ang depresyon, kabalaka, kag iban pa nga mental kag emosyunal nga pag-antos. Sarang sini liwaton ang aton panulok sa kaugalingon, sa iban, kag bisan pa sa Dios. Apektado sini ang mga babayi kag lalaki sa tanan nga edad sa tanan nga lugar sa kalibutan.

Pareho nga kamakaguba ang panganod sang pagduda nga mahimo mag-apekto sa iban nga wala pa nakaagi sining mga kabudlayan. Pareho sa bisan ano nga parte sang lawas, ang utok apektado man sang balatian, pagkasamad, kag indi balanse nga mga kemikal. Kon ang aton mga kaisipan nagaantos, nagakadapat nga magpangayo sang bulig sa Dios, sa mga tawo nga ara sa aton palibot, kag ikaayo sang kaisipan.

“Ang tanan nga tawo—lalaki kag babayi—gintuga sa dagway sang Dios. Ang kada isa pinalangga nga espiritu nga anak sang langitnon nga mga ginikanan, kag … ang kada isa may diosnon nga kinaiya kag kapalaran.” Pareho sa aton mga Ginikanan nga Langitnon kag sang aton Manluluwas, may pisikal kita nga lawas kag nagaagi sang mga emosyon.

Pinalangga nga mga sister, normal ang masubuan ukon mabalaka kon kaisa. Ang kasubo kag kabalaka natural nga mga emosyon sang tawo. Ugaling, kon pirme kita ginasubuan kag kon ang aton kasakit nagapugong sa aton nga mabatyagan ang pagpalangga sang aton Amay nga Langitnon kag sang Iya Anak kag ang impluwensya sang Balaan nga Espiritu, basi nagaantos kita sang depresyon, kabalaka, ukon iban pa nga emosyunal nga kondisyon.

Sang una ginsulat sang akon anak nga babayi: “May tion … [nga] nangin masubo ako kaayo pirme. Abi ko sadto ang kasubo isa ka butang nga dapat ikahuya, kag simbolo ini sang kahuyang. Gani gintago-tago ko lang ini. … Pamatyag ko wala ako sing pulos.”

Ang isa ka abyan naglaragway sini sa sini nga paagi: “Halin sang gamay pa ako, pirme ako nagapakig-away sa kawala paglaum, kadulom, kasubo, kag kahadlok kag sa pamatyagan nga may deperensya ukon depektibo ako. Ginhimo ko ang tanan agud itago ang akon kasakit kag wala gid maghatag sang tanda nga indi ako mabakod.”

Mga kauturan, pwede ini matabo sa bisan sin-o sa aton—labi na gid kon, bilang mga tumuluo sa plano sang kalipayan, ginahatagan naton sing huol ang aton kaugalingon sa pagpamensar nga kinahanglan perpekto na kita karon. Ang amo nga pamensaron makakalapoy. Ang paglab-ot sang pagkaperpekto isa ka proseso nga nagakatabo sa bilog naton nga kabuhi kag lapaw pa—kag paagi lamang sa grasya ni Jesucristo.

Sa kabaliskaran, kon ihambal naton ang aton mga nabatyagan, nga ginabaton nga indi kita perpekto, ginatugutan naton ang iban nga magpaambit man sa ila mga kabudlayan. Sing ululupod matun-an naton nga may paglaum kag indi kita kinahanglan mag-antos nga kita lang.

Bilang mga disipulo ni Jesucristo, nagpangako kita sa Dios nga kita “sugot nga magpas-an sang palas-anon sang isa kag isa” kag “magpangasubo upod sadtong mga nagapangasubo.” Pwede ini maglakip sang paghibalo parte sa emosyunal nga mga balatian, pagpangita sang makabulig sining mga kabudlayan, kag sa ulihi sa pagdala sang aton kaugalingon kag sang iban kay Cristo, nga amo ang Dako nga Manugbulong. Bisan wala kita makahibalo kon ano ang ginabatyag sang iban, ang pagbaton nga matuod ang sakit nga ila nabatyagan isa ka importante nga tikang padulong sa paghangop kag pag-ayo.

Sa pila ka mga kaso, ang rason sang depresyon ukon kabalaka mahimo makilala, pero kon kaisa mabudlay ini mahibal-an. Mahimo nga ang aton mga utok nagaantos sang stress ukon sobra nga kakapoy, nga kon kaisa pwede ini paayuhon sang mga pagliwat sa pagkaon, tulog, kag ehersisyo. Sa iban nga tion, ang therapy ukon pagbulong sa idalom sang ginhanas nga mga propesyunal mahimo nga kinahanglanon man.

Ang wala ginabulong nga balatian sa kaisipan ukon emosyon nagatuga sang mas dako nga pag-isahanon, indi pag-intiendihanay, pagkaguba sang mga relasyon, pagsakit sang kaugalingon, kag bisan sang paghikog. Ako mismo nakahibalo sini, tungod ang akon mismo amay naghikog madamo na nga tuig ang nagligad. Ginkakibot kag ginkasubo ko kag sang akon pamilya ang iya kamatayon. Tinuig pa sang malampuwasan ko ang kalisod, kag sang sini ko lang natun-an nga ang pag-istorya parte sa hikog sa nagakaangay nga paagi mas makabulig gali sangsa nagapaisog sang paghikog. Bukas ko na karon nga ginahambalan ang kamatayon sang akon amay sa akon kabataan kag nasaksihan ang pagpang-ayo sang Manluluwas sa pihak kag pihak nga bahin sang tilon.

Sa masubo nga palad, madamo sa nagaantos sang malala nga depresyon ang nagaantad sa pareho nila nga mga Santos tungod pamatyag nila indi na sila bagay. Makabulig kita sa ila nga mahibal-an kag mabatyagan nga kabahin sila naton. Importante nga kilalahon nga ang depresyon indi resulta sang kahuyang, kag indi ini masami resulta sang sala. Ini “nagadako sa sekreto pero nagagamay sa pag-unong.” Sing ululupod, mabungkag naton ang mga panganod sang pag-isahanon kag panulok sang tawo agud ang kahuy-anan madula kag ang mga milagro sang pag-ayo matabo.

Sa tion sang Iya mortal nga pag-alagad, ginpang-ayo ni Jesucristo ang mga masakiton kag nagaantos, pero ang tagsa ka tawo kinahanglan nga magpakita sang pagtuo sa Iya kag mag-akto agud mabaton ang Iya pagpang-ayo. May pila nga naglakat sing malawig, ang iban nagdab-ot para tandugon ang Iya bayo, kag ang iban kinahanglan kargahon palapit sa Iya para mag-ayo. Pag-abot sa pagpang-ayo, indi bala kita tanan nagakinahanglan sa Iya? “Indi bala kita tanan mga manugpakilimos?”

Sundon naton ang banas sang Manluluwas kag dugangan ang aton pagpakig-unong, buhinan ang huyog nga maghusga, kag untatan ang pagpamantay sang espiritwalidad sang iban. Ang pagpamati nga may pagpalangga isa sa pinakadako nga regalo nga aton mahatag, kag mahimo nga makabulig kita karga ukon alsa sang mabug-at nga gal-um nga nagakuga sang aton mga mahal sa kabuhi kag kaabyanan agud nga, paagi sa aton pagpalangga, mabatyagan nila liwat ang Balaan nga Espiritu kag makita ang kasanag nga nagahalin kay Jesucristo.

Kon pirme kamo ginapalibutan sang “alupuop sang kadudulman,” magliso sa Amay nga Langitnon. Wala sa inyo ginaagyan ang makabag-o sang wala katapusan nga kamatuoran nga kamo Iya mga anak kag palangga kamo Niya. Panumduma nga si Cristo amo ang inyo Manluluwas kag Manunubos, kag ang Dios amo ang imo Amay. Nakaintiendi Sila. Pamensara Sila nga ara sa inyo tupad, nagapamati kag nagasuporta. “Paumpawan [Nila] kamo sa inyo mga kapipit-an.” Himoa ang tanan nga inyo masarangan, kag magsalig sa nagabayad-sala nga grasya sang Ginuo.

Ang inyo mga kabudlayan wala nagalaragway sa inyo, kundi nagatinlo sa inyo. Bangod sang “tunok sa unod,” makaangkon kamo sang mas dako nga pagpakig-unong sa iban. Nga ginagiyahan sang Balaan nga Espiritu, ipaambit ang inyo istorya agud “buligan ang mga [mahuyang], bayawon ang mga kamot nga nagapalamuypoy, kag pabaskugon ang mga tuhod nga maluya.”

Para sa aton nga ginabudlayan karon ukon nagasuporta sang isa nga ginabudlayan, magmangin handa sa pagsunod sang mga kasuguan sang Dios agud dalayon nga maangkon ang Iya Espiritu sa pag-upod sa aton. Himuon naton ang “diutay kag [simple] nga mga butang” nga magahatag sa aton sang espirituhanon nga kusog. Pareho sang ginsiling ni Pangulong Russell M. Nelson, “Wala sang nagabukas sang mga langit pareho sang dugang nga katinlo, eksakto nga pagtuman, matutom nga pagpangita, adlaw-adlaw nga pagpaayaw sa mga pulong ni Cristo sa Libro ni Mormon, kag regular nga tion nga gintigana para sa templo kag sa hilikuton sa family history.”

Tandaan naton tanan nga ang aton Manluluwas, nga si Jesucristo, “[nagdala] sa iya kaugalingon sang [aton] mga kahuyangan, agud ang iya tagipusuon mahimo nga mapuno sang kaawa, suno sa unod, agud mahimo niya mahibal-an … kon paano magtabang [sa aton] suno sa [aton] mga kahuyangan.” Nag-abot Sia “sa pagbugkos sang buong sing tagipusuon, … sa paglipay sang tanan nga nagakasakit; … sa paghatag sa ila sang purong-purong sa baylo sang mga abo, sang lana sang kalipay sa baylo sang kasakit, sang panapton sang pagdayaw sa baylo sang espiritu sang kasubo.”

Nagapamatuod ako sa inyo nga “sa gal-um kag kasanag sang adlaw” ang Ginuo magaupod sa aton, nga ang aton “nga kapipit-an [sarang] madaug sa kalipay kay Cristo,” nga “paagi sa grasya kita naluwas, pagkatapos sang tanan nga aton mahimo.” Nagapamatuod ako nga si Jesucristo magabalik sa duta “nga may pagpaayo sa iya mga pakpak.” Sa katapusan, “pahiran Niya ang tagsa ka luha sa [aton] mga mata; kag wala na sing … kasakit pa.” Para sa tanan nga “magkari kay Cristo, kag magmangin himpit sa iya,” ang “adlaw indi na matunod … kay ang Ginuo mangin [aton] dayon nga kapawa, kag ang mga adlaw sang [aton] paglalaw matapos.” Sa ngalan ni Jesucristo, amen.