Ang Kalipay sang mga Santos
Ang kalipay maangkon sa pagtuman sang mga kasuguan ni Cristo, sa pagdaog sang kasubo kag kahuyang paagi sa Iya, kag sa pag-alagad kapareho sang Iya nga pagpangalagad.
Ang propetang si Enos sa Libro ni Mormon, apo ni Lehi, nagsulat sang isa ka tumalagsahon nga eksperiyensya nga natabo sa iya kabuhi sang lamharon pa sia. Nga nagapangayam nga isahanon, si Enos nagsugod sa pagbinagbinag sa mga pinanudlo sang iya amay nga si Jacob. Sia nagsugid, “Kag ang mga pulong nga masami ko mabatian nga ginahambal sang akon amay nahanungod sa kabuhi nga wala’y katapusan, kag sang kalipay sang mga santos, nagsalop sing madalom sa akon tagipusuon.1 Sa espirituhanon nga kagutom sang iya kalag, si Enos nagluhod sa pagpangamuyo, isa ka pinasahi nga pangamuyo nga naglawig sa bilog nga adlaw tubtob naggab-i, pangamuyo nga nagdala sa iya sa importante nga mga rebelasyon, pagpasalig, kag mga promisa.
May madamo sing matun-an gikan sa eksperiyensya ni Enos, apang sa karon ang nagapangibabaw sa akon panghunahuna amo ang handurawan ni Enos sang iya amay nga sa masami nagahambal parte sa “kalipayan sang mga santos.
Sa subong sini nga komperensya tatlo ka tuig ang nagligad, si Pangulong Russell M. Nelson naghambal parte sa kalipay.2 Ang pila sang iya ginpanghambal:
“Ang kalipay nga aton mabatyagan halos wala sing kalabtanan sa mga sirkumstansya sang aton mga kabuhi kag may dako kaayo nga kalabtanan sa ginatutokan sang aton mga kabuhi.
“Kon ang pagtutok sang aton mga kabuhi yara sa plano sang kaluwasan sang Dios, … kag kay Jesucristo kag sa Iya ebanghelyo, makabatyag kita sang kalipay walay sapayan sang nagakatabo—ukon wala nagakatabo—sa aton mga kabuhi. Ang kalipay nagahalin kag tungod sa Iya. … Para sa mga Santos sa Ulihing mga Adlaw, si Jesucristo amo ang kalipay!”3
Ang mga santos amo yadtong nagsulod sa kasugtanan sang ebanghelyo paagi sa bunyag kag nagatinguha sa pagsunod kay Jesucristo bilang Iya mga disipulo.4 Amo nga, ang “kalipay sang mga santos” nagakahulugan sang kalipay nga mangin kasubong ni Cristo.
Luyag ko maghambal sinang kalipay nga nagahalin sa pagtuman sang Iya mga kasuguan, ang kalipay nga nagahalin sa pagdaog sang kasubo kag kahuyang paagi sa Iya, kag sa kalipay nga upod sa pag-alagad kapareho sang Iya nga pagpangalagad.
Ang Kalipay sang Pagtuman sang mga Kasuguan ni Cristo
Nagapuyo kita sa panahon sang hedonismo sa diin madamo sang nagakwestyon sang importansya sang mga kasuguan sang Ginuo ukon basta nagabalewala sang mga ini. Sa masami, ang mga tawo nga nagabalewala sang mga diosnon nga mga kasuguan subong sang layi sang kaputli, ang talaksan sang katampad, kag ang kasagrado sang Adlaw nga inugpahuway daw nagauswag kag nagabaton sang maayo nga mga butang sa kabuhi, kon kaisa mas masobra pa sangsa mga nagapaninguha nga magmangin matinumanon. Ang iban nagasugod sa pagpangduhaduha kon bala ang ila mga pagpangabudlay kag mga pagsakripisyo makabayad man. Ang dumaan nga katawhan sang Israel kis-a nagreklamo:
“Wala sing pulos ang pag-alagad sa Dios, ano bala ang kapuslanan nga ginabantayan namon ang iya tinulin ukon nga nagalakat kami sing masinulub-on sa atubangan sang Ginuo sang mga kasuldadohan?
“Kag karon ginatawag naton nga malipayon ang bugalon; huo, ang mga nagahikot sang pagkamalaut ginapauswag; huo, ginasulay nila ang Dios kag nakapalagyo.“5
Maghulat lang, siling sang Ginuo, tubtob “sinang adlaw nga ako magahimo sang akon mga hiyas. … “Nian magabalik kamo … magakilala sang matarong kag sang malauton, sang nagaalagad sa Dios kag sang wala nagaalagad sa iya.”6 Ang mga malaut mahimo nga “may kalipay sila sa ila mga buluhaton sa malip-ot nga panahon,” apang temporaryo gid lamang ini pirme.7 Ang kalipay sang mga Santos nagalawig.
Makita sang Dios ang mga bagay suno sa iya sini padulongan, kag Iya ginapaambit sa aton ina nga padulongan paagi sa Iya mga kasuguan, nga epektibo nga nagagiya sa aton palikaw sa mga tugalbong kag mga batsi sang mortal nga kabuhi padulong sa walay katapusan nga kalipay. Ang peopetnag Joseph Smith nagpahayag: “Kon ang iya mga kasuguan nagatudlo sa aton nagatumod ini sing wala’y katapusan; kay ginatulok kita sang Dios bilang mga wala’y katapusan; ang Dios nagapuyo sa wala’y katapusan, kag wala nagatulok sa mga butang pareho sang aton panulok.“8
Wala pa ako nakasalapo sang isa ka tawo nga nakabaton sang ebanghelyo nga tigulang na nga wala naghandum nga kuntani nabaton niya ini sing mas temprano. Masiling na sila, “Ahay kuntani nalikawan ko ang akon pigaw nga mga pagpili kag mga sayop.” Ang mga kasuguan sang Dios amo ang aton gabay sa mas maayong mga pagpili kag mas malipayon nga mga resulta. Dapat kita malipay kag magpasalamat sa Iya sa pagpakita sining mas maayo nga paagi.
Bilang isa ka tin-edyer, si Sister Kalombo Rosette Kamwanya gikan sa D.R. Congo, karon nagaserbe sa Cote d’Ivoire Abidjan West Mission, nagpuasa kag nagpangamuyo sing tatlo ka adlaw agud makita ang direksyon nga luyag sang Dios nga iya agyan. Sa isa ka tumalagsahon nga palanan-awon sa kagab-ihon, ginpakita sa iya ang duha ka bilding, isa ka chapel kag isa nga sa karon iya nasayran nga isa ini ka templo. Nagsugod sia sa pagpangita kag sa wala madugayi iya nakita ang simbahan nga iya nakita sa iya damgo. Ang marka nagasiling, “Ang Simbahan ni Jesucristo sang mga Santos sa Ulihing mga Adlaw.” Si Sister Kamwanya ginbunyagan kag dumason ang iya iloy kag ang iya anum ka mga utod nga lalaki. Si Sister Kamwanya nagsiling, “Sang mabaton ko ang ebanghelyo, sa pamatyag ko daw pispis ako nga ginbuy-an. Ang akon tagipusuon napuno sang kalipay. … Nakaangkon ako sang kasegurohan nga palangga ako sang Dios.”9
Ang pagtuman sang mga kasuguan sang Ginuo nagatugot nga mabatyagan naton sing mas maayo kag mas mahapos mabatyagan ang Iya pagpalangga. Ang tadlong kag makitid nga dalan sang mga kasugoan direkta nga nagapadulong sa kahoy sang kabuhi, kag ang kahoy kag ang iya sini bunga, tuman katam-is kag “labing tilinguhaon labaw sa tanan nga butang.“10 mga representasyon sang gugma sang Dios kag nagapuno sang kalag “sang tuman kadako nga kalipay.“11 Siling sang Manluluwas:
“Kon magbantay kamo sang akon mga sugo, magapabilin kamo sa akon gugma; subong nga ako nagbantay sang mga sugo sang akon Amay kag nagapabilin sa iya gugma.
“Ining mga butang napamulong ko sa inyo, agud nga akon kalipay mangin yara sa inyo kag ang inyo kalipay mabug-os.”12
Ang Kalipay sa Paglampuwas Paagi kay Cristo
Bisan pa nga makita kita nga mga matutom sa pagtuman sang mga kasuguan, may yara sa gihapon sang mga pagtilaw nga makasablag sang aton kalipay. Apang kung magtinguha kita nga lampuwasan ining mga hangkat upod ang bulig sang Manluluwas, amligan sini pareho ang kalipay nga aton nabatyagan subong kag sang kalipay nga aton ginapaabot. Si Cristo nagpasalig sa Iya mga disipulo, “Sa kalibutan may kangitngitan kamo: apang magpakalig-on kamo; nadaug ko ang kalibutan.””13 Sa pagliso sa Iya, pagtuman sa Iya, paghigot sang aton mga kaugalingon sa Iya, inang pagtilaw kag kasubo mabaylohan sang kalipay. Mamitlang ako sing isa ka halimbawa.
Sang 1989, si Jack Rushton nagaserbe bilang pangulo sang Irvine California Stake sang Estados Unidos. Sa tion sang bakasyon sang pamilya sa California coast, si Jack naga-body surfing sang ang isa ka balod naglampos sa iya sa bato sa idalom sang tubig, nagbali ang iya liog kag nabalda ang iya spinal cord. Siling ni Jack sang ulihi, “Pagkalampos ko, nahibal-an ko nga naparalisado ako.”14 Indi na sia makahambal ukon makaginhawa nga sia lang.15
Ang pamilya, kaabyanan, kag mga miyembro sang stake nagdagsa sa pagsuporta kay Brother Rushton kag sang iya asawa nga si Jo Anne, kag upod sang iban nga mga butang, ginliwat ang isa ka parte sang ila balay agud mag-igo ang wheelchair ni Jack. Si Jo Anne ang nangin mayor nga manug-atipan ni Jack sang masunod nga 23 ka tuig. Nga ginatumod ang mga sinulat sa Libro ni Mormon kon paano ginaduaw sang Ginuo ang Iya katawhan sa ila mga kapipit-an kag ginpamag-an ang ila mga kabudlayan,16 si Jo Anne nagsiling, “Masami ako nga nahalawhaw sa kamag-an sang akon pamatyagan sa pag-atipan sang akon bana.”17
Ang diutay nga pagliwat sa sistema sang iya ginhawaan ang nagpabalik sang ikasarang ni Jake sa paghambal, kag sa sulod sang isa katuig, si Jack gintawag bilang titser sa Gospel Doctrine kag stake patriach. Kon maghatag sia sang patriarchal blessing, isa ka nagakapot sang priesthood ang nagatungtong sang kamot ni Brother Rushton sa ulo sang tawo nga magabaton sang bendisyon kag ginasuportahan ang iya kamot kag butkon sa tion sang bendisyon. Si Jack namatay sa Adlaw sing Paskwa tuig 2012, pagkatapos sang 22 katuig sang maukod nga pag-alagad.
Sa isa sadto ka interbyu, ginhambal ni Jack: “Ang mga problema magaabot sa tanan naton nga kinabuhi, kabahin ini sang pagkari naton diri sa duta. Kag ang iban nga tawo nagapensar nga ang relihiyon ukon ang pag-angkon sang pagtuo sa Dios magaprotekta sa imo gikan sa malain nga mga butang. Wala ako nagapati nga amo ina ang punto. Sa banta ko ang punto amo nga kon ang aton pagtuo mabakod, kon ang malain nga mga butang nagakatabo, nga matabo gid, maatubang naton ang mga ini … Ang akon pagtuo wala gid nagluya, apang wala ini nagakahulugan nga wala ako sang mga depresyon. Pamatyag ko sa una nga tion sa akon kabuhi natakos ang akon ikasarang, kag literal nga wala ako sing madalaganan, gani nagliso ako sa Ginuo, kag tubtob sini nga adlaw, akon nabatyagan ang dalayon nga kalipay.”18
Ini ang panahon sang panalagsa wala kaluoy nga mga pag-atake sa social media kag sa personal sang mga nagatinguha nga sundon ang talaksan sang Ginuo sa pamiste, kalingawan, kag sekswal nga katinlo. Sa masami ang mga lamharon kag hubin nga mga hamtong sa mga Santos, subong man ang mga babayi kag mga iloy and nagapas-an sini nga krus sang pagpangyaguta kag pagpanghingabot. Indi mahapos ang lampuwasan ang amo nga mga pagpang-abuso, apang dumduma ang mga tinaga ni Pedro, “Kon ginapakahuy-an kamo tungod sang ngalan ni Cristo, bulahan kamo, kay ang espiritu sang himaya kag sang Dios yara sa inyo: [sa ila bahin sia ginahambal nga malaut, apang sa inyo bahin sia ginahimaya].“19
Sa Hardin sang Eden, si Adan kag Eva yara sa isa ka kahimtangan sang pagka-wala’y sala, “nga wala sing kalipay, kay wala sila makakilala sang kapi-ot.”20 Karon, bilang may salabton nga mga tinuga, nagakalipay kita sa paglampuwas sang kapi-ot sa ano man nga porma, ini bala sala, pagtilaw, kahuyang, ukon iban pa nga sablag sa kalipayan. Ini ang kalipay nga makit-an ang pag-uswag sa dalan sang pagka-disipulo; ang kalipay “nga nakabaton sang kapatawaran sang … mga sala, kag makaangkon sang katawhay sa konsyensya”;21 ang kalipay nga mabatyagan ang kalag nga nagahabok kag nagatubo paagi sa grasya ni Cristo.22
Ang Kalipay sa Pag-alagad pareho ni Cristo
Ang Manluluwas nagakalipay sa pagpahanabo sang imortalidad kag kabuhi nga wala’y katapusan.23 Sa paghambal parte sa Pagbayad-Sala ni Jesucristo, si Pangulong Russell M. Nelson nagsiling:
“Kasubong sang tanan nga butang, si Jesus ang aton pinakadako nga ehemplo, ‘nga tungod sa kalipay nga ginbutang sa iya atubang nagbatas sang krus’ [Mga Hebreo 12:2]. Hunahunaa ina! Agud Iya mabatas ang pinakasakit eksperiyensya nga nabatas sa kalibutan, ang aton Manluluwas nagtutok sa kalipay!
“Kag ano nga kalipay ang ginbutang sa Iya atubang? Pat-od nga nagalakip ini sang kalipay sang pagtinlo, pagpang-ayo, kag pagpabakod sa aton; ang kalipay sa pagbayad sang mga sala sang tanan nga magahinulsol; ang kalipay nga mangin posible para sa imo kag sa akon nga magpauli—nga matinlo kag takos—sa pagpuyo upod ang aton mga Ginikanan nga Langitnon kag mga pamilya.”24
Sa amo man, ang kalipay nga “ginbutang sa aton atubang” amo ang kalipay sa pagbulig sa Manluluwas sa Iya buluhaton sang pagtubos. Bilang mga kaliwatan kag kabataan ni Abraham,25 nagapartisipar kita sa pagpakamaayo sang tanan nga mga pamilya sa kalibutan “upod ang mga bugay sang Ebanghelyo, nga amo ang mga bugay sang kaluwasan, bisan ang kabuhi nga walay katapusan.”26
Ginapensar ko ang mga pulong ni Alma:
“Amo ini ang akon kasadya, nga basi pa lang mangin isa ako ka galamiton sang Dios sa pagdala sang pila ka kalag sa paghinulsol; kag amo ini ang akon kalipay.
“Kag yari karon, kon makita ko ang madamo sang akon mga kauturan nga matuod-tuod nga mahinulsulon, kag nagakari sa Ginuo nga ila Dios, nian ang akon kalag napuno sang kalipay. …
“Apang wala ako nagakalipay sa akon lamang kaugalingon nga kadalag-an, kundi labi nga nalubos ang akon kalipay tungod sang kadalag-an sang akon mga kauturan, nga nagtaklad sa duta sang Nefi. …
“Karon kon mahunahunaan ko ang kadalag-an sining akon mga kauturan ang akon kalag maanod, bisan tubtob sa pagkabulag sini gikan sa lawas, halos nga daw amo sini, sapagkadako sang akon kalipay.”27
Ang mga bunga sang aton pag-alagad sa tagsatagsa sa Simbahan kabahin sang kalipay nga “nabutang sa aton atubang.” Bisan sa mga tinion sang pagkaluya ukon stress, mahimo kita mag-minister sing mapasensyahon kon nakatutok kita sa kalipay sa pagkahamuot sang Dios kag pagdala sang kasanag, kaumpawan kag kalipay sa Iya mga kabataan, ang aton mga kauturan.
Sang yara sa Haiti sang nagligad nga bulan para sa dedikasyon sang Port-au-Prince Temple, si Elder David kag Sister Susan Bednar nakakilala sang isa ka hubin nga sister nga ang bana napatay pila lang ka adlaw ang nagligag sa isa ka makasiligni nga aksidente. Naghibi sila upod sa iya. Apang pagka-Domingo ining babayi yara sa iya lugar bilang usher sa seremonya sa dedikasyon nga may malulo, nagapanamyaw nga yuhum para sa tanan nga nagasulod sa templo.
Nagapati ako nga ang pinakadako nga “kalipay sang mga santos“ nagagikan sa pagkilala nga ang Manluluwas nagapangabay sang ila tinutuyo,28 “kag wala sing isa nga makaangkon sang kalipay nga [magapuno] sang aton mga kalag [kon] kita [mamati kay Jesus] magpangamuyo sa Amay para sa aton.”29 Kaupod ni Pangulong Russell M. Nelson, nagapamatuod ako nga ang kalipay isa ka regalo para sa mga matinuohon nga mga Santos “nga nagbatas sang mga krus sang kalibutan”30kag sa ila nga “hungod nga nagatinguha sa pagkabuhi sang matarong nga kabuhi, subong nga gintudlo ni Jesucristo.”31 Kabay nga mangin lubos ang inyo kalipay, ginapangamuyo ko sa ngalan ni Jesucristo sa ngalan ni Jesucristo, amen.