Matuod nga mga Disipulo sang Manluluwas
Mabatyagan naton ang padayon nga kalipay kon ang aton Manluluwas kag Iya ebanghelyo ang mangin balayan nga ginatukuran naton sang aton kabuhi.
Natago sa Daan nga Katipan nga libro sang Hageo amo ang laragway sang isa ka grupo sang katawhan nga naggamit kuntani ang laygay ni Elder Holland. Nakasala sila sa indi pagbutang kay Cristo sa sentro sang ila mga kabuhi kag ila pag-alagad. Si Hageo nagapinta sing makapahunahuna nga mga paglaragway samtang ginasaway niya ining mga tawo sa pagtinir sa ila komportable nga mga balay imbes sang pagtukod sang templo sang Ginuo:
“Tion bala ini sa inyo, sa pagpuyo sa inyo mga balay nga nakisamihan, samtang ining balay guba?
“Busa karon amo ini ang ginasiling sang Ginuo sang mga kasoldadosan; Patugsilingi ang inyo mga dalanon.
“Nakasab-ug kamo sing madamo, kag nagatipon sing diotay; nagakaon kamo, apang wala kamo mabusog; nagainom kamo, apang wala kamo maayawi sing ilimnon; nagapanapot kamo, apang wala gid sing nag-init; kag ang mga nagabaton sing sohol nagabaton sing mga sohol sa pagsulod sini sa puyo nga may mga buslot.
“Amo ini ang ginasiing sang Ginuo sang mga kasoldadosan; Patugsilingi ang inyo mga dalanon.”1
Indi bala kanami sinang mga paglaragway parte sa kawalay pulos sang pag-una sang mga butang nga wala sing dalayon nga konsikwensya labaw sa mga butang sang Dios?
Sang sini lang nga sakrament miting nga akon natambongan, ginsambit sang isa ka nagbalik na nga misyonero ang isa ka amay nga gintingob ining ideya sang sia nagsiling sa iya kabataan, “Ang kinahanglanon naton indi tanto nga Wi-Fi kag mas madamo nga Nefi!”
Sa akon pagpuyo sa West Africa sing lima ka tuig kag nakita ko ang madamo nga halimbawa sang mga tawo nga kinaandan na kag wala nahuya nga ginauna ang ebanghelyo. Isa ka halimbawa amo ang ngalan sang isa ka negosyo nga nagakay-o kag nagabalanse sang guma sa Ghana. Gintawag ini sang tag-iya nga “Thy Will Alignment.”
Mabatyagan naton ang padayon nga kalipay2 kon ang aton Manluluwas kag Iya ebanghelyo ang mangin balayan nga ginatukuran naton sang aton kabuhi. Apang, mahapos gid para sa sinang balayan nga mangin mga butang sang kalibutan, sa diin ang ebanghelyo mahimo nga dugang nga opsyon na lamang ukon pagtambong sa simbahan sing duha ka oras kon Domingo. Kon amo sini, katumbas ini sa pagbutang sang aton suweldo sa “puyo nga may mga buslot.”
Si Hageo nagasiling sa aton nga magdedikar—nga mangin, subong sang amon ginasiling sa Australia, “fair dinkum” sa pagpangabuhi sang ebanghelyo. Ang mga tawo fair dinkum kon magsiling sila nga kon ano sila amo gid na sila.
Natun-an ko ang pagka-fair dinkum kag pagdedikar sa paghampang sang rugby. Natun-an ko nga kon tudohan ko gid hampang, kon ginahatag ko ang tanan-tanan, ma enjoy- ko gid maayo ang hampang.
Ang paborito ko nga tion sang rugby amo ang tuig pagkatapos sang hayskul. Ang tim nga sa diin kabahin ako alangay nga sagad kag dedikado. Kami ang nangin kampeon nga tim sina nga tuig. Apang, isa ka adlaw magahampang kami sa pigaw nga tim, kag pagkatapos sang hampang tanan kami may ka-date para sa bantog nga tuigan nga binayle sa kolehiyo. Kay abi ko mahapos lang ang hampang, mahalong gid ako nga indi ako masamaran agud ma-enjoy ko gid ang binayle. Sa sina nga hampang, wala namon ginbalbal gid ang kontra kag napierde kami. Ang malain pa, pagkatapos sang hampang ang akon bibig naghubag kag napilas nga nagpalaw-ay sa akon sa akon date. Siguro may dapat ako nga matun-an.
Lain naman nga eksperiyensya ang natabo sa isa naman ka hampang nga akon gid gindedikahan. Isa ka bes ginhungod ko nga sulungon ang kontra; gilayon ko nabatyagan ang sakit sa akon guya. Gintudloan ako sang akon amay nga indi gid pagpabal-on ang kontra nga nasakitan ako gani, nagpadayon ako sa paghampang. Ina nga gab-i, sang makaon na ako, indi ko gali makagat ang pagkaon. Pagkaaga, nagkadto ako sa ospital sa diin nakompirma sa X-ray nga nabali ang akon sag-ang. Ang akon baba ginpakipot sang alambre sa masunod nga anom ka semana.
Natun-an ang mga leksyon gikan sining paanggid sang napilas nga bibig kag bali nga sag-ang. Walay sapayan sang memorya nga indi ako puwede sang matig-a nga pagkaon sa sulod sang anom ka semana kay likido lang ang puwede sa akon, wala ako naghinulsol sang akon nabali nga sag-ang kay nagresulta ini sa paghatag ko sang tanan-tanan. Pero naghinulsol ako sang akon naghabok nga bibig kay nagsimbolo ini sang akon pagpugong.
Ang paghatag sang aton tanan-tanan wala nagakahulugan nga padayon kita mabugayan ukon magmadinalag-on. Pero nagakahulugan ini nga mangin malipayon kita. Ang kalipayan indi umalagi lamang ukon temporaryo lamang. Ang kalipayan nagapadayon kag napasad sa aton pagpanikasog nga ginabaton sang Ginuo.3
Ang isa ka halimbawa sining pagbaton amo ang istorya parte kay Oliver Granger. Si President Boyd K. Packer nagsiling: “Sang gintabog ang mga Santos pa-gwa sa Kirtland, … si Oliver nagpabilin agud ipamaligya ang ila mga propiyedad kon bisan pila lang sini. Wala tanto sing tsansa nga matabo ini. Kag, matuod gid, wala sia nakabaligya!”4 Ginsugo sia sang Unang Pangulohan nga maghimo sang mabudlay nga buluhaton, imposible pa gani. Pero gindayaw sia sang Ginuo sa iya napaslawan nga panikasog sa sining mga pulong:
“Ginadumdum ko ang akon alagad nga si Oliver Granger; tan-awa, sa pagkamatuod ginasiling ko sa iya nga ang iya ngalan pagadumdumon sing sagrado sang tanan nga henerasyon, tubtob sa wala’y katapusan, siling sang Ginuo.
“Gani, patinguhaa sia sing matutum para sa pagtubos sang Unang Pangulohan sang akon Simbahan, … kag kon malaglag sia magabangon sia liwat kay ang iya sakripisyo mangin mas sagrado sa akon sangsa iya mga kadalag-an, siling sang Ginuo.”5
Matuod ina sa aton tanan—indi ang aton mga kadalag-an kundi ang aton sakripisyo kag panikasog ang importante sa Ginuo.
Isa pa ka halimbawa sang matuod nga disipulo ni Jesucristo amo ang suod nga abyan namon sa Côte d’Ivoire sa West Africa. Ining manami, tampad nga sister nag-antos sing tuman nga emosyonal, bisan pa pisikal nga pag-abuso sang iya bana sa malawig nga tion, kag sang ulihi nagdiborsyo sila. Wala gid nagluya ang iya katampad kag kaayo, pero tungod sa -kapintas sang iya bana sa iya, nasakitan gid sia sa malawig nga tion. Sa iya mismo nga mga pulong, ginalaragway niya kon ano ang natabo:
“Bisan nagsiling ako nga napatawad ko sia, pirme ako nagatulog nga may pilas; naghinguyang ako sang akon mga inadlaw upod sinang pilas. Daw pareho ini nga may paso sa akon tagipusuon. Madamo nga beses nag-ampo ako sa Ginuo nga dulaon ini sa akon, pero tuman gid kasakit nga nagapati gid ako nga mangin amo na lang gid sini ang kabuhi ko hasta sa ulihi. Mas masakit sangsa pagkapatay sang iloy ko sang hubin pa ako; mas masakit sangsa pagkapatay sang amay ko kag akon anak. Ang sakit daw nagalapad kag nagalikop sang akon tagipusuon, nga pamatyagan ko daw mapatay na ako.
“-Pila ka bes ginapamangkot ko akon kaugalingon kon ano ayhan ang himuon sang Manluluwas sa akon sitwasyon, kag masiling ako, ‘Indi na gid ako kaagwanta, Ginuo.’
“Dayon isa ka aga ginpangita ko ang sakit nga halin sini tanan sa akon tagipusuon kag nagpadayon tubtob sa akon kalag. Indi ko na ini mabatyagan. Gilayon nga ginrepaso sang akon hunahuna ang tanan nga rason nga dapat masakitan ako, pero wala ko nabatyagan ang sakit. Naghulat ako bilog nga adlaw agud tan-awon kon mabatyagan ko ang sakit sa akon tagipusuon; wala ko ini nabatyagan. Dayon nagluhod ako kag nagpasalamat sa Dios sa pag-epekto sa akon sang pagbayad-sala nga sakripisyo sang Ginuo.”6
Ining sister sa karon malipayon na nga nahugpong sa isa ka manami, tampad nga lalaki nga nagapalangga gid sa iya.
Gani ano dapat ang aton batasan kon matuod kita nga mga disipulo ni Cristo? Kag ano ang kapuslanan sang ebanghelyo sa aton kon aton “binagbinagon ang [aton] mga dalanon,” suno sa panugyan ni Hageo?
Nanamian ako sang halimbawa sang husto nga pamatasan nga ginpakita sang amay ni Haring Lamoni. Inyo madumduman ang iya kaakig sa pagkahibalo nga ang iya anak ginaupdan ni Amon, isa ka Nefinhon—ang katawhan nga ginkaugtan sang mga Lamanhon. Gingabot niya ang iya espada agud makigsumpong kay Amon kag sa hinali namarasmasan ang espada ni Amon nga yara na sa iya tutunlan. “Karon ang hari, nga nagakahadlok nga madulaan sia sang iya kabuhi, nagsiling: Kon kaluoyan mo ako itugot ko sa imo ang bisan ano nga imo pangayuon, bisan ang katunga sang ginharian.”7
Talupangda ang iya tanyag—katunga sang iya ginharian para sa iya kabuhi.
Pero sang ulihi, pagkatapos nga mahangpan na niya ang ebanghelyo, nagtanyag sia liwat. “Ang hari nagsiling: Ano ang akon pagahimuon agud mahimo ko nga maangkon ining kabuhi nga wala’y katapusan nga imo ginahambal? Huo, ano ang akon pagahimuon agud mahimo nga mabun-ag ako sa Dios, nga ining malaut nga espiritu magabot gikan sa akon dughan, kag makabaton sang iya Espiritu, agud mahimo nga mapuno ako sang kalipay, agud indi ako mahimo nga isikway sa katapusan nga adlaw? Yari karon, siling niya, ihatag ko ang tanan nga yari sa akon, huo, talikdan ko ang akon ginharian, agud mahimo nga mabaton ko ining dako nga kalipay.”8
Sini nga higayon, handa sia sa pagsikway sang bug-os niya nga ginharian, bangod ang ebanghelyo mas labi pa sangsa tanan nga may ara sia! Nangin fair dinkum sia sa ebanghelyo.
Gani, ang pamangkot sa tagsa sa aton amo nga, fair dinkum man bala kita sa ebanghelyo? Kay inang di-lubos nga dedikado indi fair dinkum! Kag ang Dios wala nagabubo sang pagdayaw sa mga di-lubos nga dedikado.9
Wala sing manggad, ukon bisan ano nga kalingawan, ukon bisan ano nga estado, ukon bisan ano nga social media, ukon bisan ano nga video games, ukon bisan ano nga isport, ukon bisan ano nga koneksyon sa mga personalidad, ukon bisan ano sa duta nga mas malahalon sangsa kabuhi nga walay katapusan. Gani ang laygay sang Ginuo sa tagsa ka tawo amo nga “binagbinagon ang inyo mga dalanon.”
Ang akon balatyagon labing maayo nga mapabutyag sa mga pulong ni Nefi: “Nagakasadya ako sa kaathagan; nagakasadya ako sa kamatuoran; nagakasadya ako sa akon Jesus, kay gintubos niya ang akon kalag gikan sa impiyerno.”10
Matuod-tuod bala kita nga mga sumulunod Niya nga naghatag sang Iya tanan-tanan para sa aton? Sia nga aton Manunubos kag aton Mananabang sa Amay? Sia Mismo nga lubos nga dedikado sa Iya pagbayad-sala nga sakripisyo kag amo man sa karon sa Iya gugma, Iya kaluoy, kag Iya handum para sa aton nga makaangkon sing walay katapusan nga kalipay? Nagapangabay ako sa tanan nga nagapamati kag nagabasa sining mga pulong: Palihog, palihog indi pagpabuyanbuyan-i ang imo lubos nga pagdedikar tubtob nga mahimo mo ini sa palaabuton. Mag-fair dinkum na kag batyaga ang kalipay! Sa ngalan ni Jesucristo, amen.