Magbantay sa Pagpangamuyo sing Dalayon (Alma 34:39; Moroni 6:4; Lucas 21:36)
Ang dalayon nga pagbantay kinahanglanon para kontrahon ang pagkakampante kag pagpabaya.
Nagapangamuyo ako sing hugot sang bulig sang Balaan nga Espiritu para sa inyo kag sa akon sa aton pagsinadya kag pagsimba sing ululupod.
Sang Abril sang 1976, si Elder Boyd K. Packer naghambal para mismo sa mga lamharon sang Simbahan sa pangkabilugan nga komperensya. Sa iya klasiko nga mensahe nga gintig-ulohan “Espirituhanon nga mga Buaya,” ginlaragway niya kon paano nga sa isa ka hilikuton sa Aprika naobserbahan niya ang nalipdan sing maayo nga mga buaya nga nagahulat sa pagsakmal sang wala hinalung-ong nga mga biktima. Ginkumparar niya ang mga buaya kay Satanas, nga nagabantay sa mga wala nagabantay nga mga lamharon paagi sa pagtabon sang makamamatay nga kinaiya sang sala.
Beynte tres anyos ako sadto sang ginhatag ni Elder Packer ang amo nga pamulong-pulong kag kami ni Susan nagapaabot sa paggwa sang amon una nga anak sa pila na lang ka adlaw. Nagtatak gid sa amon ang kaundan sang iya mensahe parte sa paglikaw sang sala kag ang maalam nga paagi nga gingamit niya ang ordinaryo nga pamatasan sang mga sapat para magtudlo sang importante nga espirituhanon nga leksyon.
Kami ni Susan nakakadto naman sa Aprika sa madamo nga hilikuton. Kag may mga oportunidad kami nga makita ang matahum nga kasapatan nga nagapuyo sa sinang kontinente. Nga ginadumdom ang epekto sang pamulong-pulong ni Elder Packer sa amon kabuhi, gintinguhaan namon nga sundon kag tun-an ang importante nga mga leksyon halin sa pamatasan sang kasapatan sa Aprika.
Gusto ko nga ilaragway ang mga kinaiya kag taktika sang duha ka cheetah nga gintan-aw namon ni Susan nga nagaayam sang ila biktima kag ipaanggid ang pila ka mga butang nga nakita namon sa adlaw-adlaw nga pagpangabuhi sang ebanghelyo ni Jesucristo.
Mga Cheetah kag mga Topi
Ang mga cheetah amo ang pinakamadasig nga sapat sa duta kag nagadalagan ini tubtob sa kadasigon nga 75 mph (120 km/h). Ang ining matahum nga mga sapat makadalagan sing madasig halin sa pagtindog nga nagalab-ot 68mph (109 km/h) sa ubos sang tatlo ka segundo. Ang mga cheetah mga mangangayam nga nagalipot sang ila biktima kag nagadalagan sa malip-ot nga mga distansya para maglagas kag mag-atake.
Kami ni Susan nagtan-aw sing halos duha ka oras sa duha ka cheetah nga nagaayam sang dako nga grupo sang mga topi, ang pinakakomon kag pinakadamo nga antelope sa Aprika. Ang matag-as, laya nga mga hilamon sa kapatagan sang Aprika mala-bulawan nga duag-tsokolate kag halos nagalipod sa mga mangangayam samtang ila ginalagas ang isa ka grupo sang mga topi. Ang mga cheetah nagaantad sang mga 100 yarda (91 metros) sa kada isa pero nagabuligay sila nga duha.
Samtang ang isa ka cheetah tiso nga nagapungko sa hilamon kag wala nagagiho, ang isa ka cheetah nagakuob sa duta kag mahinay nga nagakamang pakadto sa kampante lang nga mga topi. Dayon ang cheetah nga nagatiso pungko nadula sa kahilamunan sa mismo tion nga ang isa ka cheetah nagbulos tiso sing pungko. Ang pagbulos-bulos sang isa ka cheetah nga nagakuob kag nagakamang palapit samtang ang isa ka cheetah nagapungko sing tiso sa kahilamunan nagpadayon sa malawig nga tion. Ang palipot nga stratehiya gintuyo para litaon kag intuon ang mga topi kag ipalayo ang ila atensyon sa nagahilapit nga katalagman. Pasensyoso kag tayuyon, ang duha ka cheetah nagbuligay para masiguro ang ila madason nga kalan-on.
Nagatindog sa tunga sang dako nga grupo sang mga topi kag sang nagahilapit nga mga cheetah ang pila ka mas gulang kag mas makusog nga mga topi nga nagaserbe mga bantay sa ibabaw sang mga bungsod. Ang mas maathag nga panulukan sa kahilamunan halin sa magagmay nga bungyod nagtugot sining mga bantay nga topi nga makakita sang mga senyales sang katalagman.
Dayon gulpi lang, sang ang mga cheetah daw ara na gid sa lapit, ang bilog nga grupo sang mga topi nagliso kag nagdinalagan. Ambot kon ukon paano ginpabalo sang mga bantay nga topi ang mas dako nga grupo, pero daw sa may paandam nga ginhatag, kag ang tanan nga topi nagsaylo sa lugar nga mas luwas.
Kag ano dason ang ginhimo sang mga cheetah? Wala nagpadugay-dugay, ang duha ka mga cheetah nagbalik sa ila pagbulos-bulos nga ang isa ka cheetah nagakuob kag nagakamang palapit samtang ang isa ka cheetah nagapungko sing tiso sa hilamon. Ang disenyo sang pag-ayam nagpadayon. Wala sila nag-untat. Wala sila nagpahimuyong ukon nagpahuway. Wala untat sila sa pagsunod sang ila stratehiya sang paglita kag pagpatalang. Ako kag si Susan nagtan-aw sa mga cheetah nga nadula sa unhan, nga nagalapit nga nagalapit sa grupo sang mga topi.
Sina nga gab-i kami ni Susan may isa ka indi malimtan nga paghinambalanay parte sa amon nakita kag natun-an. Ginhambalan man namon ining eksperiyensya sa amon mga kabataan kag mga apo kag gintan-aw ang madamo nga mapuslanon nga mga leksyon. Ilaragway ko karon ang tatlo sinang mga leksyon.
Leksyon #1—Mag-andam sa Makawiwili nga mga Pagpakuno-kuno sang Yawa
Para sa akon, ang mga cheetah may mahining nga balahibo, makawiwili, kag makabilihag nga mga tinuga. Ang dalag nga daw kolor-tsokolate kag abuabuhon nga kaputi nga balahibo sang cheetah nga may batik-batik nga itom nagaserbe nga matahum nga tabon agud ining mga sapat halos indi makita samtang ila ginaayam ang ila biktima sa wayang sang Aprika.
Sa amo man, ang peligroso sa espirituhanon nga mga ideya kag mga aksyon masami matahum, makawiwili, ukon masadya. Gani, sa aton kalibutan sa karon, ang kada isa sa aton kinahanglan nga magbantay sa malain nga nagapakuno-kuno nga maayo. Sa ginpaandam ni Isaias, “Kailo sa mga nagatawag sang malain maayo, kag maayo malain; nga nagabutang sang kadudulman nga kapawa, kag sang kapawa nga kadudulman; nga nagabutang sang mapait nga matam-is, kag sang matam-is nga mapait!”
Sa wala nagasinanto nga panahon nga ang paglapas sang kasagrado sang kabuhi sang tawo ginaduso bilang kinamatarong kag ang kagamo ginalaragway nga kahilwayan, ginbugayan kita nga magkabuhi sa dispensasyon sa ulihing-adlaw sang ang kasanag sang ginpanumbalik nga ebanghelyo sarang mag-iwag sa aton mga kabuhi kag magbulig sa aton nga mahibal-an ang maitom nga pagpatalang kag paglita sang kaaway.
“Kay sila nga maalam kag nagbaton sang kamatuoran, kag naghimo sang Balaan nga Espiritu nga ila giya, kag wala napatalang—sa pagkamatuod ginasiling ko sa inyo, indi sila pagasikwayon kag idap-ong sa kalayo, kundi malampuwasan nila ang adlaw.”
Leksyon #2—Magpadayon nga Nagabugtaw kag Mangin Alerto
Para sa isa ka topi, ang isa ka kalit nga tion sang pagkapabaya ukon indi pagbantay mahimo nga magresulta sa madasig nga pag-atake sang cheetah. Sa amo man, ang espirituhanon nga pagkakampante kag pagkapabaya nagabukas sa aton sa nagapalapit nga kaaway. Ang espirituhanon nga pagpabaya nagaimbitar sang dako nga peligro sa aton mga kabuhi.
iStock.com/Angelika
Ginlaragway ni Nefi kon paano nga sa ulihing mga adlaw lugpayan kag ugoy-ugoyon ni Satanas ang mga anak sang Dios sa “lawasnon nga kasigurohan, sa bagay nga magasiling sila: Maayo ang tanan sa Sion; huo, nagauswag ang Sion, maayo ang tanan—kag sa amo nga paagi ginadaya sang yawa ang ila mga kalag, kag ginaganoy sila sing mainandamon paidalom sa impiyerno.”
Ang dalayon nga pagbantay kinahanglanon para kontrahon ang pagkakampante kag pagpabaya. Ang pag-aligmat isa ka kahimtangan ukon aksyon sang tayuyon nga mahinalungon nga pagbantay para sa posible nga mga katalagman ukon mga kabudlayan. Kag ang tayuyon nga pagbantay nagakahulugan sang padayon nga pagbugtaw para magbantay kag mag-amlig. Sa espirituhanon, kinahanglan naton nga padayon nga nagabugtaw kag mangin alerto sa mga pagpabatyag sang Balaan nga Espiritu kag sa mga senyales nga nagahalin sa mga manugbantay sang Ginuo sa mga tore.
“Kag subong man, ginalaygayan ko kamo … nga magbantay kamo sa pagpangamuyo sing dalayon, nga indi kamo maganoy palayo sang mga pagsulay sang yawa, … kay yari karon, padyaan niya kamo sang indi maayo nga butang.”
Ang pagtutok sang aton mga kabuhi sa Manluluwas kag sa Iya ebanghelyo nagatugot sa aton nga malampuwasan ang huyog sang kinaugali nga tawo nga magpatulog-tulog kag mangin tamad sa espirituhanon. Bangod ginbugayan kita sang mga mata nga makakita kag dulunggan nga makabati, ang Balaan nga Espiritu mahimo magdugang sang aton ikasarang nga makakita kag makabati sa tion nga wala kita masami nagatulok ukon nagapamati ukon sa tion nga mahimo wala kita nagapensar nga may makita ukon mabatian.
Leksyon #3—Intiendiha ang Katuyuan sang Kaaway
Ang cheetah isa ka mangangayam nga ang kinaiya amo ang mangayam sang iban pa nga mga sapat. Sa bilog nga adlaw, adlaw-adlaw, ang cheetah isa ka mangangayam.
Si Satanas “isa ka kaaway sang pagkamatarong kag sang mga nagahandum nga sundon ang pagbuot sang Dios.” Sa bilog nga adlaw, kada adlaw, ang iya lamang handum kag solo nga katuyuan amo nga himuon ang mga anak sang Dios nga miserable pareho sa iya.
Ang plano sang kalipayan sang Amay gindisenyo sa paghatag sang direksyon sa Iya mga anak, sa pagbulig sa ila nga maeksperiyensyahan ang nagadugay nga kalipay, kag dalhon sila pauli nga hilway sa Iya nga may nabanhaw, ginpahitaas nga mga lawas. Ang yawa nagapangabudlay agud himuon ang mga anak sang Dios nga ginaligban kag masubo kag agud punggan ang ila wala katapusan nga pag-uswag. Ang kaaway wala untat sa paghulag agud atakehon ang mga elemento sang plano sang Amay nga ginakaugtan gid niya.
Si Satanas wala sing lawas, kag ang iya wala katapusan nga pag-uswag nag-untat na. Pareho sang tubig nga nagailig sa suba nga ginapunggan sang isa ka dam, sa amo man ang wala katapusan nga pag-uswag sang kaaway nag-untat bangod wala sia sang pisikal nga lawas. Tungod sang iya rebelyon, ginkaksan ni Lucifer ang iya kaugalingon sang tanan nga mortal nga mga bugay kag eksperiyensya nga nangin posible paagi sa lawas sang unod kag mga tul-an. Isa sa mabaskog nga kahulugan sa balaan nga kasulatan sang tinaga nga ginpakamalaut makita sa iya kawala sang ikasarang nga magpadayon sa pag-uswag kag mangin pareho sang aton Amay nga Langitnon.
Tungod ang pisikal nga lawas importante kaayo sa plano sang kalipayan sang Amay kag sa aton espirituhanon nga pag-uswag, ginahandum ni Lucifer nga punggan ang aton pagsulong paagi sa pagtentar sa aton nga gamiton ang aton mga lawas sa indi husto. Si Pangulong Russell M. Nelson nagpanudlo nga ang espirituhanon nga kahilwayan makita sa “‘indi paghimo sang una nga makagalanyat nga tikang padulong sa lugar nga indi dapat kag paghimo sang butang nga indi dapat.’ … Bilang mga tawo tanan kita may [pisikal] nga mga hilig nga kinahanglanon para mabuhi kita. ‘Ining mga hilig tuman kaimportante sa pagpadayon sang kabuhi. Gani, ano ang ginahimo sang kaaway? … Ginaatake niya kita paagi sa aton mga hilig. Ginatentar niya kita nga kaunon ang mga butang nga indi naton dapat kaunon, imnon ang mga butang nga indi naton dapat imnon, kag sa pagpalangga sa paagi nga indi kita dapat magpalangga!’”
Isa sa pinakadako nga katingalahan sa wala katapusan amo nga ang kaaway, nga miserable bangod wala sia sang pisikal nga lawas, amo ang nagaimbitar kag nagahaylo sa aton nga makigbahin sa iya kalisud paagi sa indi husto nga paggamit sang aton mga lawas. Ang mismo kasangkapan nga wala sa iya kag indi niya magamit amo karon ang iya mayor nga ginapuntirya sa iya pagpaninguha nga ipaon kita sa pisikal kag espirituhanon nga kalaglagan.
Ang pag-intiendi sang tuyo sang kaaway importante kaayo para sa epektibo nga pagpanghanda sa posible nga pagpangatake. Insakto nga tungod nahibal-an ni Kapitan Moroni ang katuyuan sang mga Lamanhon, nakahanda sia sa pagsugata sa ila sa tion sang ila pag-abot kag nagmadinalag-on. Kag ang pareho nga prinsipyo kag promisa magamit man sa kada isa sa aton.
“Kon handa kamo indi kamo mahadlok.
Pangagda, Promisa, kag Panaksihon
Pareho kaimportante nga ang mga leksyon matun-an paagi sa pagpanilag sang pamatasan sang mga cheetah kag mga topi, ang kada isa sa aton dapat magpangita sang mga leksyon kag paandam nga makita sa simple nga mga hitabo sa adlaw-adlaw nga pangabuhi. Samtang kita nagahandum sang kaisipan kag tagipusuon nga bukas sa pagbaton sang langitnon nga direksyon paagi sa gahum sang Balaan nga Espiritu, ang pila sa pinakadako nga mga panulin nga aton mabaton kag madamo sa pinakamabaskog nga mga paandam nga makaamlig sa aton magahalin sa aton ordinaryo nga mga eksperiyensya. Ang mabaskog nga mga paanggid makita sa pareho balaan nga mga kasulatan kag sa aton adlaw-adlaw nga pangabuhi.
Gintutokan ko ang tatlo lamang sa madamo nga mga leksyon nga pwede makita sa biyahe namon ni Susan sa Aprika. Ginaagda kag ginapaisog ko kamo nga pamensaron sing maayo ang ining istorya sang mga cheetah kag topi kag hibaluon ang dugang pa nga mga leksyon para sa inyo kag sa inyo pamilya. Palihog panumduma pirme nga ang inyo puluy-an amo ang matuod nga sentro sang pagtuon kag pagpangabuhi sang ebanghelyo.
Kon kamo mag-akto nga may pagtuo sa sining imbitasyon, ang inspirado nga mga panghunahuna magasulod sa inyo kaisipan, ang espirituhanon nga mga balatyagon ang magapuno sang inyo tagipusuon, kag inyo makilala ang mga aksyon nga dapat himuon ukon padayunon para inyo “magamit [ang] bug-os [nga] hinganib [sang Dios] agud nga mabatas ninyo ang adlaw nga malain, pagkatapos nga mahimo ninyo ang tanan-tanan, agud nga magpabilin kamo nga tampad.”
Ginapangako ko nga ang mga bugay sang epektibo nga pagpanghanda kag espirituhanon nga proteksyon magailig sa inyo kabuhi sa inyo pagbantay sa pagpangamuyo sing dalayon.
Nagapamatuod ako nga ang pagduso pasulong sa dalan sang kasugtanan nagahatag sang espirituhanon nga kahilwayan kag nagaimbitar sang nagalawig nga kalipay sa aton mga kabuhi. Kag nagasaksi ako nga ang nabanhaw kag buhi nga Manluluwas magasuporta kag magapabakod sa aton sa mga tion nga maayo kag malain. Sa sining mga kamatuoran ako nagapamatuod sa sagrado nga ngalan sang Ginuong Jesucristo, amen.