Pagkatapos sang Pagtilaw sang Aton Pagtuo
Samtang ginasunod aton ang tingug sang Dios kag ang Iya dalan sang kasugtanan, pabakuron Niya kita sa tunga sang aton mga pagtilaw.
Sang bata pa ako, si Frank Talley, nga isa ka miyembro sang Simbahan, nagtanyag nga buligan ang akon pamilya nga makabiyahe halin sa Puerto Rico pakadto sa Salt Lake City agud maselyuhan kami sa templo, ugaling nag-amat-amat abot ang mga sablag. Isa sang akon mga utod nga si Marivid, nagmasakit. Kay indi mapahamtang, nagpangamuyo ang akon mga ginikanan kon ano ang buhaton kag sa gihapon ginpabatyag nga dayunon ang biyahe. Nagsalig sila nga kon matinuohon nila nga sundon ang pagpabatyag sang Ginuo, pagabantayan ang amon pamilya kag bugayan—kag matuod gid.
Bisan ano pa nga mga sablag ang aton masugata sa kabuhi, makasalig kita nga si Jesucristo magahanda sang alagyan pasulong samtang nagalakat kita nga may pagtuo. Ang Dios nagpromisa nga ang tanan nga nagapangabuhi suno sa mga kasugtanan nga ila ginhimo sa Iya, sa Iya tiyempo, makabaton sang tanan Niya nga ginpromisa nga mga bugay. Si Elder Jeffrey R. Holland nagpanudlo, “Ang pila ka mga bugay nagaabot dayon, ang iban madugay mag-abot, kag ang iban wala nagaabot tubtob sa langit; pero sa ila nga nagapangabuhi sang ebanghelyo ni Jesucristo, nagaabot ang mga ini.”1
Gintudlo ni Moroni nga ang “pagtuo amo ang mga butang nga ginalauman kag wala makita; gani, indi magsuay sanglit wala kamo makakita, kay indi kamo makabaton sing saksi tubtob nga pagkatapos sang pagtilaw sang inyo pagtuo.”2
Ang aton pamangkot: “Ano ang dapat naton himuon para atubangon ang mga pagtilaw nga aton masugata?”
Sa iya una nga pamulong-pulong sa publiko bilang Pangulo sang Simbahan, Si Pangulong Russell M. Nelson nagpanudlo: “Bilang bag-o nga Panguluhan, gusto namon magsugod nga ginahunahuna ang katuyuan. Sa sini nga rason, nagapakighambal kami sa inyo subong gikan sa templo. Ang katumanan nga ginatinguhaan sang tagsa sa aton amo ang masangkapan sang gahum sa puluy-an sang Ginuo, maselyuhan bilang mga pamilya, mangin matutom sa mga kasugtanan nga ginhimo sa templo nga magahimo sa aton nga kalipikado sa pinakadako nga regalo sang Dios—ang kabuhi nga wala katapusan. Ang mga ordinansa sa templo kag ang mga kasugtanan nga ginahimo ninyo didto amo ang yabi sa pagpabakod sang inyo kabuhi, sang inyo pag-asawahay kag pamilya, kag sang inyo ikasarang nga pakigbatuan ang mga pag-atake sang kaaway. Ang inyo pagsimba sa templo kag ang inyo pag-alagad didto para sa inyo mga katigulangan magabugay sa inyo sang mas dako nga personal nga rebelasyon kag katawhay kag magapabakod sang inyo pangako nga magpabilin sa dalan sang kasugtanan.”3
Samtang ginasunod naton ang tingug sang Dios kag ang Iya dalan sang kasugtanan, pabakuron Niya kita sa tunga sang aton mga pagtilaw.
Mabudlay ang biyahe sang amon pamilya pakadto sa templo, pero sang nagahilapit na kami sa Salt Lake City, Utah, ang akon iloy, nga puno sing kalipay kag pagtuo, nagsiling, “Mangin OK lang kita; proteksyunan kita sang Ginuo.” Ginselyuhan kami bilang pamilya, kag ang akon utod nag-ayo. Natabo lamang ini pagkatapos sang pagtilaw sa pagtuo sang akon mga ginikanan kag sa pagsunod sa mga pagpabatyag sang Ginuo.
Ang ehemplo sang akon mga ginikanan nagaimpluwensya sa gihapon sang amon mga kabuhi sa karon. Ang ila ehemplo nagtudlo sa amon sang ngaa sang doktrina sang ebanghelyo kag ginbuligan kami nga maintiendihan ang kahulugan, katuyuan, kag mga bugay nga ginadala sang ebanghelyo. Ang pag-intiendi sang ngaa sang ebanghelyo ni Jesucristo makabulig man sa aton sa pag-atubang sang aton mga pagtilaw nga may pagtuo.
Sa katapusan, ang tanan nga gina-imbitar kag ginasugo sang Dios nga aton himuon isa ka pagpahayag sang Iya pagpalangga sa aton kag sang Iya handum nga hatagan kita sang mga bugay nga gintigana para sa mga matinuohon. Indi kita maghaum-haom nga ang aton mga kabataan manuto lang nga palanggaon ang ebanghelyo nga sila lang; responsibilidad naton nga tudloan sila. Samtang aton ginabuligan ang aton kabataan nga makahibalo kon paano gamiton ang ila kahilwayan sa pagpili sing maalamon, ang aton ehemplo makainspirar sa ila sa paghimo sang matarong nga mga pagpili. Ang ila matinuohon nga pagpangabuhi sa pila ka adlaw magabulig sa ila kabataan nga mahibal-an ang kamatuoran sang ebanghelyo para sa ila mga kaugalingon.
Mga lamharon nga lalaki kag babayi, pamatii ang propeta sa karon nga nagahambal sa inyo. Tinguhai nga tun-an ang diosnon nga mga kamatuoran kag himulati nga intiendihon ang ebanghelyo para sa inyo kaugalingon. Si Pangulong Nelso naglaygay sang nagligad lang: “Ano nga kaalam ang kulang sa inyo? … Sunda ang ehemplo sang Propeta nga si Joseph. Magpangita sang malinong nga lugar. … Magpaubos sa atubang sang Dios. Ibuhos ang inyo tagipusuon sa inyo Amay nga Langitnon. Magpalapit sa Iya para sa mga sabat.”4 Samtang nagapangayo kamo sang giya sang inyo mapinalanggaon nga Amay nga Langitnon, nagapamati sa laygay sang buhi nga mga propeta kag pagpanilag sang ehemplo sang matarong nga mga ginikanan, kamo man mangin mabakod nga ehemplo sang pagtuo sa inyo pamilya.
Sa mga ginikanan nga may kabataan nga nagbiya sa dalan sang kasugtanan, balika sila sing inanay. Buligi sila nga maintiendihan ang mga kamatuoran sang ebanghelyo. Sugdi subong; indi pa ulihi ang tanan.
Ang aton ehemplo sang matarong nga pagpangabuhi makahimo sang dako nga kinalain. Ginsiling ni Pangulong Russell M. Nelson: “Bilang mga Santos sa Ulihing mga Adlaw, naandan na naton nga pamensaron ang ‘simbahan’ bilang bagay nga nagakatabo sa aton mga simbahan, nga ginasuportahan sang kon ano nga nagakatabo sa puluy-an. Kinahanglan naton liwaton ining sulundan. Tion na para sa nasentro-sa-balay nga Simbahan, nga nga ginasuportahan sang nagakatabo sa mga bilding sang aton branch, ward, kag stake.”5
Ang balaan nga mga kasulatan nagatudlo, “Hanasa ang bata sa dalanon nga dapat niya paglaktan: kag bisan tigulang na sia indi sia magtalikod sa sini.”6
Nagasiling man ini, “Kag karon, sanglit ang pagwali sang pulong may isa ka dako nga kahuyugan sa pagtuytoy sa katawhan sa paghimo sinang matarong—huo, may mas gamhanan ini nga epekto sa mga kaisipan sang katawhan sangsa espada, ukon bisan ano pa man, nga natabo sa ila—gani nakahunahuna si Alma nga nagakaigo nga pagatilawan nila ang epektibo nga gahum sang pulong sang Dios.”7
May istorya sang isa ka babayi nga naakig nga ang iya anak grabe magkaon sing dulsi. Bisan ano niya ka hambal sa bata nga mag-untat, padayon sia nga nagakaon sang matam-is. Nga grabe ang ugtas, nagdesisyon sia nga dalhon ang iya anak para makigkita sa maalam nga tawo nga iya ginarespeto.
Nagpalapit sia kag nagsiling, “Sir, grabe magkaon dulsi ang akon anak. Pwede mo bala sia laygayan nga mag-untat na kaon sini?”
Namati sia sing maayo kag nagsiling sa iya anak sang babayi, “Magpuli ka kag magbalik pagligad sang duha ka semana.”
Gindala sang babayi ang iya anak papuli, nga natingala kon ngaa wala niya ginpangabay ang bata nga mag-untat na kaon sing dulsi.
Duha ka semana ang nagligad nagbalik sila. Gintulok sing tadlong sang maalam nga tawo ang bata kag nagsiling, “Bata, dapat mag-untat ka na kaon sing matam-is. Indi ini maayo para sa imo ikaayong-lawas.”
Nagtango ang bata kag nangako nga himuon niya ini.
Ang iloy sang bata namangkot, “Ngaa wala mo sia ginhambalan sina sang duha na ka semana?”
Nagyuhum ang maalam nga tawo. “Sang nagligad nga duha ka semana palakaon man ako sang dulsi.”
Ining tawo nagpangabuhi nga may amo sina nga integridad nga nakahibalo sia nga ang iya laygay mangin epektibo kon sia mismo nagasunod sa iya kaugalingon nga laygay.
Ang impluwensya naton sa aton kabataan mas mabaskog kon makita nila kita nga nagalakat sing matinuohon sa dalan sang kasugtanan. Ang propeta sa Libro ni Mormon nga si Jacob isa ka subong nga ehemplo sang pagkamatarong. Ang iya anak nga si Enos nagsulat parte sa impluwensya sang mga pinanudlo sang iya amay:
“Ako, si Enos, sanglit nakakilala sa akon amay nga sia isa ka matarong nga tawo—kay gintudluan niya ako sa iya hinambalan, kag subong man sa disiplina kag pagtudlo sang Ginuo—kag bulahan ang ngalan sang akon Dios tungod sini. …
“… Kag ang mga pulong nga masami ko mabatian nga ginahambal sang akon amay nahanungod sa kabuhi nga wala’y katapusan, kag sang kalipay sang mga santos, nagsalop sing madalom sa akon tagipusuon.”8
Ang mga iloy sang lamharon nga mga hangaway nagpangabuhi sang ebanghelyo, kag ang ila kabataan napuno sang dako nga pagpati. Ang ila lider nagreport:
“Gintudluan sila sang ila mga iloy, nga kon indi sila magduhaduha, pagaluwason sila sang Dios.
“Kag ginsaysay nila sa akon ang mga pulong sang ila mga iloy, nga nagasiling: Wala kami nagaduhaduha nga nahibal-an ini sang amon mga iloy.”9
Si Enos kag ang lamharon nga mga hangaway ginpabakod sang pagtuo sang ila mga ginikanan, nga amo ang nagbulig sa ila nga atubangon ang ila kaugalingon nga mga pagtilaw sang pagtuo.
Ginbugayan kita sang ginpanumbalik nga ebanghelyo ni Jesucristo sa aton panahon, nga nagainspirar sa aton kon ginaluyahan kita ukon ginaligban. Makasalig kita nga ang aton mga pagpaninguha magabunga sa husto nga tion sang Ginuo, kon magpadayon kita pasulong sa tunga sang mga pagtilaw sang aton pagtuo.
Ako kag ang akon asawa, upod sa Area Presidency, sang sini lang nag-upod kay Elder David A. Bednar sa dedikasyon sang Port-au-Prince Haiti Temple. Ang amon anak nga si Jorge, nga nag-upod sa amon, naghambal parte sa iya eksperiyensya: “Kanami-nami, Pa! Pagsugod gid ni Elder Bednar sang pangamuyo sa pagdedikar, nabatyagan ko ang kwarto nga napuno sang kaalabaab kag kasanag. Kadako kaayo sang gindugang sang pangamuyo sa akon paghangop sa katuyuan sang templo. Puluy-an gid matuod ini sang Ginuo.”
Sa Libro ni Mormon, si Nefi nagatudlo nga samtang ginahandum naton nga mahibal-an ang pagbuot sang Dios, pabakuron Niya kita. Ginsulat nila, “Ako, si Nefi, nga tuman pa kalamharon … kag may dako man nga mga handum nga makahangop sang mga katanhagaan sang Dios, gani, nagtuaw ako sa Ginuo; kag yari karon iya ako ginduaw, kag ginpahumok ang akon tagipusuon nga nagpati ako sa tanan nga mga pulong nga ginpanghambal sang akon amay; gani, wala ako magsupak batok sa iya subong sang akon mga utod nga lalaki.”10
Mga kauturan, buligan naton ang aton kabataan kag ang tanan sa aton palibot nga sundon ang dalan sang kasugtanan sang Dios agud matudloan sila sang Espiritu kag pahumukon ang ila tagipusuon sa paghandum nga sundon Sia sa bilog nila nga kabuhi.
Sa akon pagpanumdom sang ehemplo sang akon mga ginikanan, narealisar ko nga ang aton pagtuo sa Ginuong Jesucristo amo ang magapakita sa aton sang dalan pabalik sa aton langitnon nga puluy-an. Nakahibalo ako nga ang mga milagro nagaabot pagkatapos sang pagtilaw sang aton pagtuo.
Nagapamatuod ako kay Jesucristo kag sa Iya nagabayad-sala nga sakripisyo. Kabalo ako nga Sia ang aton Manluluwas kag Manughilway. Sia kag ang aton Amay nga Langitnon nag-abot sinang aga sang tigpamulak sang 1820 sa lamharon nga Joseph Smith, ang propeta sang Pagpanumbalik. Si President Russell M. Nelson amo ang propeta sa aton panahon. Sa ngalan ni Jesucristo, amen.