Mga Babayi sang Kasugtanan nga Nagapakigbulig sa Dios
Ang mangin babayi sang kasugtanan nga nagapakigbulig sa Dios amo ang kon paano ang dungganon kag maayo nga mga anak nga babayi sang Dios pirme nagbatiti, nagpanguna, kag nagminister..
Nagapasalamat ako sa bugay nga maghambal sa inyo, mga anak nga babayi sang kasugtanan sang Dios. Subong nga gab-i, ang akon tuyo amo ang paisogon kamo sa dakung pag-alagad nga sa diin gintawag kamo. Huo, ang tagsa ka anak nga babayi sang Dios nga nagapamati sa akon tingug nakabaton sang tawag halin sa Ginuong Jesucristo.
Ang inyo tawag nagsugod sang ginbutang kamo sa sining kabuhi, sa lugar kag tion nga ginpili para sa inyo sang isa ka Dios nga nakakilala sa inyo sing maayo kag nagapalangga sa inyo bilang Iya anak. Sa kalibutan sang espiritu, kilala Niya kamo kag gintudloan kamo kag ginbutang sa lugar sa diin may oportunidad kamo, nga talagsa sa kasaysayan sang kalibutan, agud maagda sa isa ka tulugmawan. Dira, mabatian ninyo ining mga pulong sang isa ka gintawag nga alagad ni Jesucristo: “Sa awtoridad nga ginhatag sa akon ni Jesucristo, ginabunyagan ko ikaw sa ngalan sang Amay, kag sang Anak, kag sang Balaan nga Espiritu. Amen.”1
Pagbutwa ninyo sa tubig, nagbaton kamo sang isa pa gid ka tawag sa pag-alagad. Bilang bag-o nga anak sang kasugtanan sang Dios, nagpromisa kamo kag nagbaton sang responsibilidad sa Ang Simbahan ni Jesucristo sang mga Santos sa Ulihing mga Adlaw, nga sa sini ginkumpirmahan kamo bilang miyembro. Nakighisugot kamo sa Dios nga dalhon sa inyo kaugalingon ang ngalan ni Jesucristo, tumanon ang Iya mga kasugoan, kag mag-alagad sa Iya.
Sa tagsa nga nagahimo sining mga kasugtanan, ang pag-alagad nga gintawag sang Dios nga iya himuon, perpekto nga magakabagay sa sina nga tawo. Ang mga anak nga babayi sang kasugtanan sang Dios, ugaling, palareho nga nagaambit sang isa ka importante kag makalilipay nga tawag. Ini amo ang mag-alagad sa iban para sa Iya.
Sa paghambal sa mga utod nga babayi, si Pangulong Russel M. Nelson naghatag sang manami nga sumaryo sang tawag sang Ginuo sa inyo nga buylogan Sia sa Iya buluhaton. Si Pangulong Nelson naglaragway sang inyo tawag sa sini nga paagi: “Ang Ginuo nagsiling, ‘Ang akon buluhaton kag akon himaya [amo ang] ipahanabo ang kawala’y kamatayon kag kabuhi nga wala’y katapusan sang tawo.Tan-awa sa (Moses 1:39.) Gani ang Iya mga anak nga babayi nga debotado nga mga disipulo matuod-tuod nga makasiling, ‘Ang akon buluhaton kag akon himaya amo ang buligan ang akon mga pinalangga nga malab-ot inang langitnon nga tinutuyo.’
“Ang pagbulig sa isa pa gid ka tawo nga malab-ot and iya langitnon nga potensyal kabahin sang diosnon nga misyon sang babayi. Bilang iloy, manunudlo, ukon nagabatiti nga santo, ginahorma niya ang buhi nga daga sa korte sang iya mga handum. Nga nagapakigbulig sa Dios, ang iya diosnon nga misyon amo ang buligan ang mga espiritu nga mabuhi kag ang mga kalag nga mabayaw . Ini ang katuyuan sang iya kabuhi. Dungganon ini, nagapasanag, kag nagapakataas”.2
Indi kamo makahibalo kon san-o ukon ano kalawig nga magasentro ang inyo personal nga misyon sa pag-alagad sa mga tawag pareho sang iloy, lider, ukon ministering sister. Ang Ginuo, sa iya pagpalangga, wala nagatugot sa aton sa pagpili sang tion, kalawigon, ukon pasunod sang aton mga responsibilidad. Pero nakahibalo kamo halin sa balaan nga kasulatan kag buhi nga mga propeta nga ang tanan sining mga responsibilidad magaabot, sa sini man nga kabuhi ukon sa madason, sa tagsa ka anak nga babayi sang Dios. Kag ang tanan sini, pagpanghanda para sa kabuhi nga wala’y katapusan upod sa mapinalanggaon nga mga panimalay—“ang pinakadako sa tanan nga mga dulot sang Dios.”3
Mangin maalam kamo nga himuon ang tanan nga pagtinguha sa paghanda subong nga ginapanumdum ang resulta. Ining buluhaton mas simple tungod ang tagsa sining mga responsibilidad nagapangayo sang halos amo man nga pagpanghanda.
Masugod kita sa responsibilidad nga mangin ministering sister. Kon ginhatagan ka man sinang responsibilidad bilang 10-katuig nga bata nga babayi sa pamilya nga ang amay napatay, ukon bilang pangulo sang Relief Solciety sa lugar nga bag-o lang nasunogan, ukon kon nagapaayo ka sa ospital pagkatapos sang operasyon—may tsansa ka nga magtuman sang imo tawag halin sa Ginuo nga mangin Iya nagaminister nga anak.
Daw magkatuhay gid ina nga mga responsibilidad sa ministering. Pero nagapangayo ini tanan sang pagpanghanda sang gamhanan, mapinalanggaon nga tagipusuon, maisog nga pagtuo nga ang Ginuo wala nagahatag sang kasugoan luwas nga nagahanda Sia sang paagi, kag kaluyag nga maglakat kag maghimo para sa Iya.4
Bangud handa sia, ang 10-katuig nga bata naghakos sa iya nabalo nga iloy kag nagpangamuyo agud mahibaloan kon paano buligan ang iya pamilya. Kag nagapadayon sia sa sini.
Ang pangulo sang Relief Society nakahanda sa pag minister antes pa sang wala ginapaabot nga sunog sa iya lugar. Kilala na niya ngadaan kag ginapalangga ang mga tawo. Ang iya pagtuo kay Jesucristo nagtubo sa sulod sang mga tinuig sa iya pagbaton sang mga sabat sa iya mga pangamuyo nga buligan sia sang Ginuo sa iya magagmay nga mga pag-alagad para sa Iya. Bangud sang iya malawig nga pagpanghanda, preparado sia kag nakunyag mag-organisar sang iya mga sisters sa pagminister sa mga tawo kag mga pamilya nga nahul-an.
Ang sister nga nagapaayo sa ospital pagkatapos sang operasyon handa sa pag-minister sa pareho niya nga mga pasyente. Nakahimo sia sang bug-os kabuhi nga pagminister para sa Ginuo sa tagsa ka estranghero pareho nga daw isa sia ka kaingod ukon abyan. Sang nabatyagan niya sa iya tagipusuon ang tawag sa pag-minister sa ospital, nag-alagad sia sa iban sing maisog kag sing may tuman nga gugma nga ang iban nga mga pasyente nagsugod sa paghandum nga indi sia anay mag-ayo dayon.
Sa amo man nga paagi nga nagahanda kamo sa pag-minister, sarang kamo maghanda para sa inyo tawag nga mangin lider para sa Ginuo kon mag-abot ini nga tion. Magakinahanglan ini sang pagtuo kay Jesucristo nga nagpanggamot sa madalum ninyo nga gugma sa balaan nga mga kasulatan, sa pagtuytoy sa mga tawo kag pagtudlo sang Iya pulong nga wala sing kahadlok. Dayon mangin handa kamo nga maagom ang Balaan nga Espiritu bilang inyo dalayon nga kaupod. Magakakunyag kamo sa pagsiling: “Ako” kon ang inyo manuglaygay sa pangulohan sang Young Women magsiling sa nataranta nga tingug, “Nagamasakit si sister Alvarez subong. Sin-o ang matudlo sa iya klase?”
Nagapangayo sang amo man nga pagpanghanda ang manami nga adlaw kon ang Ginuo magtawag sa inyo sa responsibilidad nga mangin iloy. Pero magapangayo ini sing mas mapinalanggaon nga tagipusuon sangsa ginkinahanglan ninyo sang una. Magapangayo ini sang pagtuo kay Jesucristo nga masobra sangsa nangin yara sang una sa inyo tagipusuon. Kag magapangayo ini sang kapasidad sa pagpangamuyo para sa impluwensya, paggiya, kag pagpasulhay sang Balaan nga Espiritu nga masobra sangsa nabatyagan ninyo nga posible.
Ayhan mamangkot kamo kon paano ang isa ka tawo bisan pila ang edad makahibalo kon ano ang kinahanglan sang mga iloy. Nagakaigo ini nga pamangkot. Indi mahibal-an sang tawo ang tanan, pero makatuon kita sang pila ka mga leksyon paagi sa rebelasyon halin sa Dios. Kag madamo man kita sang matun-an paagi sa pagpanilag, kon gamiton naton ang oportunidad nga pangitaon ang Espiritu sa pagbulig sa aton nga mahangpan ang aton napanilagan.
Napanilagan ko si Katheleen Johnson Eyring sa 57 anyos nga nag-asawahay kami. Iloy sia sang apat ka lalaki kag duha ka babayi. Asta subong, nagabaton sia sang tawag nga mangin iloynon nga impluwensya sa masobra isa ka gatus ka direkta nga mga miyembro sang pamilya kag ginatus nga iban pa nga iya gin-adoptar sa iya iloynon nga tagipusuon.
Madumduman ninyo ang perpekto nga paglaragway ni President Nelson sang diosnon nga misyon sang babayi—lakip na ang misyon sang pagkailoy: “Bilang iloy, manunudlo, ukon nagabatiti nga santo, ginahorma niya ang buhi nga daga sa korte sang iya mga handum. Nga nagapakigbulig sa Dios, ang iya diosnon nga misyon amo ang buligan ang mga espiritu nga mabuhi kag ang mga kalag nga mabayaw . Ini ang katuyuan sang iya kabuhi.“5
Halos suno sa akon makita, ang akon asawa nga si Kathleen nagsunod sa sina nga sugo nga ginhatag sa mga anak nga babayi sang aton Amay. Ang yabi sa akon panan-aw amo ang mga pulong nga “ginahorma niya ang buhi nga daga sa korte sang iya mga handum … nga nagapakigbulig sa Dios.” Wala sia nagpamilit. Ginhorma niya. Kag may hormahan sia sang iya mga handum kag sa sini gintinguhaan niya nga hormahon ang iya mga ginpalangga kag ginbatiti. Ang iya hormahan amo ang ebanghelyo ni Jesucristo—suno sa akon makita paagi sa mapinangamuyuon nga pagpanilag sa sulod sang mga tinuig.
Ang mangin babayi sang kasugtanan nga nagapakigbulig sa Dios amo ang kon paano ang dungganon kag maayo nga mga anak nga babayi sang Dios pirme nga nagbatiti, nagpanguna, kag nagminister, nga nagaalagad sa ano man nga paagi kag lugar nga Iya ginhanda para sa ila. Ginapromisa ko sa iyo nga makasalapo kamo sang kalipay sa inyo pagpanglakaton pakadto sa inyo langitnon nga puluy-an sa inyo pagbalik sa Iya bilang nagatipig-kasugtanan nga mga anak nga babayi sang Dios.
Nagasaksi ako nga ang Dios nga Amay buhi kag nagapalangga sa inyo. Sabton Niya ang inyo mga pangamuyo. Ang Iya Pinalangga nga Anak nagatuytoy, sa tagsa ka detalye, sang Ang Simbahan ni Jesucristo sang mga Santos sa Ulihing mga Adlaw. Si President Russel M. Nelson ang Iya buhi nga propeta. Kag si Joseph Smith nakakita kag nakighambal sa Dios nga Amay kag kay Jesucristo sa kakahoyan sa Palmyra, New York. Nakahibalo ako nga matuod ina. Nagasaksi man ako nga si Jesucristo ang inyo Manluluwas; Palangga Niya kamo. Kag paagi sa Iya Pagbayad-sala, matinloan kamo kag maalsa sa mataas kag balaan nga mga tawag nga magaabot sa inyo. Ginapamatud-an ko ini sa sagrado nga ngalan ni Jesucristo, amen.