2:3

Come, Follow Me—ang Plano sang Ginuo sa Pagbato kag Pagpangaman sa mga Plano sang Kaaway

Ni Mark L. Pace

Pangkabilogan nga Pangulo sang Sunday School

Ginahanda sang Ginuo ang Iya katawhan batok sa mga pag-atake sang kaaway. AngCome, Follow Me amo ang plano sang Ginuo sa pagbato kag pagpangaman sa mga plano sang kaaway.

Nalipay kita sa pagtipon sa sining manami nga pangkabilogan nga komperensya sang Simbahan ni Jesucristo sang mga Santos sa Ulihing mga Adlaw. Isa ka bugay nga mabaton ang hunahuna kag pagbuot sang Ginuo paagi sa mga panudlo sang Iya mga propeta kag mga apostoles. Si President Russell M. Nelson amo ang buhi nga propeta sang Ginuo. Nagapasalamat gid kita sa iya inspirado nga laygay kag direksyon nga nabaton karon nga adlaw.

Luyag ko magdugang sang akon panaksihon sa sinang ginpaambit antes sini. Nagapamatuod ako parte sa Dios, nga aton Walay Katapusan nga Amay. Buhi Sia kag palangga Niya kita kag nagabantay Sia sa aton. Ang Iya plano sang kalipayan nagaaman sang bugay sa sining mortal nga kabuhi kag sang aton pagbalik sa Iya presensya sa ulihi.

Nagapamatuod man ako parte kay Jesucristo. Sia ang Bugtong nga Anak sang Dios. Sia nagluwas sa aton gikan sa kamatayon, kag tuboson Niya kita gikan sa sala kon magpakita kita sang pagtuo sa Iya kag maghinulsol. Ang iya walay dulonan nga sakripisyo sang pagbayad-sala tungod sa aton nagadala sang mga bugay sang pagkadimamalatyon kag kabuhi nga walay katapusan. Sa pagkamatuod, “Pasalamatan naton ang Dios tungod sa indi matupongan nga dulot sang Iya diosnon nga anak” (“Ang Buhi Nga Cristo: Ang Panaksihon sang mga Apostoles,” Liahona, Mayo 2017, sulod nga panghapin sang magasin).

Ang mga Santos sa Ulihing mga Adlaw sa bilog nga kalibutan bulahan nga makasimba kay Jesucristo sa Iya mga templo. Isa sinang mga templo ginatukod sa karon sa Winnipeg, Canada. Kami sang akon asawa nga si Anne Marie nakaangkon sing oportunidad nga mabisitahan ang ginatukuran sini sang Agosto sining tuig. Matahum ang desinyo sang templo kag mangin dalayawon gid ini kon mahuman na. Apang, indi mahimo ang isa ka dalayawon nga templo sa Winnipeg, ukon bisan diin man, nga wala sing mabakod kag malig-on nga pundasyon.

Ang siklo sang pagyelo kag pagkatunaw kag pagsalupsop sang tubig sa duta sa Winnipeg nagpabudlay sa paghanda sang pundasyon sang templo. Gani, gindesisyonan nga ang pundasyon para sining templo magalakip sang 70 ka mga haligi sang ginsemento nga mga salsalon. Ining mga haligi 60 ka tapak (18 m) ang kalabaon kag 12 tubtob 20 ka pulgada (30 to 50 cm) ang kasangkaron. Ginlubong ini sa duta tubtob nga malab-ot ang matig-a nga bahin sang bato, mga 50 ka tapak (15 m) sa idalom sang duta. Sa sini nga paagi, ang 70 ka haligi nagapat-od sing mabakod kag malig-on nga pundasyon para sa mangin matahum nga Winnipeg temple.

Bilang mga Santos sa Ulihing mga Adlaw, nagatinguha kita sing amo man kalig-on kag kapat-od nga pundasyon sa aton mga kabuhi—isa ka espiritwal nga pundasyon nga kinahanglanon para sa aton pagpanglakaton sa mortalidad kag pabalik sa aton langitnon nga puluy-an. Ang ina nga pundasyon nahamtang sa malig-on nga pundasyon sang aton pagkahaylo kay Ginuong Jesucristo.

Madumduman naton ang mga panudlo ni Helaman gikan sa Libro ni Mormon: “Kag karon, mga anak ko, dumduma, dumduma nga sa bató sang aton Manunubos, nga amó si Cristo, ang Anak sang Dios, nga kamo kinahanglan gid nga magpasad sang inyo sadsaran; agud kon ang yawa magapadala sang iya mamadlos nga mga hangin, huo, sang iya mga baslay sa buhawi, … mangin walâ ini sang gahum sa pagpangibabaw sa inyo sa pagguyod sa inyo paidalom sa kadadalman sang kapiutan kag nagapadayon nga kasubo, tungod sang bato nga sa diin kamo napasad, nga amó ang isa ka pat-ud nga sadsaran, isa ka sadsaran nga kon diin ang mga tawo magapasad indi sila mapukan” (Helaman 5:12).

Nagapasalamat kita nga nagapuyo kita sa tion nga ginatudloan kita sang mga propeta kag mga apostoles parte sa Manluluwas nga si Jesucristo. Ang pagsunod sa ila laygay nagabulig sa aton sa pagpahamtang sang malig-on nga pundasyon kay Cristo.

Sang nagligad nga tuig, sa iya nagabukas nga pamulongpulong sang Oktubre 2018 nga pangkabilugan nga komperensya, si President Russell M. Nelson naghatag sining deklarasyon kag paandam: “Ang malawig na nga katuyoan sang Simbahan amo nga buligan ang tanan nga miyembro sini nga mag-uswag sa ila pagtuo sa aton Ginuong Jesucristo kag sa Iya Pagbayad-sala, nga buligan sila sa paghimo kag pagtuman sang ila mga kasugtanan sa Dios, kag nga pabakuron kag hugpongon ang ila mga pamilya. Sa sining komplikado nga kalibutan nga ginapuy-an naton, indi ini mahapos. Nagawaswas ang kaaway sa iya pag-atake sa pagtuo kag sa aton kag sa mga pamilya naton sing tuman kadasig. Agud makalampuwas kita sing espirituhanon, kinahanglan naton ang plano sa pagbato kag pagpangaman sa mga plano sang kaaway” (“Nagabukas nga Pamulongpulong,” Liahona, Nob. 2018, 7; pagdagmit gindugang).

Pagkatapos sang mensahe ni President Nelson, si Elder Quentin L. Cook sang Korum sang Dose ka Apostoles nagpresentar sang Come, Follow Me nga manwal para sa mga indibidwal kag mga pamilya. Ang iya pamulongpulong naglakip sang masunod nga mga pahayag:

“Ang bag-o nga tulun-an sa puluy-an nga Come, Follow Me nga manwal … gindesinyo agud makabulig sa mga miyembro nga makatuon sang ebanghelyo sa puluy-an.”
“‘Ini nga manwal para sa tagsa ka indibidwal kag pamilya sa Simbahan’ [Come, Follow Me—For Individuals and Families (2019), vi].”
“Ang amon katuyoan amo nga balansehon ang mga eksperiyensya sa Simbahan kag sa puluy-an sa bagay nga mapadako kaayo ang pagtuo kag espirituwalidad kag mapabaskog ang pagkahaylo sa Amay nga Langitnon kag sa Ginuong Jesucristo.” (“Madalom kag Dalayon nga Pagkahaylo sa Amay nga Langitnon kag kay Ginuong Jesucristo,” Liahona, Nob. 2018, 9–10.)

Sumugod sang Enero sining tuig, ang mga Santos sa Ulihing mga Adlaw sa bilog nga kalibutan nagsugod sa pagtuon sang Bag-ong Katipan nga gamit ang Come, Follow Me nga manwal bilang aton giya. Nga may semanal nga skedyul, ang Come, Follow Me nagabulig sa aton sa pagtuon sang balaan nga mga kasulatan, sang doktrina sang ebanghelyo, kag sang mga panudlo sang mga propeta kag mga apostoles. Manami gid ini nga bulig para sa aton tanan.

Pagkaligad sang siyam ka bulan sining bug-os nga kalibutan nga pagtuon sang balaan nga kasulatan, ano ang aton nakita? Makita naton ang mga Santos sa Ulihing mga Adlaw bisan diin nga nagatubo sa pagtuo kag debosyon kay Ginuong Jesucristo. Makita naton ang mga indibidwal kag mga pamilya nga nagahinguyang sang tion sa bilog nga semana sa pagtuon sang mga pulong sang Manluluwas. Makita naton ang nagauswag nga mga leksyon sa ebanghelyo sa aton mga klase sa Domingo sa pagtuon naton sang balaan nga mga kasulatan sa puluy-an kag pagpaambit sang aton mga nahangpan sa simbahan. Makita naton ang mas dako nga kalipay kag pag-isa sang pamilya sa aton pag-idog halin sa simple nga pagbasa sang balaan nga mga kasulatan pakadto sa pagtuon sang balaan nga mga kasulatan sa madalom nga paagi.

Nangin pribilihiyo ko nga makasugilanon sa madamo nga mga Santos sa Ulihing mga Adlaw kag mabatian sa ila mismo ang ila mga eksperiyensya sa Come, Follow Me. Ang ila mga pagpabutyag sang ila pagtuo nagapuno sang akon tagipusuon sang kalipay. Yari ang pila lamang sinang mga komento nga akon nabatian gikan sa nagkalainlain nga mga miyembro sang Simbahan sa nagkalainlain nga mga bahin sang kalibutan:

Isa ka amay nagpaambit: “Nanamian ako sang Come, Follow Me kay nagahatag ini sang oportunidad nga magpanaksihon parte sa Manluluwas sa akon mga kabataan.”
Sa lain naman nga puluy-an, isa ka bata nagsiling: “Higayon na ini nga mabatian ang akon mga ginikanan nga nagapaambit sang ila mga testimonya.”
Isa ka iloy nagpaambit: “May inspirasyon kita sa kon paano unahon ang Dios. Ang tion nga [abi naton] ‘wala kita’ [napuno] gali sang paglaum, kalipay, paghidaet, kag kadalag-an sa mga paagi nga wala naton napaabot nga posible.”
Isa ka mag-asawa nagtalupangod: “Lain na gid ang amon pagbasa sang balaan nga mga kasulatan ikumparar sang una. Mas madamo pa gid ang amon natun-an ikumparar sang una. Gusto sang Ginuo nga lain ang aton pagtamod sang mga butang. Ginahanda kita sang Ginuo.”
Isa ka iloy nagsiling: “Nanamian ako nga palareho lang ang aton ginatun-an. Sang una, ginabasa naton ini. Subong, ginatun-an na naton ini.”
Isa ka sister nagpaambit sining may paghangop nga panan-aw: “Sang una, ang leksyon ginasuportahan sang balaan nga mga kasulatan. Subong, ang balaan nga mga kasulatan ginasuportahan sang leksyon.”
Isa pa gid ka sister ang nagkomento: “Lain gid ya kon himuon ko [ikumparar sa] kon indi ko paghimuon. Mas nahapusan ako nga maghambal sa iban parte kay Jesucristo kag sa aton mga ginapatihan.”
Isa ka lola nagsiling: “Ginatawag ko ang akon mga kabataan kag mga apo kon Domingo kag nagapaambit kami sang amon paghangop sa Come, Follow Me sing ulolupod.”
Isa ka sister nakatalupangod: “AngCome, Follow Me daw pareho lang nga ang Manluluwas personal nga nagaatipan sa akon. Inspirado ini sang langit.”
Isa ka amay nagkomento: “Kon maggamit kita sang Come, Follow Me, daw pareho kita sa mga anak sang Israel nga ginamarkahan ang mga haligi sang aton mga puwertahan, nga ginaamligan ang aton mga pamilya gikan sa impluwensiya sang manuglaglag.”

Mga kauturan, makalilipay nga masugilanon kamo kag mabatian kon paano ang inyo mga pagpaninguha sa Come, Follow Me nagabugay sang inyo kabuhi. Salamat sa inyo kaukod.

Ang pagtuon sang balaan nga mga kasulatan gamit ang Come, Follow Me bilang giya nagapabakod sang aton pagkahaylo kay Jesucristo kag sa Iya ebanghelyo. Wala naton ginabaylo ang isa ka oras nga kubos sa pagsimba kon Domingo para sa isa ka oras nga dugang sa pagtuon sang balaan nga kasulatan sa puluy-an. Ang pagtuon sang ebanghelyo isa ka tayuyon nga pagtinguha sa bilog nga semana. Isa ka sister nagpaambit sa akon sang sini nga paghangop, “Ang katuyoan indi nga himuon ang pagsimba nga kubos sing isa ka oras; kundi himuon ang pagsimba nga anom ka adlaw nga mas malawig!”

Karon, binagbinaga liwat ang paandam nga ginhatag sang aton propeta nga si President Nelson sa pagbukas niya sang Oktubre 2018 nga pangkabilugan nga komperensya:

“Nagawaswas ang kaaway sa iya pag-atake sa pagtuo kag sa aton kag sa mga pamilya naton sing tuman kadasig. Agud mabuhi kita sing espirituhanon, kinahanglan naton sang mga plano sa pagbato kag pagpangaman sa sini sing matutum” (Nagabukas nga Pamulongpulong,” 7).

Dayon (pagligad sing mga 29 ka oras) sang hapon sang Domingo, gintapos niya ang komperensya upod sining promisa: “Sa inyo pagpangabudlay sa pagbag-o sang inyo puluy-an nga mangin sentro sang pagtuon sang ebanghelyo, … ang impluwensiya sang kaaway sa inyo kabuhi kag sa inyo puluy-an mangin pigaw” (“Becoming Exemplary Latter-day Saints,” Liahona, Nob. 2018, 113).

Paano magwaswas ang kaaway sa iya pag-atake sing tuman kadasig samtang ang impluwensiya sang kaaway nagapigaw na? Puwede ini matabo, kag nagakatabo na ini sa bug-os nga Simbahan, bangod ginahanda sang GInuo ang Iya katawhan batok sa mga atake sang kaaway. Ang Come, Follow Me amo ang plano sang Ginuo sa pagbato kag pagpangaman sini sing matutum. Si President Nelson nagtudlo, “Ang bag-o nga gintingob nga kurikulum nga nakasentro sa puluy-an kag suportado sang Simbahan may potensyal sa pagbuya sang gahum sang mga pamilya.” Apang, pangayuon sini ang aton pinakamaayo nga mga pagtinguha; kinahanglan naton “[tapuson] sing maid-id kag sing mahalungon agud mahimo ang [aton] puluy-an nga isa ka santuaryo sang pagtuo” (“Becoming Exemplary Latter-day Saints,” 113).

Kay man, si President Nelson nagsiling man, “Responsable kita tanan para sa aton kaugalingon nga espirituhanon nga pag-uswag” (“Nagabukas nga Pamulongpulong,” 8).

Sa paggamit sang Come, Follow Me nga manwal, ginahanda kita sang Ginuo “para sa delikado nga panahon nga ginaatubang naton subong” (Quentin L. Cook, “Madalom kag Dalayon nga Pagkahaylo,” 10). Ginabuligan Niya kita sa pagpahamtang sinang “pat-od nga sadsaran, isa ka sadsaran nga kon diin ang mga tawo magapasad indi sila mapukan” (Helaman 5:12)—ang pundasyon sang testimonya nga nakaangkla sing malig-on sa pundasyon sang aton pagkahaylo sa Ginuong Jesucristo.

Kabay nga ang aton matag-adlaw nga mga pagtinguha sa pagtuon sang balaan nga mga kasulatan magpabakod sa aton kag magpakita nga nagakaangay kita para sa sining ginpromisa nga mga bugay. Ginapangamuyo ko sa ngalan ni Jesucristo, amen.