Indi Balá nga Tanan Kitá mga Manugpakilimos?

Ni Elder Jeffrey R. Holland

Sang Korum sang Napulogduha ka mga Apostoles

Litrato

Imol ukon manggaranon man, kitá ”makahimo sang aton ikasarang” kon ang iban nagakinahanglan.

Daw ano kanami ang bag-o nga elemento sang aton pangkabilogan nga konperensya ang ining paghambal sa kinaiya nga linggwahe. Bien hecho, Eduardo.

Ayhan sa pinakamakakilibot nga tion sa Iya temprano nga pag-alagad, si Jesus nagtindog sa sinagog sa iya kinatawhan nga banwa sa Nazareth kag nagbasa sining mga pulong nga ginpanagna ni Isaiah kag ginrekord sa Ebanghelyo ni Luke: ”Ang Espiritu sang Ginuo yari sa akon, bangud ginpili niya ako nga magwali sang ebanghelyo sa mga imol; ginpadala niya ako sa pagpaayo sa mga napunô sang kasakit, sa pagwali sang kaluwasan sa mga nabihag, [kag] ... kag maghilway sa mga napilasan.”¹

Gani ang Manluluwas naghimo sang una nga pangpubliko nga pahayag sang Iya pangmesiya nga pag-alagad. Pero ang ining bersikulo nagpaathag nga sa iya pagpadulong sa Iya pinakahingapusan nga sakripisyo sang pagtubos kag Pagkabanhaw, ang una kag pinakamataas Niya nga pangmesiya nga katungdanan amó ang magpakamaayo sa mga pobre, lakip ang mga pobre sa espiritu.

Sugod sang Iya pag-alagad, si Jesus nagpalangga sa mga imol kag mga kubos sa isa ka tumalagsahon nga paagi. Siya natawo sa puluy-an sang duha sa ila kag nagdako sa katung-an sang madamo sa ila. Indi naton nahibal-an ang madamo nga mga detalye sang Iya kalibutanon nga kabuhi, pero sang isa ka bes Siya nagsiling, ”Ang mga singgalong may mga buho nga ginapaulian, kag ... ang mga pispis ... may mga pugad; pero ang Anak sang tawo walâ sing balay nga mapahuwayan.”² Sa kaathagan ang Manugtuga sang langit kag duta ”kag sang tanan nga butang nga yara sa mga ini”³ amó, nga sa pinakakubos sa Iya hamtung nga kabuhi, siya walay puluy-an.

Sa kabilogan sang maragtas sang kalibutan, ang kaimolon ginakabig nga pinakadako kag pinakalabaw sa tanan nga pagsupak. Ang iya sini hilmunon nga kabayaran sa kasamihan amó ang panglawasnon, apang ang espirituhanon kag pangbalatyagon nga mga kapiyerdihan nga iya madala basi sobra pa ang hatag sa pagpainutil. Sa ano man nga hitabo, ang maayo nga Manunubos naghatag sang mas malig-on pa nga panawag sang sa aton pag-ugyon sa Iya sa pagpamag-an sining mabug-at nga palas-anon sang mga tawo. Bilang si Heyoba, Siya nagsiling nga Iya pamatbatan sing mapintas ang balay ni Israel bangud ”ang pagkabutang sang [nagakinahanglan] yara sa inyo mga balay.”

”Ano ang imo buót silingon,” Siya nagtuaw, ”nga inyo ginabakol ang akon mga tawo, kag ginagaling ang mga nawong sang mga pobre?”⁴

Ang manunulat sang Proverbs tudok nga nagpaathag sining bagay:”Siya nga nagalupig sa mga imol nagabasol sa Iya Manugtuga, ”kag kon sin-o man ang nagapabungol sa mga panawag sang mga imol ... magpanawag [man], apang siya indi pagpamatian.”⁵

Sa aton panahon, ang ginpanumbalik nga Simbahan ni JesuCristo indi pa nakaabot sang iya isa ka tuig nga anibersaryo sang ang Ginuo nagmando sa iya mga miyembro nga ”atipanon ninyo ang mga imol kag ... mga nagakinahanglanon, kag tabangan sila agud nga sila indi mag-antus.”⁶ Talupangda ninyo ang nagamando nga tono sinang ginahambal”sila indimag-antus.” Ina ang linggwahe nga ginagamit sang Diyos kon Siya seryoso sa Iya ginapahimo.

Sa ginhatag nga kabudlay sang panghangkat sa pag-atubang sa kalautan sang kalibutan, ano ayhan ang mahimo sang isa ka lalaki ukon babaye? Ang Manunudlo mismo nga si JesuCristo naghatag sang isa ka panabat. Sang, bag-o matabo ang pagluib sa Iya kag ang Paglansang sa Krus, si Mary naghaplas sang malahalon nga lana sa ulo ni Jesus, si Judas Escariot nagpamatok sa sining paggasto kag ”nagreklamo batok sa iya.”⁷

Si Jesus nagsiling,:”Ngaa ginatublag mo siya? Siya naghimo sing maayo. ...

”Ngaa ginatublag mo siya? Siya naghimo sing maayo nga buluhaton. …

”Siya naghimo sang iya masarangan.”⁸

”Siya naghimo sang iya masarangan!” Daw ano ka malip-ot kag pat-od nga talaksan! Ang isa ka mamantala nagpamangkot kay Mother Teresa sang Calcutta sang isa ka tion nahanungod sa iya walay pag-asa nga obra sa pagtabang sa mga makaluluoy sa siyudad. Nagsiling ang mamantala nga sa halambalon sang estadistika, ang iya obra sa pinakamatuod walay pulos. Ining talagsahon nga diutay nga babaye nagsabat sing masakit nga ang iya trabaho amó ang nahanungod sa paghigugma, kag indi sa estadistika. Bisan pa sinang kasobrahan sang kadam-an nga labaw pa sa iya ikasarang nga mabuligan, siya nagsiling nga mahimo niya matuman ang sugo nga maghigugma sa Diyos kag kasilingan paagi sa pag-alagad sa yadtong iya maabót upód sang mga pambulig nga ara sa iya. ”Ang aton ginahimo masyado ka diutay nga daw isa lang ka tulò sang tubig sa dagat,” ang iya ginsiling sa iban pa nga tion. ”Apang kon indi naton ini himuon, ang aton ginahimo, mas nakulangan sang [isa pa ka tulò ang ini].”⁹ Sing masinulub-on, ang reporter nagtapos nga ang Pagka-Kristyano maathag nga indi buluhaton nga pang-estadistika. Siya nagpanginrason nga kon may mas dako pa nga kalipay sa langit sa isa ka makasasalà nga naghinulsol sang sa siyam ka napulo kag siyam nga indi nagkinahanglan nga maghinulsol, gani maathag nga ang Diyos indi sobra nga nagakabalaka sa mga porsiyento.¹⁰

Gani paano kita ”maghimo sa aton masarangan?”

Kay man isa ka butang, kitá mahimo, katulad sang ginsiling ni King Benjamin, indi pag-idingot ang aton kasarangan bangud nakit-àn naton nga ang mga imol ang mismo nagadala sang ila kaimolon sa ila kaugalingon. Ayhan ang iban nagahimo sang ila kaugalingon nga mga kabudlayan, apang indi balá nga tanan kitá nagahimo kasubong sina nga eksakto gid? Ina balá kon ngaa ang maluluy-on nga pinunò nagapamangkot, ”Indi balá nga tanan kitá mga manugpakilimos?”¹¹ Indi balá nga tanan kitá nagapanawag sang bulig kag paglaum kag mga sabat sa aton mga pangamuyo? Indi balá nga tanan kitá nagapakitluoy sang pagpatawad sa aton mga kasal-anan nga nahimo kag mga kagamuhan nga kita ang gintunaan? Indi balá nga kitá nagapakitluoy nga balusan sang grasya ang aton mga kahuyangan, nga ang kaluoy sa aton magmadinalag-on labaw sa hustisya sa pinakakubos sa aton kahimtangan? Daw makatilingala, gani, nga si Haring Benjamin nagasiling nga kitá makabaton sang pagtubos para sa aton mga salâ paagi sa pag-ampo sa Diyos, nga maluluy-on nga nagasabat, apang kitá nagahupot sang pagtubos sang aton mga salâ paagi sa maluluy-on nga pagbulig sa mga imol nga naga-ampo sa aton.¹²

Dugang pa sa maluluy-on nga buhat para sa ila, dapat kitá magpangamuyo sa yadtong nagakinahanglan. Ang hubon sang mga Zoramite, nga ginkabig sang ila kaparehong miyembro sang katilingban nga ”[mahigko]” kag ”walay pulos” ina mga pulong sa balaan kasulatannga ginpaggwa sa ila mga simbahan ”bangud sang kabaraghal sang ila [ginasuksok]nga panapton.”Sila, siling ni Mormon,”imol sila bahin sa mga butang sang kalibutan; kag amó man ... kubos sila sa tagipusuon”¹³—duha ka mga kahimtangan nga pareho nga nagaupdanay sing padayon. Ang magkaupod nga mga misyonero nga si Alma kag si Amulek nagpamalabag sa sining makahuluya nga pagsikway sa mga gubaton sa pamistihon nga mga miyembro paagi sa pagsiling sa ila nga kon ano man ang mga pribelihiyo sang iban nga ginadingot sa ila, sila padayon nga makapangamuyosa ila mga talamnanan kag sa ila mga puluy-an, sa ila mga panimalay kag sa ila mga tagipusuon.¹⁴

Apang karon, sa sini mismong hubon nga sa ila mga kaugalingon ginsikway, si Amulek nagasiling, ”Pagkatapos nga [kamo] maka [pangamuyo], kon [inyo] talikdan ang mga nagakinahanglan, kag ang mga hublas, kag indi ninyo pagduawon ang mga masakiton kag ang mga nalisdan, kag makigbahin sang inyo kabuhian, kon may [inyo] kamo [sini], sa sadtong mga nagakinahanglanginasiling ko sa inyo, ... ang inyo pangamuyo walâ sing kapuslanan, kag walâ kamo sing makuha, kag [kamo] subong sang mga salimpapaw nga nagpanghiwalâ sang pagtuo.”¹⁵ Daw ano ka talagsahon nga pagpahanumdom nga manggaranon ukon imol, dapat kitá ”maghimo sang aton masarangan” kon ang iban nagakinahanglan.

Karon, basi ako butangbutangan ninyo nga nagapanugyan sang magastuson nga pangkalibutan kag pangkatilingban nga mga padihot ukon nagasakdag sang pagpakilimos nga isa ka nagapauswag nga kabuhian, ako nagapamat-od liwat sa inyo nga ako may pagtahod sa mga prinsipyo sang kapisan, pagkinot, pagsalig sa kaugalingon, kag paghandom nga pareho kabakod sang inang iya sang sin-o man nga buhi nga lalaki ukon babaye. Kitá padayon nga ginapaabot nga magbulig sa aton mga kaugalingon bag-o kitá magpangità sang bulig sang iban. Dugang pa, indi ako nakahibalo sing eksakto kon paano ang kada isa sa inyo nagatuman sang inyo katungdanan sa yadtong may mga kawalaan ukon sa mga padayon nga indi makabulig sang ila mga kaugalingon. Pero nahibal-an ko nga ang Diyos nakahibalo, kag Siya magbulig sa inyo kag magtuytoy sa inyo maluluy-on nga mga buluhaton sang pagkasumulunod kon kamo mahimulaton nga nagakaluyag kag nagapangamuyo kag nagapangità sang mga paagi nga magtuman sang isa ka sugo nga ginahatag sa aton paliwat-liwat.

Matalupangdan ninyo nga ako nagahambal diri sang mabudlay nga pangkatilingban nga mga kinahanglanon nga indi lang para sa mga miyembro sang Simbahan. Sa maayo nga kapalaran ang paagi sang Ginuo sa pagbulig sa mga aton mas mahapos: ang tanan nga makasarang sa lawas nga magtuman sang layi sang pagpuasa. Si Isaiah nagsulat:

”Indi balá ini ang puasa nga akon ginpili? ...

”Indi balá nga ini amó ang paghatag sang tinapay sa ginagutom, kag amó nga dalhon ninyo sa inyo puluy-an ang imol nga ginasikway? kon makità ninyo ang hublas, nga siya inyo pabayuan ...? [nga kamo] magpamag-an sang iya mga palas-anon, kag ... hilwayon ang ginadaug-daug … ?”¹⁶

Ako nagapamatuod sang mga milagro, sa espirituhanon pareho sa kalibutanon, nga nagaabot sa yadtong nagatuman sang layi sang puasa. Ako nagapamatuod sang mga milagro nga nag-abot sa akon. Sa katunayan, katulad sang ginsulat ni Isaiah, ako nagpanawag sa pagpuasa mas sobra sa isa ka bes, kag sa kamatuoran ang Diyos nagsabat, ”Yari ako.”¹⁷ Mahalon ninyo inang sagrado nga pribelihiyo sa kakubusan sang kada bulan, kag mangin maalwan kamo sa inyo mga kahimtangan sa inyo halad sang puasa kag iban pa nga mga pangtabang sa katawhan, pang-eskuwela, kag pangmisyonero nga mga amot. Ako nagapanaad nga ang Diyos mangin maalwan sa inyo, kag sa yadtong nakaagom sang panabang sa inyo kamot magtawag sa inyo nga bulahan sa katubtuban. Sobra sa tatlo ka parte sang apat ka milyon nga miyembro sang Simbahan ang ginbuligan sang nagligad nga tuig paagi sa mga halad sang puasa nga gindumalahan sang dedikado nga mga bishop kag mga presidente sang Relief Society. Ina madamo nga mga Santos sa Ulihing mga Adlaw nga nagapasalamat.

Mga kauturan, inang isa ka wali nagamando nga ako magkilala sang akon indi takos, indi dapat, walay katapusan nga mga bugay sa akon kabuhi, kalibutanon kaupod sang espirituhanon. Katulad sa inyo, may tion nga ako nagkabalaka man sang mga butang nga natuhoy sa kuwarta, apang ako indi gid nangin kubos, ukon nakahibalo kon ano ayhan ang ginabatyag sang mga imol. Sa dugang pa, indi ako nakahibalo sang mga rason kon ngaa ang mga kahimtangan sang pagkatawo, kaayuhan sang lawas, pang-edukasyon, kag pangkabuhian nga mga kahigayunan malayo nga nagalain-lain diri sa kalibutan, apang kon makità ko ang pagkinahanglan sang kadamuan, nakahibalo ako nga ”dira sa grasya sang Diyos ako nagalakat.”¹⁸ Nakahibalo man ako bisan pa nga daw indi ako manugtatap sang akon utod, ako amó ang utod sang utod, kag ”bangud ako ginhatagan sang madamo, ako dapat man maghatag.”¹⁹

Bangud sina, ako nagapadungog sing personal kay Presidente Thomas Spencer Monson. Ako ginbugayan nga magpakig-upod sa sining tawo sa 47 ka tuig na, kag ang iya dagway nag akon mahalon tubtob nga ako magtaliwan amó ang iya pagpauli sa eroplano halin sa iya pangbalay nga mga tsinelas halin sa gingub-an sang kinabuhian nga East Germany bangud iya ginhatag indi lang ang iya ikaduha nga terno nga panapton kag ekstra nga mga kamisadentro kundi ang iya mismo mga sapatos halin sa iya mga tiil. ”Daw ano katahom sa ibabaw sang mga bukid [kag paglaton-laton sa estasyon sang eroplano] ang mga tiil niya nga nagadala sang maayong mga balita, nga nagatalastas sang paghidaet.”²⁰ Labaw sa tanan nga tawo nga akon nakilala, Si Presidente Monson padayon nga ”nagahimo sang iya masarangan,” para sa mga balo kag mga ilo sa amay, sa mga imol kag sa mga ginakulangan.

Sa isa ka bugna sang 1831 sa Propeta nga si Joseph Smith, ang Ginuo nagsiling nga ang mga imol sa palaabuton makaagom sang paghatag sa ila sang ginharian sang Diyos ”sa gahum kag sa daku nga himaya.”²¹ Kabay pa nga kitá makabulig sa pagtuman sinang panagna paagi sa pagkadto sa gahum kag himaya sang aton pagkamiyembro sa matuod nga Simbahan ni JesuCristo sa paghimo sang aton masarangan sa paghilway sa kon sin-o man sang aton masarangan halin sa kaimulon nga nagapugos sa ila kag nagaguba sang kadamuan sang ila mga handum, ako nagapangamuyo sa maluluy-on nga ngalan ni JesuCristo, amen.