”Ginuo, Ako Balá”
Ni Presidente Dieter F. Uchtdorf
Ikaduhang Manuglaygay sa Unang Pangulohan
Dapat naton kalimtan ang aton bugal, magtan-aw lapaw sa aton kahambugan, kag mapainubuson nga mamangkot, “Ginuo, ako balá?”
Yadto amó ang katapusan nga gab-i sang aton pinalangga nga Manluluwas sa kalibutan, bag-o Siya maghalad sang Iya Kaugalingon nga isa ka pangtubos sa katawhan. Samtang Siya nagpihak-pihak sang tinapay kaupod sa Iya mga apostoles, Siya nagsiling sa isa ka butang nga daw sa nagpunô sang ila tagipusuon sang daku nga kakugmat kag madalom nga kasubo. ”Ang isa sa inyo magluib sa akon,” Siya nagsiling sa Ila.
Ang mga apostoles indi nagpamangkot sang kamatuoran sang Iya ginsiling. Ukon sila naghulonghulong sa palibot, kag nagtudlo sa isa, kag nagpamangkot, ”Siya balá?”
Sa tigaylo, sila nangin ”nasobrahan sa kasulub-on, kag nag-umpisa ang kada isa sa ila sa pagsiling sa iya, Ginuo, ako balá?”1
Natingala ako kon ano ang buhaton sang tagsa sa aton kon kitá pamangkuton sinang pamangkot sang Ginuo. Maghulonghulong ayhan kitá sa palibot naton kag magpamangkot sa aton mga tagipusuon,”Seguro siya nagatuhoy kay Brother Johnson. Daw pirme ako nga nagaduhaduha nahanungod sa iya,” ukon ”Nalipay ako nga si Brother Brown diri subong. Tunay nga dapat niya mabatian ining mensahe.” Ukon kitá, katulad sang dumaan nga mga apostoles, magtulok sa aton tagipusuon kag mamangkot sinang nagatudok nga pamangkot: ”Ako balá?”
Sa sining yanong mga pulong, ”Ginuo, ako balá?” nagaangot ang kaalam kag ang alagyan sa personal nga pagbalik sa Diyos kag nagapadayon nga pagbag-o.
Ang Parabola sang Bulak nga mga Dandelion
Sang una nga tiyempo may isa ka tawo nga naluyag maglakat sa mga kagab-ihon sa palibot sang iya kasilinganan. Siya pinatuhay nga nakunyag nga mag-agi sa balay sang iya kasilingan. Ining kasilingan padayon nga nagahupot sang matahum kag himpit nga nautdan nga hilamnan, ang mga bulak pirme nagabukadkad, ang mga kakahuyan malambo kag mahandong. Ini makità nga inang kasilingan naggamit sang tanan nga kabudlay sa pag-angkon sang matahom nga hilamnan.
Pero sang isa ka adlaw samtang ang tawo nag-agi sa balay sang iya kasilingan, natalupangdan niya sa tunga sining matahom nga hilamnan isa ka, higante, dalag nga hilamon sang dandelion.
Ini makità nga walâ sa lugar gani siya nakibot. Ngaa indi ini gingabot sang iya kasilingan?” Indi balá niya makità ini? Indi balá niya nahibal-an nga ang dandelion makahulog sang mga liso nga magpatubò sang dugang pa nga mga hilamon sini?
Ang solo nga dandelion nagtublag sa iya sing walay tupong nga paglarawan, kag gingusto niya nga maghimo sang isa ka butang tuhoy diri. Ayhan iya ini gabuton? Ukon bombahan sang tagpatay sang hilamon? Ayhan siya sekreto nga magkadto sa kagab-ihon, kag gabuton ini.
Ining mga panghunahuna bug-os nga nagsakop sang iya isip samtang siya nagalakat pakadto sa iya puluy-an. Siya nagsulod sa iya balay nga indi man lamang nagpasiplat sa iya mismo atubang nga lagwertanga gintabunan sang ginatos nga dalag nga mga dandelion.
Mga Tablon kag Mga Mota
Ang ining sugilanon nagapahanumdom balá sa inyo sang mga pulong sang Manluluwas?
”Ngaa nga ginahimutaran mo ang mota nga yara sa mata sang imo isigkatawo, apang indi mo ginasapak ang sa imo mga mata nga daw tablon kadako? …
”... Una kuhaa anay ang mota sa imo mata nga daw tablon ka dako; kag pagkatapos maathag nga kuhaon mo ang mota nga gamay sa mata sang imo isigkatawo.”2
Ang istorya sang mga tablon kag mga mota daw malapit nga nagaangot sa aton kapaslawan nga makità sing maathag ang aton mismo mga kaugalingon. Indi ako segurado kon ngaa kitá sarang nga magsayasat kag maayo nga magpanugyan sang mga pangbulong sa mga balatian sang iban nga mga tawo, samtang masunson nga kitá nabudlayan nga makità ang aton.
Sang nagligad nga mga tinuig may yadtong balitang istorya nahanungod sa isa ka tawo nga nagpati nga kon ihaplosan niya sang limon ang iya nawong, siya indi makit-an sang mga kamera. Gani ginhaplosan niya sang limon ang iya bilog nga guya, naggwa, kag ginkawatan ang duha ka mga bangko. Walâ madugayan siya gindakop sang ang iya larawan ginwaragwag sa panggab-i nga mga balita. Sang ang polis nagpakità sa tawo sang mga bideyo sang iya kaugalingon halin sa mga kamera sang bideyo, daw indi siya magpati sa iya nakità. ”Pero ginhaplosan ko sang limon ang akon nawong!” ang iya pamatok.3
Sang ang isa ka siyentipiko sa Cornell University nakabatî sining istorya, siya nabihag sa istorya nga ang isa ka tawo masakit nga indi nakatalupangod sang iya kakulangan. Sa pagpat-od kon ini isa ka ordinaryo nga problema, ang duha ka manugsayasat nag-imbita sa mga estudyante sa kolehiyo nga maghimbon sa nagadason-dason nga mga pagprobar sa lain-lain nga mga abilidad kag pagkatapos ginpatakos sa ila ang ila inagihan. Ang mga estudyante nga indi maayo nga nagtapos amó ang may pinakakubos nga kahustuhan sa pagtakos sang ila mga nahimoang iban sa ila nagtantiya sang ila mga skor nga 5 ka beses nga mas mataas sang sa katunayan.4
Ining pagprobar ginkopya sa madamo nga mga paagi, nga nagpamat-od paliwat-liwat sang pareho nga resulta: ang kadamuan sa aton nabudlayan nga magtan-aw sa aton mga kaugalingon sa katunayan sang kon sin-o gid kitá, kag bisan pa ang mga madinalag-on nga mga tawo palapaw nga nagatantiya sang ila mga ginahatag kag nagatantiya sing kubos sa mga ginahatag sang iban.5
Ayhan daw indi ini importante nga lapaw nga maghaumhaum kon paano kita nagamaneho sang kotse ukon daw ano ka layô ang aton pagpalupad sinang bola sang golp. Pero kon kitá mag-umpisa nga magpati nga ang aton mga panghatag sa puluy-an, sa trabaho, kag sa simbahan mas lapaw pa sang sa katunayan, kitá nabulagan sa aton mga kaugalingon sa mga bugay kag mga kahigayunan nga magbag-o ang aton mga kaugalingon sa importante kag tudok nga mga paagi.
Espirituhanon nga Di-makit-an nga mga Marka
Ang isa ka ko kakilala nagpuyô sang una sa isa ka ward nga may pinakataas nga estadistika sa Simbahanang pagtambong mataas, ang numero sang home teaching mataas, ang mga kabataan sa Primary mabuot, ang mga panyapon sa ward nagalakip sang mga manamit nga mga pagkaon nga sa diin ang mga miyembro talagsa nga nagahulog sang pagkaon sa salog sang balay-mitingan, kag ako nagahunahuna nga walâ gid sing mga pagbaisay sa mga bayle sa Simbahan.
Ang akon abyan kag ang iya asawa sang masunod gintawag nga magmisyon. Sang sila nagbalik pagkatapos sang tatlo ka tuig, ining mag-asawa natingala sang mahibal-an nga samtang sila walâ didto, 11 ka mga pag-asawahay nagtapos sa diborsyo.
Bisan pa nga ang ward sa gwa may madamo nga pagpakità sang pagkamatinuohon kag kabakod, may isa ka dimalas nga hitabo sa mga tagipusuon kag mga kabuhi sang mga miyembro. Kag ang magarot nga butang sa sining sitwasyon indi pinasahi. Inang makahaladlok kag masunson di-kinahanglan nga mga butang nagakatabo kon ang mga miyembro sang Simbahan nagapalayo sa mga prinsipyo sang ebanghelyo. Makità sila sa gwa nga daw sumulunod ni JesuCristo, apang sa sulod ang ila mga tagipusuon nagabulag sa ila Manluluwas kag sa Iya mga panudlo. Sila amat-amat nga nagbiya sa mga butang sang Espiritu kag nagpadulong sa mga butang sang kalibutan.
Ang takos sang una nga mga tagkapot sang priesthood nag-umpisa sa paghambal sa ila mga kaugalingon nga ang Simbahan maayo sa mga babaye kag mga kabataan apang indi sa ila. Ukon ang iban nagapati nga ang ila masako nga mga hilimuon ukon pinasahi nga mga kahimtangan nagalibre sa ila sa pang-adlaw-adlaw nga buluhaton sang pagtuo kag pag-alagad nga magpalapit sa ila sa Espiritu. Sa sining panahon sa pagkamatarungan sa kaugalingon kag kahambugan sa kaugalingon, mahapos nga magpahito sang mga pagpasaylo sang ila indi pagpangamuyo sa Diyos, pagpatumbaya sang ila pagtuon sa balaan nga mga kasulatan, paglikaw sa mga miting sang Simbahan kag mga family home evening, ukon pagbayad sang tampad nga ikapulo kag mga amot.
Pinalangga ko nga mga kauturan, puwede balá nga magtulok kamo sa sulod sang inyo mga tagipusuon kag mamangkot sang simple nga pamangkot: “Ginuo, ako balá?”
Kamo balá nagbuhibisan diutayhalin sa ”ang ... ebanghelyo sang bulahan nga Diyos, nga gintugyan sa [inyo] sing may pagsalig?”6 Gintugutan balá ninyo ”ang diyos sining kalibutan” nga magtapna sa inyo sa pagsunod sa ”kasanag sang mahimayaon nga ebanghelyo ni Cristo?”7
Pinalangga ko nga mga kaabyanan, pinalangga ko nga mga kauturan, pamangkuta ninyo ang inyo mga kaugalingon, ”Diin ang akon manggad?
Ang inyo balá tagipusuon nahamtang sa mahapos nga mga butang sining kalibutan, ukon natumod sa mga panudlo sang maukod nga si JesuCristo? ”Kay kon diin man ang inyo manggad, dira man ang inyo tagipusuon.”8
Ang Espiritu sang Diyos ayhan nagatudok sa inyo mga tagipusuon? Kamo balá ”nagapanggamot” kag ”malig-on” sa paghigugma sa Diyos kag sa inyo isigkatawo? Nagahalad balá kamo sang bastante nga panahon kag paghimo sa pagdala sang kalipayan sa inyo pag-asawahay kag panimalay? Nagahatag balá kamo sang inyo mga kabudlay sa pinakamataas nga tuyò sa paghangop kag pagtuman ”sa kalapad, kag kalaba, kag kadalom, kag kataas”9 sang ginpanumbalik nga ebanghelyo ni JesuCristo?
Mga kauturan, kon ini ang inyo dako nga handom nga magpatubò sang Kristohanon nga mga ugali sang pagtuo, kaayuhan, ihibalo, pagpugong, pagpailub, pangkauturan nga paghigugma, pagkadiyosnon, kaluoy, pagkamainumuron [kag pag-alagad],”10ang Langitnon nga Amay maghimo sa inyo nga isa ka instrumento sa Iya mga kamot para sa kaluwasan sang madamo nga mga kalag.11
Ang Kabuhi nga Ginsayasat
Mga kauturan, walâ sa aton sing luyag nga mag-akò kon kitá nagaliw-as sa husto nga dalan. Masunson nagaisip kitá sa paglikaw nga magtulok sa kaibuturan sang aton mga tagipusuon kag mag-atubang sang aton mga kahuyangan, mga kakulangan, kag mga kahadlok. Sa hingapusan, kon kitá magsiyasat sa aton mga kabuhi, nagatulok kitá sa salaan sang mga pahilig, mga pagpasaylo, kag mga sugilanon nga ginahambal sa aton kaugalingon sa pagpanginrason sa indi takos nga mga panghunahuna kag mga hinimuan.
Pero ang ikasarang nga makità ang aton mga kaugalingon sing maathag kinahanglan sa aton espirituhanon nga pagtubò kag kaayuhan. Kon ang aton mga kahuyangan kag mga kakulangan ginatago, gani ang pangtubos nga gahum sang Manluluwas indi makapaayo sa ila kag maghatag sang mga kabakod.12 Sa tigaylo, ang aton kabulagan sa aton mga tawhanon nga mga kahuyangan magpabulág man sa aton sa balaan nga ikasarang nga ang aton Amay nagahandum nga sagudon naton sa aton kaidadalman.
Gani paano kitá makagamit sang puro nga kamatuoran sang Diyos sa aton mga kalag kag makità ang aton mga kaugalingon sa Iya pagkakità sa aton?
Mahimo ako magpanugyan nga ang balaan nga mga kasulatan kag mga pamulongpulong nga ginahatag sa pangkabilogan nga konperensya amó ang epektibo nga mga prinsipyo nga aton magamit sa pagsayasat sang aton kaugalingon.
Samtang kamo nagapamati ukon nagabasa sang mga pulong sang dumaan kag moderno nga mga propeta, mag-untat kamo sa pag-isip kon paano ang mga pulong idapat sa iban kag simple nga magpamangkot: ”Ginuo, ako balá?”
Dapat kitá magpalapit sa aton Walay Katapusan nga Amay sing mapainubuson mga tagipusuon kag mga hunahuna nga matudloan. Dapat kitá buót nga magtuon kag magbag-o. Kag siyempre, kon daw ano ang aton maangkon sa pagtuman nga magkabuhi sang kabuhi nga ginaplano sang Langitnon nga Amay para sa aton.
Ang mga yadtong indi luyag nga magtuon kag magbag-o basi balá indi gid kag seguro magsugod nga maghunahuna kon balá ang Simbahan may kon ano nga mahatag sa ila.
Apang ang yadtong sin-o nga luyag magbag-o kag mag-uswag, yadtong mga nakahibalo sa Manluluwas kag nagahandum nga mangin katulad Niya, ang yadtong mga nagapaumod sang ila mga kaugalingon nga daw diutay nga batà kag nagatinguha nga magdala sang ila mga hunahuna kag mga binuhatan sa pagbagay sa aton Amay sa Langitsila makaeksperyensya sang milagro sang Pagpasag-uli sang Manluluwas. Pat-od nga sila makabatyag sang nagasiga nga Espiritu sang Diyos. Sila makatilaw sang di-mapaathag nga kalipay nga bunga sang isa ka mabuot kag mapainubuson nga tagipusuon. Sila bugayan sang handom kag disiplina nga mangin tunay nga mga sumulunod ni JesuCristo.
Ang Gahum sang Kaayo
Sa sulod sang akon kabuhi, ako may mga kahigayunan nga makakilala sang pinakamakinaadmanon kag pinakamaalam nga mga lalaki kag babaye nga mahatag sining kalibutan, Sang ako lamharon pa, ako naimpluhensya sang yadtong mga edukado, mga sampaton, mga madinalag-on, kag mga ginapadunggan sang kalibutan. Pero sa sulod sang mga panahon, ako nakamarasmas nga mas labi ako nga naimpluhensya sang yadtong mga halangdon kag mga bulahan nga mga kalag nga tunay nga maayo kag walâ sing limbong.
Kag indi balá nga amó ina tanan ang ebanghelyo kag kon ano ang ginahimo sini sa aton? Ini amó ang maayong balita, kag nagabulig sa aton nga mangin maayo.
Ang mga pulong ni James nga Apostol nagakadapat sa aton subóng:
”Ang Diyos nagasumpo sa mga bugalon, apang Siya nagakaluoy sa mga mapainubuson. ...
Magpaubós kamo sa atubang sang Ginuo, kag iya kamo padunggan.”13
Mga kauturan, dapat naton kalimtan ang aton bugal, magtan-aw lapaw sa aton kahambugan, kag mapainubuson nga mamangkot, ”Ginuo, ako balá?”
Kag kon ang sabat matabô nga ”Huo, akon lalaking anak, may yara nga mga butang nga dapat mo bag-uhon, mga butang nga ako makabulig nga imo malutos,” Ako nagapangamuyo nga aton batunon ining sabat, mapaibuson nga kilalahon ang aton mga salâ kag mga kakulangan, kag bag-uhon ang aton mga ugali paagi sa pagmangin labing maayo nga mga bana, labing maayo nga mga amay, labing maayo nga mga batang lalaki. Kabay pa nga halin sining oras kag sa palaabuton magtinguha kitá nga maglakat sing malig-on sa bulahan nga dalan sang Manluluwaskay man ang maathag nga pagtan-aw sa aton mga kaugalingon amó ang ginahalinan sang kaalam.
Samtang ginahimo naton ini, ang maalwan nga Diyos magtuytoy sang aton kamot; ”mapabakod kitá, kag panginbulahan sa kahitaasan.”14
Pinalangga ko nga mga kaabyanan, ang una nga tikang sa sining halangdon kag madinalag-on nga dalan sang pagkasumulunod naga-umpisa sa aton pagpamangkot sang simple nga pamangkot:
”Ginuo, ako balá?”
Sa sini ako nagapamatuod kag ako nagabilin sang akon pagpakamaayo sa ngalan ni JesuCristo, amen.