”Huo, Ginuo, Magsunod Ako Sa Imo”

Ni Elder Eduardo Gavarret

Sang Kapituan

Ang Ginuo nagaimbita sa aton sa paggamit sang lainlain nga mga likga: ”Magpalapit kamo sa akon,” ”Magsunod kamo sa akon.” ”Maglakat kamo upód sa akon.” Sa kada kahimtangan ini isa ka pag-imbita nga maghimo.

”Gani yari karon, ang Ginuo nagahatag sa tanan nga kapungsuran, sa ila kaugalingon nga pungsod kag hinambalan, nga magtudlo sang iya pulong.”¹ Subóng ining balaan nga kasulatan natuman liwat samtang ako ginhatagan sining kahigayunan nga makapahayag sang akon mga balatyagon sa akon natawhan nga hinambalan.

Yadto tuig nga 1975, sang ako nag-alagad nga misyonero sa Uruguay-Paraguay Misyon nga isa ka lamharon nga misyonero. Sa sulod sang nahauna nga bulan, ang mga lider sang sona naghiwat sang isa ka buluhaton sa pagpakità sang isa ka prinsipyo sang ebanghelyo. Ang tagsa ka misyonero sa sona gintabunan sa mata, kag ginsilingan nga kami magsunod sa alagyan nga nagapadulong sa cultural hall. Dapat kami magsunod sa tingog sang isa ka pinili nga lider, ang tingog nga amon nabatian bag-o kami mag-umpisa nga maglakat. Pero kami ginpaandaman nga sa sulod sang panglakaton, kami makabatî sang madamo nga mga tingog nga magtilaw sa pagpasalangisag sa amon kag magpatalang halin sa alagyan.

Pagkatapos sang pila ka minutos nga mabatian ang mga gahud, paghambal, kag sa katung-an sini tananang tingog nga nagsiling,”Magsunod kamo sa akon,” nagbatyag ako sang pagsalig nga ako nagasunod sa husto nga tingog. Sang amon pag-abot sa cultural hall sang kapilya, kami ginsilingan nga hukson ang mga tabon sang amon mata. Sang nahimo ko ini, natalupangdan ko nga may yadto nga duha ka grupo kag ako didto sa grupo nga nagsunod sa salâ nga tingog. ”Yadto daw pareho kaayo sang tingog nga husto,” ang siling ko sa akon kaugalingon.

Yadtong eksperyensya sang 39 ka tuig na ang nagligad, may padayon nga epekto sa akon. Ginsiling ko sa akon kaugalingon, ”Indi gid kutob kon san-o liwat nga ako magsunod sa salâ nga tingog.” Pagkatapos nagsiling ako sa akon kaugalingon,”Huo, Ginuo, magsunod ako sa Imo.”

Luyag ko magpaambit sining inagihan kaupod sang malulo nga imbitasyon sang Manluluwas sa aton:

”Ako ang maayo nga manugbantay sang karnero, kag nakilala ko ang akon mga karnero. …

”Ang akon mga karnero nagapamati sa akon, kag kilala ko sila, kag sila nagasunod sa akon.” ²

Ang imbitasyon nga ”magsunod sa Iya” isa ka pinakasimple, direkta, kag gamhanan nga imbitasyon nga aton mabaton. Ini nagahalín sa maathag nga tingog nga indi nagapasalangisag.

Ang Ginuo nagaimbita sa aton nga nagagamit sang lainlain nga mga likga: ”Magpalapit kamo sa akon,” ”Magsunod kamo sa akon,” ”Maglakat kamo upód sa akon.” Sa kada sitwasyon indi ini mahuyang nga pangagda; ini isa ka pangagda nga maghimo. Ini ginahambal sa tanan nga katawhan sang isa nga amó ang Propeta sang mga propeta, ang Manunudlo sang mga manunudlo, kag Anak sang Diyos, ang Mesiya.

Ang imbitasyon nga ”Magpalapit kamo sa Akon”

”Magpalapit kamo sa akon, tanan kamo nga ginabudlayan kag ginabug-atan, kag papahuwayon ko kamo.”³

Kamo nga indi pa mga miyembro sang Simbahan magbaton sining imbitasyon paagi sa tingog sang mga misyonero upód ang mga pulong, ”Magbasa balá kamo sang Libro ni Mormon? Magpangamuyo balá kamo? Magtambong balá kamo sa Simbahan? Magsunod balá kamo sa ehemplo ni JesuCristo kag magpabunyag paagi sa yadtong may mga awtoridad?”⁴ Paano ninyo sabton ining imbitasyon subóng?⁵

Nagaimbita ako sa inyo nag magpamati kag magbaton sang mensahe sa pagsiling, ”Huo, Ginuo, magsunod ako sa Imo!”

Si Carlos Badiola kag ang iya panimalay, sa Minas, Uruguay, manugpakigkità sa mga misyonero. Kay man ang mga elders nagpamangkot sang madamo sa tion sang ila mga leksyon, sila nagpamatbat nga mag-imbita sa isa ka di-miyembro nga kasilinganisa ka matahom nga 14-ka-tuig nga dalagita nga si Normanga magbulig sa pagsabat. Si Norma isa ka dedikado nga estudyante sang hayskul nga nagatuon sang Bibliya sa eskuwelahan sinang tuig, gani sang ang mga misyonero nagpamangkot sang isa ka pamangkot, si Norma ang nagsabat. Siya ”bulawan nga manugsiyasat.” Ang leksyon sina nga adlaw natuhoy sa Pulong sang Kaalam.

Sang siya nagpauli pagkatapos sang leksyon sa mga misyonero, si Norma nakahibalo kon ano ang iya dapat himuon. Nagsiling siya sa iya iloy, ”Nanay, halin subong walâ na sing kape nga may gatas para sa akon. Gatas na lang.” Inang sabat isa ka nagapakità nga pagkilala sa iya handum sa pagbaton sang imbitasyon nga magsunod kay Cristo, sa pangagda sang mga misyonero.

Si Carlos Badiola kag si Norma pareho nga ginbunyagan. Sang ulihi, sa pagsunod sa ehemplo ni Norma, ang iya iloy, amay, kag mga utod ginbunyagan man. Si Norma kag ako ululupod nga nagdaku sa sinang diutay pero gamhanan nga branch. Sang ulihi, sang pagbalik ko matapos ang akon misyon, kami ginkasal. Dalayon nga nahibal-an ko nga mahapos ang pagsunod sa Manluluwas nga kaupod siya sa akon luyo.

Ang isa nga isa ka miyembro sang Simbahan kag nagbaton sining imbitasyon nagabag-o sang pagtuman sa kada simana sa pag-ambit sang sakramento.⁶ Ang bahin sinang pagsunod nagalakip sang pagtuman sa mga kasuguan; sa paghimo sini, kamo nagasiling, ”Huo, Ginuo, magsunod ako sa Imo!”⁷

Ang Imbitasyon nga ”Magsunod sa Akon”

”Magsunod sa akon,” amó ang imbitasyon sang Ginuo sa manggaranon nga lamharon nga pinuno . Siya nagtuman sang mga kasuguan sa bilog niya nga kinabuhi. Sang siya mamangkot kon ano pa gid ang dapat niya himuon, siya nakabaton sang sabat nga maathag nga imbitasyon: ”Magpalapit, ... magsunod sa akon.”⁸ Apang, bisan pa nga ang imbitasyon simple, ini may dala nga sakripisyo. Ini nagkinahanglan sang kabudlaynga gin-updan sang pamat-od kag paghimo.

Ang propeta nga si Nephi nagpanugyan sang kaugalingon nga pagbinagbinag sang siya nagpamangkot: ”Kag [si Jesus] nagsiling sa mga anak sang mga tawo: Magsunod kamo sa akon. Gani, pinalangga kong mga kauturan, makasunod balá kitá kay Jesus luwas kon sugot kitá sa pagtuman sang mga kasuguan sang Amay?”⁹

Ang imbitasyon nga ”magpalapit kamo sa Iya,” sa pagpamati sa Iya tingog, kag pagsunod sini amó ang mensahe sang mga misyonero halin sang una, nga nagbulig sa madamo nga magbag-o ang mga kabuhi para sa kaayuhan.

Sang singkuwenta ka tuig ang nagligad ang mga misyonero nagsulod sa reloheriya sang akon amay kag nagbilin sang isa ka relo nga dapat kaayuhon. Katulad sang ginahimo sang maayo nga mga misyonero, sila naghimulos sang kahigayunan nga magpakighambal sa akon amay kag iloy nahanungod sa ebanghelyo. Ang akon amay nagbaton sang mga misyonero, kag akon iloy nagbaton sang mensahe kag imbitasyon nga magsunod kay Cristo. Halin sadto tubtob subong, siya padayon nga aktibo sa Simbahan. Siya nagsiling, ”Huo, Ginuo, magsunod ako sa Imo!”

Samtang kamo nagatinguha nga magpalapit sa Iya, makabaton kamo sang gahum nga makatibawas sa mga kabudlay sang kabuhi, kon balá ini natuhoy ini sa kalawasan ukon sa espiritu, kag makaeksperyensiya kamo sang maayo nga pagbag-o sa tagipusuon nga magbulig sa inyo nga mangin mas malipayon.

Ang Imbitasyon nga ”Maglakat upód sa Akon”

Si Enoch gintawag nga magwali sang ebanghelyo sa mga mabudlay, matig-a sing tagipusuon nga mga tawo. Siya nagbatyag nga walâ siya sing ikasarang. Siya may pangduhaduha kon balá siya makahimo sini. Ang Ginuo nagpakalma sang iya mga pangduhaduha kag nagpabakod sang iya pagtuo paagi sa imbitasyon ”Maglakat kamo upód sa akon”isa ka pangagda nga, katulad sang isa ka baston sang bulag ukon isa ka butkon sang isa ka abyan, makagiya sa mga tikang sang isa nga indi nakapamat-od. Paagi sa pagkapyot sa butkon sang Manluluwas kag upód nga maglakat sa Iya, si Enoch nakadiskubre nga ang iya tikang nangin mapag-on kag siya nangin madinalag-on nga misyonero kag isa ka propeta.¹⁰

Ang pamat-od nga ”magpalapit sa akon” kag ”magsunod sa akon” amó nga personal. Kon kitá nagabaton sining imbitasyon, ang katupong sang aton paghimo ginapataas, kag tungod sini kitá ”maglakat upód sa Iya.” Ining kataas nagapasad sang mas malapit nga kaugnayan sa Manluluwasang bunga sang aton pagbaton sang una nga imbitasyon.

Si Norma kag ako isa kag isa nga nagbaton sang imbitasyon nga ”magpalapit kamo sa akon” kag ”magsunod kamo sa akon.” Gani karon upód sa pagsakdag sa isa kag isa, kami nakahangop nga maglakat upód sa Iya.

Ang kabudlay kag kapat-uran nga magtoltol kag magsunod sa Iya pagadulutan sang mga bugay nga aton ginakinahanglan.

Ina amó ang hitabo sa babaye nga, sa daku nga pagtinguha, nasarangan nga matandog ang panapton sang Manluluwas¹¹ ukon sa kay Bartimaeus, ang bulag nga lalaki, nga sa diin ang iya kapat-uran amó ang importante nga bahin sang milagro nga natabo sa iya kabuhi.¹² Pareho sa duha ka hitabo ginhatag ang isa ka pagpaayo sa lawas kag sa espiritu.

Dab-uta sang inyo mga kamot, tanduga ang Iya panapton, batuna ang Iya imbitasyon, magsiling, ”Huo, Ginuo, magsunod ako sa Imo!”kag maglakat upód sa Iya.

”Magpalapit kamo sa akon,” ”Magsunod kamo sa akon,” ”Maglakat kamo upód sa akon” amó ang mga imbitasyon nga may duna nga gahumsa yadtong mga magbaton sa ilanga nagapabag-o sang inyo kabuhi kag magadala sang isa ka pagpanibag-o sa inyo kaibuturan nga magbangod sa inyo sa pagpahambal, ”[Ako] walâ na sing huyog sa paghimo sing malain, kundi dalayon nga maghimo sing maayo.”¹³

Bilang panggwa nga pagpakità sang pagbag-o, makabatyag kamo sang mabaskog nga handum nga ”magbulig sa mga mahuyang, mag-alsa sa mga kamot nga nagaluyloy, kag magpalig-on sa maluya nga mga tuhod.”¹⁴

”Ano nga mga talaksan ang aton gamiton nga ”maglakat upód sa Iya?”

Inyo tumanon ang handum nga mangin labing maayo gid kamo nga sumulunod ni Cristo.¹⁵
Kamo magpangamuyo para sa sining handum nga ang inyo pagtu-o sa Iya magtubò.¹⁶
Mag-angkon sang ihibalo halin sa balaan nga mga kasulatan, nga nagapasanag sang inyo alagyan kag nagapalig-on sang inyo handum nga magbag-o.¹⁷
Magpamat-od kamo subóng nga adlaw sa paghimo kag pagsiling, ”Huo, Ginuo, magsunod ako sa imo!” Ang pagkahibalo lamang sang kamatuoran indi magpabag-o sang inyo kalibutan luwas nga gamiton ninyo ang ihibalo sa paghimo.¹⁸
Magpadayon kamo sa pamatbat nga inyo ginhimo paagi sa pagtuman sining mga prinsipyo sa adlaw-adlaw nga tanan.¹⁹

Kabay nga ang mga pulong sang aton pinalangga nga propeta, si Presidente Thomas S. Monson, magpalihok sa aton sa paghimo sa aton handum nga magbaton sang imbitasyon sang Manluluwas. Si Presidente Monson nagsiling: ”Sin-o ang Hari sang kahimayaan, ining Ginuo sang mga kasoldaduhan? Siya ang aton Agalon. Siya ang aton Manluluwas. Siya ang Anak sang Diyos. Siya ang Ginhalinan sang aton Kaluwasan. Siya nagaimbita, ’Magsunod kamo sa akon.’ Siya nagatudlo, ’Maglakat kamo, kag himua ninyo ang ginahimo ko.’ Siya tudok nga nagapangabay, ’Sundon ninyo ang akon mga kasuguan.’”²⁰

Kabay pa nga magpat-od kitá sa pagdugang sang aton ikasarang sa pagya-ob kag pagsunod sa Diyos, kag kabay pa nga ang aton sabat sa Iya imbitasyon matunog kag maathag nga mabatian: ”Huo, Ginuo, magsunod ako sa Imo!”²¹ Sa sagrado nga ngalan sang Ginuong JesuCristo, amen.